რძიანი ფაფა

რომელი საუზმეა სასარგებლო და რომელი მავნე: ექიმ-დიეტოლოგების რეკომენდაციები

212
(განახლებულია 18:52 05.12.2019)
ექიმი-დიეტოლოგები გვირჩევენ, რომელი საუზმეა სასარგებლო და რომელი – მავნე, რომელი ფაფა შეიძლება მივირთვათ დილით უზმოზე და რომლისგან ჯობს თავის შეკავება.

თბილისი, 5 დეკემბერი – Sputnik. ექიმი-დიეტოლოგები დილის მენიუს ყველაზე პოპულარულ სახეობებს მიმოიხილავენ და რეკომენდაციებს გასცემენ. სწორედ მათგან შევიტყობთ, რამდენად სასურველია დილით უზმოზე ყავის ან ჩაის დალევა და რომელი კერძებია სასარგებლო.

ექიმები ამბობენ, რომ შემწვარი კვერცხის ქიმიური შემადგენლობა ოდნავ განსხვავდება მოხარშულისგან, რადგან ის ცხიმში იწვება. როგორც კვლევები აჩვენებს, ამ დროს ქოლესტერინი ჭარბ ცხიმთან ერთად შედის კვერცხში, განსაკუთრებით, თუ ის მზადდება კარაქზე, ბეკონთან და სხვა ცხოველურ პროდუქტებთან ერთად, და ამიტომ ის 

არასასურველ გავლენას ახდენს ორგანიზმზე. ასე შემწვარი კვერცხის ჭამა შესაძლებელია კვირაში ერთ-ორჯერ. წინააღმდეგ შემთხვევაში იზრდება ათეროსკლეროზისა და გულ-სისხლძარღვთა დაავადებების განვითარების რისკი. 

სასურველია ომლეტი მომზადდეს პომიდვრითა და მწვანილით. პომიდვრის შემადგენლობაში შემავალ კაროტინოიდებს აქვს ანტიოქსიდანტური მოქმედება. მწვანილის შემადგენლობაში კი შედის დიდი ოდენობით უჯრედისი და მიკროელემენტები, რომლებიც ქოლესტერინის მავნე მოქმედებას ამცირებს.

ყველაზე სასარგებლო ფაფებად დასახელდა შვრიისა და წიწიბურას ფაფები. ცილის დიდი რაოდენობით შემცველობის გამო ეს ლიდერი ფაფებია. წიწიბურაში ცილის ამინომჟავის შემადგენლობა მეტია, ვიდრე მცენარეული წარმოშობის სხვა პროდუქტებში, და უახლოვდება ცხოველურს (მაგ., ხაჭო, ხორცი და სხვ). წიწიბურა და შვრია დიდი რაოდენობით შეიცავს დიეტურ ბოჭკოს, შედეგად, უმჯობესდება საჭმლის მომნელებელი სისტემის მუშაობა, აღარ ვითარდება შეკრულობა და აღიკვეთება ქვების წარმოქმნა. გარდა ამისა, სხვა მარცვლეულთან შედარებით წიწიბურაში მეტი რკინაა. 

სპეციალისტების თქმით, ნაკლებად სასურველია მანანის ბურღულისა და ხორბლის ფაფები. ისინი მცირე რაოდენობით შეიცავენ მცენარეულ ბოჭკოებსა და სასარგებლო ნივთიერებებს. 

ნებისმიერი ორცხობილა საუზმისთვის მზადდება უმაღლესი ხარისხის ფქვილისგან, შესაბამისად, ის დიდი რაოდენობით კალორიებსა და ნაკლებად სასარგებლო ნივთიერებებს შეიცავს.

ცხელი ბლინები უარყოფითად მოქმედებს კუჭ-ნაწლავის ტრაქტის ლორწოვანაზე და ზრდის კუჭის სეკრეციას. ვინც წონას აკონტროლებს, მათ შეუძლიათ ბლინების ცომი მოამზადონ კეფირზე და დაუმატონ გახეხილი ვაშლი, ყაბაყი ან სტაფილო. ამით ბლინების კალორიულობა მცირდება.

უზმოზე სასურველია ჩაის მიღება. მასშიც, ისევე, როგორც ყავაში, შედის კოფეინი, მაგრამ ტანინებთან შეერთებით კოფეინი წარმოქმნის ტეინს, რომელიც არც ისე საშიშია კუჭისთვის. მაგარ ყავას კი სასურველია დაუმატოთ რძე, რომ შეარბილოს მისი მოქმედება.

212