თბილისი, 17 ივნისი — Sputnik. თურქეთის ხელისუფლებამ, კორონავირუსით ინფიცირებულთა რაოდენობის მკვეთრი მატების შემდეგ, ისევ სავალდებულო გახადა სამედიცინო პირბადეების ტარება საზოგადოებრივ ადგილებში, იუწყება სააგენტო Associated Press.
გავრცელებული ინფორმაციით, ნიღბების ტარება საზოგადოებრივი თავშეყრის ადგილებში განმეორებით ხდება სავალდებულო ქვეყნის 81-დან 42 პროვინციაში.
„ჩვენი სანიტარულ-ეპიდემიოლოგიური კომიტეტები პროვინციებში განაგრძობენ კორონავირუსის გავრცელების წინააღმდეგ მიმართული გადაწყვეტილებების მიღებას. განსაკუთრებით იმ ქალაქებში, სადაც ინფიცირების შემთხვევების ზრდა შეინიშნება“, — განაცხადა თურქეთის ჯანდაცვის მინისტრმა ფაჰრეთინ კოჩამ.
ცნობილი ხდება, რომ დანარჩენ პროვინციებში, სამედიცინო პირბადეების ტარების გარდა, ასევე სავალდებულოა სოციალური დისტანციის დაცვა ტრანსპორტში, მაღაზიებსა და სავაჭრო ცენტრებში.
აღნიშნება, რომ კორონავირუსით ინფიცირებულთა რაოდენობამ მატება მას შემდეგ დაიწყო, რაც თურქეთში კაფეები, რესტორნები, სპორტდარბაზები, პარკები და პლაჟები გაიხსნა.
ოფიციალური ინფორმაციით, ბოლო პერიოდში COVID-19-ით ინფიცირებულთა სადღეღამისო რაოდენობა 1500 კაცს აჭარბებს. ეს მაშინ, როცა მანამდე დღე-ღამეში მაქსიმუმ 800–900 ადამიანი ინფიცირდებოდა.
