ტკივილი მუცლის არეში

როგორ ავიცილოთ თავიდან გულძმარვა? გპასუხობთ გასტროენტეროლოგი 

597
(განახლებულია 21:28 10.01.2021)
გულძმარვა მეტად უსიამოვნო შეგრძნებაა, რომელიც ძალიან ბევრ ადამიანს აწუხებს. ექიმი პროფილაქტიკის რამდენიმე ეფექტურ მეთოდს გირჩევთ

თბილისი, 10 იანვარი — Sputnik. რომელი საკვების ჭამა შეიძლება და რომლის — არა გულძმარვის დროს, როგორ უნდა გავუმკლავდეთ ამ უსიამოვნო მდგომარეობას, ამის შესახებ ექიმი-გასტროენტეროლოგი მარია ფომინა საუბრობს.

გულძმარვა დაავადება არ არის, მაგრამ იმის სიგნალია, რომ კუჭ-ნაწლავის ტრაქტის მხრივ პრობლემები არსებობს: ეს შეიძლება იყოს GERD (გასტროეზოფაგური რეფლუქსის დაავადება), გასტრიტი, კუჭის წყლული, ნაღვლის ბუშტის პათოლოგია. ზოგჯერ გულძმარვა შეიძლება მიანიშნებდეს გულ-სისხლძარღვთა სისტემის პრობლემებზე, მაგალითად, იშემიურ დაავადებაზე, ან იყოს მეტაბოლური დარღვევების, კერძოდ, სიმსუქნის თანმხლები.

ჯანმრთელ ადამიანებში

ყველაზე ხშირად გულძმარვა ვითარდება მოწევის ან კვებითი შეცდომების გამო: მაგალითად, როდესაც მიირთმევთ რაიმე მჟავეს, ცხიმიანს, ცხარეს, სვამთ ალკოჰოლს ან ზედმეტ საკვებს იღებთ.

გულძმარვა ემართებათ ორსულ ქალებს, ასევე მათ, ვინც მოხრილი მუშაობს, ვარჯიშობს და ამავდროულად ძლიერად ტვირთავს მუცლის ღრუს.

როგორ ვითარდება გულძმარვა?

მარილმჟავა ამოდის კუჭიდან საყლაპავის ქვედა მესამედში. ის შეიძლება განვითარდეს სფინქტერის შესუსტების გამო. ეს არის კუნთი, რომელიც საყლაპავს კუჭისგან გამოყოფს. სფინქტერი იხსნება სითხის ან საკვების მიღების დროს, შემდეგ კი იკეტება, რათა გადაყლაპული უკან არ დაბრუნდეს.

„მჟავა აზიანებს საყლაპავის ლორწოვან გარსს. როდესაც ის ზევით ხვდება, იგრძნობა წვის შეგრძნება ან ტკივილი მკერდში. ხშირად უსიამოვნო სიმპტომები ჭამიდან ორი საათის განმავლობაში გრძელდება. თუ გულძმარვა ერთჯერადი შემთხვევა კი არა, მუდმივი მოვლენაა, ქსოვილები ზიანდება: ეს არის საშიში ეროზიები და უფრო სერიოზული დაავადებები“, — ამბობს მარია ფომინა.

პროვოკატორი პროდუქტები

გულძმარვას იწვევს ცხარე და მარილიანი საკვები, შებოლილი ხორცი, მჟავე საკვები, განსაკუთრებით ციტრუსები და მათგან მიღებული წვენები. ყავა, პიტნა, ნიორი, მდოგვი, კეტჩუპი, შოკოლადი, გაზირებული წყალი და ალკოჰოლი კი ამწვავებს მდგომარეობას.

რა უნდა ჭამოთ ან დალიოთ გულძმარვის დროს

ჭიქა მინერალური გაზგასული წყალი დაგეხმარებათ გულძმარვისგან გათავისუფლებაში.

„სასარგებლოა არატკბილი სასმელი იოგურტიც, რომელიც საყლაპავის კედლებს მჟავას აშორებს, აწესრიგებს ნაწლავების მუშაობას, ანუ საკვები-გამაღიზიანებელი უფრო სწრაფად ტოვებს ორგანიზმს. თუ ლაქტოზის აუტანლობა არ აღგენიშნებათ, შეგიძლიათ დალიოთ ერთი ჭიქა უცხიმო რძე“, — ამბობს ექსპერტი.

გულძმარვისგან თავის დაღწევის კიდევ ერთი გზაა წყალი, რომელშიც მცირე რაოდენობით სოდაა გახსნილი. თუმცა ეს მეთოდი ბოროტად არ უნდა გამოიყენოთ, წინააღმდეგ შემთხვევაში მას შეუძლია საპირისპირო შედეგი გამოიწვიოს.

პროფილაქტიკა

  • ჭამის შემდეგ ერთი საათის განმავლობაში არ წამოწვეთ — დაჯექით ან იმოძრავეთ. წინააღმდეგ შემთხვევაში მჟავას გაუადვილდება კუჭიდან ზემოთ (საყლაპავში) ამოსვლა.
  • ნუ ასწევთ მძიმე საგნებს და გამორიცხეთ ფიზიკური დატვირთვა ჭამის დამთავრებისთანავე.
  • ნუ მიუჯდებით ტრაპეზს მჭიდროდ შემოტმასნილი სამოსით ან ქამრით – ეს მუცლის ღრუზე ზეწოლას გაზრდის.

„ნუ შეჭამთ ზედმეტს: კუჭის მოცულობა საშუალოდ 0,5-1 ლიტრია. ამასთან, კუჭი შეიძლება გაიზარდოს 3-4 ლიტრამდე. თუ ძალიან ბევრს მიირთმევთ, სფინქტერი გაიხსნება, რათა საკვებს სივრცე გაუზარდოს. სჯობს ჭამოთ მცირე ულუფებით დღეში ხუთჯერ“, — ამბობს მარია ფომინა.

მისი განმარტებით, თუ გულძმარვა ექვს თვეზე მეტი ხნის განმავლობაში გაწუხებთ, გემართებათ უფრო ხშირად, ვიდრე კვირაში ერთხელ და ვლინდება ღამით, უნდა მიმართოთ ექიმს.

 

597
თემები:
ექიმი გირჩევთ (24)
ბიჭუნა სტომატოლოგთან

უშედეგო და ზოგჯერ საშიშიც: კბილების მკურნალობა ხალხური მეთოდებით - ექიმი გირჩევთ

91
(განახლებულია 15:50 25.01.2021)
უმაღლესი კატეგორიის სტომატოლოგმა კბილების მკურნალობის ხუთი ყველაზე პოპულარული ხალხური მეთოდი განიხილა და მათი დადებითი და უარყოფითი მხარეები განმარტა

თბილისი, 25 იანვარი — Sputnik. კბილების მკურნალობის ხალხური საშუალებები საკმაოდ მრავალფეროვანია. ინტერნეტში უამრავი რეცეპტი არსებობს, რომელთაგან ბევრი ექიმ-სტომატოლოგებში ნამდვილ შოკსა და შეძრწუნებას იწვევს.

„ხალხური საშუალებები კბილების სამკურნალოდ— უკვე ეს ერთი ფრაზაც კი უჩქარებს სტომატოლოგს გულს. პაციენტებს თვითმკურნალობის მცდელობა კი არ დაეხმარება, არამედ, უარეს შემთხვევაში, სამწუხარო შედეგებსაც გამოიწვევს“, — ამბობს უმაღლესი კატეგორიის სტომატოლოგი  ნატალია კადკალოვა.

სპეციალისტმა ცალ–ცალკე განიხილა კბილების მკურნალობის ყველაზე პოპულარული ხალხური მეთოდები და მათი დადებითი და უარყოფითი მხარეები განმარტა.

სოდის გამოვლება

ადამიანები სოდას ხშირად ივლებენ პირის ღრუში ანთებითი პროცესების დროს. მაგრამ კადკალოვას თქმით, ასეთი ექსპერიმენტები არა მხოლოდ უსარგებლო, არამედ საშიშიცაა.

„იმის გასაგებად, თუ რამდენად საშიშია სოდის გამოვლება, საკმარისია წარმოიდგინოთ, როგორ მოქმედებს სოდა ცომზე. პირის ღრუს ანთებითი ქსოვილები ანალოგიურად რეაგირებს სოდაზე. შეშუპება იზრდება და ჩვენ არ ვიცით, ეს ყველაფერი რით დამთავრდება. თუმცა შეგვიძლია ზუსტად ვთქვათ, რომ კარგით არაფრით“, — ამბობს უმაღლესი კატეგორიის სტომატოლოგი.

ნიორი ტკივილის გასაყუჩებლად

კიდევ ერთი გავრცელებული რეცეპტია ნივრის მტკივნეულ კბილზე დადება. არსებობს მოსაზრება, რომ მასში შემავალი ფიტონციდები სასიკეთოდ მოქმედებს ანთების უბანზე და იცავს ტკივილისგან.

სტომატოლოგის თქმით, ეს ვარიანტი ვერანაირ კრიტიკას ვერ უძლებს. ნერვის ანთება ჩააქროს კი არა, პირიქით, ნიორს შეუძლია კიდევ უფრო გააუარესოს ვითარება.

„მკურნალობის“ ამ ვარიანტს შეუძლია კიდევ ერთი გართულება — ლორწოვანი გარსის დამწვრობა გამოიწვიოს, რომელსაც ხშირად ვხვდები პრაქტიკაში. ნერვის ანთება შეუქცევადი პროცესია და ამაში დახმარება მხოლოდ სტომატოლოგს შეუძლია. ის  დაზიანებულ ქსოვილს მოაცილებს და არხს ინფექციისგან გამორეცხავს. წინააღმდეგ შემთხვევაში, ანთება უფრო შორს წავა და სამკურნალო გახდება არა მარტო კბილი, არამედ ნივრით გამოწვეული დამწვრობაც“, —განმარტავს სპეციალისტი.

სპირტის ან არაყის საფენები

ზოგი ადამიანი კბილის ტკივილის გასაყუჩებლად და მოსარჩენად ძლიერი ალკოჰოლით — სპირტით ან არყით გაჟღენთილ საფენებს იყენებს. მაგრამ ამ შემთხვევაშიც იგივეა მოსალოდნელი, რაც ნივრით მკურნალობის დროს: არანაირი შვება — მხოლოდ ლორწოვანი გარსის დამწვრობა.

მცენარეული ნახარშების გამოვლება

კიდევ ერთი პოპულარული ვარიანტია პირის ღრუს გამორეცხვა მცენარეების ნახარშით. მაგალითად, გვირილას ნახარშით, რომელიც, ტრადიციულად, ძალზე ეფექტურ ანთების საწინააღმდეგო საშუალებად მიაჩნიათ.

ბალახეული ნახარშების სამკურნალო თვისებები ასობით წლის წინ იყო ცნობილი, ამიტომ ექიმებს მათ საწინააღმდეგო არაფერი აქვთ, თუმცა არსებობს ერთი „მაგრამ“.

„არაფერი მაქვს საწინააღმდეგო პირის ღრუს სხვადასხვა მცენარეული  ხსნარებით გამოვლებისა. მაგრამ ამით შეიძლება არაფერი შეიცვალოს და ანთებითმა პროცესმა განვითარება განაგრძოს“, — ამბობს ნატალია კადკალოვა.

ეს კი იმის გამო, რომ ნაყენი ვერ აღწევს კბილის ნადების ქვეშ მიმდინარე ანთებაზე, ანუ დაზიანებულ ქსოვილამდე. თუმცა სხვა საქმეა, როდესაც მცენარეულ ნაყენს პროფესიონალური გაწმენდის შემდეგ ივლებთ — ამის შედეგად მორჩენის პროცესი ჩქარდება.

კბილების გათეთრება ლიმონით

ადამიანების დიდ ნაწილს სურს, გაითეთროს კბილები ექიმის გვერდის ავლით — იაფად ან სულაც უფასოდ. საამისოდ ხშირად იყენებენ სხვადასხვა რეცეპტურას: დაწყებული ლიმონით, დამთავრებული გაქტიურებული ნახშირით.

„მიმაჩნია, რომ ლიმონის პროცედურა ყველაზე ჰუმანურია კვერცხის ნაჭუჭით, გააქტიურებული ნახშირითა და სხვა აბრაზიებით გაწმენდასთან შედარებით, რომლებიც კბილებს კაწრავს. ლიმონის შემთხვევაში შედეგი უმნიშვნელო იქნება, მაგრამ თავს მაინც არ ავნებთ“, — განმარტა ექიმმა.

91
თემები:
ექიმი გირჩევთ (24)
კოწახური

კოწახური სასარგებლო თვისებები და უკუჩვენებები

62
(განახლებულია 11:23 25.01.2021)
კოწახურის სასარგებლო თვისებები უძველესი დროიდან არის ცნობილი. მას დღესაც აქტიურად იყენებენ და ებრძვიან სურავანდს, ჰიპერტონიას, რადიკულიტს, კუჭ–ნაწლავის, ღვიძლის, თირკმელების დაავადებებს, იყენებენ კულინარიაში, კოსმეტოლოგიაში...

კოწახური (Berberis vulgaris) კოწახურისებრთა ოჯახის წარმომადგენელია. არის 3–5 მეტრი სიმაღლის ბუჩქი. აქვს ძლიერი ფესვი და გამერქნებული ფესვურები. ყლორტები მოფენილია წვეტიანი ეკლებით. ნაყოფი წითელი წაგრძელებული ფორმის კენკრაა. ყვავის მაის–ივნისში, დამწიფებას აგვისტო–სექტემბერში იწყებს. მტევნები ბუჩქებზე შუა ზამთრამდე ჰკიდია.

გავრცელებულია მთის შუა სარტყლამდე, ტყის პირებზე მდინარის ნაპირებზე, ჭალებში, რიყეზე და სხვა. გამძლეა ყინვებისა და გვალვების მიმართ.

საქართველოს სხვადასხვა კუთხეში კოწახურს სხვადასხვაგვარად უწოდებენ: მაჭი, ცაცხვ, დუცხუ, კავაღი, ცხაცხუ, ცაცხუ, ცხაცხვი, ზესხრა, ფაჩა.

კოწახურის ნაყოფს მჟავე, სასიამოვნო გემო აქვს. ის შეიცავს 5 პროცენტამდე შაქრებს, მდიდარია ორგანული მჟავებით (ლიმონის, ვაშლის, ღვინის და სხვა), სასარგებლო პექტინებით, მასში ბევრია С ვიტამინი, შეიცავს К ვიტამინს, ასევე კაროტინსა და მინერალურ მარილებს. უმწიფარ ნაყოფში არის ალკალოიდები.

ვაშლის ძმარი, როგორც ერთ–ერთი საუკეთესო საშუალება დაავადებებთან ბრძოლაში>>

კოწახურის ფოთლები, ფესვი და ქერქი შეიცავს ალკალოიდებს, მცენარის ამ ნაწილებში ასევე არის მთრიმლავი ნოვთიერებები და ვიტამინები С და Е.

კოწახური
© Flickr / flöschen / Berberitze
კოწახური

კოწახურის თვისებების შესახებ უძველესი დროიდან არის ცნობილი – ჯერ კიდევ ძველ ბაბილონსა და ინდოეთში მას იყენებდნენ, როგორც სისხლის გამწმენდ საშუალებას. ძველი ბერძნები და რომაელები კოწახურის ნაყოფისა და ფოთლებისგან კუჭ–ნაწლავის სამკურნალო საშუალებებს, ინდოეთში ეს იყო მატონიზირებელი, მსუბუქი გამხსნელი, წყურვილის მოკვლის საშუალება. ძველ ეგვიპტეში მისი მეშვეობით იწმენდნენ სისხლს. ორგანიზმს შლაკებისგან. შორეულ აღმოსავლეთში, იაპონიასა და ჩინეთში კოწახურით მკურნალობდნენ სურავანდს, ავიტამინოზს, მაღალ არტერიულ წნევას, ციებ–ცხელებას. ტიბეტურ მედიცინაში მცენარისგან გამაახალგაზრდავებელ ნაყენს ამზადებდნენ.

კოწახურს ამჟამადაც ფართოდ იყენებენ ხალხურ მედიცინაში. სხვადასხვა ქვეყანაში მას სხვადასხვა დაავადებს კურნავენ. მაგალითად, გერმანიაში კოწახურით ებრძვიან არა მხოლოდ კუჭ–ნაწლავის, არამედ ფილტვების, პირის ღრუს ლორწოვან დაავადებებს. საფრანგეთში ის სიცხისა და არტერიული წნევის დამწევი საშუალებაა, ბულგარეთში კი კოწახურით რადიკულიტს ამარცხებენ; პოლონელების ავიტამინოზს ებრძვიან, ჩინეთში – სიმსივნეს.

კოწახურს აქვს ნაღვლმდენი, ანთების საწინააღმდეგო, ანტისეპტიკური, სისხლდენის შემაჩერებელი თვისებები.

ამგვარად, ხალხურ და ასევე თანამედროვე მედიცინაში (კოწახურზე დამზადებული პრეპარატების სახით) მკურნალობენ:

თირკმელების, კუჭის, თორმეტგოჯა ნაწლავის დაავადებებს, ტუბერკულიოზს, შინაგან სისხლდენას (განსაკუთრებით მშობიარობის შემდეგ საშვილოსნოდან სისხლდენას), ზედა სასუნთქი გზების ანთებას, სხვადასხვა ორგანოს სიმსივნეს.

წიწვოვანი მცენარეების უპირატესობა, ანუ გაიკაჟეთ ჯანმრთელობა>>

კოწახურს იყენებენ დიაბეტის დროს. რამდენიმე წლის წინ აღმოაჩინეს მისი კიდევ ერთი თვისება – მცენარე მალარიით დაავადებულ ადამიანებში ზრდის ელენთას (მალარიული პლაზმოდიები კოწახურის საშუალებით სისხლში განიდევნება). ჰომეოპათიაში კოწახურზე დამწადებული პრეპარატებით კურნავენ ღვიძლის, საშარდე გზებისა და თირკმელების დაავადებებს. გამოიყენება ნიკრისის ქარის, რევმატიზმისა და წელკავის დროს.

მცენარის ყველა ნაწილი შეიცავს ალკალოიდებს, რომელთა შორის მთავარია ბერბერინი (განსაკუთრებით ფესვსა და ქერქში). ეს ნივთიერება აქვეითებს არტერიულ წნევას, ამშვიდებს, ამცირებს გულისცემას. მას იყენებენ ქოლეცისტიტის, ნაღვლის ბუშტში კენჭოვანი დაავადებებისა და ქრონიკული ჰეატიტის დროს.

ფოთლების, ნაყოფისა და ქერქისგან მზადდება ნაყენები, რომლებიც კოსმეტოლოგიაში გამოიყენება. სახლის პირობებში დამზადებული ლოსიონები აახალგაზრდავებს, აშორებს კანის დეფექტებს (პიგმენტური ლაქები, ჭორფლი, გამონაყარი), ასწორებს წვრილ ნაოჭებს, სახეს ჯანმრთელ ფერს აძლევს. ასევე კარგია კოწახური თმის მოსავლელად და ქერტლის მოსაშორებლად.

კანის გასაახალგაზრდავებლად მოამზადეთ ნაყენი შემდეგნაირად: აიღეთ 1 სუფრის კოვზი ნედლი ან ხმელი კოწახურის დაქუცმაცებული ფოთოლი, დაასხით 1 ჭიქა მდუღარე წყალი. გააჩერეთ 30 წუთი, გადაწურეთ. ნაყენის წაისვით სახეზე დილითა და საღამოს ტონიკის სახით. შეგიძლიათ გაყინოთ პატარა კუბებად და სახე გაიწმინდოთ.

კოწახურის ნაყენი წყლულოვანი დაავადებებისა და გულისრევის დროს: აიღეთ 15–20 გრამი მშრალი, დაქუცმაცებული ფოთოლი, დაასხით 200 გრამი წყალი, დადგით ცეცხლზე, მიიყვანეთ ადუღებამდე, 15 წუთის განმავლობაში ხარშეთ დაბალ ცეცხლზე, შემდეგდადგით 40 წუთი, გადაწურეთ და გააზავეთ ანადუღარ წყალში, ისე, რომ საწყისი მოცულობა მიიღოთ. მიიღეთ ნაყენი ყოველდღე, დღეში სამჯერ 1 სუფრის კოვზი.

კოწახურის ნაყენი, როგორც ნაღვლმდენი და სიცხის დამწევი საშუალება: აიღეთ 30–40 გრამი მცენარის დაქუცმაცებული ნაყოფი, დაასხით ერთი ჭიქა წყალი. ადუღეთ დაახლოებით ნახევარი საათი. შემდეგ გადაწურეთ და საწყისი მოცულობის მისაღებად შეავსეთ ანადუღარი წყლით. მიიღეთ დღეში სამჯერ ჭამამდე ნახევარი ჭიქის ოდენობით.

ხახვი – ვირუსებთან ბრძოლის საუკეთესო საშუალება>>

კოწახურის უკუჩვენებები: ალკალოიდების დიდი რაოდენობით შემცველობის გამო კოწახური სუსტ შხამიან მცენარეებს განეკუთვნება, ამიტომ მისი დიდი ხნით და უკონტროლოდ გამოყენება არ შეიძლება.

ასევე არ შეიძლება მისი მიღება ორსულებისთვის, ხოლო მცენარის მწვანე ნაყოფი შხამიანია, და მისი გამოყენება საერთოდ არ შეიძლება.

62
თემები:
სასარგებლო რჩევები
ვალუტის გაცვლის პუნქტი

ლარის კურსი 26 იანვარს

0
(განახლებულია 17:53 25.01.2021)
წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0001 ლარით გამყარდა.

თბილისი, 26 იანვარი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,3043 GEL/$1 ნიშნულზე დაადგინა.

წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0001 ლარით გამყარდა.

ლარის კურსი 26 იანვარს
ლარის კურსი 26 იანვარს
0
თემები:
ლარის კურსი დღეს