გოგონა საახალწლო დეკორაციასთან

„გადატვირთვა" ახალი წლის წინ: როგორ დავტოვოთ პრობლემები წარსულში

449
(განახლებულია 13:01 02.01.2021)
ახალი წლის დადგომამდე მნიშვნელოვანია, რომ დავემშვიდობოთ უსიამოვნებებსა და პრობლემებს, რათა მძიმე ტვირთი არ წავიღოთ თან ბედნიერ მომავალში.

ცნობიერების „გადატვირთვა" ყველას შეუძლია, თუ პოზიტიურად განეწყობით და საკუთარ ძალებს ირწმუნებთ.

ახალ წელს ადამიანი აჯამებს თავისი შრომის შედეგებს, მუშაობს შეცდომებზე. ახალ წელს უსიამოვნებებისა და პრობლემების გარეშე უნდა შეხვდეთ. თუ როგორ მოიტოვოთ პრობლემები წარსულში, ამას სპეციალისტები გირჩევენ.

რისგან უნდა გავთავისუფლდეთ ახალი წლის წინ

ყველაფერი, რაც ბედნიერებაში გიშლით ხელს, წარსულს უნდა მიაბაროთ და არასდროს აღარ დაუბრუნდეთ არც საქმეებს, არც ადამიანებსა და არც ნივთებს, რომლებიც თქვენი ნერვიულობისა და პრობლემების მიზეზი ხდება.

სანამ ახალი წელი დადგება, მნიშვნელოვანია სახლის დალაგება, ძველმანების, გატეხილი და ძველი უსარგებლო ნივთების გადაყრა. სახლი კარგად უნდა დაალაგოთ, ამასთან, ერთბაშად არა, რომ არ გადაიღალოთ. გარდერობი მოაწესრიგეთ, დაალაგეთ მისი თითოეული თარო გულმოდგინედ. ეს სახლში სიმყუდროვის ატმოსფეროს შექმნის და შენობას ენერგეტიკული უძრაობისგან გაათავისუფლებს.

  • წარმავალ წელს უნდა გაწყვიტოთ კავშირები ადამიანებთან, რომლებიც ჭაობში გითრევენ. ესენი შეიძლება იყვნენ ცრუ მეგობრები, რომლებიც სინამდვილეში თქვენით მანიპულირებენ და, ზოგადად, სხვა ადამიანების ხარჯზე ცხოვრობენ. უნდა გათავისუფლდეთ ტოქსიკური ურთიერთობებისგან, რომლებიც თქვენ ზურგს უკან ჭორებს ავრცელებენ და საქმეებს აფერხებენ.
  • უნდა გაისტუმროთ ვალებიც, თან არა მხოლოდ ფინანსური. მაგალითად, უნდა შეასრულოთ დანაპირები. ეს ადამიანს ბედნიერების მოპოვებაში და იღბლის მობრუნებაში დაეხმარება.
  • პრობლემების წარსულში დატოვებას ხელს შეუწყობს ნებისყოფა, რომლის წყალობითაც შესაძლებელია მავნე ჩვევებისგან გათავისუფლება. მავნე ჩვევები ის ტვირთია, რომელიც აფერხებს განვითარებას და უსიამოვნებების მიზეზი ხდება.
  • წარმავალი წელი ის დროა, როცა უნდა იზრუნოთ საკუთარ თავზე, პრობლემები წარსულს ჩააბაროთ და ყურადღება საკუთარ საჭიროებებზე გაამახვილოთ. უნდა მოძებნოთ პირადი მიზნები და მიჰყვეთ საკუთარ მოსაზრებებს, უარი თქვათ გატკეპნილ გზაზე სიარულზე. პირადი ბედნიერება თითოეულისთვის განსხვავებულია, ამიტომ უარი თქვით სტერეოტიპებზე.
  • მიმავალ წელს ასევე უკან უნდა მოიტოვოთ სხვისი პრობლემები, რომლებიც არანაირად არ უწყობს ხელს პირად ბედნიერებას.
  • წარმატების მნიშვნელოვანი შემადგენელია ის, რომ წარსულში დატოვოთ ყველაფერი, რაც აქტუალური აღარ არის. ნუ „ჩაიციკლებით" ნივთებზე, მიღწევებზე, თუ მათ სიხარული აღარ მოაქვთ.
  • „გადატვირთვის" კიდევ ერთი ეტაპია მიმავალ წელს ჩააბაროთ კონტროლის სიყვარული. საჭიროა თითოეული ნაბიჯის კონტროლის შეწყვეტა და ხანდახან არა გონებაზე, არამედ ინტუიციაზე დაყრდნობა.

გადატვირთვის ტექნიკა

რაც უფრო ახლოვდება ახალი წელი, მით მეტ შესაძლებლობას გვთავაზობს სამყარო. როდის დგება ყველაზე იღბლიანი დრო, ამას ინტუიცია გვიკარნახებს.

„გადატვირთვის" სამი ძირითადი ხერხი არსებობს:

მტკიცე სურვილი, რომ რაღაც გააკეთოთ, დატოვოთ პრობლემები, წინ წახვიდეთ, აფირმაციებით (მოკლე ფრაზა, რომელიც ვერბალურ ფორმულას შეიცავს. მისი ხშირი გამეორება ადამიანის ქვეცნობიერში მკვიდრდება) უნდა განამტკიცოთ. ეს ფრაზა უნდა გაიმეოროთ ხმამაღლა სარკეში ჩახედვისას, ან აზრობრივად და იმაზე ყურადღების გადატანით, რომ ეს ყველაფერი საუკეთესოდ გამოგივათ.

პრობლემების ტვირთთან გამკლავებაში მედიტაცია დაგეხმარებათ. მისი შესრულება შესაძლებელია ნებისმიერ დროს, როდესაც არავინ და არაფერი გიშლით ხელს. უნდა მოეწყოთ მოხერხებულად და სუნთქვა გაასწოროთ. თანაბარი სუნთქვა-ამოსუნთქვა დაგეხმარებათ ცნობიერების გაწმენდაში და იმ ბნელი ლაქის პოვნაში, რომელიც ხელს გიშლით წინსვლაში.

კიდევ ერთი ტექნიკა - დაგჭირდებათ ძველი, უსარგებლო ნივთი, რომლის დაწვაც შეიძლება. ფურცელზე ჩამოწერეთ იმ ყველაფრის სია, რაც წარსულს უნდა მიაბაროთ. ჩადეთ ამ უსარგებლო ნივთში და დაწვით. ამ დროს წარმოთქვით ფრაზა-აფირმაცია, დაახლოებით ასეთი: წარსულში დარჩეს ყველა პრობლემა. ფერფლი ქარს გაატანეთ.

449
თემები:
სასარგებლო რჩევები (449)
ბიჭუნა სტომატოლოგთან

უშედეგო და ზოგჯერ საშიშიც: კბილების მკურნალობა ხალხური მეთოდებით - ექიმი გირჩევთ

28
(განახლებულია 15:50 25.01.2021)
უმაღლესი კატეგორიის სტომატოლოგმა კბილების მკურნალობის ხუთი ყველაზე პოპულარული ხალხური მეთოდი განიხილა და მათი დადებითი და უარყოფითი მხარეები განმარტა

თბილისი, 25 იანვარი — Sputnik. კბილების მკურნალობის ხალხური საშუალებები საკმაოდ მრავალფეროვანია. ინტერნეტში უამრავი რეცეპტი არსებობს, რომელთაგან ბევრი ექიმ-სტომატოლოგებში ნამდვილ შოკსა და შეძრწუნებას იწვევს.

„ხალხური საშუალებები კბილების სამკურნალოდ— უკვე ეს ერთი ფრაზაც კი უჩქარებს სტომატოლოგს გულს. პაციენტებს თვითმკურნალობის მცდელობა კი არ დაეხმარება, არამედ, უარეს შემთხვევაში, სამწუხარო შედეგებსაც გამოიწვევს“, — ამბობს უმაღლესი კატეგორიის სტომატოლოგი  ნატალია კადკალოვა.

სპეციალისტმა ცალ–ცალკე განიხილა კბილების მკურნალობის ყველაზე პოპულარული ხალხური მეთოდები და მათი დადებითი და უარყოფითი მხარეები განმარტა.

სოდის გამოვლება

ადამიანები სოდას ხშირად ივლებენ პირის ღრუში ანთებითი პროცესების დროს. მაგრამ კადკალოვას თქმით, ასეთი ექსპერიმენტები არა მხოლოდ უსარგებლო, არამედ საშიშიცაა.

„იმის გასაგებად, თუ რამდენად საშიშია სოდის გამოვლება, საკმარისია წარმოიდგინოთ, როგორ მოქმედებს სოდა ცომზე. პირის ღრუს ანთებითი ქსოვილები ანალოგიურად რეაგირებს სოდაზე. შეშუპება იზრდება და ჩვენ არ ვიცით, ეს ყველაფერი რით დამთავრდება. თუმცა შეგვიძლია ზუსტად ვთქვათ, რომ კარგით არაფრით“, — ამბობს უმაღლესი კატეგორიის სტომატოლოგი.

ნიორი ტკივილის გასაყუჩებლად

კიდევ ერთი გავრცელებული რეცეპტია ნივრის მტკივნეულ კბილზე დადება. არსებობს მოსაზრება, რომ მასში შემავალი ფიტონციდები სასიკეთოდ მოქმედებს ანთების უბანზე და იცავს ტკივილისგან.

სტომატოლოგის თქმით, ეს ვარიანტი ვერანაირ კრიტიკას ვერ უძლებს. ნერვის ანთება ჩააქროს კი არა, პირიქით, ნიორს შეუძლია კიდევ უფრო გააუარესოს ვითარება.

„მკურნალობის“ ამ ვარიანტს შეუძლია კიდევ ერთი გართულება — ლორწოვანი გარსის დამწვრობა გამოიწვიოს, რომელსაც ხშირად ვხვდები პრაქტიკაში. ნერვის ანთება შეუქცევადი პროცესია და ამაში დახმარება მხოლოდ სტომატოლოგს შეუძლია. ის  დაზიანებულ ქსოვილს მოაცილებს და არხს ინფექციისგან გამორეცხავს. წინააღმდეგ შემთხვევაში, ანთება უფრო შორს წავა და სამკურნალო გახდება არა მარტო კბილი, არამედ ნივრით გამოწვეული დამწვრობაც“, —განმარტავს სპეციალისტი.

სპირტის ან არაყის საფენები

ზოგი ადამიანი კბილის ტკივილის გასაყუჩებლად და მოსარჩენად ძლიერი ალკოჰოლით — სპირტით ან არყით გაჟღენთილ საფენებს იყენებს. მაგრამ ამ შემთხვევაშიც იგივეა მოსალოდნელი, რაც ნივრით მკურნალობის დროს: არანაირი შვება — მხოლოდ ლორწოვანი გარსის დამწვრობა.

მცენარეული ნახარშების გამოვლება

კიდევ ერთი პოპულარული ვარიანტია პირის ღრუს გამორეცხვა მცენარეების ნახარშით. მაგალითად, გვირილას ნახარშით, რომელიც, ტრადიციულად, ძალზე ეფექტურ ანთების საწინააღმდეგო საშუალებად მიაჩნიათ.

ბალახეული ნახარშების სამკურნალო თვისებები ასობით წლის წინ იყო ცნობილი, ამიტომ ექიმებს მათ საწინააღმდეგო არაფერი აქვთ, თუმცა არსებობს ერთი „მაგრამ“.

„არაფერი მაქვს საწინააღმდეგო პირის ღრუს სხვადასხვა მცენარეული  ხსნარებით გამოვლებისა. მაგრამ ამით შეიძლება არაფერი შეიცვალოს და ანთებითმა პროცესმა განვითარება განაგრძოს“, — ამბობს ნატალია კადკალოვა.

ეს კი იმის გამო, რომ ნაყენი ვერ აღწევს კბილის ნადების ქვეშ მიმდინარე ანთებაზე, ანუ დაზიანებულ ქსოვილამდე. თუმცა სხვა საქმეა, როდესაც მცენარეულ ნაყენს პროფესიონალური გაწმენდის შემდეგ ივლებთ — ამის შედეგად მორჩენის პროცესი ჩქარდება.

კბილების გათეთრება ლიმონით

ადამიანების დიდ ნაწილს სურს, გაითეთროს კბილები ექიმის გვერდის ავლით — იაფად ან სულაც უფასოდ. საამისოდ ხშირად იყენებენ სხვადასხვა რეცეპტურას: დაწყებული ლიმონით, დამთავრებული გაქტიურებული ნახშირით.

„მიმაჩნია, რომ ლიმონის პროცედურა ყველაზე ჰუმანურია კვერცხის ნაჭუჭით, გააქტიურებული ნახშირითა და სხვა აბრაზიებით გაწმენდასთან შედარებით, რომლებიც კბილებს კაწრავს. ლიმონის შემთხვევაში შედეგი უმნიშვნელო იქნება, მაგრამ თავს მაინც არ ავნებთ“, — განმარტა ექიმმა.

28
თემები:
ექიმი გირჩევთ
კოწახური

კოწახური სასარგებლო თვისებები და უკუჩვენებები

42
(განახლებულია 11:23 25.01.2021)
კოწახურის სასარგებლო თვისებები უძველესი დროიდან არის ცნობილი. მას დღესაც აქტიურად იყენებენ და ებრძვიან სურავანდს, ჰიპერტონიას, რადიკულიტს, კუჭ–ნაწლავის, ღვიძლის, თირკმელების დაავადებებს, იყენებენ კულინარიაში, კოსმეტოლოგიაში...

კოწახური (Berberis vulgaris) კოწახურისებრთა ოჯახის წარმომადგენელია. არის 3–5 მეტრი სიმაღლის ბუჩქი. აქვს ძლიერი ფესვი და გამერქნებული ფესვურები. ყლორტები მოფენილია წვეტიანი ეკლებით. ნაყოფი წითელი წაგრძელებული ფორმის კენკრაა. ყვავის მაის–ივნისში, დამწიფებას აგვისტო–სექტემბერში იწყებს. მტევნები ბუჩქებზე შუა ზამთრამდე ჰკიდია.

გავრცელებულია მთის შუა სარტყლამდე, ტყის პირებზე მდინარის ნაპირებზე, ჭალებში, რიყეზე და სხვა. გამძლეა ყინვებისა და გვალვების მიმართ.

საქართველოს სხვადასხვა კუთხეში კოწახურს სხვადასხვაგვარად უწოდებენ: მაჭი, ცაცხვ, დუცხუ, კავაღი, ცხაცხუ, ცაცხუ, ცხაცხვი, ზესხრა, ფაჩა.

კოწახურის ნაყოფს მჟავე, სასიამოვნო გემო აქვს. ის შეიცავს 5 პროცენტამდე შაქრებს, მდიდარია ორგანული მჟავებით (ლიმონის, ვაშლის, ღვინის და სხვა), სასარგებლო პექტინებით, მასში ბევრია С ვიტამინი, შეიცავს К ვიტამინს, ასევე კაროტინსა და მინერალურ მარილებს. უმწიფარ ნაყოფში არის ალკალოიდები.

ვაშლის ძმარი, როგორც ერთ–ერთი საუკეთესო საშუალება დაავადებებთან ბრძოლაში>>

კოწახურის ფოთლები, ფესვი და ქერქი შეიცავს ალკალოიდებს, მცენარის ამ ნაწილებში ასევე არის მთრიმლავი ნოვთიერებები და ვიტამინები С და Е.

კოწახური
© Flickr / flöschen / Berberitze
კოწახური

კოწახურის თვისებების შესახებ უძველესი დროიდან არის ცნობილი – ჯერ კიდევ ძველ ბაბილონსა და ინდოეთში მას იყენებდნენ, როგორც სისხლის გამწმენდ საშუალებას. ძველი ბერძნები და რომაელები კოწახურის ნაყოფისა და ფოთლებისგან კუჭ–ნაწლავის სამკურნალო საშუალებებს, ინდოეთში ეს იყო მატონიზირებელი, მსუბუქი გამხსნელი, წყურვილის მოკვლის საშუალება. ძველ ეგვიპტეში მისი მეშვეობით იწმენდნენ სისხლს. ორგანიზმს შლაკებისგან. შორეულ აღმოსავლეთში, იაპონიასა და ჩინეთში კოწახურით მკურნალობდნენ სურავანდს, ავიტამინოზს, მაღალ არტერიულ წნევას, ციებ–ცხელებას. ტიბეტურ მედიცინაში მცენარისგან გამაახალგაზრდავებელ ნაყენს ამზადებდნენ.

კოწახურს ამჟამადაც ფართოდ იყენებენ ხალხურ მედიცინაში. სხვადასხვა ქვეყანაში მას სხვადასხვა დაავადებს კურნავენ. მაგალითად, გერმანიაში კოწახურით ებრძვიან არა მხოლოდ კუჭ–ნაწლავის, არამედ ფილტვების, პირის ღრუს ლორწოვან დაავადებებს. საფრანგეთში ის სიცხისა და არტერიული წნევის დამწევი საშუალებაა, ბულგარეთში კი კოწახურით რადიკულიტს ამარცხებენ; პოლონელების ავიტამინოზს ებრძვიან, ჩინეთში – სიმსივნეს.

კოწახურს აქვს ნაღვლმდენი, ანთების საწინააღმდეგო, ანტისეპტიკური, სისხლდენის შემაჩერებელი თვისებები.

ამგვარად, ხალხურ და ასევე თანამედროვე მედიცინაში (კოწახურზე დამზადებული პრეპარატების სახით) მკურნალობენ:

თირკმელების, კუჭის, თორმეტგოჯა ნაწლავის დაავადებებს, ტუბერკულიოზს, შინაგან სისხლდენას (განსაკუთრებით მშობიარობის შემდეგ საშვილოსნოდან სისხლდენას), ზედა სასუნთქი გზების ანთებას, სხვადასხვა ორგანოს სიმსივნეს.

წიწვოვანი მცენარეების უპირატესობა, ანუ გაიკაჟეთ ჯანმრთელობა>>

კოწახურს იყენებენ დიაბეტის დროს. რამდენიმე წლის წინ აღმოაჩინეს მისი კიდევ ერთი თვისება – მცენარე მალარიით დაავადებულ ადამიანებში ზრდის ელენთას (მალარიული პლაზმოდიები კოწახურის საშუალებით სისხლში განიდევნება). ჰომეოპათიაში კოწახურზე დამწადებული პრეპარატებით კურნავენ ღვიძლის, საშარდე გზებისა და თირკმელების დაავადებებს. გამოიყენება ნიკრისის ქარის, რევმატიზმისა და წელკავის დროს.

მცენარის ყველა ნაწილი შეიცავს ალკალოიდებს, რომელთა შორის მთავარია ბერბერინი (განსაკუთრებით ფესვსა და ქერქში). ეს ნივთიერება აქვეითებს არტერიულ წნევას, ამშვიდებს, ამცირებს გულისცემას. მას იყენებენ ქოლეცისტიტის, ნაღვლის ბუშტში კენჭოვანი დაავადებებისა და ქრონიკული ჰეატიტის დროს.

ფოთლების, ნაყოფისა და ქერქისგან მზადდება ნაყენები, რომლებიც კოსმეტოლოგიაში გამოიყენება. სახლის პირობებში დამზადებული ლოსიონები აახალგაზრდავებს, აშორებს კანის დეფექტებს (პიგმენტური ლაქები, ჭორფლი, გამონაყარი), ასწორებს წვრილ ნაოჭებს, სახეს ჯანმრთელ ფერს აძლევს. ასევე კარგია კოწახური თმის მოსავლელად და ქერტლის მოსაშორებლად.

კანის გასაახალგაზრდავებლად მოამზადეთ ნაყენი შემდეგნაირად: აიღეთ 1 სუფრის კოვზი ნედლი ან ხმელი კოწახურის დაქუცმაცებული ფოთოლი, დაასხით 1 ჭიქა მდუღარე წყალი. გააჩერეთ 30 წუთი, გადაწურეთ. ნაყენის წაისვით სახეზე დილითა და საღამოს ტონიკის სახით. შეგიძლიათ გაყინოთ პატარა კუბებად და სახე გაიწმინდოთ.

კოწახურის ნაყენი წყლულოვანი დაავადებებისა და გულისრევის დროს: აიღეთ 15–20 გრამი მშრალი, დაქუცმაცებული ფოთოლი, დაასხით 200 გრამი წყალი, დადგით ცეცხლზე, მიიყვანეთ ადუღებამდე, 15 წუთის განმავლობაში ხარშეთ დაბალ ცეცხლზე, შემდეგდადგით 40 წუთი, გადაწურეთ და გააზავეთ ანადუღარ წყალში, ისე, რომ საწყისი მოცულობა მიიღოთ. მიიღეთ ნაყენი ყოველდღე, დღეში სამჯერ 1 სუფრის კოვზი.

კოწახურის ნაყენი, როგორც ნაღვლმდენი და სიცხის დამწევი საშუალება: აიღეთ 30–40 გრამი მცენარის დაქუცმაცებული ნაყოფი, დაასხით ერთი ჭიქა წყალი. ადუღეთ დაახლოებით ნახევარი საათი. შემდეგ გადაწურეთ და საწყისი მოცულობის მისაღებად შეავსეთ ანადუღარი წყლით. მიიღეთ დღეში სამჯერ ჭამამდე ნახევარი ჭიქის ოდენობით.

ხახვი – ვირუსებთან ბრძოლის საუკეთესო საშუალება>>

კოწახურის უკუჩვენებები: ალკალოიდების დიდი რაოდენობით შემცველობის გამო კოწახური სუსტ შხამიან მცენარეებს განეკუთვნება, ამიტომ მისი დიდი ხნით და უკონტროლოდ გამოყენება არ შეიძლება.

ასევე არ შეიძლება მისი მიღება ორსულებისთვის, ხოლო მცენარის მწვანე ნაყოფი შხამიანია, და მისი გამოყენება საერთოდ არ შეიძლება.

42
თემები:
სასარგებლო რჩევები (449)
Telegram

Sputnik-ის ინგლისურენოვანი არხი Telegram-ზე ამუშავდა

0
(განახლებულია 16:42 25.01.2021)
არხზე გამოქვეყნდება ტექსტური შეტყობინებები, ფოტო– და გრაფიკული გამოსახულებები, აუდიო და ვიდეო ჩანაწერები, გრაფიკები და სტატისტიკა, რათა მკითხველებს გააცნოს მსოფლიოს ყველა ახალი ამბავი

თბილისი, 25 იანვარი — Sputnik. საინფორმაციო სააგენტო Sputnik–ი ახალ ინგლისურენოვან არხს ხსნის Telegram–ზე, რათა განავითაროს საინფორმაციო სერვისები Telegram–ის მულტიმედიური შესაძლებლობებით და გააშუქოს პოლიტიკური და ბიზნეს საკითხები, მსოფლიო ეკონომიკური ტენდენციები, უსაფრთხოებისა და თავდაცვის, კოსმოსის, ასევე ჯანდაცვისა და სხვა სფეროების სიახლეები და მიაწოდოს ის ფართო აუდიტორიას.

არხზე გამოქვეყნდება ტექსტური შეტყობინებები, ფოტო– და გრაფიკული გამოსახულებები, აუდიო და ვიდეო ჩანაწერები, გრაფიკები და სტატისტიკა, რათა მკითხველებს გააცნოს მსოფლიოს ყველა ახალი ამბავი — იქნება ეს დღის მთავარი თემები, კურიოზული შემთხვევები თუ კულისებს მიღმა მოვლენები.

Sputnik–ი საზოგადოებას შესთავაზებს ამონარიდებს მსოფლიოს სხვადასხვა ქვეყნის უმაღლეს თანამდებობის პირებთან, ბიზნესმენებთან, პოლიტიკოსებთან,  ანალიტიკოსებსა და წქსპერტებთან საინტერესო ექსკლუზიური ინტერვიუებიდან.

Sputnik–ის კორესპონდენტები 24/7–ზე იმუშავებენ პირდაპირ ეთერში და გააშუქებენ ყველა მნიშვნელოვან მსოფლიო მოვლენას: დაწყებული სახელმწიფო ვიზიტებით, დამთარებული საპროტესტო აქციებით, ტერორისტული შეტევებითა თუ ინფექციების აფეთქებებით.

Telegram–ში Sputnik–ის მოძებნა და გამოწერა შეგიძლიათ მისამართზე @sputniknewsint.

Sputnik-ი არის ერთ-ერთი ყველაზე დიდი საერთაშორისო მედიასაშუალება, რომელიც აერთიანებს 33 ენაზე მაუწყებელ მულტიმედიურ ინტერნეტ-საიტებს, ანალოგურ და ციფრულ რადიომაუწყებლობას მსოფლიოს 34 ქვეყნის 130-ზე მეტ ქალაქში. Sputnik-ი 24 საათის განმავლობაში აწვდის ინფორმაციას მსოფლიოს წამყვან გამოცემებს ინგლისურ, არაბულ, ესპანურ, ჩინურ ენებსა და ასევე ფარსიზე. Sputnik-ის საინფორმაციო რესურსების აუდიტორია 80 მლნ ვიზიტორს შეადგენს ერთ თვეში, ხოლო სოციალურ ქსელებში ხელმომწერთა საერთო რაოდენობა 20 მილიონს აღემატება.

 

0