ახალგაზრდული მოძრაობა „სირცხვილიას“ ხელმძღვანელები და ოპოზიციის ლიდერები გუშინ მთელი ღამე მორიგეობდნენ პარლამენტის წინ მას შემდეგ, რაც აქციის სხვა მონაწილეები დაიშალნენ.
ყველას, ვინც დარჩა, ემუქრებოდა ჯარიმა 2 ათასი ლარის ოდენობით. შსს-ში განაცხადეს, რომ შეუმჩნეველი არავინ დარჩენილა.
იყო პოლიციასთან დაპირისპირებებიც: დააკავეს ახალგაზრდული მოძრაობის სამი აქტივისტი, რომლებსაც კოცონის დასანთებად შეშა მიჰქონდათ. მთლიანობაში აქციამ მშვიდობიანად ჩაიარა, პოლიცია არიგებდა ჯარიმებს, მომიტინგეები კი მღეროდნენ, ცეკვავდნენ და თამაშობდნენ ფეხბურთს.
პარალელური აქცია მიმდინარეობდა ბათუმშიც, სადაც მთავრობის სახლთან ახლოს კარავი გაშალეს.
ხელისუფლების განცხადებით, ღამით გადაადგილების აკრძალვა საჭიროა კორონავირუსის გავრცელების სწრაფი ზრდის შესაჩერებლად. ოპოზიცია მიიჩნევს, რომ მთავრობის მიერ დაწესებული აკრძალვა პოლიტიკური ხასიათისაა და ამით მხოლოდ აქციის მონაწილეების მობილობა იზღუდება.
ოპოზიცია შეჩერებას არ აპირებს – ლიდერებმა მასშტაბური აქცია დააანონსეს შაბათს, ხოლო მანამდე მთელ ქვეყანაში გაიმართება „წერტილოვანი აქციები“. მოთხოვნები უცვლელია: ახალი არჩევნები, ცესკოს ხელმძღვანელის გადადგომა და პოლიტპატიმრების გათავისუფლება.