თბილისი, 14 ოქტომბერი — Sputnik. გუდაურის სამთო-სათხილამურო კურორტზე შენდება ექვსი საბაგირო და სათხილამურო არეალი 20%-ით იზრდება, ნათქვამია საქართველოს მთავრობის განცხადებაში.
გუდაური საქართველოს ერთ-ერთი ყველაზე პოპულარული სამთო-სათხილამურო კურორტია, რომელმაც მსოფლიო აღიარება მიიღო. 2023 წელს აქ მსოფლიო ჩემპიონატი ფრისტაილსა და სნოუბორდში ჩატარდება.
„ახალი საბაგიროების მშენებლობით კურორტზე 3,5-ჯერ გაიზრდება გამტარუნარიანობა, რაც იმას ნიშნავს, რომ საბაგიროები გაცილებით მეტი მოთხილამურის ერთად მიღებას შეძლებს“, - აღნიშნულია განცხადებაში.
კურორტზე ასევე მიმდინარეობს ხელოვნური გათოვლიანების სისტემის მეორე ფაზის მშენებლობა, რომელიც ზამთრის სეზონისთვის დასრულდება. ხელოვნური გათოვლიანების პირველი ფაზა გუდაურში 2015 წელს განხორციელდა.
ბახტაძე: ჩვენ არ ვართ კმაყოფილი კურორტების მზადყოფნის დონით >>
ტურისტების ნაკადი საქართველოში წლიდან წლამდე იზრდება. ტურისტების რაოდენობა საქართველოს ოთხ სამთო-სათხილამურო კურორტზე (გუდაური, ბაკურიანი, გოდერძი, სვანეთი) 2011 წლიდან ექვსჯერ გაიზარდა.
