თბილისი, 24 თებერვალი — Sputnik. კორონავირუსული ინფექციის პანდემია 2022 წლის დასაწყისისთვის დასრულდება, მიაჩნია ჯანმოს ევროპული რეგიონული ბიუროს ხელმძღვანელს ჰანს კლიუგეს.
„ყველაზე უარესი სცენარი უკან დარჩა. ახლა ვირუსზე უფრო მეტი ვიცით, ვიდრე 2020 წელს ვიცოდით, როცა ვირუსმა გავრცელება დაიწყო“, — თქვა კლიუგემ დანიურ ტელეარხ DR-თან ინტერვიუში.
მისი აზრით, ვირუსი კვლავაც განაგრძობს გავრცელებას, თუმცა შეზღუდვების აუცილებლობა აღარ იქნება.
ამასთან, ჯანმოს წარმომადგენელმა ხაზი გაუსვა, რომ ეს მხოლოდ მოვლენების განვითარების სავარაუდო სცენარია და რომ ზუსტი შედეგების განსაზღვრა ჯერჯერობით შეუძლებელია.
გარდა ამისა, ჰანს კლიუგემ განმარტა, რომ კორონავირუსის ახალი მუტაციების გაჩენა ბუნებრივია, ვინაიდან ვირუსი ადამიანთან ადაპტაციას ცდილობს. ამასთან ჯანმო ყურადღებით აკვირდება კორონავირუსის ახალ ვარიანტებს და გამორიცხული არ არის, რომ მათთან ბრძოლის მიზნით ვაქცინები შეიცვალოს. უფრო მეტიც, თუ საჭირო გახდება, ნულიდანაც კი შეიქმნას.
