ჰობიტონი, ახალი ზელანდია

ვირტუალური ტური: იმოგზაურე დედამიწის ყველაზე ზღაპრულ ადგილზე სახლიდან გაუსვლელად

233
(განახლებულია 20:48 08.05.2020)
მართალია, მსოფლიო კორონავირუსის პანდემიას ებრძვის და ამჟამად მოგზაურობაც შეუძლებელია, მაგრამ ყველაზე ლამაზი ქალაქების, სოფლების ვირტუალურად დათვალიერება ურიგო ნამდვილად არ იქნება.

ამჯერად ახალ ზელანდიაში, ჰობიტების სოფელში, ჰობიტონში ვიმოგზაუროთ, რომელიც ქალაქ მათამათას მახლობლად მდებარეობს. ეს არის ზღაპრული ადგილი, სადაც მსოფლიოში ერთ-ერთი ყველაზე წარმატებული ფილმი „ბეჭდების მბრძანებელი“ და „ჰობიტის“ ნაწილი გადაიღეს.

ჰობიტონი, ახალი ზელანდია
© CC0 / Pixabay
ჰობიტონი, ახალი ზელანდია

მაშ ასე, შემოგვიერთით და ჩვენთან ერთად ესტუმრეთ ჰობიტებს - ფროდო ბეგინსის, სემუაიზ გემჯის და სხვებს. იპოვეთ ბეჭედი ჰობიტ დეაგოლთან ერთად. ისეირნეთ ვიწრო ბილიკზე გენდალფთან და ნახეთ, როგორ გამოეგებება მას ძველი მეგობარი ბილბო, როგორ გაჰყურებენ მეგობრები ულამაზეს ხეობასა და ტბას, რომლის მახლობლადაც ამაყად დგას ბებერი მუხა Party Tree.

ჰობიტონი, ახალი ზელანდია
© CC0 / Pixabay
ჰობიტონი, ახალი ზელანდია

თვალისმომჭრელად ლამაზი, მრავალფეროვანი ბუნების გამო 90-იან წლებში სპეციალურად ფილმისთვის ააშენეს ჰობიტონი, თუმცა გადაღებების დასრულების შემდეგ გადაწყვიტეს ჰობიტების სოფელი დაეტოვებინათ - როგორც ტურისტული სანახაობა. იდეამ გაამართლა, ჰობიტონი ტურისტების საყვარელ ადგილად მალევე გადაიქცა.

„ბეჭდების მბრძანებლის“ რეჟისორი პიტერ ჯექსონი დიდხანს ეძებდა ფილმის გადასაღებად ადგილს. როცა მან ახალ ზელანდიას გადაუფრინა, მათამათას სიახლოვეს შენიშნა უმშვენიერესი გორაკები. რეჟისორი მაშინვე მიხვდა, რომ ჰობიტების დასახლების მოსაწყობად იდეალურ ადგილს მიაგნო. გადასაღები ადგილის ძებნისას ის ასევე ეძებდა მაღალ ხეს, რომელიც ტბასთან ახლოს იქნებოდა, ზუსტად ისეთს, როგორიც წიგნშია აღწერილი. მან ის სწორედ გორაკებთან იპოვა. ეს ხე 70–80 მეტრის სიმაღლისაა და Party Tree-ს სახელით არის ცნობილი.

ჰობიტონი ცხვრის ფერმის ტერიტორიაზე აშენდა, რომელიც ალექსანდერების ოჯახს ეკუთვნის. ოჯახი აქ 1978 წელს გადმოვიდა საცხოვრებლად. მათ მფლობელობაში 500 ჰექტარი მიწაა. ოჯახი ტრადიციულად ფერმერობას მისდევს. მოშენებული ჰყავთ ცხვარი და ძროხა. ამჟამად სასოფლო-სამეურნეო ბიზნესს სამი ძმა და მამა უძღვებიან.

მართალია, ოჯახმა არ იცოდა ვინ იყო პიტერ ჯექსონი და მათ წიგნის - „ბეჭდების მბრძანებლის“ შესახებაც არაფერი გაეგოთ, მაგრამ ისინი შეთანხმდნენ.

ჰობიტონი, ახალი ზელანდია
© CC0 / Pixabay
ჰობიტონი, ახალი ზელანდია

ჰობიტონის მშენებლობა 1999 წლის მარტში დაიწყო, ფილმის გადაღება კი იმავე წლის დეკემბერში. გადაღებებმა სამ თვეს გასტანა.

გადაღებების დროს იმდენად ხმამაღლა ყიყინებდნენ ბაყაყები, რომ მსახიობებს ერთმანეთის ხმა არ ესმოდათ. ამიტომ რეჟისორმა ერთ ადამიანს დაავალა ბაყაყების შეგროვება და ფერმის სხვა აუზზე გადატანა, რა არც ისე მარტივი საქმე იყო.  

ფილმის გამოსვლის შემდეგ ფერმას „ბეჭდების მბრძანებლის“ ასობით მოყვარული და გულშემატკივარი მოგზაური მიაწყდა და ისინი კარგა ხანს ჰობიტების ნასახლარის ჩვენების თხოვნით ალექსანდერებს თავს აბეზრებდნენ. სწორედ ამის შემდეგ გაჩნდა იდეა, სოფელი ტურისტულ ზონად ექციათ.

მშენებლობის პროცესი ცხრა თვე გაგრძელდა, სადაც 400 ადამიანი იყო ჩართული. ჰობიტონამდე 1,5 კილომეტრი გზა აშენდა, გორაკის ფერდობებზე გაკეთდა 37 მრგვალი ხვრელი ჰობიტების სახლებისთვის. ჰობიტების საცხოვრებელი სახლის ინტერიერი, ძირითადად, ხისა და პლასტმასის მასალით მოპირკეთდა, გაშენდა ულამაზესი და თვალის მომჭრელი ბაღები. ჰობიტების სახლების უმეტესობა მხოლოდ ფასადებია, რომლებიც ცარიელ ხვრელებს ფარავს.

ჰობიტონი, ახალი ზელანდია
© CC0 / Pixabay
ჰობიტონი, ახალი ზელანდია

მთლიანობაში აქ 37 სახლი აშენდა, ზუსტად იმდენი, რამდენიც ჯონ რონალდ რუელ ტოლკინს აქვს წიგნში ნახსენები. ფილმის გადაღების შემდეგ კი მხოლოდ 17 სახლი შემორჩა. დეკორაციების დიდი ნაწილი დაიშალა, განადგურდა, ნაწილი კი დღემდე ინახება სახლებში. მათ სანახავად უამრავი „ბეჭდების მბრძანებლის“ ფანი და არა მარტო ფანი სტუმრობს ჰობიტონს.

აქ შეგიძლიათ დატკბეთ თეთრი სახლებით, უცნაური დეკორაციებით, ულამაზესი ბაღით. პეიზაჟს განსაკუთრებულ მომხიბვლელობას და ბუნებრიობას მატებს ცხვრის ფარა, რომელიც ყოველდღიურად ბალახობს მწვანე მინდორზე.

თითოეული ჰობიტის ხვრელის გარშემო 30-დან 200 მცენარემდეა გაშენებული. მათ მოსავლელად ჰობიტონში რვა მებაღეა დასაქმებული.

ჰობიტონი, ახალი ზელანდია
© CC0 / Pixabay
ჰობიტონი, ახალი ზელანდია

წარმოუდგენელია არ მოჯადოვდე ზღაპრული სილამაზით, ჰობიტების საცხოვრებელი ბუნაგებით, ფერადი ბაღებით, წისქვილით, სასტუმროთი The Green Dragon, ორთაღიანი ხიდით და ცნობილი Party Tree, მით უმეტეს, თუ „ბეჭდების მბრძანებლისა“ და „ჰობიტის“ ფანი ხართ. ნამდვილად მოწყდებით რეალობას, ათასობით წლით უკან გადაინაცვლებთ და თავს ჰობიტების სტუმრად იგრძნობთ.

აქ წყვილები თავისი ცხოვრების ერთ-ერთ მნიშვნელოვან დღეს, ქორწილსაც კი აღნიშნავენ. ეს არის ადგილი, რომლის მსგავსი არ მოიპოვება. ახალდაქორწინებულები თავისი ცხოვრების უმნიშვნელოვანეს დღეს დაუვიწყარ, ზღაპრულ მოგონებად აქცევენ.

ყოველწლიურად ჰობიტონს მთელი მსოფლიოდან 300000-ზე მეტი ადამიანი სტუმრობს. ჰობიტონში ტური 50 დოლარი ღირს, რაც  „უცნაურ სამყაროში“ სამსაათიან მოგზაურობას მოიცავს. იმისათვის, რომ ამ ზღაპრულ ადგილზე მოგზაურობა გაიმარტივოთ და მეტი ინფორმაცია მიიღოთ სერვისების შესახებ, ეწვიეთ ოფიციალურ საიტს www.hobbitontours.com .

 

233
გიორგი გახარია

გახარია: ეს იყო ყველაზე სწორი გადაწყვეტილება მას ჯანმო რამდენიმე კვირაში ტაშს უკრავდა

69
(განახლებულია 18:24 27.05.2020)
საქართველოს მთავრობის მეთაური გიორგი გახარია დეპუტატებს საგანგებო მდგომარეობის პერიოდში გაწეული საქმიანობის შესახებ ანგარიშს აბარებს.

თბილისი, 27 მაისი – Sputnik. საკარანტინო ზონების იდეა ტურიზმის ეროვნულ სააგენტოში დაიბადა, ეს იყო ყველაზე სწორი გადაწყვეტილება, რომელსაც ჯანდაცვის მსოფლიო ორგანიზაცია სულ რამდენიმე კვირაში ტაშს უკრავდა, განაცხადა საქართველოს პრემერ-მინისტრმა გიორგი გახარიამ პარლამენტში სიტყვით გამოსვლისას.

პრემიერ–მინისტრი პარლამენტში დეპუტატების კითხვებს უპასუხებს>>

ამ წუთებში საქართველოს მთავრობის მეთაური დეპუტატებს საგანგებო მდგომარეობის პერიოდში გაწეული საქმიანობის შესახებ ანგარიშს აბარებს. ქვეყანის მთელ ტერიტორიაზე საგანგებო მდგომარეობა 21 მარტს გამოცხადდა.

მთავრობის მეთაურმა ანგარიშის წარდგენისას საკარანტინო ზონების საკითხზე გაამახვილა ყურადღება. მისი თქმით, საკარანტინო ზონების იდეა საქართველოს ტურიზმის ეროვნულ სააგენტოში დაიბადა და ამან გაამართლა.

„კლასტერები რომ არ გაზრდილიყო და სწრაფი და რაღაც გაურკვეველი ტესტების პირობებში უფრო დაზღვეული გვქონოდა ჩვენი მოსახლეობის ჯანმრთელობა, მივიღეთ გადაწყვეტილება საკარანტინო ზონების შექმნის – როგორც ბუფერის. ამ ვირუსს აქვს 14-დღიანი საინკუბაციო პერიოდი და ეს იყო ყველაზე სწორი გადაწყვეტილება, ეს იყო ის გადაწყვეტილება, რომელსაც დღეს ტურიზმის მსოფლიო ორგანიზაცია იყენებს თავის პროტოკოლებში, როგორ გახსნას საერთოდ ტურიზმი მსოფლიოს მასშტაბით“, – განაცხადა გახარიამ.

ამასთან, გახარიას თქმით, საქართველოში საკარანტინო ზონები 22 ათასზე მეტმა მოქალაქემ გაიარა და ამჟამად ამ სივრცეებში 4 ათასამდე პირი იმყოფება.

„ვერც ერთი ადამიანი ვერ გამოდის საკარანტინო ზონიდან ისე, თუ არ ჩაუტარდა მას PCR ტესტირება“, – აღნიშნა გახარიამ.

საქართველოს პრემიერ-მინისტრის განკარგულებით, ტურიზმის ეროვნულ სააგენტოს დაევალა საკარანტინო ზონების ორგანიზება და მოქალაქეების განთავსებასთან დაკავშირებული საკითხების გადაჭრა. კარანტინის ზონებში 24-საათიან რეჟიმში იმყოფებიან ჯანდაცვის სამინისტროს წარმომადგენლები, პერიმეტრს კი სახელმწიფო უსაფრთხოების სამსახურის თანამშრომლები აკონტროლებენ. საკარანტინო ზონებში მოქალაქეები 14 დღის განმავლობაში იმყოფებიან.

COVID-19: ჯანმომ საქართველოს კვლევაში მონაწილეობა შესთავაზა>>

საქართველოში კორონავირუსის გამოვლენის პირველი შემთხვევა 26 თებერვალს დაფიქსირდა. 21 მარტს ქვეყნის მთელ ტერიტორიაზე საგანგებო მდგომარეობა გამოცხადდა, რომელიც 23 მაისამდე გაგრძელდა. ამ ეტაპზე საქართველოში შეზღუდვების ეტაპობრივი მოხსნის პროცესი მიმდინარეობს.

69
თემები:
საქართველოს პარლამენტი

კარანტინის შემდეგ უამრავმა ტურისტმა კუნძულებზე იზოლაცია მოისურვა

85
როგორც ირკვევა, მიმდინარე წლის აპრილში კომპანიებმა მომავალ სეზონებზე უფრო მეტი საგზური გაყიდეს, ვიდრე 2019 წლის ანალოგიურ პერიოდში

თბილისი, 26 მაისი - Sputnik. COVID-19-ის პანდემიის შემდეგ უამრავმა ტურისტმა სხვადასხვა ქვეყნიდან შვებულების კუნძულებზე გატარების სურვილი გამოთქვა, წერს Daily Express.

ამის შესახებ ნათქვამია ბრიტანული ტურისტული სააგენტო Hays Travel-ის მფლობელების მიერ ჩატარებულ კვლევაში. სააგენტომ ოპერატორი Thomas Cook 2019 წელს შეიძინა.

ასე, ჯონ და აირინ ჰეისების (John and Irene Hays) მონაცემებით, შემკვეთებს ყველაზე მეტად სურს იზოლაციის გატარება ბალეარის ან ნორმანდიის კუნძულებზე.

„ადამიანებს რეალურად გაქცევა სურთ... აქტიურად ჯავშნიან მიმართულებებს, რა თქმა უნდა, არა ამ ზაფხულისთვის, მაგრამ შემდეგი ზამთრისთვის და 2021 წლისთვის“, - წერს ჯონ ჰეისი.

ამასთან მან განმარტა, რომ მიმდინარე წლის აპრილში კომპანიებმა მომავალი სეზონებისთვის მეტი საგზური გაყიდეს, ვიდრე 2019 წლის ანალოგიურ პერიოდში.

როგორც ჰეისები აცხადებენ, როდესაც სახელმწიფოებმა პანდემიასთან დაკავშირებული შეზღუდვების თანდათანობით მოხსნა დაიწყეს, „ადამიანებმა გვირაბის ბოლოს შუქი დაინახეს“.

85
დაკეტილი კაფე მცხეთაში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/28 მაისი

78480
23 მაისიდან საქართველოში საგანგებო მდგომარეობა აღარ მოქმედებს, მაგრამ მთავრობამ შეზღუდვების ნაწილი ძალაში დატოვა.

თბილისი, 28 მაისი – Sputnik. საგანგებო მდგომარეობის რეჟიმის მოხსნის შემდეგ, კორონავირუსით ინფიცირებულთა რაოდენობის ზრდის თავიდან აცილების მიზნით, საქართველოს მთავრობამ შეზღუდვების და აკრძალვების ნაწილი ძალაში დატოვა. ეს შესაძლებელი გახდა პარლამენტის მიერ დამტკიცებული ცვლილებებით კანონში „საზოგადოებრივი ჯანმრთელობის შესახებ“. ახლა მთავრობას მიენიჭა უფლება შემოიღოს შეზღუდვები საგანგებო მდგომარეობის რეჟიმის მოხსნის შემდეგ.

ცვლილებები 15 ივლისამდე იმოქმედებს.

მოქმედი ძირითადი შეზღუდვების ჩამონათვალი:

  • რესტორნები, სასტუმროები, ტანსაცმლისა და ფეხსაცმლის მაღაზიები, სავაჭრო მოლები, სპორტდარბაზები ივნისის დასაწყისიდან ეტაპობრივად გაიხსნება;

  • რესტორნებს აქვთ მხოლოდ კერძების მიწოდების სერვისით მუშაობის უფლება, აგრეთვე ფეხსაცმლისა და ტანსაცმლის მაღაზიებს შეუძლიათ ონლაინ ვაჭრობა;
  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე
  • აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;

მთავრობა საქართველოს ყველა მოქალაქეს მოქმედი რეკომენდაციების დაცვისკენ მოუწოდებს.

ტრანსპორტი

  • აკრძალულია საერთაშორისო სამგზავრო სახმელეთო და საზღვაო მიმოსვლა;
  • აკრძალულია პირდაპირი საერთაშორისო რეგულარული ავიარეისები, ჩარტერულის გარდა, რომელიც ინიშნება მხოლოდ საქართველოს მოქალაქეთა დაბრუნების მიზნით;
  • აკრძალულია სარკინიგზო ტრანსპორტით მგზავრთა გადაყვანა;
  • აკრძალულია საქალაქთაშორისო და მუნიციპალიტეტების ტერიტორიაზე მგზავრთა გადაყვანა სამარშრუტო ტაქსებითა და ავტობუსებით;
  • აკრძალულია საზოგადოებრივი ტრანსპორტით, მათ შორის, მეტროპოლიტენითა და საბაგიროთი გადაადგილება.

საზოგადოებრივი ცხოვრება

  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • ყველა სახის ტრენინგი, კონფერენცია და სემინარი უნდა ჩატარდეს დისტანციურად;
  • სკოლებსა და უნივერსიტეტებში სასწავლო პროცესი კვლავ დისტანციურად განხორციელდება;
  • დასაშვებია უნივერსიტეტში პრაქტიკული/ლაბორატორიული სამუშაოებისა და გამოცდების ჩატარება არადისტანციურად, მაგრამ რეკომენდაციების შესაბამისად;
  • კულტურული ღონისძიებები მხოლოდ დისტანციური ფორმით ჩატარდება;
  • აკრძალულია მასობრივი სპორტული ღონისძიებების, შეკრებების და შეჯიბრებების ჩატარება;

ეკონომიკური საქმიანობა

  • აკრძალულია რესტორნებში, ბარებში, კაფეებსა და სასადილოებში მომხმარებლის ადგილზე კვების მომსახურება;
  • აკრძალულია ფეხსაცმლისა და ტანსაცმლის მაღაზიების მუშაობა;
  • აკრძალულია სავაჭრო ცენტრების და ბაზრობების მუშაობა, აგრარული ბაზრობების გარდა;
  • აკრძალულია სპორტული, კულტურული და გასართობი ღონისძიებების ორგანიზება და გამართვა;
  • აკრძალულია ვალუტის გადამცვლელი პუნქტების მუშაობა;
  • აკრძალულია სპორტულ-გამაჯანსაღებელი აქტივობები და პროცედურები.

ამ მომენტისათვის ინფიცირებულთა რაოდენობა 735 ადამიანს შეადგენს, აქედან 557 გამოჯანმრთელდა, 12 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს. ეპიდემიოლოგები მიიჩნევენ, რომ ჯერჯერობით აუცილებელია სოციალური დისტანციის უზრუნველყოფა და მოქალაქეთა მობილობის შეზღუდვა.

კორონავირუსით ინფიცირების ახალი შემთხვევების უმრავლესობა შიდა გადაცემას უკავშირდება.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 3076, სტაციონარებში მეთვალყურეობის ქვეშ კი 250 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე StopCoV.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
78480
თემები:
COVID-19 საქართველოში