ჟოზეპ ბორელი

ჟოზეპ ბორელმა მოსკოვისა და პეკინის დაახლოება გააკრიტიკა

52
(განახლებულია 19:54 30.03.2021)
ევროკავშირის უმაღლესი წარმომადგენელი მიიჩნევს, რომ აუცილებელია გაანალიზდეს, სინამდვილეში რა ამოძრავებთ ჩინეთსა და რუსეთს.

თბილისი, 30 მარტი — Sputnik. რუსეთი და ჩინეთი ძალიან მსგავს ენას იყენებენ დასავლეთსა და აშშ-ზე საუბრისას, წერს სოციალურ ქსელში ევროკავშირის უმაღლესი წარმომადგენელი საგარეო საქმეთა და უშიშროების პოლიტიკის სფეროში ჟოზეპ ბორელი. აღნიშნულის თაობაზე ინფორმაციას სააგენტო РИА Новости ავრცელებს.  

როგორც პოლიტიკოსი აღნიშნავს, ცოტა ხნის წინ რუსეთის საგარეო საქმეთა მინისტრის სერგეი ლავროვისა და ჩინეთის საგარეო უწყების ხელმძღვანელის ვან ის შეხვედრაზე მხარეებმა განაცხადეს, რომ განზრახული აქვთ განამტკიცონ თავიანთი ტექნიკური დამოუკიდებლობა დასავლეთის ქვეყნებისგან. ამასთან მინისტრებმა მოუწოდეს დასავლეთს, არ ჩაერიონ მოსკოვისა და პეკინის საქმეებში.

ბორელის თქმით, საჭიროა ყურადღებით გაანალიზდეს, რა ამოძრავებს ამ ორ სახელმწიფოს.

„მაგალითად, ორივე ქვეყანას სურს გაზარდონ დასავლეთისგან ეკონომიკური დამოუკიდებლობის ხარისხი, მაგრამ ისინი ერთ ლიგაში არ თამაშობენ — ჩინეთს აშკარა უპირატესობა აქვს“, — წერს ბორელი საკუთარ ბლოგზე.

რაც შეეხება ენერგეტიკას, ევროკავშირის უმაღლესი წარმომადგენლის თქმით, ეს ერთ-ერთი საკვანძო საკითხია მოსკოვისა და პეკინის ურთიერთობებში — ჩინეთს აუცილებლად ესაჭიროება ნავთობი და გაზი, რომელსაც ის რუსეთისგან იღებს.

„მოსკოვი ენერგორესურსების ექსპორტის დივერსიფიცირებას ცდილობს ევროკავშირის ფარგლებს მიღმა ჩვენს ურთიერთობებში დაძაბულობის გათვალისწინებით“, — წერს პოლიტიკოსი.

თუმცა, მისი თქმით, ეს მარტივი საქმე არ იქნება, ვინაიდან ინფრასტრუქტურის მოწყობას უზარმაზარი ინვესტიციები სჭირდება. 

რაც შეეხება პეკინს, ბორელის თქმით, ის ასევე მუშაობს შეთანხმებებზე ცენტრალური აზიის ენერგეტიკულ „დერჟავებთან“.

იმავდროულად ჟოზეპ ბორელს მიაჩნია, რომ ჩინეთისა და რუსეთის კავშირის მხოლოდ ეკონომიკური თვალსაზრისით განხილვა არასწორი იქნებოდა, ვინაიდან „მათი დაახლოება უპირველესად დემოკრატიული ფასეულობების უარყოფას ემყარება“.

მანამდე რუსეთის საგარეო საქმეთა მინისტრმა სერგეი ლავროვმა განაცხადა, რომ მოსკოვს ევროკავშირთან, როგორც ორგანიზაციასთან, არანაირი ურთიერთობები არ აქვს, ვინაიდან ეს „ინფრასტრუქტურა ბრიუსელის ცალმხრივმა გადაწყვეტილებებმა გაანადგურა“. ამასთან მინისტრმა აღნიშნა, რომ რუსეთი მზადაა, განავითაროს ურთიერთობა ევროკავშირთან თანასწორუფლებიანობისა და ინტერესთა ბალანსის დაცვის საფუძველზე.

მოგვიანებით ბორელმა რუსეთს „საშიში მეზობელი“ უწოდა, თუმცა განაცხადა, რომ საერთო ინტერესის საკითხების გადასაჭრელად გარკვეული არხების შენარჩუნებაა საჭირო.

რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ ბორელის განცხადება არა მარტო შეურაცხმყოფელად და სინამდვილესთან შეუსაბამოდ შეაფასა, არამედ მას დეზინფორმაციაც უწოდა.

52
თემები:
რუსეთი დღეს (818)
კამალა ჰარისი

აშშ-ის ვიცე-პრეზიდენტის მკვლელობის მუქარის ბრალდებით ფლორიდაში 39 წლის ექთანი დააკავეს

11
(განახლებულია 11:30 18.04.2021)
ქალის ადვოკატის თქმით, მისი დაცვის ქვეშ მყოფი ვიცე-პრეზიდენტისთვის „რეალურ საფრთხეს არ წარმოადგენდა“ და თავის აღშფოთებას მხოლოდ ქმართან ურთიერთობაში ავლენდა.

თბილისი, 18 აპრილი - Sputnik. აშშ-ის ფედერალურმა ხელისუფლებამ ვიცე-პრეზიდენტ კამალა ჰარისის მკვლელობის მუქარის ბრალდებით ფლორიდის მკვიდრი ქალი დააკავა, იუწყება გამოცემა USA Today.

სამართალდამცველებმა 39 წლის ექთანი ნივიან პეტი ფელპსი (Niviane Petit Phelps) ხუთშაბათს დააკავეს. არსებული ინფორმაციით, ბრალდებული „შეგნებულად და განზრახ იმუქრებოდა აშშ-ის ვიცე-პრეზიდენტის მოკვლით და სხეულის დაზიანების მიყენებით“.

საიდუმლო სამსახურის მონაცემებით, ბრალდებულმა მეუღლეს, რომელიც ციხეში პატიმრობას იხდის, რამდენიმე ვიდეო გაუგზავნა, სადაც გამოხატავდა რისხვას 2020 წლის არჩევნების შედეგების გამო, ასევე იარაღის ტარების ნებართვას მოითხოვდა. სასამართლოს ხელთ არსებული დოკუმენტებით, ფელპსმა ჩაწერა ხუთი ვიდეორგოლი, სადაც ჰარისის მოკვლით იმუქრებოდა და კონკრეტულ თარიღს ასახელებდა. აღნიშნულია, რომ ქალის მუქარას ამყარებდა მისი რწმენა, თითქოს ჰარისი „სინამდვილეში შავკანიანი არაა“.

სამედიცინო დაწესებულების ადმინისტრაციამ, რომელშიც ფელპსი 20 წლის განმავლობაში მუშაობდა, განაცხადა, რომ მას დაითხოვენ.

ქალის ადვოკატის თქმით, მისი დაცვის ქვეშ მყოფი ვიცე-პრეზიდენტისთვის „რეალურ საფრთხეს არ წარმოადგენდა“ და თავის აღშფოთებას მხოლოდ ქმართან ურთიერთობაში ავლენდა.

11
ვენახი

საფრანგეთის სოფლის მეურნეობა უდიდეს კატასტროფას განიცდის

103
(განახლებულია 23:27 17.04.2021)
საფრანგეთის სოფლის მეურნეობის მინისტრი მიიჩნევს, რომ ქვეყანაში XXI საუკუნის დასაწყისიდან ამხელა კატასტროფა არ მომხდარა

თბილისი, 17 აპრილი – Sputnik. საფრანგეთის ხელისუფლება ერთ მილიარდ ევროს გამოყოფს სოფლის მეურნეობის დარგის დასახმარებლად, რომელიც გვიანი ყინვების გამო კატასტროფას განიცდის, განაცხადა ქვეყნის პრემიერ-მინისტრმა ჟან კასტექსმა.

„ესაა ნამდვილი დრამა, რასაც ამ კლიმატური კატასტროფის გამო დარგის პროფესიონალები განიცდიან. ეს არის ადამიანური, ეკონომიკური დრამა. ახლა დგას სოფლის მეურნეობის დარგის მუშაკთა გადარჩენის საკითხი“, - განაცხადა კასტექსმა სოფლის მეურნეობის დარგის წარმომადგენლებთან შეხვედრის შემდეგ.

მისი თქმით, სახელმწიფომ ამ კატასტროფას სათანადოდ უნდა უპასუხოს. სახელმწიფო გამოყოფს ერთ მილიარდ ევროს, რადგან „სიტუაცია ასეთ ზომებს ამართლებს“, განაცხადა საფრანგეთის პრემიერმა.

ადრე სოფლის მეურნეობის მინისტრმა ჟულიენ დენორმანდიმ აღნიშნა, რომ საფრანგეთში გვიანმა ყინვებმა დააზიანა „ასობით ათასი ჰექტარი ვენახები, ხე-ხილი და ნათესები“. მისი თქმით, ეს „შესაძლოა, სოფლის მეურნეობაში XXI საუკუნიდან ყველაზე დიდი კატასტროფაა“.

103
გამვლელები პირბადეებით

ბრძოლა COVID-19-თან: რეგულაციების დარღვევის რამდენი ფაქტი გამოვლინდა ბოლო 24 საათში

0
(განახლებულია 12:22 18.04.2021)
შექმნილი ეპიდვითარების გამო საქართველოში 28 ნოემბრიდან დაწესებული რეგულაციებიდან დარჩენილია „კომენდანტის საათი“, პირბადე, დისტანცია და რამდენიმე სხვა შეზღუდვა.

თბილისი, 18 აპრილი – Sputnik. პოლიციამ ბოლო 24 საათის განმავლობაში მთელი ქვეყნის მასშტაბით დაწესებული შეზღუდვების ფარგლებში მოქმედი რეგულაციების დარღვევის 1.437 ფაქტი გამოავლინა, იუწყება შინაგან საქმეთა სამინისტრო.

არსებული ეპიდემიოლოგიური ვითარების გამო საქართველოში 28 ნოემბრიდან ახალი შეზღუდვები ამოქმედდა, რომლებიც 2021 წლის 31 იანვრის ჩათვლით იყო ძალაში. შეზღუდვების ეტაპობრივი შემსუბუქების გეგმა საქართველოს პრემიერ-მინისტრმა ირაკლი ღარიბაშვილმა თებერვლის ბოლოს წარმოადგინა და შეზღუდვების ეტაპობრივად მოხსნაც დაიწყო. თუმცა ძალაში რჩება წესები, რომლებიც ეხება პირბადის ტარებას, ღამით გადაადგილების აკრძალვას და სხვ.

პოლიციამ იზოლაციისა და კარანტინის წესის დარღვევისთვის 122 ფიზიკური პირი დააჯარიმა.

დაჯარიმებულთა შორის არიან მოქალაქეები, რომლებმაც საღამოს 9 საათიდან დილის 5 საათამდე დაწესებული გადაადგილების შეზღუდვის წესი დაარღვიეს.

გარდა ამისა, 24 საათის განმავლობაში პირბადის ტარების წესის დარღვევის ფაქტზე 1.179 ფიზიკური პირია დაჯარიმებული, ხოლო პირბადის ტარების წესის განმეორებით დარღვევის 136 ფაქტი გამოვლინდა.

პირბადის ტარების წესის დარღვევა ითვალისწინებს ჯარიმას 20 ლარის ოდენობით, ხოლო პირბადის ტარების წესის განმეორებით დარღვევა ისჯება 40 ლარიანი ჯარიმით.

იზოლაციისა და კარანტინის წესის დარღვევა ფიზიკური პირის დაჯარიმებას 2 ათასი ლარით, ხოლო იურიდიული პირის – 10 ათასი ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს.

შინაგან საქმეთა სამინისტრო მოუწოდებს მოქალაქეებს, გამოიჩინონ მაღალი საზოგადოებრივი პასუხისმგებლობა და დაემორჩილონ არსებულ რეგულაციებს.

 

 

0