მოგზაურობის დროს გადაღებული ფოტო

შობა ევროპაში: ქართველი მოგზაურის მოგონებები

170
(განახლებულია 21:41 07.01.2021)
დღეს ადამიანები უხილავ მტერს ებრძვიან, პანდემიამ ყველას ცხოვრება შეცვალა. თუმცა შობა–ახალ წელს სამყარო მაინც ახალი შემართებით და ხალისით ხვდება.

ალბათ ყველა ადამიანის ოცნებაა საშობაოდ მორთული ევროპის ქალაქების მონახულება, თუმცა ამჯერად ვირტუალურ მოგზაურობას დავჯერდეთ, სადაც გიდობას ხელოვანი თამუნა გაჩეჩილაძე გაგვიწევს. მან გასულ წელს, პანდემიამდე საშობაოდ მორთულ ევროპის სამ ქვეყანაში იმოგზაურა. ის სადღესასწაულოდ მოწყობილ ქალაქებზე, იქაურ ტრადიციებზე და საშობაო ბაზრობებზე მოგვითხრობს.

თამუნა გაჩეჩილაძე
თამუნა გაჩეჩილაძე

– ქართველები განებივრებულები ვართ დღესასწაულებით. მუდმივად ვულოცავთ ერთმანეთს ამ დღესასწაულებს და ბედნიერები ვართ ამით, მაგრამ შობა და ახალი წელი განსაკუთრებული დღეებია. ადრე, ჩემს ბავშვობაში შობის დღესასწაულზე დიდი თოვლიც იყო ხოლმე. რამდენჯერ გარეთ გავსულვარ 31 დეკემბერს და სიხარულით მივლია თოვლიანი თბილისის ქუჩებში. ახლა შესაძლებლობები მეტი გვაქვს, რომ შობას შევხვდეთ სადაც გვსურს და ვისთან ერთადაც გვსურს, მაგრამ გაზაფხულივით დღეებია, ვერაფრით იტყვი, რომ ახალი წელი მოდის. შობა და ახალი წელი ერთადერთი დღესასწაულია, რომელიც მსოფლიოში ალბათ ყველას ერთნაირ სიხარულს ჰგვრის. მე ნოემბრის დასაწყისში უკვე ვიწყებ საახალწლო სამზადისს, ვარჩევ დეკორაციებს, ვწყვეტ რა ფერის უნდა იყოს ამ წელს ნაძვის ხე და სახლის ინტერიერი. ხშირად ვცვლი განათებებს, რაც საოცარ ელფერს მატებს ახალ წელს. განათების ფერს დიდ მნიშვნელობას ვანიჭებ, გააჩნია რომელ წელს რა განწყობაზე ვარ.

შობა ევროპაში
შობა ევროპაში

– პანდემიამდე ხშირად მოგზაურობდით უცხო ქვეყნებში. გასულ წელს ესტუმრეთ საშობაოდ მორთულ ქალაქებს. გაიხსენეთ თქვენი ვოიაჟი.

– შობა ევროპაში არის ზღაპარი. ისეთი დაუვიწყარი ზღაპარი, რომელიც გაფიქრებინებს, რომ ამის ნახვის გამო ღირდა ცხოვრება. წელს სამი ქვეყანა ვნახე შობას და დავრწმუნდი, რომ საშობაოდ მოწყობილ სივრცეებს, ფანტაზიებს, ადამიანის შესაძლებლობებს არა აქვს საზღვარი. ესპანეთის დედაქალაქში ისეთი საშობაო აურზაური იყო და იმდენი ნაძვის ხე იდგა, თავისუფლად დაიკარგებოდა ადამიანი. ფერადი ნაძვის ხეების რიგი თვალზე ცრემლს და სასიამოვნო ღიმილს გვგვრიდა ყველას. ყველგან საშობაო მუსიკა ისმოდა და საშობაოდ მოწყობილ სივრცეებში ყველა ადამიანს შეეძლო არა მარტო საახალწლო სუფრას მიჯდომოდა, დაეგემოვნებინა კიდეც ცხელი ჩაი და მურაბა. ამდენი ფიფქი, ამდენი ულამაზესი დეკორაცია მართლა არსად მინახავს. ზღაპრული და მართლაც სამეფო იყო ესპანეთის მეფის ფელიპე VI-ის სასახლეში მოწყობილი შობის დროინდელი ბეთლემი და ქალაქის სცენები, რომელიც მეფემ მისი შვილისთვის, ტახტის მემკვიდრის ლეონორისთვის ფლორენციაში შეუკვეთა. მთელი ქალაქი და ყველა ტურისტი მიდის ამ საოცრების დასათვალიერებლად.

მოგზაურობის დროს გადაღებული ფოტო
მოგზაურობის დროს გადაღებული ფოტო

არანორმალურად ლამაზი იყო წინასაშობაოდ პორტუგალის დედაქალაქი ლისაბონიც. ოდნავ ამაღლებული ადგილებიდან საოცარი სანახაობა იშლება მნახველის თვალწინ. შორს ნისლებში მოჩანს ქრისტეს ქანდაკება, რომელიც ბრაზილიაში მდგარი ქრისტეს ქანდაკების ანალოგია და მასზე მხოლოდ ათი მეტრით პატარაა, ნისლებს ქვემოთ – მდინარე ტეჟუ და ატლანტის ოკეანე. ყველა ცენტრალურ მოედანზე დგას გიგანტური, ძალიან დახვეწილი ნაძვის ხეები. თვლა არა აქვს ქალაქში დეკორაციებს და საახალწლო განათებეს. თვით ოკეანერიუმში, რომელიც მსოფლიოს უნიკალურ ოკეანარიუმებს შორის არის, ისეთი საახალწლო განწყობა იდგა, გაოგნებული შევყურებდი. საახალწლო ბაზრობები ხომ სასწაული სანახაობაა. ბედნიერი, ღიმილიანი ადამიანები დიდი გულისყურით არჩევდნენ საახალწლო საჩუქრებს და ფერად ჩანთებში აწყობდნენ. საერთოდ რომ არ გინდოდეს განიცადო რა არის ახალი წელი, ერთხელ იქ გავლა მოგანდომებს შობას ბედნიერად შეხვდე. სპეციალურად ავიღე ტური ლისაბონთან ახლოს სინტრაში სამეფო სასახლის სანახავად. გაოგნებული დავრჩი, გაქვს განცდა, თითქოს მეფე გაგიღებს კარებს და მოგილოცავს ახალ წელს.

შობა ევროპაში
შობა ევროპაში

სადღესასწაულოდ იყო მორთული საფრანგეთის დედაქალაქი პარიზიც. ყველგან ცხელი ღვინის და საშობაო ნამცხვრების სუნი იდგა. საშობაოდ ევროპაში ყველაზე მეტად ბედნიერი სახეების მშურს. ღმერთო რა სიხარულია, როცა ამდენი ადამიანის სახეზე ბედნიერებას ხედავ. როგორ მინდა ოდესმე ჩვენი ქალაქის ქუჩებშიც ვხედავდე ამდენ ბედნიერ ადამიანს. ყველა ცენტრალურ მოედანს თავისი ნაძვის ხე აქვს და თავისი გმირები ჰყავს. ყველაზე ლამაზი ნაძვის ხე კი ლაფაიეტის ცენტრშია. ყოველ წელს ათასობით ადამიანი ელოდება ამ ნაძვის ხის განათებას და არც ერთ წელს ეს ნაძვის ხე ერთნაირი არ არის. ამ სილამაზეს კი უკვდავი ჩაიკოვსკის „მაკნატუნას“ ჰანგები ამშვენებს.

შობა ევროპაში
შობა ევროპაში

ჩემი მოგზაურობის კულმინაცია საშობაო „დისნეილენდი“ იყო. სიტყვებიც არ მყოფნის იმ ემოციების გადმოსაცემად, რაც იქ დამეუფლა. მიუხედავად იმისა, რომ მეორედ მოვხვდი ზღაპარში, მაინც აღფრთოვანებული დავრჩი. იქაურობას ვეძახი სამყაროს, რომელიც ცხოვრებაში ერთხელ მაინც ყველა ადამიანმა აუცილებლად უნდა ნახოს. დავაძალებდი კიდეც ადამიანებს, რომ ეს სამყარო ერთხელ მაინც მოინახულონ. კლასიკური ზღაპრების ყველა გმირი – მიკი მაუსის 90 წლის იუბილე, ამ იუბილესთვის სპეციალურად შექმნილი დეკორაციები, საჩუქრები, სამკაულები და უამრავი ნივთები ამშვენებდა იქაურობას. სივრცე, სადაც ყველა ერთნაირად აღფრთოვანებული და ბედნიერია. ციოდა, საკმაოდ ციოდა, მაგრამ ამ სიცივეს სადღესასწაულო მსვლელობის დროს, რომელშიც ზღაპრის გმირები მონაწილეობენ, ათასობით ადამიანსთვის ხელი არ შეუშლია. საღამოს კი დღის დაგვირგვინებაა ლაზერული შოუ. უძლური ვარ, როცა ვცდილობ გადმოვცე ის სიხარული, რაც იქ სუფევდა. ყველამ, ყველამ დაისახეთ მიზნად ერთხელ მაინც მოინახულოთ ელფების, კეთილი ფერიების და სიყვარულის სამყარო.

თამუნა გაჩეჩილაძე
თამუნა გაჩეჩილაძე

– ადამიანებში როგორი განწყობა იგრძნობოდა?

– ის, რისთვისაც ღირს ევროპაში მოგზაურობა, არიან ადამიანები, ბედნიერი, დასვენებული, სიყვარულით აღსავსე სახეები. ვერსად იმდენ ბედნიერ ადამიანს ვერ შეხვდები, რამდენსაც აქ. ხანდახან ღიმილი სიცოცხლესაც შველის, სასოწარკვეთილ ადამიანსაც. ისე მინდა გვიყვარდეს ერთმანეთი, როგორც იქ. რამდენი ხანია აქ ადამიანის სახეებზე კმაყოფილება და ბედნიერება არ მინახავს...

თამუნა გაჩეჩილაძე
თამუნა გაჩეჩილაძე

– როგორ მიულოცავთ შობა–ახალ წელს ქართველ ხალხს?

– ვუსურვებ, რომ ყველას ჰქონდეს სამსახური და სტაბილურობის განცდა, რომ ადამიანი ერთხელ იბადება და ყველამ ისე ვიცხოვროთ, რომ ღირდეს ჩვენი ამ სამყაროში მოსვლა. ყველას მინდა ჰქონდეს სახლი, თბილი კერა და გემრიელი საკვები. ბედნიერი ხალხი მინდა დადიოდეს ჩემი ქალაქის ქუჩებში. იმედია ყოველთვის ოცნება არ იქნება ეს სურვილი და ოდესღაც ჩვენც შევხვდებით ისეთ ახალ წელს, სადაც ყველას ეყვარება, სადაც პატივისცემა და ადამიანის სიცოცხლე უზენაესი ღირებულება გახდება. ბედნიერებას და გამართლებას ვუსურვებ ყველას!..

 

170
ტურისტები პანდემიის დროს

საელჩო: ისრაელიდან ტურისტების უსწრაფეს მიღებაზე ინტენსიური მოლაპარაკებები მიმდინარეობს

27
მომავალი თვიდან ყველა ქვეყნიდან, მათ შორის ისრაელიდან, ავიაკომპანიები საქართველოს მიმართულებით ფრენების განხორციელებას შეძლებენ

თბილისი, 24 იანვარი – Sputnik. ისრაელის საელჩო მიესალმება საქართველოს მთავრობის განცხადებას 1 თებერვლიდან საერთაშორისო ფრენების აღდგენისა და ასევე, საქართველოში უცხო ქვეყნის მოქალაქეების შესვლასთან დაკავშირებული შეზღუდვების მოხსნას, ნათქვამია საქართველოში ისრაელის საელჩოს მიერ გავრცელებულ განცხადებაში.

უწყებათშორისი საკოორდინაციო საბჭოს გადაწყვეტილებით, 1 თებერვლიდან საქართველო რეგულარულ ფრენებს ყველა მიმართულებით აღადგენს.

„კონკრეტული დეტალები, თუ რა ტიპის სამედიცინო ტესტი, ვაქცინაცია ან სერტიფიკატი იქნება საჭირო, ჯერ ოფიციალურად არ გამოქვეყნებულა. ამიტომ, ნებისმიერი გაუგებრობისა და უსიამოვნების თავიდან აცილების მიზნით, რეკომენდირებულია მოთმინებით დაველოდოთ შემდგომ ოფიციალურ განცხადებას, რომელიც გამოქვეყნებული იქნება საქართველოსა და ისრაელის მთავრობების ოფიციალური წყაროების მიერ“, - ნათქვამია განცხადებაში.

უწყების ინფორმაციით, ისრაელსა და საქართველოს შორის აქტიურად მიმდინარეობს მოლაპარაკებები, რათა საქართველომ უმოკლეს დროში შეძლოს ისრაელიდან ტურისტების მიღება.

„21 იანვარს აღნიშნული საკითხი დეტალურად იყო განხილული ისრაელის საგარეო საქმეთა მინისტრის, აშკენაზისა და მისი ქართველი კოლეგის, ზალკალიანის სატელეფონო საუბრისას. შესაბამისად, ისრაელის საელჩო მიესალმება საქართველოს მთავრობის აღნიშნულ განცხადებას და მზად არის, ისრაელელ ვიზიტორებს გაუწიოს ყველა აუცილებელი საკონსულო მომსახურება“, – ნათქვამია განცხადებაში.

საქართველომ ავიამიმოსვლა ყველა მიმართულებით გასული წლის მარტის შუა რიცხვებში შეწყვიტა, როდესაც ჯანმომ კორონავირუსის პანდემიის შესახებ გამოაცხადა. შეზღუდვები არ ეხებოდა მხოლოდ იმ სპეცრეისებს, რომლებიც ქვეყნის მოქალაქეების სამშობლოში დაბრუნებას ისახავდა მიზნად. ზაფხულის შუა პერიოდში რეგულარული ფრენების აღდგენა დაიწყო, თუმცა ეპიდვითარების გაუარესების გამო უმეტესი მათგანი ისევ შეჩერდა. ბოლოს ავიამიმოსვლის აკრძალვის ვადა 2021 წლის 31 იანვრამდე გახანგრძლივდა.

27
დამსვენებლები გუდაურში

ტურიზმის სექტორი მთავრობას ღია წერილით მიმართავს და რეკომენდაციებს აცნობს

44
ტურიზმის სექტორის წარმომადგენლებმა მთავრობის ეკონომიკურ გუნდს თავად შესთავაზეს გეგმა, თუ როგორ განაახლებენ მუშაობას უსაფრთხოდ.

თბილისი, 24 იანვარი - Sputnik. ტურიზმის სექტორი საქართველოს მთავრობას ღია წერილითა და რეკომენდაციებით მიმართავს, იუწყება პირველი არხი.

22 იანვარს უწყებათშორისმა საკოორდინაციო საბჭომ 1 თებერვლიდან ქვეყანაში მოქმედი შეზღუდვების ეტაპობრივი მოხსნის გადაწყვეტილება მიიღო. თუმცა ამ ეტაპზე ტურიზმის, მათ შორის, სამთო-სათხილამურო კურორტების გახსნა არ იგეგმება და არსებული შეზღუდვები კვლავ ძალაში რჩება. მთავრობის გეგმის მიხედვით, ზამთრის კურორტები მუშაობას 1 მარტიდან განაახლებენ. საქართველოში ზამთრის კურორტებზე ტურისტული სეზონი, ჩვეულებრივ, დეკემბრის დასაწყისში იხსნება და მარტის ბოლომდე გრძელდება. შესაბამისად, წლევანდელი სეზონი ოთხჯერ უფრო ხანმოკლე იქნება და მხოლოდ ერთი თვით შემოიფარგლება.

აღნიშნულმა გადაწყვეტილებამ ტურიზმის სფეროს წარმომადგენელთა უკმაყოფილება გამოიწვია.

განცხადებას, რომელსაც სექტორი მთავრობას ორშაბათს გაუგზავნის, ხელს აწერენ სასტუმროებისა და რესტორნების ფედერაცია, საქართველოს ტუროპერატორთა ასოციაცია, საქართველოს გამყვანი ტურიზმის ასოციაცია, სატრანსპორტო კომპანიები, ტუროპერატორები.

ტურიზმის სექტორის წარმომადგენლები სამთო-სათხილამურო კურორტების გახსნას 1 თებერვლიდან ითხოვენ. მათი თქმით, სათხილამურო სრიალისთვის ეკიპირებული ადამიანი ვირუსის გადატანის საფრთხეს არ წარმოადგენს.

„სამთო კურორტების სასტუმროებსაც ისევე შეუძლია კოვიდ უსაფრთხოების რეგულაციების დაცვა, როგორც კახეთის ან სხვა რეგიონის სასტუმროებს, სადაც საკმაოდ მაღალი მობილობა შეიმჩნეოდა, მაგრამ ამით ეპიდ-მდგომარეობა არ გაუარესებულა“, - ნათქვამია წერილში.

როგორც წერილშია აღნიშნული, ტურიზმის სექტორი ასევე მოითხოვს როგორც სახმელეთო, ასევე საჰაერო საზღვრების გახსნას. ამასთან, მათი რეკომენდაციით, საზღვარზე შემოსულმა ტურისტმა უნდა წარადგინოს PCR ტესტის დამადასტურებელი საბუთი, ანტისხეულის დამადასტურებელი საბუთი ან სწრაფი ტესტი ადგილზე ჩაუტარდეს.

„სასწრაფოდ შემუშავდეს კოვიდ-დაზღვევის პროგრამა უცხოელი ვიზიტორებისთვის. ეს დამატებით შემოსავალს გაუჩენს სადაზღვევო კომპანიებს, ასევე დამატებითი შემოსავალი გაჩნდება ქვეყნისთვისაც, ასევე მოაგვარებს პრობლემას ვინ და რა სახსრებით მკურნალობს ვიზიტორს, თუ საქართველოში ყოფნის დროს დაუდგინდა კოვიდ ვირუსი“, - ნათქვამია მთავრობისთვის განკუთვნილ წერილში.

სექტორი მოითხოვს რეგულარული რეისების აღდგენისთანავე გაიხსნას რესტორნები, მუზეუმები და სხვა ღირსშესანიშნაობები, სადაც მოხდება რეგულაციების მკაცრი დაცვა და განხორციელდება კონტროლი.

ტურისტული სექტორი, რომელშიც დაახლოებით 150 ათასი ადამიანია დასაქმებული, კორონავირუსის პანდემიის გამო ყველაზე მეტად დაზარალდა.

გასულ სეზონზე, კორონავირუსის გავრცელების საფრთხის არიდების მიზნით, საქართველოს მთავრობამ მარტში ზამთრის სათხილამურო კურორტებზე სეზონის ვადაზე ადრე დახურვის გადაწყვეტილება მიიღო.

საკოორდინაციო საბჭოს გადაწყვეტილებით, 28 ნოემბრიდან ბაკურიანის, გუდაურის, გოდერძისა და მესტიის სათხილამურო კურორტებზე სპეციალური შეზღუდვები დაწესდა. კერძოდ, სასტუმროების გამოყენება დასაშვებია მხოლოდ საკარანტინო სივრცეების მოსაწყობად. გაჩერებულია სათხილამურო ტრასებისა და სათხილამურო საბაგიროების ფუნქციონირება.

44
ტურისტული ბიზნესის საპროტესტო აქცია თბილისში

ინფექციონისტი: შეუძლებლად მიმაჩნია ერთიანად ყველა შეზღუდვის მოხსნა, თუმცა...

0
საქართველოში, განსაკუთრებით დიდ ქალაქებში მოსახლეობა შეზღუდვების მოხსნას ითხოვს. საზოგადოებრივი ტრანსპორტის მუშაობის აღდგენის, ზამთრის კურორტების და ბაზრობების გახსნის მოთხოვნით საპროტესტო აქციები იმართება.

თბილისი, 24 იანვარი – Sputnik. შეუძლებლად მიმაჩნია ერთიანად ყველა შეზღუდვის მოიხსნას, თუმცა გარკვეული შემსუბუქების დრო ნამდვილად დადგა, განაცხადა ინფექციონისტმა ოთარ ჩოკოშვილმა ტელეკომპანია „რუსთავი 2“-ის ეთერში.

ქვეყანაში ეპიდემიოლოგიური ვითარების გაუარესების გამო 28 ნოემბრიდან მკაცრი შეზღუდვები მოქმედებს. კერძოდ, აუცილებელია პირბადის ტარება ქუჩაში, შეზღუდულია გადაადგილება 21:00-დან 05:00 საათამდე, დაკეტილია რესტორნები, კაფეები და ა.შ. შეზღუდვების შემსუბუქება ეტაპობრივად 1 თებერვლიდან დაიწყება.

„ჩვენ საკუთარი გამოცდილებით ძალიან კარგად მოგვეხსენება, რომ რეგულაციების სრული მოხსნა გარკვეულ დროში, დაახლოებით, 1-2 თვეში იწვევს მდგომარეობის ძალიან ცუდი მიმართულებით წასვლას და შემდგომ გართულებებს“, - ამბობს ჩოკოშვილი.

ინფექციონისტის განცხადებით, ქვეყანაში თუ ერთბაშად მოიხსნება ყველა შეზღუდვა, შეიძლება კვლავ ისეთი ეპიდვითარება შეიქმნას, როგორიც დეკემბრის თვეში იყო.

„შემთხვევები რადიკალურად შემცირდა, მაგრამ ჩვენთან უკვე დაფიქსირებულია ბრიტანული შტამი, რაც იმას ნიშნავს, რომ თუ ხელაღებით მოვხსნით ყველა შეზღუდვას, შეიძლება იმავე მდგომარეობაში ჩავვარდეთ, როგორშიც ვიყავით დეკემბერში. თუმცა, ხაზს ვუსვამ, რომ შეზღუდვების ნაწილი უნდა შემსუბუქდეს“, - ამბობს ჩოკოშვილი.

საქართველოში, განსაკუთრებით დიდ ქალაქებში მოსახლეობა შეზღუდვების მოხსნას ითხოვს. საზოგადოებრივი ტრანსპორტის მუშაობის აღდგენის, ზამთრის კურორტების და ბაზრობების გახსნის მოთხოვნით საპროტესტო აქციები იმართება.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 546-ით გაიზარდა და ინფიცირებულთა საერთო რიცხვმა 253.518-ს მიაღწია.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.

0