შსს-ს შენობა

საბერძნეთში დაკავებული საქართველოს ოთხი მოქალაქე იდენტიფიცირებულია

219
(განახლებულია 19:10 17.03.2019)
ერთ-ერთი დაკავებული „კანონიერი ქურდი“ გიორგი ენდელაძეა

თბილისი, 17 მარტი — Sputnik. საბერძნეთში საქართველოს პოლიციის ატაშესა და საბერძნეთის პოლიციის მიერ, საერთაშორისო საპოლიციო თანამშრომლობის ფარგლებში ჩატარებული ერთობლივი მუშაობის შედეგად, საბერძნეთში იდენტიფიცირებული იქნა დანაშაულებრივი ორგანიზებული ჯგუფი, რომლის წევრები საქართველოს მოქალაქეები არიან, აცხადებენ შსს-ში.

საქართველოს 4 მოქალაქე მიმდინარე წლის 14 მარტს, საბერძნეთში, ქალაქ ათენში დააკავეს.

დაკავებულებს შორის ერთ-ერთი, 1981 წელს დაბადებული, ე.წ. კანონიერი ქურდი გიორგი ენდელაძეა - მეტსახელად „თავა“. ასევე დაკავებული არიან: 1979 წელს დაბადებული თ.კ., 1978 წელს დაბადებული თ.ვ. და 1987 წელს დაბადებული ა.ვ. ბერძნული კანონმდებლობით, დაკავებულებს მრავალგზის ქურდობასა და ორგანიზებული დანაშაულებრივი დაჯგუფების შექმნაში ედებათ ბრალი.

ნივთმტკიცებად ამოღებულია მოპარული ნივთები, ასევე იარაღი, ჯავშანჟილეტები, ნიღბები, რომლებსაც ბოროტმოქმედები ქურდობის დროს იყენებდნენ. დაკავებულები ბინებს ორი წლის განმავლობაში ძარცვავდნენ და 200 ათასი ევროს ღირებულების ნივთები მოიპარეს.

საერთაშორისო ორგანიზებულ დანაშაულთან ბრძოლა შინაგან საქმეთა სამინისტროს ერთ-ერთ მთავარ პრიორიტეტს წარმოადგენს. ამ მიზნით, ქართველი სამართალდამცველები აქტიურად თანამშრომლობენ უცხოელ კოლეგებთან. საერთაშორისო საპოლიციო თანამშრომლობის ფარგლებში, საქართველოს შინაგან საქმეთა სამინისტრომ 2018 წლიდან დღემდე, ფრანგ, ბერძენ, ესპანელ და პოლონელ კოლეგებთან ერთად, ევროკავშირის წევრ ქვეყნებში 20 მასშტაბური ერთობლივი ოპერაცია ჩაატარა, რომელთა შედეგად, მძიმე დანაშაულების ბრალდებით დაკავებულ იქნა საქართველოს 141 მოქალაქე, მათ შორის 10 ე.წ. „კანონიერი ქურდი“, აცხადებენ უწყებაში.

 

219
თემები:
მსოფლიო დღეს–2018 (1694)
მზის ჩასვლა ზღვაზე

მზის მინიმუმი დაიწყო: გველის თუ არა გამყინვარება და მიწისძვრები?

161
(განახლებულია 17:15 29.05.2020)
გასული წლის დეკემბერში მეცნიერებმა გაავრცელეს ინფორმაცია, რომ მზის მინიმუმის დადგომა 2020 წლის აპრილისთვის იყო ნავარაუდევი — პლუს–მინუს ექვსი თვის ცთომილებით. ასე რომ, ჩვენ ან უკვე ვართ აღნიშნულ პერიოდში, ან მის ზღურბლზე ვდგავართ

თბილისი, 29 მაისის — Sputnik. მზის მინიმუმი, რომლის 2019-2020 წლებში  დადგომის თაობაზეც ჯერ კიდევ სამი წლის წინ ალაპარაკდნენ NASA–ს სპეციალისტები, საზოგადოების ნაწილის აზრით, სიცივეს, შიმშილსა და მიწისძვრებს მოიტანს,  იუწყება სამეცნიერო გამოცემა Science Alert–ი.

გამოცემა განმარტავს მზის მინიმუმის რაობასა და მის გავლენას დედამიწის მოსახლეობაზე.  

გასული წლის დეკემბერში აშშ–ის ოკეანური და ატმოსფერული კვლევების ეროვნულმა სააგენტომ (NOAA) გაავრცელა ინფორმაცია, რომ მზის მინიმუმის დადგომა 2020 წლის აპრილისთვის იყო ნავარაუდევი — პლუს–მინუს ექვსი თვის ცთომილებით. ასე რომ, ჩვენ ან უკვე ვართ აღნიშნულ პერიოდში, ან მის ზღურბლზე ვდგავართ. 

მეცნიერების თქმით, მზის ციკლს მისი მაგნიტური ველი განსაზღვრავს, რომელიც მიმართულებას ყოველ 11 წელიწადში ერთხელ იცვლის, თუმცა, რატომ ხდება ეს — ჯერჯერობით ზუსტად არ არის ცნობილი.

„მზის მინიმუმი — ეს დაბალი აქტივობის პერიოდია მზის 11 წლიან ციკლში. ამაში საშიში არაფერია. თუ ამ სტრიქონებს კითხულობთ, დიდი ალბათობით, უკვე რამდენიმე მინიმუმი გაქვთ გადატანილი შეუმჩნევლად“, — ნათქვამია სტატიაში.

ირკვევა, რომ დედამიწის მოსახლეობა ვერ შეიგრძნობს მზის ციკლების ცვალებადობას. მართალია, მზის მინიმუმში ულტრაიისფერი გამოსხივება მცირდება (რის გამოც დედამიწის ატმოსფერო თითქოს ცოტა იკუმშება), მაგრამ არა იმდენად, რომ ჩვენი დაცვა შეწყვიტოს. ასე რომ, მზის მინიმუმისას საფრთხე კოსმოსში მყოფ ასტრონავტებს ემუქრებათ, მაგრამ არანაირად დედამიწის მოსახლეობას.

რაც შეეხება გამყინვარებას, მიწისძვრებსა და შიმშილობას, მსგავსი მოლოდინები უკავშირდება 1816 წლის „უზაფხულო წელიწადს“, რომელიც სწორედ მზის მინიმუმს დაემთხვა. თუმცა გასათვალისწინებელია ისიც, რომ ეს იყო მცირე გამყინვარების პერიოდი, რომელიც  XIV საუკუნეში დაიწყო და XIX საუკუნემდე გაგრძელდა.

მიიჩნევა, რომ გაჭიანურებულ  მზის მინიმუმს „ახალი გამყინვარების პერიოდი“ შეუძლია გამოიწვიოს. მაგრამ როგორც NASA–ს სპეციალისტები აღნიშნავენ, დიდი რაოდენობით წიაღისეული საწვავის მოხმარებისა და სათბური გაზების გამოფრქვევის გამო, მზის მინიმუმი ასი წელიც რომ გაგრძელდეს, გლობალური ტემპერატურა მაინც გაიზრდება და გამყინვარება არ გვემუქრება.

 

161
თემები:
მსოფლიო და მეცნიერება
როსტომ საგინაშვილი

კოსმოსში გაგზავნილი „ჩაკრულოს“ შემსრულებლის ოცნება: ხშირად ამიხედავს ცაში და...

96
(განახლებულია 20:54 29.05.2020)
„ჩაკრულომ" ისტორიაში შემიყვანა. ის უკვე ჩემი ნაწილია, ჩემშია, ისევე, როგორც თითოეულ ქართველში“, – ასე გვითხრა ხალხური სიმღერების გამორჩეულმა შემსრულებელმა როსტომ საგინაშვილმა.

1977 წელს კოსმოსში გაგზავნილ "ოქროს ფირფიტაზე" ჩაიწერა ქართული პოლიფონიური სიმღერა „ჩაკრულო", რომელსაც ქართული ხალხური სიმღერისა და ცეკვის სახელმწიფო ანსამბლთან ერთად როსტომ საგინაშვილი და ილია ზაქაიძე ასრულებენ.

იდეა, დედამიწიდან გაეშვათ კოსმოსური ობიექტი, რომელიც წაიღებდა სხვადასხვა ინფორმაციას დედამიწის შესახებ, მე-20 საუკუნის 70-იანი წლების მიწურულს ამერიკელ მეცნიერსა და ტელეწამყვანს კარლ საგანს გაუჩნდა. ეს იდეა NASA-მ განახორციელა, რომელმაც კოსმოსში გაუშვა აპარატი Voyager. მასში მოთავსებულ „ოქროს დისკზე” სხვადასხვა ინფორმაციასთან ერთად მხოლოდ 27 მუსიკალური ნაწარმოები შეარჩიეს და მათ შორის ჩვენი ქართული ხალხური საგანძური „ჩაკრულოც“ აღმოჩნდა.

ჩვენ დავუკავშირდით ბატონ როსტომს და ვთხოვეთ კიდევ ერთხელ გაეხსენებინა ეს ფაქტი და მისი ცხოვრების დაუვიწყარი შეხვედრები...

როსტომ საგინაშვილი
photo: courtesy of Tamar Saginashvili
როსტომ საგინაშვილი

- ბატონო როსტომ, თუ გრძნობთ თავს ისტორიის ნაწილად?

- ისტორიის ნაწილად ვგრძნობ თუ არა თავს? - ხანდახან ალბათ კი, ძირითადად ჩვეულებრივი კახელი ვარ. ეს ამბავი ხომ დღეს მარტო დედამიწის კი არა კოსმოსური ისტორიის ნაწილიცაა. „ჩაკრულოს" კოსმოსში გაშვების შესახებ 1977 წელს ამერიკაში მეორე მოგზაურობის დროს გვითხრა ჩვენმა იმპრესარიომ. არც კი გვჯეროდა, იმდენად წარმოუდგენელი ამბავი იყო. არც დეტალები ვიცოდით, მაშინ ასე მარტივი არ იყო ინფორმაციის მიღება. ერთადერთი, რაც ვიცოდით, ის იყო, რომ მათ საბჭოთა რუსეთის მიერ რეკომენდებული Подмосковные вечера-ს ნაცვლად ერთხმად შეარჩიეს „ჩაკრულო", რომელსაც „ნასაში“ არც ლობი ჰყავდა და არც დამცველი. როცა ანსამბლთან ერთად ამ ამბავმა საქართველოში ჩამოაღწია, ატყდა აურზაური – არა ჩვენი ნამღერი „ჩაკრულოა“ გაგზავნილი და არა ჩვენიო. ყველა მეკითხებოდა, როსტომ, ამდენს რომ კამათობს ეს ხალხი, რატომ არ იტყვი, რომ ეს თქვენი „ჩაკრულოაო“.

როსტომ საგინაშვილი
photo: courtesy of Tamar Saginashvili
როსტომ საგინაშვილი

- თქვენ არ ერეოდით იმ კამათში?

- რა მნიშვნელობა აქვს, ვინ იმღერა. ეს ქართული სიმღერის ზეიმი და აღიარებაა და ეს ფაქტი მარად დარჩება ქართული კულტურის ისტორიაში. იმედი მაქვს, მომავალში უფრო მეტად დააფასებენ ამ ფაქტის მნიშვნელობას, ვიდრე ახლა აფასებენ.

- ძალიან ბევრ გამორჩეულ ადამიანს შეხვედრიხართ ცხოვრებაში?

- ძალიან გამიმართლა, რომ მქონდა ბედნიერება ცხოვრების გარკვეული პერიოდი გამევლო ქართული ხელოვნებისა და კულტურის ნამდვილ ვარსკვლავებთან. რომელი ერთი გავიხსენო? – ჰამლეტ გონაშვილი, ანზორ კავსაძე, ჯანსუღ ჩარკვიანი, გივი ბერიკაშვილი, კახი კავსაძე, ზურა ქაფიანიძე, ანზორ ერქომაიშვილი... საოცარი თაობები წავიდა. რაინდული სული, ვაჟკაცობა, ქართველობა, ნიჭიერება, პატიოსნება ერთეულებს კი არა, მთელ თაობებს ახასიათებდა. განუმეორებელი ეპოქა იყო და ბედნიერი ვარ, რომ ამ ეპოქის პატარა ნაწილი მეც ვიყავი.

როსტომ საგინაშვილი
photo: courtesy of Tamar Saginashvili
როსტომ საგინაშვილი

- ყველაზე დაუვიწყარი შეხვედრა რომელი იყო?

- შთამბეჭდავი შეხვედრა ძალიან ბევრი იყო, ერთის გამორჩევა ძნელია. მაგრამ მაინც ჯორჯ ბალანჩინთან შეხვედრას გამოვყოფდი. რატომ? ასეთ კორიფეებთან შეხვედრა ყოველთვის საინტერესო და ამაღელვებელია. როგორ არ აღელდები, როცა იცი, რომ ამერიკულ ბალეტს ქართული წარმოშობის ქორეოგრაფმა ჩაუყარა საფუძველი ჩაუყარა. ყველაზე კარგი მომენტი იყო, როცა ჩვენი მოცეკვავე გოგონები ბალანჩინის ბალერინებს ქართულ ცეკვაში ხელის მოძრაობას ასწავლიდნენ. ნამდვილი მასტერ-კლასი ჩაუტარეს.

- რამეზე თუ გწყდებათ გული?

- ცხოვრების მანძილზე უნიკალური ფოტოარქივი დამიგროვდა, კარგი საქმე იქნებოდა მათი ალბომად გამოცემა, მაგრამ აქამდე ვერ მოვახერხე, ამიტომ ეს ოცნება შვილებს „ვუანდერძე". ალბათ ისტორიაც ამ ფოტოებთან ერთად "დამიმახსოვრებს". საერთოდ, კარგი პატრონი ამ უნიკალურ მოვლენას – ქართული სიმღერის კოსმოსში გაგზავნას ვგულისხმობ – ქვეყნის პრესტიჟის ასაწევად გამოიყენებდა, მაგრამ... ჩვენთან, სამწუხაროდ, ეს ამბავი შემთხვევიდან შემთხვევამდე თუ ახსენდებათ და მომიკითხავენ ხოლმე, სად არისო.

როსტომ საგინაშვილი
photo: courtesy of Tamar Saginashvili
როსტომ საგინაშვილი

- მკითხველს ვუთხრათ, დღეს სად ხართ...

- სად ვარ და სოფელში ვარ და როგორც ჩვეულებრივ პენსიონერს შეეფერება, ისე ვცხოვრობ.

- ისე, თუ გჯერათ დედამიწის გარდა სხვა პლანეტაზეც რომ არის სიცოცხლე?

- მე მჯერა, რომ სადღაც სხვა ცივილიზაციებიც არსებობს. ხშირად ამიხედავს ცაში და მიფიქრია, ნეტავ, ახლა ვინ ისმენს ჩვენს „ჩაკრულოს“–მეთქი, ან რომ ისმენს, რა ესმის, რა განცდა ეუფლება? ნეტავ, ჩვენსავით ბურძგლავს, როცა ესმის "ხმალო ხევსურეთს ნაჭედო"?

- დარწმუნებული ვარ, რომ „ჩაკრულო“ მარტო სიმღერა არ არის თქვენთვის...

- "ჩაკრულომ" ისტორიაში შემიყვანა. ის უკვე ჩემი ნაწილია, ჩემშია, ისევე, როგორც თითოეულ ქართველში. ჩვენ ხომ ამ სიმღერებს უბრალოდ არ ვუსმენთ. ამ დროს ჩვენი სისხლი დუღს და გული ამოვარდნაზეა. როცა ქართული სიმღერა გვესმის, თითქოს ყველა უჯრედი ამ მელოდიას ხმას აყოლებს. იმიტომ რომ ის ჩვენი ერის სულის ნაწილია. ჩვენ კი ამ ერის შვილები ვართ – ნიჭიერები, ამაყები, ძლიერები და... ჯერჯერობით ყველა „თავთავისთვის ამღერებულები". აი, როცა ყველა ერთად და ხმაშეწყობილად „ავმღერდებით", მაშინ მართლა გაბრწყინდება ჩვენი ქვეყანა...

 

96
დინამო არენა

საქართველოს ჩემპიონატი ფეხბურთში 25 ივნისს განახლდება

0
ყველა ფეხბურთელს კორონავირუსზე ორი ტესტი ჩაუტარდებათ – პირველი ჩემპიონატის განახლებამდე 10 დღით ადრე და მეორე მატჩის დაწყებამდე.

 

თბილისი, 29 მაისი – Sputnik.  საქართველოს ჩემპიონატი ფეხბურთში  25 ივნისს განახლდება, ნათქვამია საქართველოს ფეხბურთის ფედერაციის (სფფ) განცხადებაში.

განცხადებაში ამასთან აღნიშნულია, რომ ამ ეტაპზე საუბარია მხოლოდ ეროვნული (უმაღლესი) ლიგის ჩემპიონატზე. თუ როდის აიღებს სტარტს ჩემპიონატები დანარჩენ დივიზიონებში, ასაკობრივ ჯგუფებსა და საქართველოს თასზე – ჯერჯერობიც უცნობია. ასევე აღსანიშნავია, რომ კორონავირუსის პანდემიასთან დაკავშირებული იძულებითი პაუზის გამო, ეროვნული ლიგის ფორმატი შეიცვლება. 

 „ეროვნული ლიგა შეცვლილი ფორმატით განახლდება – ოთხი წრის ნაცვლად, გუნდები ორ წრეში ითამაშებენ. შესაბამისად, გარდა მარტში გამართული ორი ტურისა, სეზონის განახლების შემდეგ ეროვნული ლიგის მონაწილე კლუბები 16 ტურს ითამაშებენ. მატჩები საწყის ეტაპზე მაყურებლის გარეშე გაიმართება“, – ნათქვამია სფფ–ის განცხადებაში.

განცხადებაში ასევე აღნიშნულია, რომ ყველა ფეხბურთელს კორონავირუსზე ორი ტესტი ჩაუტარდებათ – პირველი ჩემპიონატის განახლებამდე 10 დღით ადრე და მეორე მატჩის დაწყებამდე.

 „საქართველოს ჩემპიონატის ეროვნული ლიგის, მეორე, მესამე და მეოთხე ლიგების გუნდები საწევრო გადასახადისგან გათავისუფლებული იქნებიან. კლუბებს აღნიშნული თანხის გამოყენება იმ რეკომენდაციების შესასრულებლად შეეძლებათ, რომელიც შექმნილ სიტუაციაში აუცილებელია. ამასთან, კორონავირუსზე ტესტების ჩატარების ხარჯებს ფედერაცია საკუთარ თავზე იღებს“, – განაცხადა სსფ–ის პრეს–ცენტრში ორგანიზაციის გენერალურმა მდივანმა დავით მუჯირმა.

COVID-19-ის პანდემიის გამო მარტის დასაწყიში საქართველოს ფეხბურთის ფედერაციამ ქვეყანაში ყველა დონეზე საფეხბურთო ჩემპიონატის შეჩერების გადაწყვეტილება მიიღო. ორ ჩატარებული მატჩის შემდეგ ლიდერობს თბილისის „ლოკომოტივი“, რომელსაც ორი გამარჯვება აქვს მოპოვებული.

საქართველოს მოქმედი ჩემპიონი თბილისის „დინამოა“.

0
თემები:
სპორტის ამბები