თბილისი, 4 ივნისი — Sputnik. საქართველოში მაისის თვეში ყველაზე მეტი რაოდენობის ვიზიტი რუსეთიდან ჩამოსულმა მოგზაურებმა განახორციელეს - ერთ თვეში ისინი საქართველოს 172,2 ათასჯერ ესტუმრნენ, რაც გასული წლის ანალოგიურ მაჩვენებელს 53,2%-ით აღემატება, ნათქვამია ტურიზმის ეროვნული ადმინისტრაციის მასალებში.
მიმდინარე წლის მაისში უცხოელებმა საქართველოში 723,2 ათასი ვიზიტი განახორციელეს, რაც გასულის წლის მაისთან შედარებით 14,2%-ით მეტია.
უწყების მონაცემებით, მაისში 618,7 ათასი ვიზიტი განახორციელეს 15 წელს ზემოდ ასაკის პირებმა, რაც გასული წლის ანალოგიურ პერიოდს 14,2%-ით აღემატება.
რაც შეეხება ტურისტული ვიზიტების რაოდენობას, მაისში მან 424,5 ათასს გადააჭარბა (ზრდა 18%).
ქვეყნების ხუთეული საქართველოში საერთაშორისო ვიზიტების რაოდენობის მიხედვით 2019 წლის მაისში
| ქვეყანა | ვიზიტების რაოდენობა | ცვლილება წელიწადში (%) |
| რუსეთი | 172 217 | 53,2 |
| აზერბაიჯანი | 105 962 | 3,0 |
| სომხეთი | 98 572 | 15,5 |
| თურქეთი | 71 563 | -14,0 |
| ისრაელი | 17 084 | 9,3 |
მაისში ჩვენს ქვეყანას ქართული დიასპორის 39,8 ათასი წარმომადგენელი ეწვია, რაც 2018 წლის მაისთან შედარებით 12,3%-ით მეტია.
განსაკუთრებული ზრდა დაფიქსირდა ყირგიზეთიდან (+135.4%), უზბეკეთიდან (+90.5%), ყაზახეთიდან (+84.6%), ჩინეთიდან (+56.4%), ბელარუსიდან (+56.4%), აშშ-დან (+33.9%) და ა.შ.
ვინ ჩამოდის ყველაზე ხშირად საქართველოში >>
პოზიტიური ტენდენცია ნარჩუნდება ევროკავშირის ქვეყნებიდან. საერთაშორისო ვიზიტორების ზრდის კუთხით გამოირჩევა: დიდი ბრიტანეთი (+48.2%), შვედეთი (+31.2%), პოლონეთი (+27.2%), გერმანია (+26.4%), საფრანგეთი (+26%), ნიდერლანდები (+22.3%) და ა.შ.
ყველაზე მეტი უცხოელი საქართველოში სახმელეთო და საჰაერო ტრანსპორტით ჩამოდის.
ტრანსპორტის სახეობები, რომლითაც უცხოელები საქართველოში ჩამოდიან
| რტანსპორტის სახეობა | ვიზიტების რ-ბა | ცვლილება წელიწადში (%) | წილი ვიზიტების რიცხვში (%) |
| სახმელეთო | 434 441 | 12,1 | 70,2 |
| საჰაერო | 175 895 | 19,2 | 28,4 |
| რკინიგზა | 5 294 | 35,4 | 0,9 |
| საზღვაო | 3 089 | 12,2 | 0,5 |
სასაზღვრო პუნქტებს შორის, რომელსაც უცხოელი ვიზიტორები კვეთენ, ლიდერობს თბილისის აეროპორტის საკონტროლო-გამშვები პუნქტი, ყაზბეგი და „წითელი ხიდი“.
საკონტროლო-გამშვები პუნქტები საქართველოს საზღვრებზე - პირველი ხუთეული
| საკონტროლო-გამშვები პუნქტი | ვიზიტების რ-ბა | ცვლილება წელიწადში (%) | წილი ვიზიტების რიცხვიდან (%) |
| თბილისის აეროპორტი | 137 434 | 16,4 | 22,2 |
| ყაზბეგი | 126 736 | 30,8 | 20,5 |
| წითელი ხიდი | 88 473 | 12,8 | 14,3 |
| სადახლო | 87 676 | 29,0 | 14,2 |
| სარფი | 80 823 | -11,2 | 13,1 |
საქართველოში ტურიზმის სფერო წლიდან წლამდე აქტიურად ვითარდება, რაც სტატისტიკურ მონაცემებში აისახება. ყოველწლიურად ქვეყანაში იხსნება ახალი სასტუმროები, კვების ობიექტებში ხარისხის შემოწმება ტარდება, მიმდინარეობს მომსახურე პერსონალის და გიდების გადამზადება.
