საახალწლო მორთულობა

ათი მშვენიერი საშობაო ფილმი სადღესასწაულო განწყობისთვის

407
(განახლებულია 15:13 01.01.2021)
სხვა რა არის ახალი წელი, თუ არა განწყობა  და განწყობის შექმნა? - ოთახში ბუხარი, ბუხარში ცეცხლი, გარეთ თოვლი და ფილმის საყურებლად შეკრებილი ოჯახი. 

ახალ წელსა და შობას საოცრად უხდება ფილმები, რომლებსაც მოაქვთ ნოსტალგია, თბილ ღუმელთან ჯდომის განცდა და ბედნიერი დასასრულის რწმენა. ყველას გვინდა გვჯეროდეს, რომ ამქვეყნად არსებობს ჩვენი წილი ბედნიერება, რომელიც ერთ დღეს კარზე აუცილებლად მოგვიკაკუნებს.

დღეს, როცა პანდემიამ მთელი მსოფლიო სახლში გამოკეტა და ახალი წელი მოპარა, ალბათ ყველაზე ძნელია საახალწლო განწყობის შექმნა. დღეს მართლა იმის დროა, გამოვნახოთ ჩვენს თავში ძალები და ვირუსს ჩვენი წილი შობა და ახალი წელი არ მოვაპარინოთ. ამიტომ, მოიხვიეთ თბილი პლედი, დაისხით სურნელოვანი ჩაი და უყურეთ ფილმებს, რომლებიც საუკეთესო განწყობას შეგიქმნით და საახალწლო სასწაულების რწმენას შეგმატებთ.

ჩვენ შეგიგროვეთ შესანიშნავი ფილმები საახალწლო განწყობით, რომლებიც ჯერ არ გინახავთ, ან იქნებ დაგავიწყდათ კიდეც. მოდით, კიდევ ერთხელ დავბრუნდეთ ბავშვობაში, მივწეროთ წერილი თოვლის პაპას, გრინჩს მოვაპარინოთ შობა და კევინი კიდევ ერთხელ დავტოვოთ სახლში მარტო.

1. მარტო სახლში (Home Alone)  1990წ.– ყველასთვის ნაცნობი და საყვარელი საახალწლო ფილმი პატარა ბიჭზე, რომელიც საშობაო არდადეგებზე გამგზავრებულ ოჯახს სახლში დაავიწყება. ფილმს იმდენად დიდი გამოხმაურება მოჰყვა, რომ კიდევ რამდენიმე ნაწილი გადაიღეს, რომლებიც ინტრიგებით, პოზიტივით, მახეებით, მხიარული და სასაცილო  ამბებით სავსე ისტორიებს გვიამბობს.

2. საშობაო დაბნეულობა ( A Very Merry Mix-up) 2013წ.  -  ეს მყუდრო ისტორია შეიქმნა მათთვის, ვისაც, თბილ პლედში გახვეულებს ცხელი შოკოლადით სავსე ფინჯნით ხელში, უყვართ კეთილი ფილმების ყურება.  გოგონა, სახელად ალისა, შობას აპირებს თავისი საქმროს მშობლებს შეხვდეს. აეროპორტში მას სხვადასხვა გამოწვევა და დაბრკოლება ელის. საბედნიეროდ, გოგონა  ხვდება უცნობ ადამიანს  და ეს მოულოდნელი გაცნობა წარმოუდგენელ თავგადასავლად იქცევა. მოკლედ,  ერთ-ერთი ის სასიამოვნო ფილმია, რომელიც საახალწლო განწყობას ნამდვილად შეგიქმნით.

3. სტოუნების ოჯახი ( The Family Stone) 2005წ. - კიდევ ერთი შესანიშნავი სადღესასწაულო ფილმი. ევერეტი გადაწყვეტს, საშობაო არდადეგებზე საცოლე ოჯახს გააცნოს, რაც დიდ უხერხულობას გამოიწვევს. ერთ  მხარეს არის სტოუნების უცნაური ოჯახი, მეორე მხარეს კი საკმაოდ კონსერვატიული საცოლე. ფილმში სადღესასწაულო ფონზე საკმაოდ საინტერესო სიუჟეტი ვითარდება.

4. პრინცესას შეცვლა (The Princess Switch) 2018წ. - ეს მშვენიერი ფილმია მათთვისა, ვისაც სურს შობის ღამეს რომანტიკული ატმოსფერო შეიქმნას. ჰერცოგინია მარგარეტი და  ჩიკაგოს ჩვეულებრივი მცხოვრები სტეისი აღმოაჩენენ, რომ საოცრად ჰგვანან ერთმანეთს. ისინი მოიფიქრებენ, როგორ გაცვალონ ადგილები და ეს იდეა ბედის ნამდვილ საჩუქრად იქცევა (რა თქმა უნდა, პატარა მაგიის დახმარებით).

5. რეალური სიყვარული ( Love Actually) 2003წ. - შობის მოახლოვებასთან ერთად ზოგი შორდება ერთმანეთს, ზოგს უყვარდება და საბოლოოდ, იქმნება  საკმაოდ პოზიტიური სიუჟეტები. ეს არაჩვეულებრივი, ტკბილი ბრიტანული ფილმი სავსეა საახალწლო მუსიკით, საოცარი მსახიობებითა და ამაღელვებელი თავგადასავლებით.  ეს ისტორიები კი გვარწმუნებს, რომ შობის ღამეს ნამდვილად ხდება სასწაულები.

6. ადამიანი, რომელმაც შობა გამოიგონა ( The man Who Invented Christmas) 2017წ. - რამდენიმე წარუმატებელი წიგნისა და ფინინსური პრობლემების შემდეგ, ახალგაზრდა ინგლისელი მწერალი ჩარლზ დიკენსი, გამომცემლების უარყოფის მიუხედავად, გადაწყვეტს დაწეროს და გამოაქვეყნოს წიგნი „საშობაო სიმღერა“.  მოგვიანებით, ეს წიგნი გახდება  შენდობის, პატიებისა და სიყვარულის სიმბოლო. ეს ამაღელვებელი ისტორია გიყვებათ იმაზე, თუ როგორ იქმნება საშობაო სასწაულები. ასობით წლის შემდეგაც ეს სასწაულები კვლავ გვაიძულებს, ვაკეთოთ სიკეთეები.

7. შობის ღამემდე (The Night Before) 2015წ. - ამერიკული კომედია სამ მეგობარსა და მათ ტრადიციებზე, ჩაიცვან უცნაური სვიტერები და მხიარულად  და თავაშვებულად შეხვდნენ ახალ წელს. მოვლენები იცვლება და მეგობრები სასაცილო სიტუაციებში ხვდებიან.

8. ყველაფერი, რაც საშობაოდ მინდა ( All I Want For Christmas) 1991წ. - ნიუ – იორკში შობაა და ჰელი და იტანი ცდილობენ განქორწინებული მშობლების შერიგებას.  მიუხედავად სირთულეებისა,  მათ შეუძლიათ მიაღწიონ წარმატებას თოვლის ბაბუის დახმარებით - რადგან ოცნებები შობას ყოველთვის ახდება. ჩაუჯექით და ისიამოვნეთ ამ უთბილესი ფილმით.

9. შვებულება (Holiday) 2006წ.-  მამაკაცებთან განშორების გამო ჩიხში შესული ურთიერთობების შემდეგ, ლოს -ანჯელესელმა ამანდამ და ლონდონელმა აირისმა გადაწყვეტეს სახლები გაცვალონ. ისინი ვერასდროს წარმოიდგენდნენ, რომ ეს მათ თავბრუდამხვევ თავგადასავალს მოუტანდა.

10.  საშობაო არდადეგები ( National Lampoon’s Christmas Vacation) 1989წ.- გრისვოლდების ოჯახში შობას ზეიმობენ. შობა ხომ საჩუქრების ჩუქების, საახალწლო სიმღერებისა და    ნაძვის ხის შუქების ციმციმის დროა.  მაგრამ სტუმრად მოსული ნათესავები ყველაფერს აფუჭებენ და გრისვოლდების ოჯახს ნამდვილი სტიქიური უბედურება ატყდება თავს. მგონი, ამ ფილმის ყურებისას გულში იმასაც კი გავიფიქრებთ, რომ თურმე არც ისე ცუდი იდეაა ახალი წლის სტუმრების გარეშე აღნიშვნა.

და ბონუსად,

როგორ მოიპარა გრინჩმა შობა ( How To Grinch Stole Christmas) 2000წ. - როგორ დავასრულოთ ჩვენი სია ისე, რომ გრინჩს შობა არ მოვაპარინოთ? მთელს სამყაროზე განაწყენებული, თავიდან ბოლომდე მწვანე ფერის ბანჯგვლიანი არსება არავის უყვარს, ამიტომაც ცხოვრობს მარტო.  გრინჩს განსაკუთრებით არ უყვარს შობის დღესასწაული და ამ დღეს ყოველთვის ცუდი განწყობით ხვდება. თუმცა...

იმედია, ჩვენი შერჩეული ფილმები საუკეთესო საახალწლო განწყობას შეგიქმნით. მოკალათდით კომფორტულად საყვარელ ადამიანებთან ერთად, ისიამოვნეთ ფილმებით და კიდევ ერთხელ ირწმუნეთ ახალი წლის ჯადოსნურობა.

 ბედნიერ შობა-ახალ წელს გისურვებთ!

407
მძინარე ქალი

არც ისე სასარგებლო, მაგრამ ეფექტური: ექიმი სწრაფი ჩაძინების მარტივ მეთოდს ასახელებს

211
(განახლებულია 22:11 22.01.2021)
უძილობა კვლავაც რჩება ჩვენი ნერვიული და მოუსვენარი საუკუნის ერთ-ერთ მთავარ პრობლემად, თუმცა არსებობს მისი აღმოფხვრის ეფექტური ხერხი

თბილისი, 22 იანვარი — Sputnik. არსებობს სწრაფი ჩაძინების მარტივი, თუმცა გარკვეული თვალსაზრისით, არც ისე სასარგებლო ხერხი, აცხადებს სეჩენოვის უნივერსიტეტის ნერვული დაავადებებისა და ნეიროქირურგიის კათედრის დოცენტი მიხაილ პოლუეკტოვი.

მისი თქმით, ამისათვის საჭიროა ძილის წინ ოთხი საათით ადრე რაიმე ტკბილის ჭამა.

„დაძინებამდე ოთხი საათით ადრე მაღალი გლიკემიური ინდექსის მქონე საკვების მიღება, რომელიც შეიცავს ბევრ ადვილად ასათვისებელ ნახშირწყლებს, აჩქარებს ჩაძინებას. ასე რომ, ზოგადად, შეგვიძლია ვთქვათ, რომ ტკბილეული ხელს უწყობს ჩაძინებას, თუმცა სხვა თვალსაზრისით ეს არც ისე სასარგებლოა“, — აღნიშნა ექიმმა.

ადვილად ასათვისებელი, ანუ ჩქარი ნახშირწყლები, ეს მარტივი ნახშირწყლებია, რომლებსაც ორგანიზმი ადვილად ამუშავებს. მათ მხოლოდ რამდენიმე წუთი სჭირდება უბრალო მოლეკულებად დასაშლელად, სისხლში მოსახვედრად და ამით ორგანიზმის საჭირო ენერგიით მოსარაგებლად. ასეთი პროცესების სიჩქარე განისაზღვრება გლიკემიური ინდექსით: რაც უფრო მაღალია ის, მით უფრო ნაკლებ დროს ხარჯავს ორგანიზმი გადამუშავებაზე.

სწრაფ ნახშირწყლებს შეიცავს, მაგალითად, ცომეული, ბურღულეული, მოხარშული ბოსტნეული, შემწვარი კარტოფილი, ლაფშა, შაქარი, თაფლი და ა.შ.

 

211
თემები:
ექიმი გირჩევთ
ახალგაზრდა ქალი იზომავს წელის გარშემოწერილობას

არც იშიმშილოთ და არც ძალიან დაიტვირთოთ: 12 მარტივი ხრიკი წონაში სწრაფად დასაკლებად

289
(განახლებულია 20:24 22.01.2021)
ბრიტანეთის ჯანდაცვის ეროვნული სამსახურის სპეციალისტებმა სპეციალური პროგრამა შექმნეს, რომელიც ცხოვრების ჯანსაღ წესზე ლამის შეუმჩნევლად გადაგიყვანთ და წონასაც ზედმეტი დატვირთვის გარეშე დაგაკლებინებთ 

თბილისი, 22 იანვარი — Sputnik. ექიმებმა ჩამოთვალეს ხრიკები, რომლებიც საშუალებას მოგცემთ, სპეციალური დიეტის გარეშე დაიკლოთ წონაში უფრო სწრაფად წერს გამოცემა The Sun–ი.

დიდი ბრიტანეთის ჯანდაცვის ეროვნული სამსახურის სპეციალისტ ტამარა უილნერის თქმით, ადამიანის წონაზე ზეგავლენას ახდენს არა მარტო საკვები, არამედ ყველა წვრილმანი ჩვევა. იგი გთავაზობთ 12-კვირიან სპეციალურ პროგრამას, რომელიც გარკვეული წესების ჩვევად ქცევას ითვალისწინებს.

ეს ის მარტივი წესებია, რომლებიც ზედმეტი კილოგრამების მოცილებაში დაგეხმარებათ შიმშილის, გამომფიტავი დიეტებისა და გამუდმებული ფიზიკური დატვირთვების გარეშე, და რომელიც ცხოვრების ჯანსაღ წესზე ლამის შეუმჩნევლად გადაგიყვანთ. 

ბრიტანეთის ჯანდაცვის ეროვნული სამსახურის (NHS) პროგრამა Second Nature-ს რეკომენდაციები ასე გამოიყურება: 

  • გააზავეთ დღე მოკლე ფიზიკური დატვირთვებით. მაგალითად: კბილების გახეხვის დროს ჩაჯდომებით, ტელევიზორის ყურებისას კედლიდან აწევებით; რამე საქმიანობის დროს ადგილზე სირბილით;
  • შეზღუდეთ ალკოჰოლის მიღება;
  • არ დალიოთ ყავა დღის მეორე ნახევარში, რათა ღამით უკეთ დაიძინოთ;
  • შეცვალეთ ხილის წვენი და ტკბილი სასმელები წყლით, ჩაით ან რძით;
  • დაიწყეთ ყოველი დილა 10-წუთიანი სეირნობით;
  • ძირითადი კვების დროს ჭამეთ მეტი, რომ მოგვიანებით არ წაიხემსოთ;
  • თუ ტკბილეული გიყვართ, შეცვალეთ რძიანი ან თეთრი შოკოლადი 70%-იანი შავი შოკოლადით;
  • ყოველკვირეულად გასინჯეთ ახალი ბოსტნეული;
  • შეადგინეთ საყიდლების ჩამონათვალი სუპერმარკეტში წასვლამდე, რათა თავიდან აიცილოთ საკვებზე სპონტანური ხარჯები;
  • სთხოვეთ მეგობარს, ისეირნოდ თქვენთან ეთად კვირაში ორჯერ;
  • მოძებნეთ პოზიტიური ემოციების მიღების ალტერნატიული გზები — საკვების გარდა. სცადეთ თავსატეხების ამოხსნა, მეგობართან საუბარი ან სხვა რამ, რაც სიამოვნებას განიჭებთ;
  • ნუ აუკრძალავთ საკუთარ თავს გარკვეულ საკვებს. თუ ძალიან გსურთ რაიმეს ჭამა, უარი კი არ თქვათ, უბრალოდ მიირთვით ის აუჩქარებლად.

 

289
თემები:
ექიმი გირჩევთ
შესასვლელი ლილოს ბაზრობაზე

„ლილო მოლის“  მოვაჭრეები მაღაზიების თვითნებურად გახსნას გეგმავენ

0
„ლილო მოლის“ ადმინისტრაციის განცხადებით, 28 ნოემბრიდან დაწესებულმა შეზღუდვებმა პირდაპირი გავლენა იქონია მოვაჭრეთა შემოსავალზე და დიდი ზარალი მიაყენა მათ.

თბილისი, 24 იანვარი – Sputnik. „ლილო მოლის“ ტერიტორიაზე დასაქმებულებმა დღეს საპროტესტო აქცია გამართეს, იუწყება რუსთავი 2.

ეპიდვითარების გაუარესების გამო საქართველოში 28 ნოემბრიდან მკაცრი შეზღუდვები ამოქმედდა. იმ დღიდან ყველა სავაჭრო ცენტრი და ბაზრობა (გარდა აგრარული ბაზრისა) დაკეტილია. 22 იანვარს უწყებათაშორისი საკოორდინაციო საბჭომ მიიღო გადაწყვეტილება, რომელის თანახმადაც მაღაზიები და სავაჭრო ცენტრები მუშაობას 1 თებერვლიდან, ხოლო ღია და დახურული ტიპის ბაზრობები 15 თებერვალიდან განაახლებენ.

„ლილო მოლის“ მოვაჭრეები, სავაჭრო ცენტრების მსგავსად, 1 თებერვლიდან გახსნის ნებართვას ითხოვენ.

როგორც აქციის მონაწილეები აცხადებენ, თუ 1 თებერვლიდან გახსნის ნებართვას არ მიიღებენ, რეგულაციებს არ დაემორჩილებიან და მაღაზიებს თვითნებურად გახსნიან.

„ყველა რეგულაცია, რაც არის მოთხოვნილი აბსოლუტურად აკმაყოფილებს 6 ათასივე მაღაზია. შეუძლიათ ნებისმიერი გახსნან და შეამოწმონ", - განაცხადა აქციის ერთ-ერთმა მონაწილემ, თამარ თოდრიამ.

როგორც „ლილო მოლის“ გენერალურმა დირექტორმა, გიორგი კვარაცხელიამ აღნიშნა, ბაზრობების ხელმძღვანელები მთავრობას წერილობით თხოვნას გაუგზავნიან, რათა მათ მუშაობის დაწყება 1 თებერვლიდან შეძლონ.

„მეექვსე თვეა რაც დახურულები ვართ და ფინანსურად ძალიან მძიმე მდგომარეობაა შექმნილი. ვაჭრობის სფერო არ უნდა იყოფოდეს სექტორებად და თუ გახსნაა, უნდა იხსნებოდეს და უფრო თანაბრად გადანაწილდება ვიზიტორების რაოდენობა", - განაცხადა გიორგი კვარაცხელიამ.

საპროტესტო აქცია მიმდინარეობს ასევე მთავრობის ადმინისტრაციასთან, სადაც შეკრებილები არიან  სხვადასხვა სფეროს წარმომადგენლები, მათ შორის, სპორტსმენები, გიდები, ტურისტული კომპანიის წარმომადგენლები. აქციის მონაწილეები კორონავირუსის გავრცელების წინააღმდეგ დაწესებული შეზღუდვების შემსუბუქებას ითხოვენ.

ქვეყანაში ეპიდემიოლოგიური ვითარების გაუარესების გამო 28 ნოემბრიდან მკაცრი შეზღუდვები მოქმედებს. კერძოდ, აუცილებელია პირბადის ტარება ქუჩაში, შეზღუდულია გადაადგილება 21:00-დან 05:00 საათამდე, დაკეტილია რესტორნები, კაფეები და ა.შ.

შეზღუდვების შემსუბუქება ეტაპობრივად 1 თებერვლიდან დაიწყება.

0