რეჯეფ ერდოღანი

ერდოღანმა პომპეოსთან შესახვედრად ვერ მოიცალა

85
(განახლებულია 14:40 17.11.2020)
მაიკ პომპეოს ვიზიტი სტამბულში კოსტანტინოპოლის პატრიარქ ბართლომესთან შეხვედრის მიზნით იყო დაგეგმილი, ქვეყნის დედაქალაქში ჩასვლა კი გრაფიკით გათვალისწინებული არ იყო.

თბილისი, 17 ნოემბერი — Sputik. თურქეთის პრეზიდენტმა რეჯეფ თაიიფ ერდოღანმა ვერ მონახა დრო ქვეყანაში ვიზიტით მყოფ აშშ-ის სახელმწიფო მდივან მაიკ პომპეოსთან შესახვედრად, განუცხადა ჟურნალისტებს სახელმწიფო დეპარტამენტის ერთ-ერთმა მაღალჩინოსანმა.

„სახელმწიფო მდივანს, თურქეთის ოფიციალურ პირებს — საგარეო საქმეთა მინისტრ ჩავუშოღლუს ჩათვლით და, ვფიქრობ, პრეზიდენტ ერდოღანსაც სურდათ ეს მომხდარიყო, მაგრამ არ მოხდა. არ მოხდა იმიტომ, რომ პრეზიდენტ ერდოღანის განრიგი შეიცვალა და მან ვერ შეძლო ჩატეულიყო იმ პარამეტრებში, რომლებიც ჩვენ დავუდეთ საფუძვლად სახელმწიფო მინისტრის ვიზიტს“, — განაცხადა დიპლომატმა სტამბულში გამართულ ბრიფინგზე.

სახელმწიფო დეპარტამენტის წარმომადგენელმა აღიარა, რომ ვაშინგტონსა და ანკარას შორის უთანხმოება არსებობს, მაგრამ ჟურნალისტების დაჟინებულ შეკითხვაზე, მაინც რა შეიძლებოდა სწყენოდა ერდოღანს, მან განაცხადა, რომ საქმე მხოლოდ და მხოლოდ თურქეთის ლიდერის განრიგში იყო.

„არ მგონია, თურქეთის ხელისუფლება ფიქრობდეს... რომ მათ ხელი ჰკრეს. ეს განრიგის საკითხი იყო. თურქებმა ძალიან კარგად იციან აშშ-ის ადმინისტრაციის უმაღლესი ეშელონებიდან — პრეზიდენტიდან ქვემოთ, როგორია ჩვენი შეხედულებები იმ საკითხებზე, რომლებშიც ჩვენ ვერ ვთანხმდებით“, — დაამატა ამერიკელმა მაღალჩინოსანმა.

უთანხმოებებზე საუბრისას დიპლომატმა დააზუსტა, რომ საუბარია სხვადასხვა რეგიონში არსებულ ვითარებაზე — აღმოსავლეთ ხმელთაშუაზღვისპირეთის, ლიბიისა და სირიის ჩათვლით.

აღსანიშნავია, რომ მაიკ პომპეო სტამბულს კოსტანტინოპოლის პატრიარქ ბართლომესთან შეხვედრის მიზნით ეწვია, ანკარაში ჩასვლა კი მის გრაფიკში დაგეგმილი არ იყო.

თურქეთსა და აშშ-ს შორის ურთიერთობებში კრიზისი მას შემდეგ დაიწყო, რაც ანკარამ რუსეთისგან ჰაერსაწინააღმდეგო თავდაცვის სისტემები (С-400) შეიძინა. ვაშინგტონი ანკარისგან გარიგებაზე უარის თქმასა და რუსული სისტემის ამერიკული კომპლექსი Patriot-ით ჩანაცვლებას მოითხოვდა, ემუქრებოდა რა ანკარას გამანადგურებელ F-35-ის მიყიდვის შეწყვეტითა და CAATSA-ს შესაბამისი სანქციების დაწესებით. ანკარამ უარი თქვა აშშ-ის წინადადებაზე და ამ დათმობაზე არ წავიდა.

 

85
თემები:
მსოფლიო დღეს (2333)
კორონავირუსის ეპიდემია თურქეთში

თურქეთი კორონავირუსის გამო შეზღუდვებს ამკაცრებს და კომენდანტის საათს აწესებს

6
(განახლებულია 00:49 01.12.2020)
კომენდანტის საათი იმოქმედებს 21:00-დან 5:00 საათამდე სამუშაო დღეებში, ასევე პარასკევის 21:00 საათიდან ორშაბათის 05:00 საათამდე. საჯარო დაწესებულებები 10:00-დან 16:00 საათამდე იმუშავებენ

თბილისი, 1 დეკემბერი – Sputnik. თურქეთში 1 დეკემბრიდან შეჩერდება აბანოების, აუზების და სპორტდარბაზების მუშაობა, სავაჭრო ცენტრებში მოქალაქეების შესვლა შეიზღუდება, განაცხადა თურქეთის პრეზიდენტმა რეჯეფ თაიიფ ერდოღანმა. ამის შესახებ წერს РИА Новости.

„აბანოები, საუნები, აუზები, სპორტდარბაზები სამშაბათიდან მუშაობას წყვეტენ. სავაჭრო ცენტრებში შეუშვებენ მომხმარებელთა მხოლოდ გარკვეულ რაოდენობას და ისიც მხოლოდ ციფრული კოდით. ასევე შეიზღუდება ღია სივრცეებში ხალხმრავალი ადგილების მონახულება. კომენდანტის საათი იმოქმედებს 21:00-დან 5:00 საათამდე სამუშაო დღეებში, ასევე პარასკევის 21:00 საათიდან ორშაბათის 05:00 საათამდე. საჯარო დაწესებულებები 10:00-დან 16:00 საათამდე იმუშავებენ“, - განაცხადა ერდოღანმა ტელემიმართვისას.

„ჩვენ ვსწავლობთ ყველა ვაქცინას, რომელიც ცდების ბოლო საფეხურზე გადავიდა. ყველა ჩვენს მოქალაქეს ექნება შესაძლებლობა, ვაქცინა უფასოდ მიიღოს. ვაქცინაცია მომდევნო თვიდან დაიწყება. ჩვენ უკვე ვაქცინის 50 მილიონი დოზა შევუკვეთეთ“, - აღნიშნა თურქეთის ლიდერმა.

როგორც ადრე ქვეყნის ჯანდაცვის მინისტრმა ფაჰრეთინ ქოჯამ განაცხადა, კორონავირუსის პანდემიამ თურქეთის ზოგ რეგიონში, მათ შორის სტამბოლში, მესამე პიკს მიაღწია. ბოლო კვირის განმავლობაში ქვეყანაში კორონავირუსის ახალი შემთხვევების დადასტურების და მისგან გარდაცვალების რამდენჯერმე რეკორდული მაჩვენებლები დაფიქსირდა.

გასულ დღე-ღამეში თურქეთში კორონავირუსით ინფიცირების 31 219 შემთხვევა გამოვლინდა, გარდაიცვალა 188 ადამიანი, ეს პანდემიის დაწყებიდან რეკორდული მაჩვენებელია, ამას ქვეყნის ჯანდაცვის სამინისტროს მონაცემები მოწმობს.

6
თემები:
COVID-19-ის პანდემია მსოფლიოში
მოჰსენ ფაჰრიზადე

ირანული მედია: ფაჰრიზადე კოსმოსიდან მართვადი იარაღითაა მოკლული

11
(განახლებულია 09:09 01.12.2020)
ირანის ხელისუფლება ფიზიკოს მოჰრენ ფაჰრიზადეს მკვლელობაში ისრაელს სდებს ბრალს და არ აპირებს, უპასუხოდ დატოვოს „სახელმწიფოებრივი ტერორიზმის“ აქტი

თბილისი, 1 დეკემბერი — Sputnik. ირანელი ფიზიკოსი მოჰსენ ფაჰრიზადე კოსმოსიდან მართვადი იარაღით მოკლეს, იუწყება ტელეარხი Al-Alam–ი.

„მკვლელობაში გამოყენებული, ისრაელის წარმოების იარაღი თანამგზავრის მეშვეობით კონტროლდებოდა“, — წერს გამოცემა წყაროზე დაყრდნობით.

ამასთან სააგენტო Fars–ის ინფორმაციით, ფიზიკოსს 150 მ დაშორებიდან ესროლეს  დისტანციური მართვის იარაღიდან და ფაჰრიზადესა და მისი დაცვის წევრების გარდა ადგილზე სხვა არავინ იყო.

ოფიციალურმა თეირანმა ასევე დაადასტურა, რომ უშუალოდ თავდასხმის ადგილზე შემსრულებლები არ ყოფილან.

​მოჰსენ ფაჰრიზადე 27 ნოემბერს მოკლეს თეირანის მახლობლად, როდესაც ის ქალაქ აბსარდისკენ მიემგზავრებოდა დაჯავშნული ავტომობილით, დაცვის სამი მანქანის თანხლებით. მძიმედ დაჭრილი ფიზიკოსი საავადმყოფოში ვერტმფრენით გადააფრინეს, მაგრამ ექიმებმა მისი გადარჩენა ვერ შეძლეს.

ირანის საგარეო საქმეთა მინისტრ მოჰამად ჯავად ზარიფის ვარაუდით, გამორიცხული არ არის, რომ ფაჰრიზადეს მკვლელობაში, რომელსაც ისლამური რესპუბლიკის ბირთვული პროგრამის ერთ-ერთ ავტორად მოიაზრებდნენ, ისრაელის ხელი ერიოს. მან მოუწოდა საერთაშორისო თანამეგობრობას, განსაკუთრებით კი ევროკავშირს, შეწყვიტონ ორმაგი სტანდარტები და დაგმონ „სახელმწიფოებრივი ტერორიზმის“ აქტი.

 

11
თემები:
მსოფლიო დღეს (2333)
კერძო ჰოსტელი

საქართველოს ტურისტული ინდუსტრიის ალიანსი შეზღუდვების გადახედვას ითხოვს

0
(განახლებულია 09:04 01.12.2020)
სექტორის კომპანიები საბანკო კრედიტების გადავადებას ითხოვენ 2021 წლის ზაფხულამდე როგორც იურიდიული, ისე ფიზიკური პირებისთვის, რომლებმაც პანდემიის გამო სამუშაო დაკარგეს

თბილისი, 1 დეკემბერი – Sputnik. საქართველოს ტურისტული ინდუსტრიის ალიანსის წევრმა ორგანიზაციებმა პრემიერ–მინისტრ გიორგი გახარიას ამ სექტორის მუშაობასთან დაკავშირებული შეზღუდვების გადახედვის თხოვნით მიმართეს.

რას აცხადებენ საქართველოს ბიზნეს–ასოციაციაში ახალი ლოკდაუნის შესახებ>>

ეპიდემიოლოგიური ვითარების გაუარესების გამო საქართველოს ხელისუფლებამ კორონავირუსთან ბრძოლის ორთვიანი გეგმა დაამტკიცა, რომლის მიხედვით ამ პერიოდში ქვეყანაში რიგი შეზღუდვები იმოქმედებს. გეგმა 28 ნოემბერი – 31 იანვრის პერიოდს მოიცავს.

„საქართველოს ტურიზმის ინდუსტრიის ალიანსი მხარს უჭერს მთავრობის ყველა, დროულ და აუცილებელ ზომას ჩვენი ქვეყნის მოქალაქეების ჯანმრთელობის დასაცავად და კერძო სექტორის მხარდასაჭერად. ამავე დროს, ალიანსის თითოეული წევრი გამოხატავს სრულ მზაობას, ჩაერთოს ყველა არსებული ადამიანური რესურსით საერთო გამოწვევის დაძლევაში და ერთად შევიმუშაოთ დამატებითი მექანიზმები სექტორის გადასარჩენად“, – ნათქვამია მიმართვაში.

ალიანსის წევრები ითხოვენ „წარიმართოს პრობლემებზე უფრო ღრმად ორიენტირებული და ეფექტური დიალოგი“ ბიზნეს–სექტორსა და მთავრობის ეკონომიკურ გუნდს შორის.

ასოციაციის წევრები თავის მიმართვაში ითხოვენ დროებითი აკრძალვის გაუქმებას სარესტორნო სექტორის მუშაობაზე, ზამთრის კურორტების მუშაობის აღდგენას ყველა რეგულაციის სავალდებულო დაცვით. ასევე პრემიერ–მინისტრისადმი წერილში არის თხოვნა, რომ გადავადდე საბანკო კრედიტები 2021 წლის ზაფხულამდე როგორც იურიდიული, ისე ფიზიკური პირებისთვის, რომლებიც ამ სფეროში იყვნენ დასაქმებული და პანდემიის გამო სამუშაო დაკარგეს.

ასოციაციის წევრები პრემიერ–მინისტრს სთხოვენ სამუშაო ჯგუფის შესახებ, რომლის მუშაობაშიც ჩაერთვებიან სექტორის წარმომადგენლები ყველა რეკომენდაციის შესაბამისად.

მემორანდუმს ტურიზმის ინდუსტრიის ალიანსის შესახებ 2020 წლის 5 მაისს მოეწერა ხელი. მასში 27 ორგანიზაცია შევიდა. ალიანსი შეიქმნა კომუნიკაციისა და იმ გამოწვევების გადასალახავად, რომელთა წინაშე აღმოჩნდნენ ტურისტული სექტორის წარმომადგენლები კორონავირუსის პანდემიის გამო.

პრემიერ–მინისტრისადმი მიმართვას ხელს აწერს 27–ვე ორგანიზაცია, რომელთა შორის არიან საქართველოს გასტრონომიის ასოციაცია, საქართველოს ეკოტურიზმის ასოციაცია, სასტუმროების და რესტორნების ფედერაცია, საქართველოს გიდების ასოციაცია, გასტრონომიული ტურიზმის ბიზნეს–ასოციაცია, საქართველოს ტურიზმის ასოციაცია, საქართველოს სომელიეთა ასიციაცია, გუდაურის ტურიზმის ასოციაცია და სხვ.

0
თემები:
COVID-19 საქართველოში