ბორჯომ-ხარაგაულის ეროვნული პარკი

რა ვნახოთ და როგორ დავისვენოთ ბორჯომში: რჩევები მოგზაურობის მსურველებს

935
(განახლებულია 15:52 15.06.2020)
მსოფლიოში გავრცელებული პანდემიის გამო საქართველოს მთავრობამ არაერთხელ მოუწოდა საზოგადოებას საქართველოში დასვენებისკენ. წელს ტურისტებს ძველებურად ვერ ვუმასპინძლებთ, ამიტომ ჩვენი ქვეყნის ეკონომიკა ნაწილობრივ სწორედ ჩვენზეა დამოკიდებული.

გადავწყვიტეთ შემოგთავაზოთ ციკლი იმის შესახებ, საქართველოს მასშტაბით სად და როგორ შეძლებთ უსაფრთხო და ნაყოფიერ დასვენებას. ამჯერად არჩევანს ბორჯომზე შევაჩერებთ, რომელიც ამჟამად „მწვანე ზონის“ სტატუსს ინარჩუნებს.

ბორჯომი ბალნეოლოგიური და კლიმატური კურორტია, რომელიც ზღვის დონიდან 800-850 მეტრზე მდებარეობს. აქ ჩამოსულ დამსვენებელს ხვდება საოცარი კლიმატი, ულამაზესი ხედები, მთები, წიწვოვანი ტყე, სუფთა ჰაერი, სიგრილე და მინერალური წყლები, რაც მრავლადაა რაიონში.

ბორჯომი ერთ-ერთი შესანიშნავი ადგილია დასვენებისთვის, ლაშქრობისთვის თუ რეგიონის კულტურის მრავალსაუკუნოვანი ისტორიის გასაცნობად.

ბორჯომი-ხარაგაულის ეროვნული პარკი
FB/დაცული ტერიტორიების სააგენტო / Agency of Protected Areas (Georgia)
ბორჯომი-ხარაგაულის ეროვნული პარკი

რა ვნახოთ ბორჯომში

ბორჯომი მდიდარია საოცარი, თვალისმომჭრელი მთებით, ტბებით და ეროვნული პარკებით. ლაშქრობის მსურველებს შეგიძლიათ მოინახულოთ ბორჯომ-ხარაგაულის ეროვნული პარკი, ნეძვის აღკვეთილი, ლომის მთა, კახისის ტბა, წეროს ტბა, მეღრუკის ხეობა.

მათ შორის დიდი პოპულარობით სარგებლობს ბორჯომ-ხარაგაულის ეროვნული პარკი, რომლის ტურისტული მარშრუტების ქსელი ერთი და მრავალდღიანი ლაშქრობების საშუალებას იძლევა და ჯამში 12 მარკირებულ და კეთილმოწყობილ ბილიკს მოიცავს. ბილიკების მახლობლად მოწყობილია ტურისტული თავშესაფრები, საპიკნიკე და საკემპინგე ადგილები, ცეცხლის დასანთებად გამოყოფილია სპეციალური ადგილები.

პიკნიკი ბორჯომში
photo: courtesy of Nino Maisuradze
პიკნიკი ბორჯომში

ლომის მთისკენ მიმავალი მარშრუტი იწყება ბორჯომ-ხარაგაულის ეროვნული პარკის შესასვლელთან. ამ ბილიკზე  თქვენ შეგხვდებათ შერეული ტყეები, ცად აზიდული მწვერვალი, ალპური მდელო საოცარი ფერებით და წმინდა გიორგის სალოცავი. მაისში ბილიკის ლამაზ ხედებს განსაკუთრებულ ელფერს სძენს აყვავებული დეკა, ხოლო ივნისში თქვენს ყურადღებას მიიპყრობს როდოდენდრონი. მზიან ამინდში შესაძლებელია დიდი კავკასიონის ქედის და ევროპის უმაღლესი მწვერვალის - იალბუზის დანახვა.

ნეძვის ეროვნული პარკი 2007 წელს შეიქმნა და მისი შექმნის მიზანია კავკასიური სოჭის უნიკალური კორომებისა და ფოცხვერის დაცვა-შენარჩუნება.

კახისის ტბა
კახისის ტბა

კახისის ტბა თრიალეთის ქედის დასავლეთ კალთაზე მდებარეობს. ის საქართველოში ერთ-ერთი ყველაზე პოპულარული და ყველაზე „ტურისტმრავალი“ ტბაა. ტბას გარშემო ულამაზესი ნაძვნარი აკრავს, საპიკნიკე და საბანაკე ადგილებიც  ბევრია, რაც თქვენი სასიამოვნო დასვენების გარანტიაა. გზად ტყეში ზაფხულში მრავლად შეხვდებით კენკრას, ჟოლოს და მაყვალს. შეგიძლიათ მათი განსაკუთრებული არომატით დატკბეთ. დამერწმუნეთ, ასეთ გემრიელ კენკრას სხვაგან ვერ გასინჯავთ. ტბამდე მისასვლელი ბილიკი ძალიან მარტივია და ნებისმიერ მსურველს შეუძლია აქ მოხვედრა.

ბორჯომი ასევე გამოირჩევა კულტურული ძეგლების სიმრავლით. აქ შეძლებთ მოინახულოთ ისეთი უძველესი ისტორიული და კულტურული ძეგლები, როგორიცაა მწვანე მონასტერი, ტიმოთესუბნის მონასტერი, ფოთოლეთის ეკლესია, დაბის წმინდა გიორგის ეკლესია, პეტრეს ციხე, დვირის ციხე, ყვიბისის ბერის საყდრების ეკლესია, რომლის შესახებ ცოტამ თუ იცის.

მწვანე მონასტრის ნანგრევი
მწვანე მონასტრის ნანგრევი

მწვანე მონასტერი ბორჯომიდან რამდენიმე კილომეტრში, სოფელ ჩითახევის მახლობლად, დაბურული ფოთლოვანი ტყის შუაგულში მდებარეობს. დღეს აქ მამათა მონასტერი ფუნქციონირებს და ბერები მოღვაწეობენ. ძეგლი მეცხრე საუკუნით თარიღდება. მეცნიერთა აზრით, ის ცნობილი ქართველი მოღვაწის, წმინდა გრიგოლ ხანძთელის მოწაფეების – ქრისტეფორესა და თევდორეს აშენებულია.

მონასტრის გვერდით ჩამოედინება ანკარა წყარო, სადაც ქვებზე დღემდე მოსჩანს სისხლის ნაკვალევი. ადგილობრივი მღვდელმსახურები მოგიყვებიან, რომ ისტორიული ცნობების თანახმად, მე-16 საუკუნეში შაჰ-თამაზის შემოსევების დროს მონასტერი დაურბევიათ, ბერები სასტიკად უწამებიათ და სწორედ ამ მდინარის პირას დაუხოცავთ. მონასტრის ტერიტორიაზე დღესაც შეგიძლიათ ნახოთ ძნელბედობის ჟამს დაღვრილი ბერების უხრწნელი სისხლის უამრავი ნაკვალევი. ეს ტაძრის უდიდესი სიწმინდეა, რომელსაც დრო და ჟამი ვერაფერს აკლებს.

მწვანე მონასტერი
მწვანე მონასტერი

ტიმოთესუბნის ღვთისმშობლის სახელობის მონასტერი მე-12–მე-13 საუკუნეების მიჯნაზე აუგიათ სოფელ ტიმოთესუბანში. ტაძარი ულამაზეს ბუნებაშია ჩაკარგული და ყოველწლიურად უამრავ დამთვალიერებელს მასპინძლობს. ტაძრის მოხატულობა 1205-1215 წლებით თარიღდება და თამარ მეფის ეპოქას მიეკუთვნება, სწორედ ამიტომ არის ის უნიკალური. საბედნიეროდ ფრესკების დიდი ნაწილი დღემდე შენარჩუნებულია.

პეტრეს ციხე
პეტრეს ციხე

პეტრეს ციხე სოფელ ლიკანის პირდაპირ, მდინარე მტკვრის მარჯვენა სანაპიროზე მდებარეობს და შუა საუკუნეების ძეგლს მიეკუთვნება. ციხე ავალიშვილების ფეოდალურ საგვარეულოს ეკუთვნოდა. მე-16 საუკუნეში ოსმალთა მიერ თორის დაპყრობის შემდეგ პეტრეს ციხე ოსმალური ადმინისტრაციული ცენტრი გამხდარა. აქ მრავლად არის შემორჩენილი სხვადასხვა ნაგებობის ნაშთები.

ბორჯომთან ახლოს არაერთი ცნობილი კურორტია, რომლის მონახულებაც შეგიძლიათ. ესენია ბაკურიანი, მიტარბი, კოხტა, ციხისჯვარი, ცემი, ლიკანი, წაღვერი.

ბორჯომიდან ისე არ წახვიდეთ, რომ არ მოინახულოთ ღირსი სერაფიმე საროველის ეკლესია, რომელიც სადგერში, მეუფე სერაფიმეს (ჯოჯუა) ლოცვა-კურთხევით აშენდა. ტაძრის მახლობლად სენაკი დგას. სენაკის შესასვლელში წერია: „ეს კელია არის ასლი იმ კელიისა, რომელშიც სიცოცხლის უკანასკნელი წლები გატარა ღირსმა მამა სერაფიმე საროველმა“. ტაძრის ტერიტორიაზე ნახავთ უზარმაზარ ქვას, რომელიც ანალოგია წმინდა სერაფიმეს ქვისა. როცა ბოროტი ცდილობდა მამა სერაფიმეს გონების ამღვრევას, წმინდა მამა კიდევ უფრო ამკაცრებდა ღვაწლს – ყოველ ღამით ის უზარმაზარ ქვაზე ადიოდა და ხელაპყრობით წარმოსთქვამდა იესოს ლოცვას: „უფალო იესო ქრისტე, ძეო ღვთისაო, შემიწყალე მე ცოდვილი.” ასე ლოცულობდა წმინდანი 1000 დღე-ღამის განმავლობაში.

ყვიბისის ბერისაყდრების ეკლესია
photo: courtesy of Bakur Gelashvili
ყვიბისის ბერისაყდრების ეკლესია

ბორჯომის რიონში, სოფელ ყვიბისში მდებარეობს ბერისაყდრების ეკლესია, რომელიც ულამაზეს თვალუწვდენელ ტყეშია ჩამალული და მე-10–მე-11 საუკუნით თარიღდება. ტაძარი სოფლიდან ოთხი კილომეტრის დაშორებითაა. გადმოცემის თანახმად, ტაძარი წმინდა გიორგის სახელობისა ყოფილა. ნაგებობა დანგრეულია, მხოლოდ მთავარი ნავის ჩრდილოეთ კედლის ფრაგმენტი, კამარის ძალზედ მცირე ნაწილი და აბსიდია შემორჩენილი. ეკლესიაში ორი ქვის ფილა დევს. ერთ-ერთზე ბოლნური ჯვრებია გამოსახული. შემორჩენილია გალავნის ნაშთიც, რომელიც ტაძარს ჰქონია შემოვლებული. 2009-2010 წლებში ბერისაყდრების ეკლესიის მახლობლად აშენდა ათანასე ათონელის ტაძარი. ტაძარი მოხატულია. ამჟამად აქ მამათა მონასტერი ფუნქციონირებს.

სოფელი ყვიბისი
სოფელი ყვიბისი

ბერისაყდრების ეკლესიამდე მიდის როგორც საფეხმავლო, ისე სამანქანო გზა. თუმცა გირჩევთ გასავლელი მანძილი ფეხით გაიაროთ და დატკბეთ ულამაზესი ბუნებით, რომელიც გულგრილს არ დაგტოვებთ.

ბორჯომის რაიონის შესახებ უფრო მეტის გასაგებად აუცილებლად უნდა ეწვიოთ მხარეთმცოდნეობის მუზეუმს, რომელიც თავს იწონებს ასეული წლების განმავლობაში შეგროვებული 40 ათასზე მეტი ექსპონატით.

კახისის ტბა
კახისის ტბა

სად დავრჩეთ ბორჯომში.

ბორჯომში დასარჩენი ადგილი მრავლადაა. ვინაიდან ბორჯომი ბალნეოლოგიური კურორტია, აქ განსაკუთრებული პოპულარობით სარგებლობს სპა-სასტუმროები და სანატორიუმები. ერთ-ერთი მდიდრული და პოპულარული სასტუმროა Crowne Plaza Borjomi, რომელიც ბორჯომის პარკის შესასვლელთანაა. აქ არის აუზი, საუნა, გოგირდის აბანოები, ტარდება სპა-პროცედურები და ა.შ. რა თქმა უნდა, ფასებიც მომსახურების შესაბამისია და ორადგილიანი ოთახის ღირებულება, დღეში 300 ლარიდან იწყება.

რომანოვების სასახლე ლიკანში ერთ-ერთია იმ არქიტექტურულ ნიმუშებს შორის, რომლებიც გერმანელებმა ააგეს საქართველოში
საქართველოს ეროვნული არქივი
რომანოვების სასახლე ლიკანში ერთ-ერთია იმ არქიტექტურულ ნიმუშებს შორის, რომლებიც გერმანელებმა ააგეს საქართველოში

ცენტრიდან დაახლოებით 1.5 კმ-ის მოშორებით, ლიკანში, ე.წ მეოთხე სამმართველოს ტერიტორიაზე კიდევ ერთი მდიდრული სასტუმრო Rixos Borjomi მდებარეობს. აქაც არის სპა-ცენტრი აუზით, საუნები და სხვა მომსახურება. ამ სასტუმროების ნომრებში განთავსება კი 200 დოლარიდან იწყება.

თუ უფრო ბიუჯეტურად გსურთ დასვენება, პარკის მიმდებარე ტარიტორიაზე არაერთი საოჯახო ტიპის კეთილმოწყობილი სასტუმროა, სადაც ფასები 30-დან 150 ლარამდე მერყეობს.

15 ივნისიდან საქართველოს ყველა ეროვნული პარკი და დაცული ტერიტორია განაახლებს ვიზიტორების მიღებას. იმოგზაურეთ საქართველოში, თქვენ საყვარელ ადგილებზე და სხვებსაც გაუზიარეთ მიღებული ემოციები.

 

935
ავიაკომპანია Airzena - Georgian Airways–ის თვითმფრინავი

რამდენად სარისკოა საქართველოში უცხოელი ტურისტების შემოშვება ცერცვაძე განმარტავს

94
(განახლებულია 20:28 09.07.2020)
საქართველომ საზღვრები მხოლოდ იმ ქვეყნებისთვის გახსნა, რომლებშიც კორონავირუსული ინფექციის გავრცელება კონტროლდება.

თბილისი, 9 ივლისი – Sputnik. საქართველოში საერთაშორისო ტურიზმის აღდგენა გარკვეულ რისკებთან არის დაკავშირებული, თუმცა ქვეყანა მათთან გამკლავებას შეძლებს, განუცხადა ჟურნალისტებს თბილისის ინფექციური საავადმყოფოს დირექტორმა თენგიზ ცერცვაძემ.

როგორი ეპიდვითარებაა იმ ხუთ ქვეყანაში, ვისთვისაც საქართველო საზღვრებს ხსნის>>

გუშინ ცნობილი გახდა, რომ საქართველო უახლოეს პერიოდში საზღვრებს გახსნის გერმანიის, საფრანგეთის, ესტონეთის, ლატვიისა და ლიეტუვასთვის. ამ ქვეყნების მოქალაქეები ქვეყანაში უნდა ჩამოვიდნენ პირდაპირი ავიარეისით და შეავსონ სპეციალური ელექტრონული ანკეტა, სადაც უნდა მიუთითონ მოგზაურობის ისტორია ბოლო 14 დღის განმავლობაში, დატოვონ საკონტაქტო ტელეფონი და იმ ადგილის მისამართი, სადაც გაჩერდებიან.

„თითოეული შეზღუდვის მოხსნას წინ უნდა უსწრებდეს კარგად გაკეთებული ანალიზი და კარგად შემუშავებული რეგულაციები იმისთვის, რომ შესაძლო რისკები შევამციროთ. აქამდე საქართველო ამას წარმატებით ახერხებდა... დაახლოებით იმავესთან, ოღონდ გაცილებით სერიოზულთან გვაქვს საქმე, როცა ვსაუბრობთ საზღვრების გახსნაზე. რა თქმა უნდა, საზღვრების გახსნა შეიცავს რისკებს, სწორედ ამიტომ საზღვრების გახსნა არ მოხდა ხელაღებით ყველა ქვეყანასთან. მოხდა ჯერ მხოლოდ ხუთ ქვეყანასთან“, – განაცხადა ცერცვაძემ.

მან აღნიშნა, რომ საქართველომ საზღვრები გახსნა იმ ქვეყნებისთვის, რომლებიც ინფექციის გავრცელებას აკონტროლებენ.

„ამიტომ ვფიქრობ, რომ სწორად გატარებული პრევენციული ღონისძიებებით ამ ხუთ ქვეყანასთან საზღვრების გახსნით რისკი არის, თუმცა მცირე“, – აღნიშნა ცერცვაძემ.

მისი თქმით, კორონავირუსის ახალ შემთხვევებს ჯანდაცვის სისტემა ისე გაუმკლავდება, რომ ამას მოსახლეობა ვერ იგრძნობს.

„თუ ისე მოხდება, რომ მათ საზღვარზე ტემპერატურა არ დაუფიქსირდებათ და შეიძლება შემდეგ გახდნენ ავად, მეოთხე, მეშვიდე დღეს, ამისთვისაა ჩვენი სამსახურები. ისინი გაათმაგებული ყურადღებით იქნებიან, რომ თითოეული ასეთი შემთხვევა გამოვლინდეს და მოხდეს ამ შემთხვევის ყველა კონტაქტის მოძიება და მკურნალობა“, – განაცხადა ცერცვაძემ.

„პროცესს გავაკონტროლებთ“ - ტიკარაძემ საზღვრების გახსნასთან დაკავშირებით კომენტარი გააკეთა>>

ევროკავშირმა საქართველო ევროკავშირის არაწევრი 15 ქვეყნის სიაში შეიყვანა, რომლებისთვისაც 1 ივლისიდან საზღვრები გახსნა. საქართველოს მოქალაქეებისთვის საზღვრები გახსნეს შვეიცარიამ, უნგრეთმა, გერმანიამ, ლატვიამ, საფრანგეთმა, ესპანეთმა, ნიდერლანდებმა, იტალიამ, მონტენეგრომ და სხვ.

94
თემები:
COVID-19 საქართველოში
გუდაური

მაღალმთიან კურორტებზე საზაფხულო სეზონი იხსნება

66
(განახლებულია 13:59 08.07.2020)
კორონავირუსის გავრცელების საფრთხის გამო საქართველოს მთავრობამ მარტში ზამთრის კურორტებზე სეზონის ვადაზე ადრე დახურვის გადაწყვეტილება მიიღო.

თბილისი, 8 ივლისი – Sputnik. საქართველოს მაღალმთიანი კურორტები – გუდაური, ბაკურიანი და სვანეთის სოფლები საზაფხულო სეზონს 10 ივლისს ხსნიან, ნათქვამია საქართველოს მთის კურორტების განვითარების კომპანიის განცხადებაში.

განცხადებაში აღნიშნულია, რომ ზაფხულის სეზონი, კორონავირუსის პანდემიის გათვალისწინებით, უსაფრთხოების ყველა ზომის დაცვით გაიხსნება.

ზაფხულის სეზონის განმავლობაში ბაკურიანში – დიდველზე ყველა საბაგირო ყოველდღიურად 11:00-დან 17:00 საათამდე იმუშავებს.

გუდაურში დამსვენებლებს „გუდაურა“ (გონდოლა) და კობი-გუდაურის საბაგირო 11:00–17:00 საათებში მოემსახურება. სვანეთში მესტია-ჰაწვალის დამაკავშირებელი და ზურულდის საბაგიროები 10:00–16:30 საათებში იმუშავებს.

„მთის კურორტების განვითარებისა და პოპულარიზაციისთვის აუცილებელია ზამთრის კურორტები ოთხსეზონიანი გახდეს. ამისთვის ბაკურიანში 6 კმ-იანი საერთაშორისო დონის ველობილიკია მოწყობილი. ველობილიკი ფუნქციონირებს გუდაურშიც, რომლის სიგრძე 5 კილომეტრია. ბილიკები როგორც პროფესიონალი, ისე მოყვარული ველომრბოლელებისთვისაა გათვლილი“, – ნათქვამია განცხადებაში.

ტურიზმის გააქტიურება საფრთხეს შეიცავს, მაგრამ საქართველო ვერ გაჩერდება – გოფოძე>>

კორონავირუსის გავრცელების თავიდან ასაცილებლად მთის კურორტების განვითარების კომპანიამ უსაფრთხოების წესები შეიმუშავა.

კერძოდ, დღის ბოლოს საბაგირო გზები სადეზინფექციო ხსნარებით დამუშავდება. გონდოლაში დაიშვება მხოლოდ ოთხი ადამიანი, რომლებიც ჭადრაკისებურად განლაგდებიან. დახურულ სივრცეში პირბადის ტარება აუცილებელია.

ღია საბაგიროების შემთხვევაში ექვსადგილიან საბაგიროზე დაიშვება სამი ადამიანი, ხოლო ოთხიანზე – ორი, ოჯახის შემთხვევაში – პლუს ბავშვი.

კურორტების სტუმრებმა ორმეტრიანი დისტანცია უნდა დაიცვან. სალაროებთან მოთავსებული იქნება სადეზინფექციო საშუალებები. თანხის გადახდის შემდეგ სტუმრებმა აუცილებლად უნდა დაიმუშაონ ხელები სპეციალური ხსნარით. სანამ ისინი საბაგიროთი ისარგებლებენ, გაივლიან თერმოსკრინინგს.

ზემო აჭარა აქტუალობას არ კარგავს: ჩირუხის მთა ტურისტული ცენტრი გახდება>>

საქართველოს მთავრობამ მარტში, კორონავირუსის გავრცელების საფრთხის არიდების მიზნით, ზამთრის სათხილამურო კურორტებზე სეზონის ვადაზე ადრე დახურვის გადაწყვეტილება მიიღო.

66
თემები:
ტურიზმი საქართველოში
მყიდველები ბაზარში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/10 ივლისი

86400
საქართველოში საგანგებო მდგომარეობა ერთი თვის წინ მოიხსნა, მაგრამ მთავრობამ შეზღუდვების ნაწილი ძალაში დატოვა.

თბილისი, 10 ივლისი – Sputnik. საქართველოს მთავრობა აგრძელებს კორონავირუსის პანდემიის გამო დაწესებული შეზღუდვების მოხსნას, მაგრამ ამავე დროს მთავრობა და ეპიდემიოლოგები მოუწოდებენ მოქალაქეებს გამოიჩინონ სიფრთხილე და დაიცვან ჯანდაცვის სამინისტროს რეკომენდაციები.

ქვეყნის ტერიტორიაზე მოქმედებს შემდეგი შეზღუდვები:

  • დახურულ სივრცეებში, საჯარო დაწესებულებებში, საზოგადოებრივ ტრანსპორტში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • საზოგადოებრივ ტრანსპორტში დაუშვებელია პირბადის გარეშე ყოფნა და კონდიციონერების ჩართვა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე;
  • დახურულ სივრცეებში აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • უნივერსიტეტებში სასწავლო პროცესი კვლავ დისტანციურად განხორციელდება;
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს).

ამ მომენტისათვის ინფიცირებულთა რაოდენობა 968 ადამიანს შეადგენს, აქედან 844 გამოჯანმრთელდა, 15 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

15 ივნისიდან აღდგა შიდა ტურიზმი, ხოლო 1 ივლისიდან საქართველო საზღვრებს უცხოელი ტურისტებისთვის გახსნის.

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 4851, სტაციონარებში მეთვალყურეობის ქვეშ კი 231 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე stopcov.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
86400
თემები:
COVID-19 საქართველოში