გუდაური

რა იზიდავდა ტურისტებს საქართველოში საახალწლოდ

130
საქართველოს ტურიზმის ასოციაციის ხელმძღვანელმა ისაუბრა საახალწლო ღონისძიებებზე ქვეყანაში და იმაზე, თუ რა იზიდავს ყველაზე მეტად ტურისტებს

საქართველოში ახალი წლის დღეებში განსაკუთრებული პოპულარობით სარგებლობდა სამთო-სათხილამურო კურორტები, ამის შესახებ „Sputnik-საქართველოს“ ესაუბრა საქართველოს ტურიზმის ასოციაციის (GTA) თავმჯდომარე ნატა კვაჭანტირაძე.

ყველაზე ხშირად საქართველოში ტურისტები აზერბაიჯანიდან, რუსეთიდან და სომხეთიდან ჩამოდიან >>

ეს მეტწილად უკავშირდება მასშტაბურ მარკეტინგულ კამპანიებს, რომელიც როგორც კერძო სექტორის, ისე ხელისუფლების მიერ არის ჩატარებული.

„ზამთრის სეზონი ყოველთვის აქტუალურია იმიტომ, რომ ჩვენ გვაქვს შესანიშნავი კურორტები, რომლებზეც მოთხოვნა წლიდან წლამდე იზრდება. წელს მაგალითის სახით შეგვიძლია მოვიყვანოთ ბაკურიანი. გაზრდილი მოთხოვნის გამო იქ გზებზეც კი საცობებიც შეიქმნა. ეს მიუთითებს ინფრასტრუქტურის გაუმართაობაზე და სახელმწიფო აუცილებლად გააკეთებს ყველაფერს, რათა ეს პრობლემა გადაიჭრას. გაზრდილი მოთხოვნა შეიმჩნევა არამარტო ბაკურიანში, არამედ გუდაურშიც“, - გვიამბო კვაჭანტირაძემ.

მისი თქმით, ტურიზმის განვითარებასთან ერთად ამა თუ იმ კურორტებზე გამოცოცხლება ეტყობა ახლომდებარე დასახლებულ პუნქტებშიც. მაგალითად, გუდაური ეხმარება სტეფანწმინდას, ხოლო ბაკურიანი - მთელ სამცხე-ჯავახეთს.

ამასთან, იზრდება მოთხოვნა თბილისზე, თუმცა მცირდება ინტერესი ბათუმის მიმართ.

„ტურისტი, რომელიც ჩამოდის საქართველოში, სანამ სამთო-სათხილამურო კურორტზე გაემგზავრება, ირჩევს ტურებს თბილისში, მცხეთაში ან კახეთში. ანუ დროს უთმობს კულტურულ ტურებს“, - გვიამბო კვაჭანტირაძემ.

რაც შეეხება სამთო კურორტებს, გუდაურსა და ბაკურიანს თანდათანობით ეწევა მესტია, უამბო „Sputnik-საქართველოს“ ტურისტული სააგენტო World Express-ის დირექტორმა კახა ჩაკვეტაძემ.

ინფრასტრუქტურა და სასტუმროები

საქართველოში ახალი წლის დღეებში როგორც დიდი სასტუმროები, ისე ოჯახური ტიპის სასტუმროები გადავსებული იყო.

„ადამიანები ძირითადად ირჩევენ საშუალო დონის, ანუ საშუალო ბიუჯეტის სასტუმროებს. დიდი სასტუმროები ძვირია, თუმცა 29 დეკემბრიდან 4 იანვრამდე იყო გადატვირთული ყველა სასტუმრო - დიდიც, საშუალოც და მცირე“, - განაცხადა ჩაკვეტაძემ.

ტურისტები დიდ ყურადღებას საგზაო ინფრასტრუქტურას უთმობენ.

„თუ დავაკვირდებით ტენდენციებს, ჯერჯერობით ევროპულ სამთო-სათხილამურო კურორტებს ვერ შევედრებით. მაგრამ სახეზეა სამთო-სათხილამურო კურორტების განვითარების ტემპი. ხუთბალიანი სისტემით ჩვენ გვეკუთვნის მყარი სამიანი პლუსით“, - აღნიშნა ჩაკვეტაძემ.

როგორ აპირებს ტურისტების მოზიდვას საქართველო 2019 წელს >>

ჩაკვეტაძის თქმით, თუ კურორტებზე ცენტრალური გზა ასე თუ ისე გარემონტებულია, სასტუმროებისკენ თუ გადავუხვევთ, სურათი იცვლება. მან იმედი გამოთქვა, რომ ხელისუფლება ამ პრობლემას უახლოეს მომავალში გადაჭრის.

„გზებს მეტი ყურადღება უნდა დაეთმოს. პრობლემა ზოგჯერ იქმნება თბილისი-სტეფანწმინდას მაგისტრალზე. იქ გროვდება დიდი სატვირთო ავტომობილები, და თოვისა და ლიპყინულის გამო ტრანსპორტს გადაადგილება უჭირს“, - განაცხადა ჩაკვეტაძემ.

მან ასევე არ გამორიცხა სასტუმროებზე ფასების შემცირება, რასაც მათი რაოდენობის მუდმივი ზრდა განაპირობებს.

130
თემები:
ახალი 2020 წელი (37)
მსოფლიო ტურიზმის ორგანიზაციის ლოგოტიპი

UNWTO-ს გენერალური მდივანი: ტურიზმის აღდგენა იწყება

55
(განახლებულია 16:24 17.09.2020)
მსოფლიო ტურიზმის აღმასრულებელმა საბჭომ თბილისის დეკლარაცია მიიღო, რომელიც მხარს უჭერს ტურიზმის განახლების თვალსაზრისით საქართველოს მთავრობის ძალისხმევას.

თბილისი, 17 სექტემბერი — Sputnik. გაეროს მსოფლიო ტურიზმის ორგანიზაციის (UNWTO) აღმასრულებელი საბჭო მიესალმება და მხარს უჭერს ქვეყანაში ტურისტული სექტორის ამოქმედების კუთხით საქართველოს მთავრობის ძალისხმევასა და ეფექტურ ზომებს. შესაბამისი დეკლარაცია ორგანიზაციის აღმასრულებელმა საბჭომ თბილისში მიიღო, იუწყება საქართველოს მთავრობის პრეს-სამსახური. 

აღმასრულებელი საბჭოს თბილისის დეკლარაცია UNWTO-ს გენერალურმა მდივანმა ზურაბ პოლოლიკაშვილმა საქართველოს პრემიერ-მინისტრ გიორგი გახარიას პირადად გადასცა.

დეკლარაციაში ნათქვამია, რომ საბჭო მხარს უჭერს საქართველოს მთავრობის ძალისხმევას ტურიზმის სფეროს გახსნის მიმართულებით.

„ეს ტურიზმის გლობალურ რუკაზე ქვეყანას გამძლე, სტაბილურ და ძალიან ფასეულ დანიშნულების ცენტრად წარმოაჩენს", – ნათქვამია დეკლარაციაში, რომელიც აღმასრულებელი საბჭოს 112-ე სხდომის ფარგლებში იქნა მიღებული.

დეკლარაციის მთავარი მიზანია მსოფლიოში ტურიზმის სტაბილური განვითარების ხელშეწყობა, მასში განსაზღვრულია ტურისტული ინდუსტრიის პოლიტიკის ძირითადი ვექტორი, არსებული გამოწვევების დაძლევის სამომავლო გეგმები.

„დიდად ვაფასებთ და გულწრფელად ვუხდით მადლობას საქართველოს მთავრობას გაერთიანებული ერების მსოფლიო ტურიზმის ორგანიზაციის აღმასრულებელ დირექტორთა საბჭოს საზეიმო სხდომის მოწვევისა და გულთბილი მასპინძლობისთვის, რომელიც პანდემიის შემდეგ იმართება და საქართველოს მდიდარი კულტურული მემკვიდრეობისა და უნიკალური სტუმარმასპინძლობის ტრადიციის შეგრძნების შესაძლებლობას გვაძლევს“, – აღნიშნულია დეკლარაციაში.

16-17 სექტემბერს თბილისში გაეროს მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომა ტარდება. ეს COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობითი ღონისძიებაა. 

სხდომა გახსნეს საქართველოს პრემიერ-მინისტრმა გიორგი გახარიამ და UNWTO-ს გენმდივანმა ზურაბ პოლოლიკაშვილმა. დელეგატებს შორის არიან მაღალი რანგის სტუმრები ესპანეთიდან, საბერძნეთან, პორტუგალიიდან, რუმინეთიდან, მაროკოდან, საუდის არაბეთიდან.

„ეს იყო პანდემიის შემდეგ გაეროს ორგანიზაციის პირველი შეხვედრა და ის, რომ საქართველოს 20 სხვადასხვა ქვეყნის დელეგაცია და მაღლი რანგის სტუმრები ეწვივნენ, უფლებას გვაძლევს ვთქვათ, რომ ტურიზმი აღდგენას იწყებს. თუმცა, ამას გარკვეული დრო დასჭირდება“, – განაცხადა პოლოლიკაშვილმა.

მისი თქმით, ეს იყო ტურიზმისთვის ისტორიული დღე და ყოველივე ეს საქართველოში მთავრობის მხარდაჭერით განხორციელდა. როგორც პოლოლიკაშვილმა აღნიშნა, ღონისძიებაზე საქართველოს პრემიერ-მინისტრ გიორგი გახარიას დასწრება კიდევ ერთხელ ადასტურებს იმ ფაქტს, რომ საქართველო ტურიზმს, როგორც ეკონომიკის ძირითად ლოკომოტივს, დიდ მნიშვნელობას ანიჭებს.

„სწორედ ეს დეკლარაცია წარმოადგენს მსოფლიო მასშტაბით აღიარებას, რომ საქართველო დაცული და „მწვანე ზონაა“, როგორც მასზე დღეს ევროპის ყველა ქვეყანაში საუბრობენ. ეს კიდევ ერთი მესიჯია იმისა, რომ საქართველოში ჩამოსვლა შეიძლება. ღონისძიებაზე 30-ზე მეტი ქვეყნის დაახლოებით 150 სტუმარი შეიკრიბა. აქედან გამომდინარე, ჩვენ გვსურს, რომ ქვეყნებს შორის ეს ურთიერთობები გაგრძელდეს და უფრო გაღრმავდეს“, – აღნიშნა პოლოლიკაშვილმა. 

პოლოლიკაშვილის განცხადებით, აღმასრულებელი საბჭოს წევრებმა თბილისის დეკლარაცია მიიღეს და ყველა დათანხმდა, რომ შეიძლება საზღვრების გახსნა და ქვეყნებს შორის ურთიერთობების დალაგება. დეკლარაცია ეძღვნება სხვადასხვა ინოვაციური პროდუქტების დახმარებითა და სანიტარული ნორმების დაცვით საზღვრების გახსნის შესაძლებლობებს, რათა ადამიანებმა მოგზაურობა დაიწყონ, აღნიშნა მან.

გაეროს მსოფლიო ტურიზმის ორგანიზაციის აღმასრულებელი საბჭო 35 წევრი სახელმწიფოსგან შედგება და ორგანიზაციის მმართველ ორგანოს წარმოადგენს. ის უზრუნველყოფს UNWTO-ს ეფექტიან მუშაობას და გლობალური დღის წესრიგით გათვალისწინებული მოგზაურობისა და ტურიზმის ინდუსტრიის პოლიტიკის ძირითად საკითხებს განიხილავს. მსოფლიო ტურიზმის ორგანიზაციის გენერალური მდივნის პოსტი საქართველოს ეკონომიკის ყოფილ მინისტრს ზურაბ პოლოლიკაშვილს 2017 წლიდან უკავია. მისი უფლებამოსულების ვადა 2018–2021 წლებს მოიცავს.

55
თემები:
ტურიზმი საქართველოში
გიორგი გახარია

გახარია: საქართველო საერთაშორისო არენაზე ერთ-ერთი ყველაზე უსაფრთხო ტურისტული ქვეყანაა

81
(განახლებულია 19:35 16.09.2020)
საქართველო COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობით ღონისძიებას მასპინძლობს.

თბილისი, 16 სექტემბერი — Sputnik. საქართველომ შეძლო მწვანე ქვეყნის სტატუსის მოპოვება და საერთაშორისო არენაზე დღეს ერთ-ერთი ყველაზე უსაფრთხო ტურისტული ქვეყანაა, რაც გვაძლევს შესაძლებლობას, პოსტკრიზისულ პერიოდში დავიწყოთ ეკონომიკური განვითარების ახალი ეტაპი, განაცხადა საქართველოს პრემიერ-მინისტრმა გიორგი გახარიამ სასტუმრო „ბილტმორში“ გამართულ ღონისძიებაზე სიტყვით გამოსვლისას.

რა ელის მსოფლიო ტურიზმს კორონავირუსის პირობებში>>

15-17 სექტემბერს საქართველო გაეროს მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომას მასპინძლობს. ეს COVID-19-ის პანდემიის პერიოდში მსოფლიოში უპრეცედენტოდ მაღალი რანგის წარმომადგენლობითი ღონისძიებაა.

„პოსტკრიზისულ პერიოდში ერთ-ერთი ყველაზე მნიშვნელოვანი მოვლენა მსოფლიოსთვის სწორედ ტურიზმის აღდგენის ტენდენცია იქნება და ჩვენი სურვილია, ამ პროცესში ვიყოთ პიონერები, რის საფუძველსაც გვაძლევს ტურისტულ სექტორში უსაფრთხოების კუთხით დაგროვილი გამოცდილება. ჩვენ ვფიქრობთ, ტურიზმის სექტორში საქართველოსთვის პოსტკრიზისული ეპოქა უნდა იყოს შესაძლებლობა და გვინდა, რომ ეკონომიკური კრიზისი, პანდემია ქვეყნის ტურიზმის განვითარებისთვის ვაქციოთ შესაძლებლობად“, – განაცხადა გიორგი გახარიამ.

საქართველოს პრემიერ-მინისტრის თქმით, დღეს ტურიზმი წარმოადგენს ერთ-ერთ იმ სექტორს, რომელსაც პანდემიის გავრცელების გამო მსოფლიო მასშტაბით უდიდესი ზიანი მიადგა. 

„მინდა ხაზი გავუსვა იმ ფაქტს, რომ კრიზისულმა პერიოდმა საქართველოში ტურიზმის სექტორი ასევე დააზიანა, თუმცა წინა წლების მაჩვენებლებით საქართველო, ტურიზმის განვითარების თვალსაზრისით, ერთ-ერთი ლიდერი იყო მსოფლიოში და, რაც მთავარია, ტურიზმის სექტორი ქვეყნის ეკონომიკის 8.1% გახდა“, – აღნიშნა გახარიამ.

დღეს ღონისძიების მონაწილეებს სიტყვით მიმართა გაეროს მსოფლიო ტურიზმის ორგანიზაციის გენერალურმა მდივანმა ზურაბ პოლოლიკაშვილმაც.

„მსოფლიო პანდემიის გამო ტურიზმის მიმართულებები რისკის ქვეშ არის, მაგრამ დღეს ნამდვილად ისტორიული ღონისძიებაა, რადგან პანდემიის შემდეგ პირველად იმართება მსოფლიო ტურიზმის ორგანიზაციის საბჭოს სხდომა. ჩვენ ერთად ვართ ძლიერები, რაც გვაძლევს ტურიზმის აღდგენისა და ამ პროცესის მართვის უნიკალურ პოტენციალს“, – განაცხადა ზურაბ პოლოლიკაშვილმა.

მისი თქმით, მსოფლიო ტურიზმის ორგანიზაცია ყველაფერს გააკეთებს იმისთვის, რათა შეარბილოს პანდემიით გამოწვეული ნეგატიური შედეგები.

საქართველოს ეკონომიკისა და მდგრადი განვითარების მინისტრმა ნათია თურნავამ მსოფლიო ტურიზმის ორგანიზაციის ღონისძიების თბილისში გამართვას „მთავრობის ქმედებების ეფექტურობის ძალიან მაღალი შეფასება“ უწოდა.

„ჩვენ ამაყები ვართ, რომ სწორედ თბილისია დღეს ქალაქი, სადაც მსოფლიო ტურიზმის ლიდერები მსჯელობენ, ამ რთული გამოწვევის პირობებში როგორი მომავალი ექნება ტურიზმს, როგორ დაეხმარონ გლობალურად მსოფლიოში ამ დარგს და საქართველო, რა თქმა უნდა, თავის ღირსეულ სიტყვას იტყვის ამ მიმართულებით“, – განუცხადა ჟურნალისტებს ნათია თურნავამ.

გაეროს მსოფლიო ტურიზმის ორგანიზაციის აღმასრულებელი საბჭო 35 წევრი სახელმწიფოსგან შედგება და ორგანიზაციის მმართველ ორგანოს წარმოადგენს. ის უზრუნველყოფს UNWTO-ს ეფექტიან მუშაობას და გლობალური დღის წესრიგით გათვალისწინებული მოგზაურობისა და ტურიზმის ინდუსტრიის პოლიტიკის ძირითად საკითხებს განიხილავს.

თბილისში ორგანიზაციის სხდომა მსოფლიო ჯანდაცვის ორგანიზაციისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის გაიდლაინებისა და უსაფრთხოების სრული დაცვით ტარდება.

81
თემები:
ტურიზმი საქართველოში
პარანალის ობსერვატორიიდან გადაღებული „პლანეტების პაემანი“: მთვარე იუპიტერსა და ვენერას შორის

იუპიტერზე მძვინვარებს გრიგალი, რომელსაც „დედამიწის ჩაყლაპვა“ შეუძლია: ვრცელდება ფოტო

0
(განახლებულია 09:29 21.09.2020)
სპეციალისტების თქმით, იუპიტერზე დაფიქსირებული საშინელი ძალის გრიგალი საათში 650 კილომეტრის სიჩქარით მოძრაობს

თბილისი, 21 სექტემბერი — Sputnik. აშშ–ის კოსმოსური სააგენტო NASA–ს ექპერტებმა, ტელესკოპ Hubble–ს მეშვეობით, პლანეტა იუპიტერზე უნიკალური წითელი და თეთრი გრიგალების ფოტოები გადაიღეს და საკუთარ Instagram–ზე გამოაქვეყნეს.

View this post on Instagram

A post shared by Hubble Space Telescope (@nasahubble) on

სპეციალისტების თქმით, წითელი გრიგალი, რომელიც საკმაოდ ძლიერია იმისთვის, რომ „დედამიწა ჩაყლაპოს“, ამ დროისათვის უკვე შემცირებისკენ მიდის.

იმავდროულად მის ქვემოთ ფიქსირდება მეორე გრიგალიც, რომელიც კვლავ მრისხანებს და ფერს იცვლის (ამ დროისათვის ის თეთრია),  თუმცა ის მნიშვნელოვნად სუსტია პირველზე.

„Hubble–ს ახალ უნიკალურ და შთამბეჭდავ ფოტოზე ჩანს კაშკაშა თეთრი გრიგალი ჩრდილოეთ განედზე, რომელიც საათში 650 კმ სიჩქარით მოძრაობს“, — ნათქვამია Hubble–ს ოფიციალურ საიტზე.

აღნიშნული ფოტო მიმდინარე წლის 25 აგვისტოსაა გადაღებული, როდესაც იუპიტერი დედამიწიდან 653 მლნ კილომეტრით იყო დაშორებული.

 

 

0
თემები:
მსოფლიო დღეს