სასტუმრო Radisson Iveria

საქართველოში სასტუმროები იხსნება: რეკომენდაციები პერსონალისა და სტუმრებისთვის

226
(განახლებულია 22:17 07.06.2020)
საქართველოში ჩამოსული ტურისტები დაისვენებენ ე.წ. „მწვანე ზონებში“, სადაც იქნება უზრუნველყოფილი სრული უსაფრთხოება დაინფიცირებისგან როგორც ტურისტებისთვის, ისე ადგილობრივი მოსახლეობისთვის.

თბილისი, 7 ივნისი - Sputnik. ორშაბათიდან, 8 ივნისიდან საქართველოში მუშაობას განაახლებენ სასტუმროები, თუმცა მხოლოდ ის სასტუმროები, რომლებმაც საქართველოს ჯანდაცვის სამინისტროს შესაბამისი ნებართვა მიიღეს და მზად არიან თანამშრომლების და სტუმრების უსაფრთხოება უზრუნველყონ.

საქართველო საერთაშორისო სტუმრებს 1 ივლისიდან მიიღებს, შიდა ტურიზმი კი 15 ივნისს იწყება.

ჯანდაცვის სამინისტრომ ყველა ტიპის სასტუმროებისთვის რეკომენდაციები შეიმუშავა:

  • როგორც პერსონალს, ისე ვიზიტორებს სასტუმროში შესვლისას უტარდება თერმოსკრინინგი. მომატებული ტემპერატურის შემთხვევაში ეს უნდა მიეთითოს სპეციალურ წიგნში და ეცნობოს „112“-ის ცხელ ხაზზე.
  • ინფორმაცია COVID-19-თან დაკავშირებული პროფილაქტიკური ზომების შესახებ თვალსაჩინო ადგილზე უნდა იყოს განთავსებული, შესაძლებელია ვიდეო/აუდიო მასალების გამოყენება
  • სასტუმროს ყველა სივრცის სათანადო დასუფთავება/დეზინფექცია დღეში სულ მცირე 3-ჯერ უნდა ჩატარდეს, ხშირად შეხებადი ზედაპირები ყოველ 2 საათში ერთხელ უნდა დასუფთავდეს
  • ხალხის თავშეყრის ადგილებში აუცილებელია ორმეტრიანი დისტანციის დაცვა
  • ერთჯერადი ხელსახოცები და პირბადეები უნდა განთავსდეს დახურულ სანაგვე კონტეინერებში
  • შიდა სივრცეებში უნდა იყოს უზრუნველყოფილი ბუნებრივი ვენტილაცია
  • ორსართულიანი საწოლების გამოყენება დაუშვებელია
  • საერთო მოხმარების სააბაზანო ოთახების ყოველი გამოყენების შემდეგ უნდა მოხდეს მათი დეზინფექცია
  • ვიზიტორები და სასტუმროს პერსონალი სასტუმროში უნდა შევიდნენ დეზობარიერის გავლით, საერთო სივრცეებში უნდა იყოს განთავსებული დისპენსერები სადეზინფექციო საშუალებით.
  • სასტუმროებისა და რესტორნების მეპატრონეებს ურჩევენ გამოიყენონ მხოლოდ ბეჭდური, ერთჯერადი მენიუ ან მისი ელექტრონული ვარიანტი, ასევე ერთჯერადი სუფრები.
  • ერთ მაგიდასთან უნდა განთავსდეს მაქსიმუმ 6 ადამიანი დისტანციის დაცვით, თუ საუბარი არ არის ერთი ოჯახის წევრებზე.

სპეციალური მოთხოვნები:

  • სასტუმროს რეგისტრატურაზე უნდა დამონტაჟდეს გამჭვირვალე ბარიერი.
  • დალაგებაზე პასუხისმგებელმა პერსონალმა უნდა აირიდოს მჭიდრო კონტაქტი სტუმრებთან. პერსონალმა დალაგების დროს უნდა გამოიყენოს ხელთათმანები და ხელთათმანების გამოყენების შემდეგ დაიბანოს ხელები და დაიმუშაოს სპეციალური ხსნარით.
  • ბინებსა და აპარტამენტებში სტუმრებსა და მასპინძლებს შორის მიღება-გასვლის დროს პირადი კონტაქტი მინიმუმამდე უნდა იყოს დაყვანილი. რეკომენდირებულია სტუმრის მიღების (check in) და გასვლის (checkout) დისტანციური სისტემის დანერგვა.
  • სტუმრის გასვლის შემდეგ, ოთახების დალაგება განხორციელდეს შემდეგი პრინციპით - დეზინფექცია, 4 საათიანი განიავება, დალაგება-დასუფთავება.

განსაკუთრებული ყურადღება უნდა დაეთმოს სააბაზანოებისა და საპირფარეშოების დასუფთავებას, ასევე ხშირად შეხებად ზედაპირებს.

სასტუმროების აუზებში ბანაობა დაშვებულია, თუმცა აუზის ყოველ 6 კვადრატული მეტრი ფართობზე მხოლოდ ერთი ადამიანი დაიშვება. აუზში ჩასვლა დაშვებულია მხოლოდ შხაპის მიღების შემდეგ. წყალი უნდა იწმინდებოდეს სპეციალური მეთოდით, აუზსაც დეზინფექცია უნდა უტარდებოდეს.

როგორც პარასკევს გახდა ცნობილი, თბილისში 75 შემოწმებუ8ლი სასტუმროდან უსაფრთხოების პროტოკოლს მხოლოდ 15 პასუხობს.

იგეგმება, რომ საქართველოში ჩამოსული ტურისტები დაისვენებენ ე.წ. „მწვანე ზონებში“, სადაც იქნება უზრუნველყოფილი სრული უსაფრთხოება დაინფიცირებისგან როგორც ტურისტებისთვის, ისე ადგილობრივი მოსახლეობისთვის.

 

226
თემები:
ტურიზმი საქართველოში (261)
ავიაკომპანია Airzena - Georgian Airways–ის თვითმფრინავი

რამდენად სარისკოა საქართველოში უცხოელი ტურისტების შემოშვება ცერცვაძე განმარტავს

100
(განახლებულია 20:28 09.07.2020)
საქართველომ საზღვრები მხოლოდ იმ ქვეყნებისთვის გახსნა, რომლებშიც კორონავირუსული ინფექციის გავრცელება კონტროლდება.

თბილისი, 9 ივლისი – Sputnik. საქართველოში საერთაშორისო ტურიზმის აღდგენა გარკვეულ რისკებთან არის დაკავშირებული, თუმცა ქვეყანა მათთან გამკლავებას შეძლებს, განუცხადა ჟურნალისტებს თბილისის ინფექციური საავადმყოფოს დირექტორმა თენგიზ ცერცვაძემ.

როგორი ეპიდვითარებაა იმ ხუთ ქვეყანაში, ვისთვისაც საქართველო საზღვრებს ხსნის>>

გუშინ ცნობილი გახდა, რომ საქართველო უახლოეს პერიოდში საზღვრებს გახსნის გერმანიის, საფრანგეთის, ესტონეთის, ლატვიისა და ლიეტუვასთვის. ამ ქვეყნების მოქალაქეები ქვეყანაში უნდა ჩამოვიდნენ პირდაპირი ავიარეისით და შეავსონ სპეციალური ელექტრონული ანკეტა, სადაც უნდა მიუთითონ მოგზაურობის ისტორია ბოლო 14 დღის განმავლობაში, დატოვონ საკონტაქტო ტელეფონი და იმ ადგილის მისამართი, სადაც გაჩერდებიან.

„თითოეული შეზღუდვის მოხსნას წინ უნდა უსწრებდეს კარგად გაკეთებული ანალიზი და კარგად შემუშავებული რეგულაციები იმისთვის, რომ შესაძლო რისკები შევამციროთ. აქამდე საქართველო ამას წარმატებით ახერხებდა... დაახლოებით იმავესთან, ოღონდ გაცილებით სერიოზულთან გვაქვს საქმე, როცა ვსაუბრობთ საზღვრების გახსნაზე. რა თქმა უნდა, საზღვრების გახსნა შეიცავს რისკებს, სწორედ ამიტომ საზღვრების გახსნა არ მოხდა ხელაღებით ყველა ქვეყანასთან. მოხდა ჯერ მხოლოდ ხუთ ქვეყანასთან“, – განაცხადა ცერცვაძემ.

მან აღნიშნა, რომ საქართველომ საზღვრები გახსნა იმ ქვეყნებისთვის, რომლებიც ინფექციის გავრცელებას აკონტროლებენ.

„ამიტომ ვფიქრობ, რომ სწორად გატარებული პრევენციული ღონისძიებებით ამ ხუთ ქვეყანასთან საზღვრების გახსნით რისკი არის, თუმცა მცირე“, – აღნიშნა ცერცვაძემ.

მისი თქმით, კორონავირუსის ახალ შემთხვევებს ჯანდაცვის სისტემა ისე გაუმკლავდება, რომ ამას მოსახლეობა ვერ იგრძნობს.

„თუ ისე მოხდება, რომ მათ საზღვარზე ტემპერატურა არ დაუფიქსირდებათ და შეიძლება შემდეგ გახდნენ ავად, მეოთხე, მეშვიდე დღეს, ამისთვისაა ჩვენი სამსახურები. ისინი გაათმაგებული ყურადღებით იქნებიან, რომ თითოეული ასეთი შემთხვევა გამოვლინდეს და მოხდეს ამ შემთხვევის ყველა კონტაქტის მოძიება და მკურნალობა“, – განაცხადა ცერცვაძემ.

„პროცესს გავაკონტროლებთ“ - ტიკარაძემ საზღვრების გახსნასთან დაკავშირებით კომენტარი გააკეთა>>

ევროკავშირმა საქართველო ევროკავშირის არაწევრი 15 ქვეყნის სიაში შეიყვანა, რომლებისთვისაც 1 ივლისიდან საზღვრები გახსნა. საქართველოს მოქალაქეებისთვის საზღვრები გახსნეს შვეიცარიამ, უნგრეთმა, გერმანიამ, ლატვიამ, საფრანგეთმა, ესპანეთმა, ნიდერლანდებმა, იტალიამ, მონტენეგრომ და სხვ.

100
თემები:
COVID-19 საქართველოში
გუდაური

მაღალმთიან კურორტებზე საზაფხულო სეზონი იხსნება

66
(განახლებულია 13:59 08.07.2020)
კორონავირუსის გავრცელების საფრთხის გამო საქართველოს მთავრობამ მარტში ზამთრის კურორტებზე სეზონის ვადაზე ადრე დახურვის გადაწყვეტილება მიიღო.

თბილისი, 8 ივლისი – Sputnik. საქართველოს მაღალმთიანი კურორტები – გუდაური, ბაკურიანი და სვანეთის სოფლები საზაფხულო სეზონს 10 ივლისს ხსნიან, ნათქვამია საქართველოს მთის კურორტების განვითარების კომპანიის განცხადებაში.

განცხადებაში აღნიშნულია, რომ ზაფხულის სეზონი, კორონავირუსის პანდემიის გათვალისწინებით, უსაფრთხოების ყველა ზომის დაცვით გაიხსნება.

ზაფხულის სეზონის განმავლობაში ბაკურიანში – დიდველზე ყველა საბაგირო ყოველდღიურად 11:00-დან 17:00 საათამდე იმუშავებს.

გუდაურში დამსვენებლებს „გუდაურა“ (გონდოლა) და კობი-გუდაურის საბაგირო 11:00–17:00 საათებში მოემსახურება. სვანეთში მესტია-ჰაწვალის დამაკავშირებელი და ზურულდის საბაგიროები 10:00–16:30 საათებში იმუშავებს.

„მთის კურორტების განვითარებისა და პოპულარიზაციისთვის აუცილებელია ზამთრის კურორტები ოთხსეზონიანი გახდეს. ამისთვის ბაკურიანში 6 კმ-იანი საერთაშორისო დონის ველობილიკია მოწყობილი. ველობილიკი ფუნქციონირებს გუდაურშიც, რომლის სიგრძე 5 კილომეტრია. ბილიკები როგორც პროფესიონალი, ისე მოყვარული ველომრბოლელებისთვისაა გათვლილი“, – ნათქვამია განცხადებაში.

ტურიზმის გააქტიურება საფრთხეს შეიცავს, მაგრამ საქართველო ვერ გაჩერდება – გოფოძე>>

კორონავირუსის გავრცელების თავიდან ასაცილებლად მთის კურორტების განვითარების კომპანიამ უსაფრთხოების წესები შეიმუშავა.

კერძოდ, დღის ბოლოს საბაგირო გზები სადეზინფექციო ხსნარებით დამუშავდება. გონდოლაში დაიშვება მხოლოდ ოთხი ადამიანი, რომლებიც ჭადრაკისებურად განლაგდებიან. დახურულ სივრცეში პირბადის ტარება აუცილებელია.

ღია საბაგიროების შემთხვევაში ექვსადგილიან საბაგიროზე დაიშვება სამი ადამიანი, ხოლო ოთხიანზე – ორი, ოჯახის შემთხვევაში – პლუს ბავშვი.

კურორტების სტუმრებმა ორმეტრიანი დისტანცია უნდა დაიცვან. სალაროებთან მოთავსებული იქნება სადეზინფექციო საშუალებები. თანხის გადახდის შემდეგ სტუმრებმა აუცილებლად უნდა დაიმუშაონ ხელები სპეციალური ხსნარით. სანამ ისინი საბაგიროთი ისარგებლებენ, გაივლიან თერმოსკრინინგს.

ზემო აჭარა აქტუალობას არ კარგავს: ჩირუხის მთა ტურისტული ცენტრი გახდება>>

საქართველოს მთავრობამ მარტში, კორონავირუსის გავრცელების საფრთხის არიდების მიზნით, ზამთრის სათხილამურო კურორტებზე სეზონის ვადაზე ადრე დახურვის გადაწყვეტილება მიიღო.

66
თემები:
ტურიზმი საქართველოში (261)
სვანეთის კოშკები

საქართველოს მაღალმთიანი რეგიონების განვითარებაში დაეხმარებიან

0
(განახლებულია 00:09 10.07.2020)
ერთი პროექტისთვის ფინანსური მხარდაჭერის მოცულობა 5-დან 50 ათას ევროს შეადგენს, კანდიდატის მხრიდან თანადაფინანსება მინიმუმ 10%-ს უნდა შეადგენდეს.

თბილისი, 10 ივლისი – Sputnik. მესტიის, ლენტეხის, ცაგერის, ონის, ამბროლაურის, საჩხერეს, ჭიათურას და ტყიბულის მუნიციპალიტეტებში ტურიზმის სფეროში პროექტებისთვის საგრანტო კონკურსი გამოცხადდა.

საბაზრო მოთხოვნებზე მორგებული ბიზნეს გარემოს შექმნის მიზნით ევროკავშირმა, შვედეთმა და ავსტრიამ სვანეთის, რაჭა-ლეჩხუმისა და ზემო იმერეთის რეგიონებში მდგრადი სამთო ტურიზმის სექტორში ადგილობრივი განვითარების ინიციატივების 860 ათასი ევროს მოცულობის მხარდაჭერის შესახებ გამოაცხადეს, ნათქვამია საქართველოში ევროკავშირის წარმომადგენლობის ვებგვერდზე გავრცელებულ განცხადებაში.

ფინანსური მხარდაჭერის მოცულობის დიაპაზონია 5 000-დან 50 000 ევროს ჩათვლით. კანდიდატის მხრიდან თანადაფინანსება მთლიანი ბიუჯეტის მინიმუმ 10%-ს უნდა შეადგენდეს. წარდგენილი პროექტის ხანგრძლივობა განსაზღვრულია მინიმუმ 6 თვით და მაქსიმუმ 24 თვით. ყველა დაგეგმილი ღონისძიებები დასრულებული უნდა იყოს 2022 წლის 30 სექტემბრამდე.

განაცხადების შეტანის ბოლო ვადაა 3 აგვისტოს 18:00 საათი თბილისის დროით.

კონკურსში მონაწილეობა შეუძლიათ აღნიშნულ მუნიციპალიტეტებში რეგისტრირებულ კომერციულ და არაკომერციულ კომპანიებს ან პირებს, რომლებიც დარეგისტრირებულნი არიან აღნიშნულ სამიზნე რეგიონებში ან რომელთა საქმიანობის ძირითადი ნაწილი პროექტით დაფარულ არეალებში ხორციელდება ან განხორციელდება.

მაღალმთიანი დასახლების სტატუსის მინიჭების კრიტერიუმები იცვლება >>

კონკურსი მდგრადი სამთო ტურიზმისა და ორგანული სოფლის მეურნეობის მხარდაჭერის ოთხწლიანი პროექტის - GRETA-ს ფარგლებში მიმდინარეობს.

GRETA-ს მიზანია განავითაროს ხსენებულ სექტორებში მცირე და საშუალო საწარმოები. პროექტი მოიცავს საქართველოს სამ რეგიონს - ზემო სვანეთს, რაჭასა და ზემო იმერეთს. მისი ღირებულება 6,8 მილიონ ევროს შეადგენს.                         

0
თემები:
სოციალური სფერო საქართველოში