თბილისი, 27 აპრილი — Sputnik. გრენონების ოჯახმა ერთ მილიონ დოლარზე მეტი იშოვა კორონავირუსის „სასწაულებრივი“ წამლის გაყიდვით, რომელიც სინამდვილეში ქსოვილის მათეთრებელი იყო, ნათქვამია აშშ-ის იუსტიციის სამინისტროს პრეს-რელიზში.
Mark Grenon, who sold thousands of bottles of industrial bleach as a covid cure, was just federally indicted with his 3 sons. Grenon advertised as the “Archbishop” of Genesis II Church of Health & Healing and sold them as a “Miracle Mineral Solution.” https://t.co/FMworVJ8zt
— Ron Filipkowski (@RonFilipkowski) April 24, 2021
გავრცელებული ინფორმაციით, დანაშაულებრივი საქმიანობით 62 წლის მარკ გრენონი და მისი შვილები — 34 წლის ჯონათანი, 32 წლის ჯოზეფი და 26 წლის ჯორდანი იყვნენ დაკავებული.
როგორც ირკვევა, მეტი დამაჯერებლობისთვის ოჯახმა სექტა ჩამოაყალიბა სახელწოდებით „ჯანმრთელობისა და განკურნების ეკლესია დაბადება II“. საკუთარ „წამალს“ კი Miracle Mineral Solution („მინერალური სასწაული“) უწოდეს და ირწმუნებოდნენ, რომ ის ავადმყოფებს არა მარტო COVID-19-სგან, არამედ კიბოს, შიდსის, ალცჰეიმერისა და პარკინსონის დაავადებების, დიაბეტის, აუტიზმის, მალარიის, ჰეპატიტისა და ჰერპესისგანაც კი კურნავდა.
გრენონებმა ათობით ათასი ბოთლი „წამლის“ გაყიდვა მოასწრეს და ამ საქმიანობით ერთ მილიონ დოლარზე მეტი იშოვეს.
„ეს ქიმიური ხსნარი სინამდვილეში შეიცავს ნატრიუმის ქლორიდსა და წყალს, რომელიც პერორალური მიღების შემდეგ ქლორის დიოქსიდად გარდაიქმნება − ძლიერ მათეთრებლად, რომელიც წყლის სამრეწველო მასშტაბებში გასაწმენდად ან ქსოვილების, ცელულოზისა და ქაღალდის მათეთრებლად გამოიყენება“, — ნათქვამია იუსტიციის სამინისტროს პრეს-რელიზში.
სურსათისა და მედიკამენტების ხარისხის სანიტარული ზედამხედველობის სააგენტომ „მინერალური სასწაული“ COVID-19-ისა თუ სხვა დაავადებების სამკურნალოდ უვარგისად ცნო და განმარტა, რომ აღნიშნულ პროდუქტს სიცოცხლისთვის საშიში სახიფათო გვერდითი ეფექტები აქვს — ძლიერი პირღებინების, დიარეისა და წნევის უკიდურესი ვარდნის ჩათვლით.
გარდა ამისა, გამოძიებით დადგინდა, რომ „მინერალური სასწაულის“ მიღების შემდეგ რამდენიმე ადამიანი გარდაიცვალა კიდეც.
გრენონების საქმის სასამართლო განხილვები 26 აპრილს დაიწყო. ბრალის დადასტურების შემთხვევაში მამასაც და მის სამივე შვილსაც სამუდამო პატიმრობა ელით.