ვაქცინაცია Sputnik V–თი

რით განსხვავდება ერთმანეთისგან კორონავირუსის ვაქცინები: Спутник V, Pfizer, Moderna

85
(განახლებულია 17:17 27.01.2021)
მსოფლიოში სწრაფად იზრდება კორონავირუსით ინფიცირებულთა რიცხვი – ბოლო მონაცემებით, პლანეტაზე ინფიცირების 100 მილიონამდე შემთხვევაა დაფიქსირებული.

მიუხედავად იმისა, რომ მოსახლეობის იმუნიზაცია ხუთი სხვადასხვა ვაქცინის გამოყენებით უკვე მსოფლიოს დაახლოებით 50 ქვეყანაში დაიწყო, ჯანდაცვის მსოფლიო ორგანიზაცია აცხადებს, რომ პანდემიის მეორე წელი შესაძლოა პირველზე მძიმე აღმოჩნდეს.

ვაქცინას მიიჩნევენ ახალი ტიპის კორონავირუსის საბოლოოდ დამარცხებისა და ცხოვრების ჩვეულ რიტმთან დაბრუნების ერთადერთ საშუალებად. ამიტომ მთავარი საკითხი, რომელიც ყველა ქვეყანას და ზოგადად კაცობრიობას აწუხებს, არის იმუნიზაცია და ვაქცინის არჩევა.

„Sputnik-საქართველო“ დაინტერესდა, უკვე რომელი ვაქცინების გამოყენება დაიწყეს მსოფლიოში და რით განსხვავდება ისინი ერთმანეთისგან.

რით განსხვავდება კორონავირუსის ვაქცინები

ჩინეთის ქალაქ უჰანში კორონავირუსული ინფექციის აფეთქების შესახებ 2019 წლის დეკემბერში გახდა ცნობილი. ამჟამად მსოფლიოში მუშაობა მიმდინარეობს COVID-19-ის 200-ზე მეტ სხვადასხვა ვაქცინაზე, რომელთა ნაწილიც უკვე ადამიანებზე იცდება.

იმ ვაქცინებს შორის, რომელთაც კვლევების ყველა ეტაპი აქვთ გავლილი, უფრო პერსპექტიულად მიიჩნევა ამერიკული Pfizer-BioNTech, ბრიტანული AstraZeneca, ამერიკული Moderna და რუსული Спутник V.

კორონავირუსის ვაქცინები ერთმანეთისგან გასხვავდება ტიპით, ორგანიზმში შეყვანის მეთოდით, შენახვის პირობებითა და ვადით, ასევე, რაც არანაკლებ მნიშვნელოვანია, ღირებულებით.

Спутник V

კორონავირუსის ვაქცინა, სახელწოდებით Спутник V, რუსეთმა 2020 წლის აგვისტოში დაარეგისტრირა. ვაქცინა ადამიანის ადენოვირუსების სხვადასხვა შტამის საფუძველზე შეიმუშავა გამალეის სახელობის ეპიდემიოლოგიისა და მიკრობიოლოგიის ნაციონალურმა ცენტრმა.

მისი ეფექტურობა 92,4%-ია. ვაქცინა სრულად იცავს ორგანიზმს კორონავირუსით დაავადების მძიმე შემთხვევებისგან.

Спутник V შექმნილია ორი სახით: გაყინული სახით – თხევადი Gam-COVID-Vac ინახება არაუმეტეს მინუს 18 გრადუს ტემპერატურაზე, და ლიოფილიზებული სახით – Gam-COVID-Vac Lyo ფხვნილი ინახება პლუს 2-8 გრადუს ტემპერატურაზე.

ინექცია კეთდება ორჯერ, სამკვირიანი შუალედით. ორი აცრა ჯამში ჯდება 20 დოლარი – თითქმის ორჯერ იაფი სხვა ვაქცინებზე, რომლებიც ანალოგიური დონის შედეგს აჩვენებენ.

რუსეთში Спутником V პრეპარატით მასობრივი ვაქცინაცია 18 იანვარს დაიწყო.

  • რუსული პრეპარატი, რომლის მნიშვნელოვან უპირატესობად მიიჩნევენ უსაფრთხოებას, ეფექტიანობასა და ხანგრძლივი ნეგატიური შედეგების არარსებობას, რუსეთის გარდა, დარეგისტრირებულია არგენტინაში, სერბეთში, ბოლივიაში, ალჟირში, პალესტინაში, პარაგვაიში, ვენესუელაში, თურქმენეთსა და ბელარუსში.

ევროკავშირის პირველი ქვეყანა, რომელმაც თავის ტერიტორიაზე Спутник V-ს გამოყენება ოფიციალურად დაუშვა, უნგრეთია. რუსული ვაქცინის 1,2 მილიარდი დოზის შეძენაზე განაცხადი 50-ზე მეტმა ქვეყანამ გააკეთა.

Pfizer-BioNTech

გერმანული კომპანია BioNTech-ისა და ამერიკული Pfizer-ის ერთობლივი პროდუქცია კორონავირუსის პანდემიის დაწყების შემდეგ პირველი ვაქცინა გახდა, რომელიც ჯანდაცვის მსოფლიო ორგანიზაციამ ოფიციალურად მოიწონა საგანგებო სიტუაციებში, და რომლის უსაფრთხოება და ეფექტურობა კვლევებმა დაამტკიცა. კლინიკური კვლევების ბოლო ფაზაზე Pfizer-ის პრეპარატმა 90%-ზე მაღალი შედეგიანობა აჩვენა.

რუსული პრეპარატისგან განსხვავებით, Pfizer-ის ვაქცინა ინახება არაუმეტეს მინუს 75 გრადუს ტემპერატურაზე, რაც მისი ტრანსპორტირების პრობლემას ქმნის, გალღობის შემდეგ კი ვარგისია მხოლოდ ხუთი დღის განმავლობაში.

Pfizer-ის ვაქცინით აცრა კეთდება ორჯერ, ორკვირიანი შუალედით. ორჯერ აცრის ფასი დაახლოებით 40 დოლარია.

პირველმა Pfizer-ის გამოყენება დიდმა ბრიტანეთმა დაუშვა. მას მოჰყვნენ კანადა, აშშ, ევროპისა და ახლო აღმოსავლეთის ქვეყნები. აშშ-სა და კანადაში მასობრივი ვაქცინაცია 14 დეკემბერს დაიწყო, ევროპის ქვეყნებში – 27 დეკემბერს. ისრაელმა Pfizer-ით ყველაზე მეტი – უკვე 2 მილიონი მოქალაქე აცრა. კომპანია 2021 წელს 300 მილიონი დოზის დამზადებას გეგმავს.

Moderna

ამერიკული კომპანია Moderna-ს ვაქცინის ეფექტიანობა 95%-ს შეადგენს. ამ შემთხვევაშიც აცრა ორჯერ კეთდება, ოთხკვირიანი ინტერვალით.

Moderna, განსხვავებით Pfizer-სგან, ინახება პლუს 2-8 გრადუს ტემპერატურაზე 30 დღის განმავლობაში, თუმცა ის ორჯერ ძვირია – 64-74 დოლარი ორი აცრა.

წელს Moderna 600 მილიონი დოზის დამზადებას გეგმავს.

აშშ-ში Moderna-ს გამოყენება დეკემბერში დაუშვეს და შეუკვეთეს 200 მილიონი დოზა, დამატებით 300 მილიონის შესაძლო შეძენის პირობით. აშშ-ის შემდეგ ვაქცინის გამოყენება დაუშვეს კანადამ, ისრაელმა, დიდმა ბრიტანეთმა და შვეიცარიამ.

ამერიკული პრეპარატი იანვარში ევროპელმა რეგულატორმაც მოიწონა.

AstraZeneca

შიმპანზეს ადენოვირუსის საფუძველზე ბრიტანული კომპანია AstraZeneca-სა და ოქსფორდის უნივერსიტეტის მიერ დამზადებული ვაქცინის საშუალო ეფექტიანობამ 70% შეადგინა. AstraZeneca-ს, როგორც სპეციალისტები მიიჩნევენ, ორი უპირატესობა აქვს. გარდა იმისა, რომ ვაქცინის შენახვა და ტრანსპორტირება ექვსი თვის განმავლობაში ჩვეულებრივ სამაცივრე პირობებში შეიძლება (პლუს 2-8 გრადუსი), ერთხელ აცრა 4-5 დოლარი ჯდება. აცრა ერთხელ ან ორჯერ სხვადასხვა დოზით ხდება.

დიდმა ბრიტანეთმა მსოფლიოში პირველმა დაუშვა AstraZeneca-ს გამოყენება და შეუკვეთა 100 მილიონი დოზა. პრეპარატი მოიწონეს ინდოეთში, არგენტინაში, დომინიკელთა რესპუბლიკაში, სალვადორში, მექსიკასა და მაროკოში.

AstraZeneca-მ 6 მილიარდი დოზის შეკვეთა მიიღო.

Sinovac Biotech

ჩინური კომპანია Sinovac Biotech-ის მიერ ადამიანის ერთი ადენოვირუსის საფუძველზე დამზადებული ვაქცინა ასევე ჩვეულებრივ მაცივარში პლუს 2-8 გრადუს ტემპერატურაზე ინახება.

CoronaVac-ის ეფექტიანობის შესახებ მონაცემები განსხვავებულია – ბრაზილიაში ჩატარებული ბოლო ცდებით შედეგიანობამ 50,4% აჩვენა, ინდონეზიაში – 65,3%, თურქეთში – 91,5%.

CoronaVac ვაქცინა ჩინეთში გასული წლის ივლისიდან მაღალი რისკის ჯგუფებში სასწრაფო გამოყენების აუცილებლობის შემთხვევაში დაუშვეს. ვაქცინა 13 იანვარს თურქეთის ხელისუფლებამაც მოიწონა. აზიის რამდენიმე ქვეყანამ – სინგაპურმა, მალაიზიამ და ფილიპინებმა, ასევე ბრაზილიამ და უკრაინამ – ხელი მოაწერეს CoronaVac-ის შეძენის შესახებ ხელშეკრულებებს.

იმუნიზაციისთვის კეთდება ორი აცრა. ფასი ცნობილი არ არის. Sinovac-ში განაცხადეს, რომ წელიწადში 300 მილიონ დოზას დაამზადებენ.

ვაქცინების ეფექტიანობისა და მსოფლიოში მათზე არსებული მოთხოვნილების მიუხედავად, მასობრივი ვაქცინაცია უმტკივნეულოდ არ მიმდინარეობს – მასმედიაში პერიოდულად ჩნდება ცნობები ვაქცინაციის შემდეგ მორიგი მსხვერპლის შესახებ.

მედიკოსები ამტკიცებენ, რომ ყველა პრეპარატის გამოყენებას შეიძლება ახლდეს გვერდითი მოვლენა, მაგრამ არ შეიძლება კორონავირუსის აცრის შემდეგ ჯანმრთელობის პრობლემებისა თუ ავადობის ავტომატურად დაკავშირება ვაქცინაციასთან. თუმცა არ უარყოფენ, რომ ვაქცინის გვერდითმა მოვლენებმა შეიძლება გაამწვავოს ქრონიკული დაავადებები. 

მასალა მომზადებულია ღია წყაროების საფუძველზე

85
თემები:
COVID-19-ის პანდემია მსოფლიოში (1328)

პალესტინელებისა და ისრაელის პოლიციის შეტაკება იერუსალიმში: კადრები ეპიცენტრიდან

47
(განახლებულია 14:01 08.05.2021)
იერუსალიმში 7 მაისის ღამით პალესტინელებსა და ისრაელის პოლიციას შორის სასტიკი შეჯახება მოხდა. იხილეთ ვიდეოკადრები მოვლენების ეპიცენტრიდან

დაპირისპირებამ აღმოსავლეთ იერუსალიმის ერთდროულად ორ რაიონში იფეთქა.

გავრცელებული ინფორმაციით, პოლიციამ რეზინის ტყვიები,  ხმოვან-მანათობელი ყუმბარები და ცრემლსადენი გაზი გამოიყენა.

ამ დროისათვის არსებული ინფორმაციით, დაშავებულია 205 ადამიანი.   

 

 

47
არჩილ ჭოტაშვილი

25 წლიანი მეგობრობა სიმღერის ფონზე და ადგილი, რომელიც ბევრი უპოვარისთვის შვებად იქცა

207
(განახლებულია 07:28 08.05.2021)
ხშირად წინასწარ რაიმეს განსაზღვრა  ცხოვრებაში შეუძლებელია, რადგან  შენს ისტორიას ბედისწერა მაინც საკუთარი სცენარით გააგრძელებს...

როცა საქართველოს ტექნიკური უნივერსიტეტის კავშირგაბმულობის ფაკულტეტი დაამთავრა, წარმოდგენა არ ჰქონდა, რომ ცხოვრების გზა სულ სხვა მიმართულებით წაიყვანდა. ერთ დღეს პარტერიდან სცენაზე გადაინაცვლა, 1996 წლიდან კი მისი პოპულარობის ათვლა დაიწყო. ამის შემდეგ სახელმწიფო მოხელე გახდა და სცენისკენ გზას ახლა უკვე სხვებს უკვალავდა.

ასეთია რამდენიმე წინადადებით გადმოცემული არჩილ ჭოტაშვილის შემოქმედება და საქმიანობა. დღეს იგი საქველმოქმედო კავშირის „თემი“ მოხალისე პედაგოგია და მათთან ერთად მუსიკალურ და სხვადასხვა სახის პროექტებს ახორციელებს. უფრო კონკრეტულად კი თავად მოგვიყვება.

არჩილ ჭოტაშვილი
არჩილ ჭოტაშვილი

- ბატონო არჩილ, დავიწყოთ იმით, თავის დროზე რამდენად საინტერესო და რთული აღმოჩნდა თქვენთვის სცენიდან-კულისებში გადანაცვლება?

-ალბათ ნებისმიერი შემოქმედისთვის და ზოგადად პიროვნებისთვის რთულია სივრცისა და დროის შეზღუდვა, მაგრამ არაერთი წლის გამოცდილებამ დაგვანახა, რომ კომპლექსური მიზეზების გამო, მხოლოდ შემოქმედებითი საქმიანობით არსებობა სულ უფრო შეუძლებელი ხდებოდა. როდესაც საქართველოს კულტურის, სპორტისა და ახალგაზრდობის სამინისტროში მივედი, იქ დამხვდნენ საოცარი თანამშრომლები, რომლებთანაც ახლაც ვმუშაობ და ვმეგობრობ. შემსრულებლის გამოცდილებამ ნამდვილად გამიმარტივა სამინისტროს ყოველდღიურობასთან შეგუება. ქართული ფოლკლორის თემები ჩემთვის არ იყო უცხო როგორც ოჯახური ტრადიციებიდან გამომდინარე, ისე პროფესიული გამოცდილების კუთხით, თუმცა ფოლკლორული ანსამბლების საჭიროებები და პრობლემები მხოლოდ სამინისტროში მისვლის შემდეგ დავინახე. 

არჩილ ჭოტაშვილი
არჩილ ჭოტაშვილი

-დავაკონკრეტოთ, სამინისტროში თქვენ იყავით „ფოლკლორის მხარდაჭერის ეროვნული პროგრამის“ კოორდინატორი. კონკრეტულად როგორ გამოიხატა იმ პროგრამის მხრიდან ქართული ხალხური ხელოვნების მხარდაჭერა?

-მაშინ, 90-იანების ბოლოს და ახალი საუკუნის დასაწყისში, მხოლოდ თითზე ჩამოსათვლელ ანსამბლებს ჰქონდათ ახალი სასცენო სამოსი და გამართული ხალხური საკრავები. ,,ფოლკლორის მხარდაჭერის ეროვნული პროგრამის“ ფარგლებში, წლების განმავლობაში, ასობით მომღერალს და მოცეკვავეს შევუკერეთ სასცენო სამოსი და დავუმზადეთ ტრადიციული და ტემპერირებული საკრავები. სასიამოვნო იყო ოსტატებთან ურთიერთობა, რომლებმაც თავისი შრომით და ცოდნით დიდი ამაგი გასწიეს ქართული ფოლკლორის ასაღორძინებლად. სამწუხაროდ ზოგი მათგანი უკვე გარდაცვლილია. მეამაყება, რომ სამინისტროში ჩემი მუშაობის დროს საქართველოს ფოლკლორის სახელმწიფო ცენტრისთვის შევიძინეთ თანამედროვე ხმის ჩამწერი აპარატურა, რომელიც რეგიონებში ექსპედიციებში გამოიყენებოდა.

არჩილ ჭოტაშვილი საშობაო გამოფენაზე „რედისონ ბლუ ივერიაში“
არჩილ ჭოტაშვილი საშობაო გამოფენაზე „რედისონ ბლუ ივერიაში“

-რეგიონებში როგორ ხორციელდებოდა მსგავსი პროექტები?

-სამინისტროს მიერ განსახორციელებული პროექტების ფარგლებში ხშირად მიწევდა რეგიონებში კულტურის სახლების მდგომარეობის შესწავლის მიზნით მოგზაურობა, რისთვისაც ბედის მადლობელი ვარ.  მაშინ უამრავი კულტურის სახლი აღიჭურვა სასცენო და კინოჩვენებისთვის საჭირო აპარატურით, რის შემდეგაც მათ ახალი სიცოცხლე დაიწყეს. განსაკუთრებით მიხაროდა საბავშვო და ახალგაზრდული საესტრადო ანსამბლების აღმოჩენა და მათი დახმარება. საქართველოს მასშტაბით სარეპეტიციო და პროფესიონალური აპარატურა არაერთ ახალბედა მუსიკოსს და ანსამბლს გადავეცით.

ჯგუფი „ფლეში“
ჯგუფი „ფლეში“

- საქართველოს ფარგლებს გარეთ მყოფ ქართველ ხელოვანებთან თუ გქონდათ  ურთიერთობა?

- დიახ, მე ვიმუშავე ევროპაში არსებულ ქართულ დიასპორასთან და ზემოხსებული პროგრამის ფარგლებში, სასცენო სამოსი და საკრავები მათაც გავუგზავნეთ. განსაკუთრებით მსიამოვნებდა ისტორიულ ჰერეთში არსებული ანსამბლების მხარდაჭერა. მაშინ გავიცანი ნიჭიერი შემსრულებლები, რომლებიც ქართულ ფოლკლორს  საზღვარგარეთ ცარიელი ენთუზიაზმით ინახავდნენ. ასევე საინტერესო გამოდგა ქართული სამოსისა და საკრავების ავთენტურობის საკითხზე მუშაობა. ამ მიმართულებით ჯერ კიდევ არის თემები, რომლებზე მუშაობაც აუცილებელია.

არჩილ ჭოტაშვილი, დათო ვალიშვილი და ექიმი ირმა გოცირიძე
არჩილ ჭოტაშვილი, დათო ვალიშვილი და ექიმი ირმა გოცირიძე

- თქვენ იყავით ერთ-ერთი ორგანიზატორი და სამხატვრო ხელმძღვანელი პატრიოტული სიმღერების კონკურსებისა, რომელიც ცნობილი იყო სახელით „პატრინოტი“...

-„პატრინოტის“ ფესტივალი, ჩემი, როგორც სახელმწიფო მოხელედ ყოფნის პერიოდში, ნამდვილად ამოსუნთქვას ჰგავდა. ნაცნობ წრეში განსაკუთრებით სასიხარულო და სასიამოვნოა მუშაობა, მითუმეტეს როცა ამ შრომას კარგი შედეგიც მოჰყვება. ამ ფესტივალის მადლიერი ბევრი კომპოზიტორი და შემსრულებელი იყო. სიმღერების შერჩევა პროფესიონალ კომპოზიტორთა ჟიურის ევალებოდა. მაშინ საკმაოდ ბევრი სიმღერა შემოვიდა საქართველოს სხვადასხვა კუთხეებიდან. კონკურსში გასული სიმღერები რეპეტიციებზე მუშავდებოდა და შემდეგ სატელევიზიო ტურებზე ცოცხლად სრულდებოდა ბენდის თანხლებით. იმ დროს გავიცანი უნიჭიერესი თეონა ქუმსიაშვილი, რომელიც სამწუხაროდ ტრაგიკულად დაიღუპა. თუ არ ვცდები, ფართო სატელევიზიო აუდიტორიის წინაშე, სწორედ ამ ფესტივალზე გამოჩნდა პირველად ჯგუფი „მგზავრები“. ასევე ფესტივალის მეშვეობით წარმოჩინდა ბევრი ახალგაზრდა შემსრულებელი.

თემის წევრები
თემის წევრები

-ცნობილია, რომ ყველაზე რთული სიმღერის დაწერა პატრიოტულ თემაზეა, რომელი სიმღერა და შემსრულებელი დაგამახსოვრდათ?

-იმ ფესტივალიდან დამამახსოვრდა ის ფაქტი, რომ მასში უამრავი სიმღერა შემოვიდა სოხუმზე. „პატრინოტის“ მიმდინარეობისას გავიცანი ბრიტანელი კომპოზიტორი და მომღერალი, ტონი ომეილი (Tony O’Mally). რომლის სიმღერამ ,,ჩემი ვედრება“ (Hear My Plea!) დიდი მოწონება დაიმსახურა. მოგვიანებით  მისი ჩაწერა გადაწყდა ევროვიზიის კონკურსში მონაწილეობის მისაღებად. არანჟირების ავტორი, ტონი ომეილთან ერთად ზურა მახნიაშვილი იყო. მართალია, იმ სიმღერამ კონკურსში ვერ გაიმარჯვა, მაგრამ ის იმდენად შეგვიყვარდა, რომ ჰიმნის ვერსიაც კი ჩავწერეთ. მასში მონაწილეობდნენ: რატი დურგლიშვილი, ალეკო ბერძენიშვილი, ლევან ლაზარაშვილი, მაიკო კაჭკაჭიშვილი, ია ჩანტლაძე, ნინი ბადურაშვილი, სოფო კაკულია, ჯგუფი „ფლეში“, სოფო ხალვაში, თაკო გაჩეჩილაძე, მაია დარსმელიძე და ვერიკო ტურაშვილი. ის სიმღერა აშშ-ს მაშინდელი სენატორის, ჯონ მაკკეინის ცნობილი სიტყვებით -„Today we are all Georgians” იწყებოდა. საინტერესო იქნებოდა ვიდეოკლიპზე მუშაობაც, მაგრამ სამწუხაროდ ვერ მოხერხდა.

-დღეს თქვენ საქველმოქმედო კავშირის ,,თემი“ მოხალისე პედაგოგი ხართ, რას წარმოადგენს „თემი“ და თქვენი როლი კონკრეტულად რაში გამოიხატება?

-თემში (www.temi-community.org) მამაჩემის წყალობით მოვხვდი და  მისი დამაარსებლების ენთუზიაზმმა გამაოცა. ორგანიზაცია 1989 წელს შეიქმნა. იმ დროისთვის ტერმინი შეზღუდული შესაძლებლობის მქონე პირი არ არსებობდა. ეს თემა თითქმის ტაბუირებული იყო. თემი ყვარელში, სოფელ გრემში მდებარეობს. თავიდან  გრემელები მათ „გიჟებს“ ეძახდნენ. თუმცა წლების განმავლობაში მათ შორის ურთიერთობები იმდენად გამყარდა, რომ ოჯახებიც შეიქმნა. ამჟამად თემი და სოფელი ერთმანეთს აძლიერებს. თემი ბიომეურნეობას (მევენახეობა, მეღვინეობა, მებაღეობა, მებოსტნეობა, მემარცვლეობა და სხვ.) მისდევს და ცდილობს საკუთარი შემოსავლების, სახელმწიფოსა და უცხოელი პარტნიორების დახმარებით შექმნას ისეთი გარემო, სადაც სხვადასხვა მოწყვლადი ჯგუფები შეძლებენ საკუთარი თავის რეალიზებას.

-თქვენ ახსენეთ, რომ ეს თემა მაშინ თითქმის ტაბუირებული იყოო, თქვენი პირველი შთაბეჭდილება თუ გახსოვთ?

- მახსოვს... ჩემი პირველი შთაბეჭდილება გამაოგნებელი იყო. ვერ ვხვდებოდი, როგორ შეიძლებოდა სახელმწიფოს მიეტოვებინა ისეთი კატეგორიის ადამიანები, თავისი მოქალაქეები, რომლებსაც დახმარების გარეშე ფიზიკურად გადაადგილებაც არ შეეძლოთ. საარაკო თავდადების წყალობით, ეს ადგილი ბევრი უპოვარისთვის საკუთარ სახლად იქცა. აქ ვნახე პირველად ოქსფორდიდან ჩამოსული სტუდენტები, რომლებიც თემის მაცხოვრებლებისთვის მოხალისეებად მუშაობდნენ. საწყენი იყო, რომ ქართველი ახალგაზრდები და სტუდენტები ათეულობით წლების განმავლობაში არ ინტერესდებოდნენ თემის  ცხოვრებით. ნამდვილად არაა შემთხვევითი ის, რომ ბატონმა მერაბ კოკოჩაშვილმა სწორედ თემის მაცხოვრებლების ინსპირაციით გადაიღო მხატვრული ფილმი „ნუცას სკოლა“. 

- თქვენი საქმიანობა თემელებთან სიმღერით დაიწყო?

- რა თქმა უნდა სიმღერით დაიწყო. თემელებთან ერთად, იქ ყოფნის დროს, ბევრი სიმღერა ვისწავლე. ხალხურ და სხვა ჟანრის სიმღერებს მათ ახლაც ვასწავლი. ერთი სიმღერის დაწერაც კი მოვახერხე და ის თემის შესახებ გადაღებულ ორ დოკუმენტურ ფილმშიც მოხვდა. ამჟამად ხალხურ საკრავებზე დაკვრას და სიმღერას, თემელებს და გრემელ ბავშვებს ძალიან კარგი პედაგოგი და მუსიკოსი, ქეთინო ზარდიაშვილი ასწავლის.

- როგორ ფიქრობთ, რომ არა „ფლეში“ თქვენს ცხოვრებაში, როგორ და სად გააგრძელებდა საქმიანობას პოლიტექნიკური ინსტიტუტის კავშირგაბმულობის ფაკულტეტის კურსდამთავრებული?

- პირველად, სცენაზე, ჩვენი ჯგუფი სახელით „FLASH“-ი 1996 წელს გამოვიდა. ასე რომ, წელს, 25 წლის იუბილე გვაქვს.  ზუსტად 25 წლის წინ, 16 აპრილს, კოტე მარჯანიშვილის სახლობის სახელმწიფო დრამატული თეატრის პარტერში, როგორც მსმენელი ვიჯექი და ჩემი მეგობრების პირველ აკაპელას „მზე ჩადის ზღვაში“ და ასევე აკაპელა -ინტერპრეტაციას ბითლზის უკვდავ სიმღერაზე „Yesterday” აპლოდისმენტებით და ოვაციებით ვხვდებოდი... წელს, ჩვენი იუბილე მოკრძალებულად ავღნიშნეთ, თემისთვის საჩუქრად ჩავწერეთ სიმღერა, რომლის მეშვეობით მათზე გადაღებული ახალი ფილმი მუსიკალურად გავაფორმეთ. როცა ხშირად ვამბობდით, „ფლეში“ უკვდავიაო, ამაში ჩვენს მეგობრობას ვგულისხმობდით, დრომ გვიჩვენა, რომ ასეცაა...

 

207
მთები

დღის ასტროპროგნოზი ზოდიაქოს ნიშნებისთვის: 9 მაისი

0
(განახლებულია 09:21 08.05.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 9 მაისია, კვირა. კლებადი მთვარე ვერძის ნიშანშია. ამ დღეს პლანეტა მზე მფარველობს.

ეს დღე სიყვარულს უნდა მიუძღვნათ და არა ომსა და მტრობას. გრძნობები გამძაფრებული იქნება, რაც სიყვარულისთვის ძალიან კარგია, მაგრამ კამათისა და ჩხუბისთვის, რა თქმა უნდა – არა. ნებისმიერმა გაუფრთხილებელმა სიტყვამ თუ საქციელმა დიდი წყენა შეიძლება მოიტანოს. გადაწყვეტილებებს დღეს გული მიიღებს, რომელსაც რეალური გრძნობები სჭირდება, და არა – გონება.

როგორ იკლებენ წონაში ზოდიაქოს ნიშნები>>

ვერძი: საზღვარი „საჭიროასა“ და „მინდას“ შორის შეიძლება დაირღვეს. მოგინდებათ გრძნობებზე აყოლა, მაგრამ ვარსკვლავები ამას არ გირჩევენ. ყველაფერი იოლად არ გამოგივათ, ხანდახან სერიოზული წინაღობების გადალახვა მოგიწევთ. მიუხედავად ამისა, პოზიტიური ტენდენციები ბევრ სფეროშია შესამჩნევი. იყავით შეუპოვარი და ეცადეთ, არ დაკარგოთ საკუთარი ძალების რწმენა. თუ ხელებს არ ჩამოუშვებთ პირველივე ბარიერის დანახვისას, ყველაფერი გამოგივათ.

კურო: საჭიროა თანამიმდევრულად მოქმედება და ქაოსისთვის თავის არიდება. აჩქარება შეცდომების მიზეზი შეიძლება გახდეს. დრო უნდა გამონახოთ სიტუაციაში გასარკვევად და სხვადასხვა ვარიანტის განსახილველად. მოუსმინეთ გამოცდილი ადამიანების რჩევებს. ასე შეძლებთ მოსალოდნელი ხარვეზებისთვის გვერდის ავლას. საღამოს დაისვენეთ და ისეთი რამ გააკეთეთ, რაც განწყობას აგიმაღლებთ.

ტყუპი: დღეს მაქსიმალურად გაძლიერდება შემოქმედებითი მისწრაფებები და თუნდაც არ იყოთ ხელოვნების სფეროში დაკავებული ადამიანი, ეს პოტენციალი თქვენში აუცილებლად გაიღვიძებს. ამას გარდა, მოსალოდნელია ურთიერთობები ძალზე საინტერესო ადამიანებთან და საინტერესო თემებზე. ასევე ხელსაყრელი დროა რომანტიკული შეხვედრისთვის, განსაკუთრებით დღის მეორე ნახევარი. ეს დიდ პოზიტიურ ემოციებს მოგიტანთ.

კირჩხიბი: საინტერესო იდეები გაგიჩნდებათ, რაც კარგად აისახება როგორც თქვენს კარიერაზე, ასევე ცხოვრებაზე ზოგადად. ასევე სასარგებლო იდეის მაგივრად შესაძლებელია ძალიან საინტერესო ნაცნობობა. ნაკლებად სავარაუდოა, რომ რომანტიკული შეხვედრა იყოს, მაგრამ მატერიალური თვალსაზრისით ეს ძალზე პერსპექტიული აღმოჩნდება. ნებისმიერ შემთხვევაში, ძალიან კარგი დღე გელოდებათ და ამიტომ ყურადღებით უნდა იყოთ, რომ შანსი ხელიდან არ გაუშვათ.

ლომი: დღეს ახალი საინტერესო შეხვედრებისა და ნაცნობობის შესაძლებლობა გექნებათ. არაა გამორიცხული, რომ ერთ–ერთი ასეთი შეხვედრა ან გაცნობა რომანტიკული ხასიათისა აღმოჩნდეს, თუმცა ნაკლებად სავარაუდოა, რომ მას სერიოზული გაგრძელება მოჰყვეს. მთლიანობაში დღე ძალზე მრავალფეროვანი და საინტერესო გელოდებათ. ხოლო იმისთვის, რომ საჭირო დროს საჭირო ადგილზე აღმოჩნდეთ, ენდეთ ინტუიციას, რომელიც დღეს საკმაოდ გამძაფრებული გექნებათ.

ქალწული: დღეს თქვენი მთავარი ძალა და იარაღი თქვენი სისუსტეები იქნება. ამ სისუსტეების გამოყენებით, შეიძლება ითქვას, რომ გარშემომყოფებს „დაატერორებთ“, უნარი, რომ მიზანს ყველანაირი გზით მიაღწიოთ, აპოგეას მიაღწევს. ამასთან, თავად თქვენ მოგეჩვენებათ, რომ არაფერი განსაკუთრებული და უჩვეულო არ ხდება და გარშემომყოფების გრძნობებზე თამაში სრულიად ბუნებრივი რამაა. თუ ასე გააგრძელებთ, მალე ტირანად შეიძლება იქცეთ ოჯახში.

სასწორი: მთელი დღის განმავლობაში განწყობა შეიძლება ათასჯერ შეგეცვალოთ – მხიარულება მოულოდნელად „მოქუფრულმა“ ფიქრებმა ჩაანაცვლოს, თუმცა ერთი–ორ წუთში ამ ღრუბლებიდან ისევ მზემ გამოანათოს. მოკლედ რომ ვთქვათ, დღეს ემოციებისთვის განსაკუთრებული ყურადღების მიქცევა არ ღირს. ასევე აჯობებს, თუ მნიშვნელოვანი საქმეების გაკეთებას გადადებთ, ან გადააბარებთ იმას, რომლის განწყობა დღეს ჭირვეულობით არ გამოირჩევა.

მორიელი: დღეს თქვენში ტალანტი გაიღვიძებს: ნებისმიერი ბუზი, რომელიც გვერდით ჩაგიფრენთ, სპილოდ აქციოთ. მთელი დღის განმავლობაში ხან რა გაგაღიზიანებთ და ხან – რა. თუ არ გინდათ, ბუზღუნასა და აბეზარას სახელი დაგერქვათ, ნაკლები ყურადღება უნდა მიაქციოთ ნეგატივს, გარშემომყოფების ნაკლოვანებებს. სამაგიეროდ შესანიშნავად გაართმევთ თავს იმ საქმეებს, რომლებშიც წვრილმანებისადმი ყურადღებაა საჭირო – სჯობს, სწორედ ასეთ საქმეებს დაუთმოთ დრო.

მშვილდოსანი: დღეს გული დიდი და ხმაურიანი კომპანიებისკენ გაგიწევთ, რომ თუნდაც სულ ცოტა ხნით აღმოჩნდეთ ყურადღების ცენტრში. ყოველ შემთხვვაში, თუ ასეთ ადგილას არ აღმოჩნდებით და ვერც ყურადღების ცენტრში მოექცევით, იოცნებოთ მაინც ამაზე. ამაში ცუდი არაფერია, მაგრამ ეცადეთ ზედმეტი არ მოგივიდეთ და გარშემომყოფები არ გააღიზიანოთ, თან იმის გათვალისწინებით, რომ თქვენი რეაქცია ირგვლივ მყოფების მხრიდან გამოსროლილ ირონიულ შენიშვნებზე ორმაგად მწვავე იქნება.

თხის რქა: მუდმივად მოგიწევთ სახლის საქმეებზე და საზრუნავზე ყურადღების გადატანა. ეს კარგიცაა – დროა, მიხედოთ საშინაო საქმეებს და სხვა საკითხები კი გადადოთ. მაინც არ გელოდებათ რამე გრანდიოზული გარღვევები და შედეგები საქმიანობაში. მაგრამ ვარსკვლავები გირჩევენ, ზედმეტი ყურადღება არ დაუთმოთ წვრილმანებს, მცირე უსიამოვნებებს, წინააღმდეგ შემთხვევაში შემდეგ რამდენიმე დღე ამაზე მოგიწევთ „ჩაციკლვა“.

მერწყული: გაუგებრობებით სავსე დღეა და ამის მიზეზი თვითონ თქვენი არათანმიმდევრულობა იქნება. დღეს გაცნობიერებულად მოგინდებათ წესების დარღვევა, შეიძლება სხვადასხვა წვრილმანმა მიიქციოს თქვენ ყურადღება, ისეთმა, რომელსაც სხვა დროს საერთოდ არ მიაქცევდით ყურადღებას. ამან შეიძლება ისე გაგიტაცოთ, რომ გასაკეთებელი საქმეები საერთოდ დაგავიწყდეთ, ამით კი თქვენი გეგმები დაირღვევა და კალაპოტიდან ამოვარდებით.

თევზები: თქვენში ყველაფერ მშვენიერსა და ლამაზზე განსაკუთრებული ალღო გაიღვიძებს და ეს მშვენირი, პირველ რიგში, ფულია. ძალიან დიდია დღეს იმის ალბათობა, რომ თუ საგაძური, არა, რამე ძველი ყუთი მაინც იპოვოთ და ამან დაგაინტერესოთ. შემოსავლებთან დაკავშირებით სასიამოვნო სიურპრიზი გელოდებათ. ერთადერთი, რაშიც უნდა იფრთხილოთ, ეს საკვებია – არის დიდი შანსი, რომ გაძლიერებული მადის გამო ფიგურას ზიანი მიაყენოთ.

0