თბილისი, 26 მაისი — Sputnik. ლიტვის ჩარტერული ავიაკომპანია Small Planet Airlines იწყებს პირდაპირი რეისების განხორციელებას ვარშავიდან ბათუმის მიმართულებით, ამის შესახებ აჭარის მთავრობა იტყობინება.
A320 ტიპის აერობუსები იფრენენ მარშრუტით ვარშავა-ბათუმი-ვარშავა ყოველ კვირა დღეს.
კომპანია Small Planet Airlines-ს სერტიფიკატი აქვს მოქმედებისათვის ლიტვაში, პოლონეთსა და იტალიაში.
ამრიგად, ამ ეტაპზე ზაფხულის ტურისტულ სეზონზე ბათუმის მიმართულებით რეისებს შვიდი ავიაკომპანია განახორციელებს. ვარშავის გარდა რეისები იქნება დუბაიდან, ბეირუთიდან, კიევიდან, მოსკოვიდან, ჩერეპოვეციდან და სანკტ-პეტერბურგიდან.
ბოლო წლებში საქართველოში ტურიზმის სფერო დინამიურად ვითარდება — წლიდან-წლამდე იზრდება უცხოელ დამსვენებელთა რიცხვი.
ტურისტთა დიდი ნაწილი საქართველოს შავი ზღვის სანაპიროზე მოდის დასასვენებლად. ტურისტებს შორის ერთ-ერთი ყველაზე პოპულარული ადგილია ბათუმი.
2016 წელს საქართველოს 6,3 მილიონზე მეტი უცხოელი ეწვია. მათგან 1,4 მილიონი აჭარაში იყო ჩასული.