თუშეთი

პირიქითა თუშეთი: მთათა შორის და კლდეთა ახლოს

99
(განახლებულია 09:17 22.08.2020)
როცა მოგზაურობის შესახებ სტატიის წერას ვიწყებ, იმდენად მრავალფეროვანი არჩევანი მაქვს, ბევრს ვფიქრობ – რომელ რეგიონზე დავწერო, მთაზე თუ ბარზე, ზღვაზე თუ უდაბნოზე, ისინი ხომ მრავლადაა ჩვენს დალოცვილ მიწაზე.

მოდით ისევ მთაზე დავწერ, ან უკეთესზე რაზე უნდა ვწერო? - „რად ვერ შაგტყობდი ჩემ ტკბილ თუშეთო“... ჰოდა, მოდი, იყოს თუშეთი.

თუშეთი
თუშეთი

ამბობენ, თუ პირიქითა არ ნახე, მაშინ თუშეთი არ გინახავსო. როდესაც თუშეთში პირველად მიდიხარ, უცნაური შეგრძნება გიპყრობს – შიშის, თან ბედნიერების. მიდიხარ ცად აზიდულ ქარაფებზე, ექცევი ხევების თავზე და ამ ურთულეს გზაზე მანქანით უმწეოდ მგზავრობ. გგონია, სადაცაა ეს თვალუწვდენელი ბუნება გშთანთქავს. თუმცა პეიზაჟები იმდენად სწრაფად იცვლება, შთაბეჭდილებებიდან გამოსვლას ვერ ასწრებ და შიშიც გავიწყდება.

თუშეთში ფშაველი-აბანო-ომალოს უღელტეხილით მოხვდებით, რომელიც 72-კილომეტრიანი მონაკვეთია. აუცილებელია მაღალი გამავლობის ტრანსპორტით მგზავრობა, წინააღმდეგ შემთხვევაში არც იოცნებოთ. გზად ულამაზეს მთაგორებს, ჩანჩქერებს და მდელოებს შეხვდებით. თუშეთის გზა ექსტრემალური და სახიფათო გზის სახელით არის ცნობილი. ის შესულია მსოფლიოს ხუთ ყველაზე საშიშ და ექსტრემალურ გზებს შორს.

თუშეთი, სოფელი კვავლო
თუშეთი, სოფელი კვავლო

პირიქითა თუშეთს მიეკუთვნება სოფლები დართლო, კვავლო, დანო, ჩიღო, ჭეშო, ფარსმა, გირევი, ბასო. ეს არის სოფლები, სადაც მოსახლეობა ზაფხულობით ცხოვრობს. ზამთარში ჩიღოში მხოლოდ ერთი ოჯახი, ხოლო ჭეშოში ორი ოჯახი რჩება. თუმცა არის ნასოფლარები ჰეღო, ჭონთიო, ნაკუდურთა. კოშკებისა და სახლების ნაშთები განაკუთრებულ სევდას ტოვებს – კარი აღარ აქვთ, გვერდები მორღვევიათ... ისინი ეულად, უმწეოდ დარჩენილ, უიმედო მოხუცს ჰგვანან…

თუშური კოშკი
თუშური კოშკი

თუშეთი გამოირჩევა თავისი ძველისძველი ტრადიციებით, რომელიც დღემდეა შემორჩენილი. თუშები არ კარგავენ მამა-პაპის დანატოვარ ადათებს, წესებს, ტრადიციებს. ყოველწლიურად ყველა სოფელს აქვს თავისი სოფლის დღეობა.

თუშეთში საკულტო დღეობები „ათნიგენობები“ (იგივე ათენგენობა) აღდგომიდან მეასე დღეს იწყება და ორი კვირის მანძილზე გრძელდება. „ათნიგენობის“ მასპინძელია „შულტა“, სოფლის მიერ არჩეული ჯვარის ყმა. თუშური დღეობა ტრადიციული ლუდის გარეშე წარმოუდგენელია. დღეობისთვის ლუდი სპეციალურად იხარშება და თუშები მას ალუდას ეძახიან. დღეობაზე მისულ ყველა სტუმარს ალუდით უმასპინძლდებიან. თუშური დღეობები დოღის გარეშე არასდროს მთავრდება.

თუშეთი, სოფელი კვავლო
თუშეთი, სოფელი კვავლო

შემორჩენილია ასევე თუშური ტრადიციები: თუშური მისალმება, მომთაბარეობა, სტუმარ-მასპინძლობა, პიროვნებათა შეძმავება, დობილ-ძმობილობა, გარდაცვალება, ქორწილი, მარიამობა, გიორგობა, მზებუდობა, დიდმარხვა, ამაღლება, წელწდობები და სხვ.

სასტუმრო “კვავლო” სოფელ კვავლოში
სასტუმრო “კვავლო” სოფელ კვავლოში

ერთ-ერთი მნიშვნელოვანია სტუმარმასპინძლობის ტრადიცია. ცხენოსანი მგზავრი სოფლის სიახლოვეს ჩამოქვეითდება და ვიდრე არ გასცდება სოფელს, ცხენზე არ შეჯდება. ეს წესი დღესაც ცოცხალია და მას გულდასმით იცავენ. მის დაცვას ელიან სტუმრისგანაც. სოფელზე ამხედრებული გავლა ტრადიციულ საზოგადოებაში მოძალადე მტერთან იყო  ასოცირებული და სოფლის შეურაცხყოფას ნიშნავდა. შემდგომში ამ ჩვეულებამ დაკარგა თავდაპირველი მნიშვნელობა და სოფლის მიმართ კეთილგანწყობის უსიტყვო გამოხატულებისა და მისალმების ჟესტის მნიშვნელობა შეიძინა.

აღსანიშნავია თუშური ფოლკლორი. ცნობილია თუშური გარმონი. თუშური სიმღერებია: „ლაშარის სიმღერა”, „ზეზვა გაფრინდაული”, „დალა”, „ეს შემოდგომა მოვიდა”, „მეითის სიმღერა”, „დედა მოგიკვდესა”, „მეცხვარის სიმღერა” და სხვ. საკრავებიდან გავრცელებულია სალამური, ფანდური და, როგორც აღვნიშნეთ, გარმონი.

სულის შემძვრელი და შთამბეჭდავია თუშური დატირება - „დალაი“. ის მხოლოდ თუშეთშია გავრცელებული და შეეხება ყველას, ყველა მოყმეს, ვინც კი ოდნავ მაინც მიუახლოვდება, ან თვლიან რომ უახლოვდება კაი ყმის იდეალს. „დალაი“, როგორც ხმით ნატირალი, სრულდება მიცვალებულის არა დაკრძალვის დღეს, არამედ წლისთავზე, როცა მის პატივსაცემად იმართება დოღი, რომელშიც საგანგებოდ შეკაზმულ-მორთული მისი ცხენიც მონაწილეობს.

გამორჩეულია თუშური კერძები: ხინკალი, რომელიც აუცილებლად უნდა იყოს ცხვრის ხორცით დამზადებული. ხინკალი ნელდება მხოლოდ ხახვით და თუშური „წყლის ქონდარით". ასევე კოტორი (ხაჭაპური), რომელიც მზადდება ხაჭოს გულით. აღსანიშნავია ჩობან-ყაურმა, ხავიწი, გორდილა, ქუმელი, ანუ მოხალული ქერი. ზელენ ერბოში ან ხაჭოში. ქუმელს ასევე იყენებენ ჩვილი ბავშვების საკვებად რძეში ან წყალში, თუშები სწორედ ამით ზრდიდნენ ბავშვებს.

თუ თუშეთში დასვენებას გადაწყვეტთ, გაითვალისწინეთ, აქ ძირითადად შეხვდებით საოჯახო სასტუმროებს, რომლებიც თითქმის ყველა სოფელშია. ასევე აქ არის თუშეთის ეროვნული პარკის ვიზიტორთა ცენტრი, სადაც გააცნობენ სტუმრებს თუშეთის ისტორიულ წარსულს. შეგიძლიათ დაათვალიეროთ მუზეუმი, სადაც ნახავთ ძველ თუშურ ნაკეთობებს, ისტორიულ ფოტოებს. აქ გაგაცნობენ ტურისტულ მარშრუტს. მიმდებარედ არის საპიკნიკე და საკარვე ადგილები. ასევე შეგიძლიათ ისარგებლოთ ცხენებით და ველოსიპედებით.

თუშეთი, სოფელი კვავლო
თუშეთი, სოფელი კვავლო

განსაკუთრებული და შთამბეჭდავია თუშური სახლები, რომლებიც ნაშენებია სიპი ქვის მშრალი წყობით. მშენებლობის დროს არ არის გამოყენებული კირი და ცემენტი. ეს კი სახლებს უნიკალურობას სძენს.

ქვემო ომალოში არის ამბულატორია. არის სასწრაფო სამედიცინო დახმარებაც. თუმცა თუ მძიმე და განსაკუთრებული შემთხვევაა, ინიშნება სპეციალური რეისი ვერტმფრენით, რათა დაშავებული დროულად იყოს გადაყვანილი უახლოეს კლინიკაში. აქვეა აფთიაქი, თუმცა საჭიროების შემთხვევაში პაციენტს მედიკამენტებით უზრუნველყოფს ამბულატორია.

პირიქითა თუშეთის თითქმის ყველა სოფელი უზრუნველყოფილია ინტერნეტით, ჰელიოსისტემებით. ადგილობრივებს მზის ენერგიაზე აქვთ დენი და ცხელი წყალი, ამიტომ აქ ხანგრძლივად დასვენების არ შეგეშინდეთ.

ვწერ ამ ყველაფერს და სინანული მიპყრობს, რადგან თუშეთი პირადად არ მინახავს! მოკლედ, ოცნებები იქით იყოს და, მივდივართ თუშეთისკენ. მომავალ წელს აუცილებლად უნდა ვნახო!..

სტატიის მომზადებაში დაგვეხმარა მამუკა გაწირიძე.

 

99
მსოფლიო ტურიზმის ორგანიზაციის ლოგოტიპი

UNWTO-ს გენერალური მდივანი: ტურიზმის აღდგენა იწყება

69
(განახლებულია 16:24 17.09.2020)
მსოფლიო ტურიზმის აღმასრულებელმა საბჭომ თბილისის დეკლარაცია მიიღო, რომელიც მხარს უჭერს ტურიზმის განახლების თვალსაზრისით საქართველოს მთავრობის ძალისხმევას.

თბილისი, 17 სექტემბერი — Sputnik. გაეროს მსოფლიო ტურიზმის ორგანიზაციის (UNWTO) აღმასრულებელი საბჭო მიესალმება და მხარს უჭერს ქვეყანაში ტურისტული სექტორის ამოქმედების კუთხით საქართველოს მთავრობის ძალისხმევასა და ეფექტურ ზომებს. შესაბამისი დეკლარაცია ორგანიზაციის აღმასრულებელმა საბჭომ თბილისში მიიღო, იუწყება საქართველოს მთავრობის პრეს-სამსახური. 

აღმასრულებელი საბჭოს თბილისის დეკლარაცია UNWTO-ს გენერალურმა მდივანმა ზურაბ პოლოლიკაშვილმა საქართველოს პრემიერ-მინისტრ გიორგი გახარიას პირადად გადასცა.

დეკლარაციაში ნათქვამია, რომ საბჭო მხარს უჭერს საქართველოს მთავრობის ძალისხმევას ტურიზმის სფეროს გახსნის მიმართულებით.

„ეს ტურიზმის გლობალურ რუკაზე ქვეყანას გამძლე, სტაბილურ და ძალიან ფასეულ დანიშნულების ცენტრად წარმოაჩენს", – ნათქვამია დეკლარაციაში, რომელიც აღმასრულებელი საბჭოს 112-ე სხდომის ფარგლებში იქნა მიღებული.

დეკლარაციის მთავარი მიზანია მსოფლიოში ტურიზმის სტაბილური განვითარების ხელშეწყობა, მასში განსაზღვრულია ტურისტული ინდუსტრიის პოლიტიკის ძირითადი ვექტორი, არსებული გამოწვევების დაძლევის სამომავლო გეგმები.

„დიდად ვაფასებთ და გულწრფელად ვუხდით მადლობას საქართველოს მთავრობას გაერთიანებული ერების მსოფლიო ტურიზმის ორგანიზაციის აღმასრულებელ დირექტორთა საბჭოს საზეიმო სხდომის მოწვევისა და გულთბილი მასპინძლობისთვის, რომელიც პანდემიის შემდეგ იმართება და საქართველოს მდიდარი კულტურული მემკვიდრეობისა და უნიკალური სტუმარმასპინძლობის ტრადიციის შეგრძნების შესაძლებლობას გვაძლევს“, – აღნიშნულია დეკლარაციაში.

16-17 სექტემბერს თბილისში გაეროს მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომა ტარდება. ეს COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობითი ღონისძიებაა. 

სხდომა გახსნეს საქართველოს პრემიერ-მინისტრმა გიორგი გახარიამ და UNWTO-ს გენმდივანმა ზურაბ პოლოლიკაშვილმა. დელეგატებს შორის არიან მაღალი რანგის სტუმრები ესპანეთიდან, საბერძნეთან, პორტუგალიიდან, რუმინეთიდან, მაროკოდან, საუდის არაბეთიდან.

„ეს იყო პანდემიის შემდეგ გაეროს ორგანიზაციის პირველი შეხვედრა და ის, რომ საქართველოს 20 სხვადასხვა ქვეყნის დელეგაცია და მაღლი რანგის სტუმრები ეწვივნენ, უფლებას გვაძლევს ვთქვათ, რომ ტურიზმი აღდგენას იწყებს. თუმცა, ამას გარკვეული დრო დასჭირდება“, – განაცხადა პოლოლიკაშვილმა.

მისი თქმით, ეს იყო ტურიზმისთვის ისტორიული დღე და ყოველივე ეს საქართველოში მთავრობის მხარდაჭერით განხორციელდა. როგორც პოლოლიკაშვილმა აღნიშნა, ღონისძიებაზე საქართველოს პრემიერ-მინისტრ გიორგი გახარიას დასწრება კიდევ ერთხელ ადასტურებს იმ ფაქტს, რომ საქართველო ტურიზმს, როგორც ეკონომიკის ძირითად ლოკომოტივს, დიდ მნიშვნელობას ანიჭებს.

„სწორედ ეს დეკლარაცია წარმოადგენს მსოფლიო მასშტაბით აღიარებას, რომ საქართველო დაცული და „მწვანე ზონაა“, როგორც მასზე დღეს ევროპის ყველა ქვეყანაში საუბრობენ. ეს კიდევ ერთი მესიჯია იმისა, რომ საქართველოში ჩამოსვლა შეიძლება. ღონისძიებაზე 30-ზე მეტი ქვეყნის დაახლოებით 150 სტუმარი შეიკრიბა. აქედან გამომდინარე, ჩვენ გვსურს, რომ ქვეყნებს შორის ეს ურთიერთობები გაგრძელდეს და უფრო გაღრმავდეს“, – აღნიშნა პოლოლიკაშვილმა. 

პოლოლიკაშვილის განცხადებით, აღმასრულებელი საბჭოს წევრებმა თბილისის დეკლარაცია მიიღეს და ყველა დათანხმდა, რომ შეიძლება საზღვრების გახსნა და ქვეყნებს შორის ურთიერთობების დალაგება. დეკლარაცია ეძღვნება სხვადასხვა ინოვაციური პროდუქტების დახმარებითა და სანიტარული ნორმების დაცვით საზღვრების გახსნის შესაძლებლობებს, რათა ადამიანებმა მოგზაურობა დაიწყონ, აღნიშნა მან.

გაეროს მსოფლიო ტურიზმის ორგანიზაციის აღმასრულებელი საბჭო 35 წევრი სახელმწიფოსგან შედგება და ორგანიზაციის მმართველ ორგანოს წარმოადგენს. ის უზრუნველყოფს UNWTO-ს ეფექტიან მუშაობას და გლობალური დღის წესრიგით გათვალისწინებული მოგზაურობისა და ტურიზმის ინდუსტრიის პოლიტიკის ძირითად საკითხებს განიხილავს. მსოფლიო ტურიზმის ორგანიზაციის გენერალური მდივნის პოსტი საქართველოს ეკონომიკის ყოფილ მინისტრს ზურაბ პოლოლიკაშვილს 2017 წლიდან უკავია. მისი უფლებამოსულების ვადა 2018–2021 წლებს მოიცავს.

69
თემები:
ტურიზმი საქართველოში
გიორგი გახარია

გახარია: საქართველო საერთაშორისო არენაზე ერთ-ერთი ყველაზე უსაფრთხო ტურისტული ქვეყანაა

84
(განახლებულია 19:35 16.09.2020)
საქართველო COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობით ღონისძიებას მასპინძლობს.

თბილისი, 16 სექტემბერი — Sputnik. საქართველომ შეძლო მწვანე ქვეყნის სტატუსის მოპოვება და საერთაშორისო არენაზე დღეს ერთ-ერთი ყველაზე უსაფრთხო ტურისტული ქვეყანაა, რაც გვაძლევს შესაძლებლობას, პოსტკრიზისულ პერიოდში დავიწყოთ ეკონომიკური განვითარების ახალი ეტაპი, განაცხადა საქართველოს პრემიერ-მინისტრმა გიორგი გახარიამ სასტუმრო „ბილტმორში“ გამართულ ღონისძიებაზე სიტყვით გამოსვლისას.

რა ელის მსოფლიო ტურიზმს კორონავირუსის პირობებში>>

15-17 სექტემბერს საქართველო გაეროს მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომას მასპინძლობს. ეს COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობითი ღონისძიებაა.

„პოსტკრიზისულ პერიოდში ერთ-ერთი ყველაზე მნიშვნელოვანი მოვლენა მსოფლიოსთვის სწორედ ტურიზმის აღდგენის ტენდენცია იქნება და ჩვენი სურვილია, ამ პროცესში ვიყოთ პიონერები, რის საფუძველსაც გვაძლევს ტურისტულ სექტორში უსაფრთხოების კუთხით დაგროვილი გამოცდილება. ჩვენ ვფიქრობთ, ტურიზმის სექტორში საქართველოსთვის პოსტკრიზისული ეპოქა უნდა იყოს შესაძლებლობა და გვინდა, რომ ეკონომიკური კრიზისი, პანდემია ქვეყნის ტურიზმის განვითარებისთვის ვაქციოთ შესაძლებლობად“, – განაცხადა გიორგი გახარიამ.

საქართველოს პრემიერ-მინისტრის თქმით, დღეს ტურიზმი წარმოადგენს ერთ-ერთ იმ სექტორს, რომელსაც პანდემიის გავრცელების გამო მსოფლიო მასშტაბით უდიდესი ზიანი მიადგა. 

„მინდა ხაზი გავუსვა იმ ფაქტს, რომ კრიზისულმა პერიოდმა საქართველოში ტურიზმის სექტორი ასევე დააზიანა, თუმცა წინა წლების მაჩვენებლებით საქართველო, ტურიზმის განვითარების თვალსაზრისით, ერთ-ერთი ლიდერი იყო მსოფლიოში და, რაც მთავარია, ტურიზმის სექტორი ქვეყნის ეკონომიკის 8.1% გახდა“, – აღნიშნა გახარიამ.

დღეს ღონისძიების მონაწილეებს სიტყვით მიმართა გაეროს მსოფლიო ტურიზმის ორგანიზაციის გენერალურმა მდივანმა ზურაბ პოლოლიკაშვილმაც.

„მსოფლიო პანდემიის გამო ტურიზმის მიმართულებები რისკის ქვეშ არის, მაგრამ დღეს ნამდვილად ისტორიული ღონისძიებაა, რადგან პანდემიის შემდეგ პირველად იმართება მსოფლიო ტურიზმის ორგანიზაციის საბჭოს სხდომა. ჩვენ ერთად ვართ ძლიერები, რაც გვაძლევს ტურიზმის აღდგენისა და ამ პროცესის მართვის უნიკალურ პოტენციალს“, – განაცხადა ზურაბ პოლოლიკაშვილმა.

მისი თქმით, მსოფლიო ტურიზმის ორგანიზაცია ყველაფერს გააკეთებს იმისთვის, რათა შეარბილოს პანდემიით გამოწვეული ნეგატიური შედეგები.

საქართველოს ეკონომიკისა და მდგრადი განვითარების მინისტრმა ნათია თურნავამ მსოფლიო ტურიზმის ორგანიზაციის ღონისძიების თბილისში გამართვას „მთავრობის ქმედებების ეფექტურობის ძალიან მაღალი შეფასება“ უწოდა.

„ჩვენ ამაყები ვართ, რომ სწორედ თბილისია დღეს ქალაქი, სადაც მსოფლიო ტურიზმის ლიდერები მსჯელობენ, ამ რთული გამოწვევის პირობებში როგორი მომავალი ექნება ტურიზმს, როგორ დაეხმარონ გლობალურად მსოფლიოში ამ დარგს და საქართველო, რა თქმა უნდა, თავის ღირსეულ სიტყვას იტყვის ამ მიმართულებით“, – განუცხადა ჟურნალისტებს ნათია თურნავამ.

გაეროს მსოფლიო ტურიზმის ორგანიზაციის აღმასრულებელი საბჭო 35 წევრი სახელმწიფოსგან შედგება და ორგანიზაციის მმართველ ორგანოს წარმოადგენს. ის უზრუნველყოფს UNWTO-ს ეფექტიან მუშაობას და გლობალური დღის წესრიგით გათვალისწინებული მოგზაურობისა და ტურიზმის ინდუსტრიის პოლიტიკის ძირითად საკითხებს განიხილავს.

თბილისში ორგანიზაციის სხდომა მსოფლიო ჯანდაცვის ორგანიზაციისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის გაიდლაინებისა და უსაფრთხოების სრული დაცვით ტარდება.

84
თემები:
ტურიზმი საქართველოში
ნადირობა

საქართველოში  უკანონო ნადირობის 304 შემთხვევა გამოვლინდა

0
(განახლებულია 13:20 25.09.2020)
უკანონო ნადირობის ყველაზე მეტი-230  შემთხვევა დასავლეთის რეგიონული სამმართველოს სამოქმედო ტერიტორიაზე დაფიქსირდა.

თბილისი, 25 სექტემბერი – Sputnik. ნადირობის სეზონის გახსნიდან დღემდე საქართველოს მასშტაბით უკანონო ნადირობის 304 ფაქტი გამოვლინდა, იუწყება გარემოსდაცვითი ზედამხედველობის დეპარტამენტი. 

საქართველოში გადამფრენ ფრინველებზე ნადირობის სეზონი 22 აგვისტოს გაიხსნა. არემოსდაცვითი ზედამხედველობის დეპარტამენტის თანამშრომლები ნადირობის სეზონის ფარგლებში ნადირობის წესების დარღვევის გამოვლენისა და უკანონო ნადირობის აღკვეთის მიზნით საქართველოს მასშტაბით 24-საათიან გაძლიერებულ კონტროლს ახორციელებენ.

უწყების ცნობით, უკანონო ნადირობის ყველაზე მეტი – 230  შემთხვევა დასავლეთ საქართველოს ტერიტორიაზე დაფიქსირდა.  რაც შეეხება დედაქალაქს, აქ სამი ფაქტი დაფიქსირდა.

„გარემოსდაცვითი ზედამხედველობის დეპარტამენტის თანამშრომლებმა სამცხე-ჯავახეთში უკანონო ნადირობის 21, აღმოსავლეთ რეგიონული სამმართველოს სამოქმედო ტერიტორიაზე-18, აჭარასა და გურიაში-14, სამეგრელო -ზემო სვანეთში-7. ქვემო ქართლში-6, კახეთში კი 5 ფაქტი გამოავლინეს“, – აღნიშნულია განცხადებაში.

სპეციალისტებმა შემოწმების დროს 279 ხელნაკეთი მოწყობილობა ე.წ. „მანოკი“ ამოიღეს. გარდა ამისა, გამოვლენილი სამართალდარღვევებიდან 20 შემთხვევაში სამართალდამრღვევები დაწესებული მოსაკრებლის გადახდის დამადასტურებელი ქვითრის გარეშე ნადირობდნენ, 12 მონადირეს კი დაურეგისტრირებელი იარაღი აღმოაჩნდა. 

გარემოსდაცვითი ზედამხედველობის დეპარტამენტი მოქალაქეებს მოუწოდებს, კანონდარღვევის დაფიქსირების შემთხვევაში, მიმართონ გარემოს დაცვისა და სოფლის მეურნეობის სამინისტროს „ცხელ ხაზს“ – 153 (ზარი უფასოა, ანონიმურობა დაცულია), რათა მყისიერად მოხდეს კანონდარღვევაზე რეაგირება.

საქართველოში ნადირობისათვის დაშვებულ გადამფრენ ფრინველთა ცალკეულ სახეობებზე დაწესებულია ნადირობის ვადები და დღიური ლიმიტები.

ნადირობის დროს იკრძალება მცენარეული საფარის დაწვა, გარეული ფრინველის კვერცხის შეგროვება და გაყიდვა, ცხოველთა ბუდეების, ბუნაგების, საცხოვრებელი ადგილების მოშლა ან განადგურება, ცხოველთა მასობრივი მოპოვებისთვის სხვადასხვა მოწყობილობის გამოყენება, ნადირობა თვითმფრინავიდან, ვერტმფრენიდან, ავტომობილიდან, მოტოციკლიდან, კატარღებიდან, ძრავიანი ნავებიდან და სხვა მოტორიანი სატრანსპორტო საშუალებებიდან.

ნადირობა ასევე აკრძალულია სახელმწიფო ნაკრძალებში, ეროვნულ პარკებში და მათ გარშემო 500-მეტრიან ზონაში, საქართველოს ქალაქების ადმინისტრაციულ საზღვრებში.

0
თემები:
ჩვენ და ბუნება