დადგინდა ძილის იდეალური ხანგრძლივობა – თუ დიდხანს სიცოცხლე გსურთ
(განახლებულია 15:56 18.11.2020)
ამერიკელმა მეცნიერებმა მასშტაბური კვლევა ჩაატარეს, რა დროსაც 400 ათასზე მეტი ადამიანის ძილის რეჟიმი შეისწავლეს.თბილისი, 18 ნოემბერი — Sputnik. ძილის ხანგრძლივობას გადამწყვეტი მნიშვნელობა აქვს გულის უკმარისობისგან დასაცავად, იუწყება გამოცემა Express ტულეინის უნივერსიტეტის (აშშ) მეცნიერთა კვლევაზე დაყრდნობით.
სწავლულებმა დაადგინეს, რომ ადამიანებს, რომლებსაც ძილის შედარებით ჯანმრთელი რეჟიმი აქვთ, გულის დაავადებების რისკი მნიშვნელოვნად უქვეითდებათ.
ასეთ ჯანმრთელ რეჟიმად მეცნიერები ყოველ ღამე შვიდ–რვა საათიან ძილს მიიჩნევენ.
კვლევის პროცესში მეცნიერები 37-დან 73 წლამდე ასაკის 408.802 ადამიანს დააკვირდნენ, რომელთაგან 5.221-ს გულის უკმარისობის დიაგნოზი ჰქონდა დასმული. აღმოჩნდა, რომ ამ უკანასკნელებს ძილის პრობლემები აღენიშნებოდათ: ზოგს უძილობა აწუხებდა, ზოგი ხშირად იღვიძებდა ღამღამობით საკუთარი ხვრინვის გამო, სხვებს კი მცირე ხნით ეძინათ.
მანამდე ჩინელმა მეცნიერებმა დაასკვნეს, რომ დღისით ერთ საათზე მეტი ხნით ძილი სასიკვდილოდ სახიფათოა. ანალიზის შედეგებმა აჩვენა, რომ მათ, ვისაც დღისით რეგულარულად ეძინათ ერთ საათზე მეტხანს, გულ-სისხლძარღვთა დაავადებების რისკი 34%-ით, ხოლო სხვა მიზეზებით სიკვდილიანობის რისკი 30%-ით ეზრდებოდათ.
თემები:
შოთა თხილიშვილის ხელნაკეთი ნიღბები ყველა შემთხვევისთვის, ანუ „ხანდახან, როცა გაჩერდები“
(განახლებულია 22:43 26.11.2020)
როცა შოთა თხილიშვილმა ნიღბების კეთება დაიწყო, მაშინ ვერც წარმოიდგენდა, რომ მოვიდოდა დრო და ადამიანები ნიღბის გარეშე გარეთ გასვლას ვერ შეძლებდნენ...თუმცა მისი ნიღბები მედიცინისგან შორსაა და ისინი ხელოვნების ნიმუშს წარმოადგენს. სხვადასხვა თემატიკის ნიღბებს საკუთარი ტექნოლოგიით ამზადებს, უნდა, რომ მალე საკუთარი ნამუშევრების ბრენდი შექმნას...
- შოთა, ოდესმე წარმოიდგენდით, რომ ნიღბების ეპოქაში აღმოვჩნდებოდით?
- არა, ვერასოდეს წარმოვიდგენდი, რომ ადამიანებს ასეთი რამ თავს დაგვატყდებოდა და ნიღაბი აქტუალური გახდებოდა...
- თქვენ შემთხვევაში ნიღბით გატაცება როდის დაიწყო?
- სხვათა შორის, მე ბავშვობიდან, თითქმის ორი წლიდან ვძერწავ. როგორც დედა იხსენებს, რა გასაკვირიც უნდა იყოს, სწორედ ამ ასაკიდან დაიწყო ჩემი შემოქმედებითი გატაცებები, ხატვაც ადრე დამიწყია. მოგვიანებით კი პირველი ლექსიც დამიწერია.
- სამხატვრო აკადემიაში რატომ არ ჩააბარეთ?
- აკადემიური განათლების მიმართ ერთგვარი პროტესტი მაქვს. ჩემი აზრით, ნიჭიერი ადამიანი, რომელიც აკადემიაში შევა, შემდეგ ვიღაცის ასლი ხდება და ნიჭის განვითარებაზე ორიენტირებული არ არის. ყოველთვის ვცდილობ მსგავსი გავლენებისგან თავისუფალი ვიყო. ამიტომაც არაფერი მისწავლია. რა თქმა უნდა, ცნობილი მხატვრების შემოქმედებას ვიცნობ, მაგრამ ხატვის ტექნიკა არსად მისწავლია. ვიღაცამ ეს ყველაფერი უკვე გაიარა, პირველაღმომჩენია, პიონერია. მე კი მომწონს, როცა რაიმე სწავლის, შეცნობის გზას დამოუკიდებლად გავდივარ, ყოველგვარი ჩარევებისა და რჩევების გარეშე, საკუთარი პრაქტიკის საფუძველზე.
- ნიღბებს რა მასალისგან აკეთებთ?
- ნიღბებს საკუთარი ტექნიკით წინასწარ დამზადებული მინარევის საშუალებით ვაკეთებ. ისინი პოლიურეთანის პლასტიკის, ანუ ორკომპონენტიანია, მასალა საქართველოში სპეციალურად ჩამომაქვს. ჩემი ნიღბები მხოლოდ ორიგინალებია, ექსკლუზიური შეკვეთით დამზადებული.
- თქვენი ნიღბები კონკრეტულად რომელიმე პერსონაჟს გამოსახავს?
- ახლავე აგიხსნით: არის ასეთი ხელოვანება Host face, რაც სხვადასხვა პერსონაჟების განსახიერებას გულისხმობს. სხვადასხვა ფილმებისა და ანიმაციების გმირები ბავშვობიდან მიზიდავს, მათ მიმართ ინტერესი სულ მქონდა. როცა ვხედავდი, რომ ზოგჯერ მათი ხასიათი არ შეესაბამებოდა მათსავე გარეგნობას, მაშინ თავად ვქმნიდი ამა თუ იმ პერსონაჟს ისეთად, როგორიც წარმომედგინა, ანუ როგორიც, ჩემი აზრით, რეალობაში უნდა ყოფილიყო.
- ძირითადად როგორ ნიღბებს გიკვეთავენ და მათ შორის პოლიტიკოსის ნიღაბი თუ იყო?
- უფრო ხშირად მიკვეთავენ რომელიმე კონკრეტული პერსონაჟის, ან მითოლოგიური გმირების ნიღაბს, რომელსაც ჩემეული ინტერპრეტაციით ვაკეთებ. რაც შეეხება პოლიტიკოსების ნიღაბს, არავის შეუკვეთია. თუმცა პოლიტიკოსებს, მგონი, ისედაც აქვთ სიმბოლური ნიღაბი და ზედმეტი საჭირო აღარ არის.
- უჩვეულო შეკვეთა თუ გქონიათ?
- რაიმე უჩვეულო შეკვეთა არ მახსენდება. ერთხელ მთხოვეს ვიკინგის რქებიანი ჩაფხუტი დამემზადებინა. უჩვეულო ნიღბებს ძირითადად ჩემთვის ვქმნი ხოლმე. მათი გამოყენება ინტერიერისთვისაც შეიძლება. ძირითადად იაპონურ და აზიურ პერსონაჟებზე მაქვს აქცენტი, ანუ სინთოისტურ ღვთაებებსა და პერსონაჟებზე.
- ქართული მითოლოგიური პერსონაჟის ნიღაბი არ არის მათ შორის?
- ახლა მინდა, რომ ნადირობის ქალღმერთის დალის ნიღაბი გავაკეთო. მითოლოგიური პერსონაჟები საინტერესოა და კონკრეტულ ემოციას გამოხატავს – სიკეთეს, სიხარულს, აგრესიას... თუმცა არის ნიღბები, რომელიც არაფერს გამოხატავს, უემოციოა.
- უემოციო ნიღაბს რისთვის იყენებენ?
- ახლა მაქვს ერთი პოეტური ნიღაბი, რომელიც ჩემთვის დავამზადე, ის არანაირ ემოციას არ გამოხატავს და ცარიელია.
- პოეტური ნიღაბი უემოციო და ცარიელია?
- ახლავე აგიხსნით: პოეზიის შემთხვევაში ეს ნიღაბი უემოციო იმიტომაა, რომ კონკრეტულ შემთხვევაში მინდა ემოცია ნიღბისგან კი არა, ლექსიდან და სიტყვებიდან მოდიოდეს.
- ნიღბების ბრენდზე არ გიფიქრიათ?
- დიახ, მინდა, რომ ჩემი ნიღბების ბრენდი შევქმნა და „ხელკეთა“ დავარქვა. საერთოდ მარტო ნიღბებზე არ ვარ ორიენტირებული, ამავდროულად ვხატავ, ვქმნი სკულპტურებს და ქვის ბარელიეფებს. უბრალოდ, ყველაფერი ხარჯებთანაა დაკავშირებული და ნიღბებზე ამიტომ შევჩერდი.
- უახლოეს დროში რაიმე ჩანაფიქრი ხომ არ გაქვთ?
- გადავწყვიტე შევქმნა ახალი ტრენდი – ჩინური ზოდიაქოს 12 ნიშნის გამოყენებით გავაკეთო ნიღბები, რომელსაც ჩვეულებრივ პირბადედაც გამოიყენებენ. მოკლედ, ეს ისეთი თემაა, რომელიც შემოქმედებით ფანტაზიას დიდ გასაქანს აძლევს.
- როგორია თქვენი დღევანდელი, ასე ვთქვათ, შეუნიღბავი სათქმელი, რომლითაც ადამიანებს შეგიძლიათ მიმართავთ?
- მათ ასე ვეტყოდი: გინდ ცუდად იყო, გინდ კარგად, მოუხადე სამყაროს მადლობა ყველაფრისთვის და როგორც ერთმა მაგარმა ადამიანმა მითხრა ერთხელ, მეც გეტყვით: ძალა არის შენში! ხანდახან, როცა გაჩერდები, დაფიქრდები, ბევრჯერ დაეცემი, დაგავიწყდება ვინ ხარ, სისულელეს ჩაიდენ, ბევრჯერ მაღლაც ახვალ, გულიც აგიცრუვდება ან რაიმე გაგახარებს – ეს ყველაფერი შენი გზაა, რომელსაც თავად ირჩევ როგორ წარმართო. ცხოვრება შენი მასწავლებელია, ყოველგვარი ადამიანური გასწავლის ამ გზაზე სიარულს. იყავი შეუპოვარი და არასდროს უთხრა თანადგომაზე უარი მას, ვისაც მართლა ძალიან სჭირდება...
წაულების „შურისძიება“: დანიას ახალი თავსატეხი გაუჩნდა – დახოცილი წაულები მიწიდან ამოდიან
(განახლებულია 21:14 26.11.2020)
ცოტა ხნის წინ დანიაში კორონავირუსის საფრთხის გამო განადგურებულმა წაულებმა ქვეყანას ახალი პრობლემა გაუჩინეს.თბილისი, 26 ნოემბერი — Sputnik. წაულების ნაჩქარევი მასობრივი დახოცვის შემდეგ დანიას ახალი თავსატეხი გაუჩნდა, იუწყება გამოცემა The Guardian.
გამოცემის ინფორმაციით, მრავალი ათასი ცხოველი მცირე სიღრმის ორმოებში დაფლეს და ახლა ისინი მიწის ზედაპირზე იწყებენ „ამოსვლას“.
დასავლეთ იუტლანდიის პოლიცია, სადაც რამდენიმე ათასი წაულა სამხედრო პოლიგონზე დაფლეს, ცდილობს რამენაირად წინააღმდეგობა გაუწიოს საშინელ მოვლენას და სამარხებს ზემოდან მიწას აყრის.
„ნეშტების გახრწნის შედეგად წარმოიქმნა გაზები. ამის გამო ნეშტები გაიბერა და ახლა ეს წაულები მიწის ზემოთ ამოდიან“, — განმარტა ეროვნული პოლიციის ოფიციალურმა წარმომადგენელმა თომას კრისტენსენმა.
როგორც ირკვევა, ყველაფერი ნიადაგის ტიპზეა დამოკიდებული. გამომდინარე იქიდან, რომ დასავლეთ იუტლანდიაში ქვიშიანი გრუნტია, ის ძალიან მსუბუქია და ერთი მეტრის სიღრმეზე გათხრილი ტრანშეები საკმარისი არ გამოდგა ცხოველების ნეშტების „შესაკავებლად“.
გარდა ამისა, ადგილობრივი მასმედია შიშობს, რომ განადგურებული ცხოველები შესაძლოა ტბებთან და წყალქვეშა წყლებთან ახლოსაა დამარხული, რამაც შეიძლება ნიადაგისა და სასმელი წყაროების დაბინძურება გამოიწვიოს.
როგორც დანიის გარემოს დაცვის სამინისტრო აცხადებს, მოვლენა „დროებითია და ხრწნის პროცესთანაა დაკავშირებული“. სამინისტრო ირწმუნება, რომ ტერიტორიაზე 24-საათიანი კონტროლი დაწესდება მანამ, სანამ სპეციალური წინაღობა არ აიგება „ადამიანებისა და ცხოველების პოტენციური საფრთხისგან დასაცავად“.
თემები:
2021 წლის ჰოროსკოპი: ქალწული – ფინანსები, სიყვარული, ჯანმრთელობა
(განახლებულია 10:07 25.11.2020)
როგორი იქნება 2021 წელი ქალწულებისთვის, რას მოუტანს ის ამ ნიშნით დაბადებულ ქალებსა და მამაკაცებს ცხოვრების სხვადასხვა სფეროში – გაეცანით ჩვენს ჰოროსკოპს2021 – თეთრი ხარის წელიწადი მარტივი არ იქნება, მაგრამ რამდენადაც ქალწულები ზოდიაქოს ბრძენ ნიშანთა რიცხვს განეკუთვნებიან, ისინი ნებისმიერი პრობლემიდან გარკვეული გაკვეთილის გამოტანას ცდილობენ, რათა ერთი და იგივე შეცდომა არ გაიმეორონ. 2021 წელს ეს პრობლემები, ძირითადად, უმნიშვნელო იქნება და ხშირად თავად ქალწულების გადაწყვეტილებაზე არ იქნება დამოკიდებული.
ქალწული: ანალიტიკოსი, ორგანიზებული, მოწესრიგებული - ზოგადი დახასიათება>>
ქალწული მამაკაცი
მამაკაც ქალწულებს, შესაძლოა, რაღაც გეგმები ჩაუვარდეთ, ჰქონდეთ გარკვეული გაუგებრობები და თავდაჯერებულობის მოულოდნელი შერყევები. ბევრი სირთულე არაპროგნოზირებადი იქნება, რაც გადაწყვეტილების მოძებნის მცდელობაზე უარყოფითად აისახება. ასტროლოგები გირჩევენ, ყოველგვარ მოვლენას რაც შეიძლება მარტივად შეხედოთ.
ფინანსები და სამუშაო: ქალწულებისთვის ყველაზე პროდუქტიული დრო გაზაფხულის პირველი ნახევარი და შემოდგომის მიწურული იქნება. იღბალი ყველა პროფესიის წარმომადგენლების გვერდით დადგება. თქვენ მხოლოდ მოტივაცია და ენთუზიაზმი დაგჭირდებათ. ექსპერტები გირჩევენ, ფულთან დაკავშირებით იფრთხილოთ, ნებისმიერი ნივთი დაფიქრებით იყიდოთ და თანხა ქარს არ გაატანოთ.
სიყვარული და ურთიერთობები: სიყვარულში ქალწულ მამაკაცებს ძალიან გაგიმართლებთ. ეს განსაკუთრებით მათ ეხება, ვისაც თავისი მეორე ნახევარი ჯერ არ უპოვია. ვარსკვლავები და პლანეტები გააძლიერებენ თქვენს მომხიბვლელობას, რაც საწინააღმდეგო სქესის წარმომადგენლებზე განსაკუთრებული შთაბეჭდილების მოხდენაში დაგეხმარებათ.
განწყობა და ჯანმრთელობა: 2021 წელს ქალწულმა მამაკაცებმა ჯანმრთელობას ყურადღება უნდა მიაქციოთ, თუ ასე არ მოიქცევით, შესაძლოა, პრობლემები გაჩნდეს. არ შეიძლება, ყურადღება არ მიაქციოთ ორგანიზმის სიგნალებს იმის თაობაზე, რომ რაღაც წესრიგში არაა.
ზოდიაქოს ყველაზე ქარიზმატული ნიშნები>>
ქალწული ქალი
2021 წელი ქალწულებს ბევრ სასიამოვნო სიახლეს გპირდებათ. იანვრის დასაწყისში შესაძლებელი იქნება ადრე გაწეული სამუშაოს პირველი ნაყოფის მიღება. საუკეთესო იქნება თქვენთვის დროის მუშაობაში ინვესტირება, მაგრამ, ამავდროულად, არ უნდა დაივიწყოთ დროული დასვენებაც. ასტროლოგები ასევე გირჩევენ, რომ სასურველი რეალობად არ მიიღოთ.
ფინანსები და სამუშაო: ფინანსურ სფეროში ქალმა ქალწულებმა აუცილებლად უნდა მოუსმინოთ და ენდოთ საკუთარ ინტუიციას, რომელიც ზოდიაქოს ყველა სხვა ნიშანს შორის თქვენთვის ყველაზე მძლავრი იარაღი გახდება. მეექვსე გრძნობა განსაკუთრებით დაეხმარება შემოქმედებით სფეროებში მოღვაწე ქალწულებს. ძვირადღირებული ნივთების შეძენა უპრიანი ზაფხულში იქნება, სხვა დროს, სჯობს, ამისგან თავი შეიკავოთ.
სიყვარული და ურთიერთობები: ამ ნიშნის ქალებს, მამაკაცების მსგავსად, ვარსკვლავები მომხიბვლელობისა და ქარიზმის განსაკუთრებულ აურას გიბოძებენ. გრძნობებთან დაკავშირებულ საკითხებში ქალწულები წარმატებებს უკვე 2021 წლის პირველივე დღეებიდან მიაღწევთ. შეგიძლიათ პაემანზე წასვლა, ინიციატივის გამოჩენა, მაგრამ მოვლენების დაჩქარება არ ივარგებს.
ყველაზე, ყველაზე... ზოდიაქოს ნიშნების ძლიერი მხარეები>>
განწყობა და ჯანმრთელობა: ამ სფეროში ქალ ქალწულებს უფრო მშვიდი წელი გელოდებათ, ვიდრე მამაკაცებს. განწყობის მკვეთრი ცვლილებები, რომლებიც თქვენს გეგმებს დაარღვევს და იღბალს დაგაშორებთ, მოსალოდნელი არ არის. ზამთარსა და გაზაფხულზე კარგი იქნება, თუ ნეგატიური ჩვევებისგან გათავისუფლდებით.
გაეცანით ასევე 2021 წლის ჰოროსკოპს ვერძების, კუროების, ტყუპების, კირჩხიბებისა და ლომებისთვის.