პლანეტების აღლუმი

არც ისე შორს: ნაპოვნია 24 პლანეტა დედამიწაზე უკეთესი სასიცოცხლო პირობებით

153
(განახლებულია 16:15 06.10.2020)
ამერიკელმა და გერმანელმა ასტრობიოლოგებმა რამდენიმე ათასი ეგზოპლანეტის მონაცემები გააანალიზეს და მათგან ისეთები გამოყვეს, რომლებზეც სიცოცხლისთვის დედამიწაზე უკეთესი პირობებია.

თბილისი, 6 სექტემბერი — Sputnik. კოსმოსში არის პლანეტები, რომლებიც სიცოცხლისთვის უფრო ხელსაყრელია, ვიდრე დედამიწა, ასკვნიან ამერიკელი და გერმანელი ასტრობიოლოგები, რომელთა კვლევაც გამოქვეყებულია ჟურნალში Astrobiology.

მკვლევარებმა ამ დროისათვის ცნობილი 4,5 ათასი ეგზოპლანეტის ტემპერატურის, სინოტივისა და სხვა ფაქტორების შესახებ მონაცემები გააანალიზეს და მათგან 24 გამოყვეს. ეს პლანეტები, მათი აზრით, დედამიწაზე ასაკოვანი, თბილი და, შესაძლოა, უფრო ტენიანიცაა. მკვლევარები ვარაუდობენ, რომ ასეთ პლანეტებზე სიცოცხლის განვითარებისთვის დედამიწაზე მეტი შესაძლებლობა არსებობს.   

მეცნიერების თქმით, ყველა ეს პლანეტა დედამიწიდან 100 სინათლის წლითაა დაშორებული. მათი შესწავლა მომავალში როგორც NASA-ს, ისე ევროპის კოსმოსური სააგენტოს ტელესკოპებით — „ჯეიმს უებით“, LUVIOR-ით და PLATO-თი იქნება შესაძლებელი.

„ახალი კოსმოსური ტელესკოპებით ჩვენ მეტ ინფორმაციას მივიღებთ. ამიტომ მნიშვნელოვანია, რომ სწორი სამიზნეები ამოვარჩიოთ... არ უნდა მოვიმართოთ მეორე დედამიწის ძიებაზე, იმიტომ რომ შეიძლება არსებობდეს პლანეტები, რომლებიც სიცოცხლისთვის უფრო ხელსაყრელიც კია, ვიდრე ჩვენი პლანეტა“, — აცხადებს კვლევის ხელმძღვანელი, პროფესორი დირკ შულცე-მაკუხი.

მეცნიერების აზრით, სიცოცხლისთვის ბევრად ვარგისია ის პლანეტები, რომლებიც დედამიწაზე 10–50%-ით დიდია, ვინაიდან ისინი, უფრო მძლავრი გრავიტაციის გამო, მეტი ხნის განმავლობაში ინარჩუნებენ შიდა სიმხურვალეს და ასევე ატმოსფეროს.

გარდა ამისა, მკვლევარები ამბობენ, რომ სიცოცხლე შედარებით იოლად შეიძლება განვითარდეს დედამიწაზე უფრო მაღალი ტენიანობისა და ოდნავ მეტი (დაახლოებით 5 გრადუსი ცელსიუსით) ტემპერატურის პირობებში.

ამასთან  მეცნიერები აღიარებენ, რომ ამ 24 პლანეტის მიკუთვნება „დასასახლებლად ზევარგისების“ კატეგორიისთვის სულაც არ ნიშნავს იმას, რომ მათზე აუცილებლად არის სიცოცხლე, უბრალოდ, მათზე არსებობს ყველა პირობა რთული სიცოცხლის განვითარებისთვის.

153
თემები:
მსოფლიო და მეცნიერება (527)
არჩევნები უკრაინაში

კენჭისყრა კარანტინის პირობებში: უკრაინელები ადგილობრივ თვითმმართველობას ირჩევენ

24
უკრაინელები მაჟორიტარული სისტემით ირჩევენ დეპუტატებს და იმ ტერიტორიული თემების სოფლების, დაბების და ქალაქების საბჭოების თავმჯდომარეებს, სადაც 10 ათასამდე ამომრჩეველი ცხოვრობს

თბილისი, 25 ოქტომბერი – Sputnik. უკრაინაში კვირას ადგილობრივი თვითმმართველობის ორგანოების არჩევნები მიმდინარეობს, იუწყება РИА Новости.

წელს არჩევნები იმართება საერთო ეროვნული კარანტინის პირობებში, რომელიც კორონავირუსის აფეთქების გამო 12 მარტს დაწესდა და მინიმუმ წლის ბოლომდე გაგრძელდება. უბნებზე მისულ ამომრჩევლებს მოუწევთ რამდენიმე ეპიდსაწინააღმდეგო წესის დაცვა, რომლებიც მინისტრთა კაბინეტმა სექტემბერში ოფიციალურად დაამტკიცა.

ადგილობრივი არჩევნები ახალი საარჩევნო კანონით ტარდება. უკრაინელები მაჟორიტარული სისტემით ირჩევენ დეპუტატებს და იმ ტერიტორიული თემების სოფლების, დაბების და ქალაქების საბჭოების თავმჯდომარეებს, სადაც 10 ათასამდე ამომრჩეველი ცხოვრობს. დეპუტატებს და იმ ტერიტორიული თემების სოფლების, დაბების და ქალაქების საბჭოების თავმჯდომარეებს, სადაც 10 ათასზე მეტი ამომრჩეველი ცხოვრობს, პროპორციული სისტემით ღია სიებით ირჩევენ.

COVID-19-ის აქტიური ფორმის მქონე ამომრჩევლები, რომლებიც საავადმყოფოებში ან სახლში თვითიზოლაციაში იმყოფებიან, ხმის მიცემას მკურნალობის ადგილის მიხედვით გაცვლითი ბრიგადების დახმარებით შეძლებენ.

მიმდინარე არჩევნების შედეგები 6 ნოემბერს გაირკვევა და გამოქვეყნდება ხუთი დღის განმავლობაში, დიდ ქალაქებში მერის არჩევნების მეორე ტურის შემთხვევაში - არაუგვიანეს 20 ნოემბრისა. ადგილობრივი არჩევნები დონბასის ტერიტორიების ნაწილში არ გაიმართება.

უკრაინაში კორონავირუსით ინფიცირების შემთხვევების რაოდენობა ბოლო დღე-ღამეში 6088-ით გაიზარდა, გარდაიცვალა 102 ადამიანი. პანდემიის დაწყებიდან 25 ოქტომბრამდე ქვეყანაში 343 498 შემთხვევა გამოვლინდა, გამოჯანმრთელდა 141 508 ადამიანი, აქედან ბოლო დღე-ღამეში - 1753.

24
თემები:
მსოფლიო დღეს
საათის გადაწევა

ევროპის ქვეყნები ზამთრის დროზე გადავიდნენ

136
(განახლებულია 11:32 25.10.2020)
ევროკავშირის ყველა სახელმწიფოში დრო ერთნაირად იცვლება - კვირას დილის 4 საათზე, რადგან ეს მნიშვნელოვანია საერთაშორისო სარკინიგზო და საჰაერო გადაზიდვებისთვის

თბილისი, 25 ოქტომბერი — Sputnik. კვირას ღამით თითქმის ყველა ევროპულმა ქვეყანამ საათის ისრები ერთი საათით უკან გადაწია - ქვეყნები ზამთრის დროზე გადავიდნენ.

დრო ყველა სახელმწიფოში ერთდროულად იცვლება - კვირას დილის 4 საათზე, რადგან ეს მნიშვნელოვანია საერთაშორისო სარკინიგზო და საჰაერო გადაზიდვებისთვის. პროცესი ყოველთვის ერთ და იგივე დღეებში ხდება - მარტის და ოქტომბრის ბოლო კვირა დღეს. კვირის ადრეული დილა იმიტომ შეირჩა, რადგან ყველაზე ნაკლებ დისკომფორტს იწვევს, რადგან ამ დღეს ტრაფიკი ყველაზე ნაკლებია.

საათის ისრების გადაწევა მთელს ევროკავშირშია მიღებული.

ამჟამად რეალიზაციის პროცესშია ფინეთის ინიციატივა, რომელიც ევროკავშირში საათების ისრების გადაწევის პრაქტიკის შეწყვეტას გულისხმობს.

ევროპარლამენტმა 2019 წლის გაზაფხულზე კენჭი უყარა ფინეთის წინადადებას. მოსალოდნელია, რომ ეს იქნება ევროპარლამენტის და ევროპის კავშირის საბჭოს ერთობლივი გადაწყვეტილება. ამის შემდეგ ეს ინიციატივა ყველა წევრ სახელმწიფოში ეროვნულ დონეზე იქნება რატიფიცირებული.

ევროპის კავშირის საბჭოს ეს წინადადება ჯერ არ განუხილავს, ეს ნიშნავს, რომ გადაწყვეტილება შეიძლება ამოქმედდეს არა უადრეს 2022 წლისა. დროის შეცვლის შესახებ დისკუსიაც კორონავირუსის პანდემიის გამო გადაიდო.

საქართველო ზამთრის დროზე არ გადადის. საქართველოს პრეზიდენტის შესაბამისი ბრძანებულება „საქართველოს ტერიტორიაზე მოქმედი დროის ათვლის შესახებ“ 2005 წლის 20 ოქტომბერს გამოიცა. შესაბამისად, საქართველოში ოქტომბრის ბოლო კვირა დღეს საათის ისრები ერთი საათით უკან მას მერე არ გადაწეულა.

136
თემები:
მსოფლიო დღეს
ლიანა ჯოჯუა

ლიანა ჯოჯუამ ბრძოლა ვეღარ გააგრძელა - ამერიკელმა მას ცხვირი გაუტეხა

0
ქართველმა სპორტსმენმა UFC-ს ეგიდით უკვე სამი ბრძოლა ჩაატარა, საიდანაც ორი წააგო, ერთი მოგებით დაასრულა

თბილისი, 25 ოქტომბერი – Sputnik. ქართველი სპორტსმენი ლიანა ჯოჯუა („ძუ მგელი“) დამარცხდა ამერიკელ მირანდა მავერიკთან UFC-ს (Ultimate Fighting Championship) ტურნირზე, რომელიც ამ დღეებში აბუ-დაბიში იმართება.

მსაჯებმა ბრძოლა პირველივე რაუნდში გააჩერეს, რადგან ამერიკელმა ჯოჯუას ცხვირი გაუტეხა. ქართველი სპორტსმენი ბრძოლის გაჩერების კატეგორიული წინააღმდეგი იყო, მაგრამ ტრავმა ძალიან სერიოზული აღმოჩნდა.

„სამწუხაროდ, ასეც ხდება. ბრძოლის გაგრძელება მინდოდა, მაგრამ ამის შესაძლებლობა არ მომეცა“, - დაწერა ჯოჯუამ თავის Instagram-ზე.

ბრძოლის დაწყებისთანავე მავერიკმა ხელის სიგრძეში უპირატესობა მოიპოვა. ჯოჯუას რამდენიმე მცდელობა ჰქონდა ფეხებში შეებოჭა მეტოქე, მაგრამ ყოველ მცდელობისას თავში პირდაპირი დარტყმა მიიღო. ერთ-ერთ ეპიზოდში კი იდაყვით ხისტი დარტყმა მიიღო, რომელიც ცხვირის გატეხვის მიზეზი გახდა. ექიმებმა ბრძოლის შეწყვეტის გადაწყვეტილება მიიღეს და ჯოჯუას ტექნიკური ნოკაუტი ჩაეთვალა.

ჯოჯუასთვის ეს UFC-ს ეგიდით მესამე ბრძოლა იყო, საიდანაც მან ორი წააგო, ერთი მოგებით დაასრულა.

0
თემები:
სპორტის ამბები