თბილისი, 5 ოქტომბერი — Sputnik. ბელგიის ახლად ჩამოყალიბებულ მთავრობაში ქვეყნის ვიცე–პრემიერის პოსტი ტრანსგენდერმა დაიკავა, რაც პირველი შემთხვევაა ევროკავშირში, იუწყება The Brussels Times–ი.
„ბელგიის მთავრობის შემადგენლობაში ვიცე–პრემიერის თანამდებობა ღია ტრანსგენდერმა პეტრა დე სუტერმა დაიკავა, თუმცა ეს თითქმის შეუმჩნეველი დარჩა ბელგიური მედიასაშუალებებისთვის“, — წერს გამოცემა.
გავრცელებული ინფორმაციით, დე სუტერი ევროპარლამენტის ყოფილი დეპუტატია, რომელიც ბელგიის მთავრობაში ფლამანდიის მწვანეთა პარტიიდან შევიდა.
როგორც თავად პეტრა დე სუტერი წერს Twitter–ზე, ის ამაყია იმით, რომ ბელგიასა და ევროკავშირის ქვეყნების უმეტესობაში „გენდერული კუთვნილება პრობლემა არ არის“.
I am proud that in 🇧🇪 and in most of 🇪🇺 your gender identity does not define you as a person and is a non-issue. I hope that my appointment as Minister and deputy PM can trigger the debate in countries where this is not yet the case. #fighttransphobia pic.twitter.com/WdgHu2gyy6
— Petra De Sutter (@pdsutter) October 4, 2020
ამასთან პოლიტიკოსმა იმედი გამოთქვა, რომ მისი მაგალითი დისკუსიების საფუძველი გახდება იმ ქვეყნებში, სადაც განსხვავებული ვითარება სუფევს.
აღსანიშნავია, რომ დე სუტერი განათლებით გინეკოლოგია და მანამდე გენტის უნივერსიტეტის რეპროდუქციული მედიცინის განყოფილებას ხელმძღვანელობდა. პოლიტიკური კარიერის განმავლობაში მას არასდროს დაუმალავს თავისი გენდერული ორიენტაცია და აქტიურად მონაწილეობდა ლგბტ მოძრაობის აქციებში.
ბელგიის ახალმა მთავრობამ მეფე ფილიპეს წინაშე ფიცი 1 ოქტომბერს დადო და ბოლო ორი წლის განმავლობაში პირველი სრულფასოვანი ფედერალური კაბინეტი გახდა.
