თავის ტკივილი

როდისაა თავის დაბუჟება საგანგაშო სიგნალი: ნევროლოგი გირჩევთ

434
(განახლებულია 18:22 21.12.2020)
ცნობილი ნევროლოგი ასახელებს მიზეზებს, რის გამო შეიძლება გაჩნდეს თავში დაბუჟების შეგრძნება, და საგანგაშო სიმპტომებს აკონკრეტებს.

თბილისი, 21 დეკემბერი – Sputnik. ადამიანები მიეჩვივნენ იმ ფაქტს, რომ ხელები და ფეხები უბუჟდებათ, მაგრამ როდესაც დაბუჟებისა და ჩხვლეტის შეგრძნებები თავში ჩნდება, ეს ბევრში გაკვირვებას იწვევს, აცხადებს ექიმი-ნევროლოგი ირინა რიაბოკონი.

მისი თქმით, ეს მდგომარეობაც ნორმალურად შეიძლება ჩაითვალოს, მაგრამ რიგ შემთხვევებში ექიმები სიფრთხილეს იჩენენ და სრულ გამოკვლევას ატარებენ, ვინაიდან შესაძლოა ეს საგანგაშო სიგნალი იყოს.

„არსებობს მთელი რიგი ძირითადი ნერვული კლასტერები, რომლებიც თავის ტვინს სახისა და თავის სხვადასხვა ნაწილებთან აკავშირებს. დაბუჟება შეიძლება განვითარდეს ნერვის ანთების, დაზიანების ან მასზე ზეწოლის დროს. შემცირებული ან ბლოკირებული სისხლმომარაგებაც შეიძლება გახდეს დაბუჟების მიზეზი“, – განმარტავს რიაბოკონი.

ნევროლოგის თქმით, თავის დაბუჟების მიზეზები მრავალფეროვანია. თუ ასეთი სიმპტომი გაციების, თავის ტკივილების ან ძილისთვის არახელსაყრელი პოზის გამო გაჩნდა, ეს საშიში არ არის. მაგრამ თუ ადამიანი რაიმე დაავადებით იტანჯება, იღებს სხვადასხვა მედიკამენტს ან რაიმე ტრავმა აქვს გადატანილი, მაშინ კი უნდა დაყურადდეს. თავის დაზიანება ან ტვინის შერყევა დაბუჟებას მაშინ იწვევს, თუ ნერვებია დაზიანებული.

„სიტყვაში „დაბუჟება“, რაც სინამდვილეში მგრძნობელობის დაკარგვას ნიშნავს, პაციენტები ხშირად სხვადასხვა შეგრძნებებს მოიაზრებენ, როგორებიცაა თითქოს ჭიანჭველების ცოცვა, წვა თუ ჩხვლეტა (ე.წ. პარესთეზიები). ასეთი შეგრძნებების მიზეზის გასარკვევად ძალზე მნიშვნელოვანია იმის დადგენა, თუ რას გულისხმობს პაციენტი ზუსტად — მგრძნობელობის დაქვეითებას, მის არარსებობას თუ პარესთეზიას“, — ამბობს ექიმი.

ნევროლოგი აღნიშნავს, რომ პარესთეზიის დროს შეიძლება მგრძნობელობა შენარჩუნებული იყოს, ზოგჯერ გაძლიერებულიც კი. ნაკლებად გვხვდება სიტუაციები, როდესაც ამ უბანზე პარესთეზია კომბინირებულია მგრძნობელობის დაქვეითებასთან (შეხების შეგრძნება, ტკივილის მგრძნობელობა — ჩხვლეტა, ვიბრაციის შეგრძნება და სხვ.).

„პარესთეზიას (მგრძნობელობის დაქვეითების გარეშე) შეიძლება მრავალი მიზეზი ჰქონდეს და ამ მიზეზების დადგენა ყოველთვის არ არის შესაძლებელი. მაგალითად, ეს შეიძლება იყოს ზოგი პრეპარატის გვერდითი ეფექტი, ან ძლიერ მღელვებასთან, შფოთვასთან იყოს დაკავშირებული. განსაკუთრებით მაშინ, როცა შეგრძნებების ლოკალიზაცია იცვლება“, — აღნიშნავს სპეციალისტი.

მაგრამ თავის ან სახის გარკვეულ არეში მგრძნობელობის დარღვევა კი უკვე მოითხოვს დეტალურ გამოკვლევას. ამის მიზეზი შეიძლება იყოს სისხლძარღვოვანი დარღვევები, ნერვების დაზიანება ან თავის ტვინის დაავადებები. ამ შემთხვევაში აუცილებელია ექიმთან ვიზიტი და დეტალური გამოკვლევის ჩატარება.

ნევროლოგის განმარტებით, ეს სიმპტომი შეიძლება გამოიწვიოს საკმაოდ სერიოზულმა დაავადებებმაც: მაგალითად, დიაბეტურმა ნეიროპათიამ – ნერვის შეუქცევადი დაზიანების გამო. ამასთან თავის დაბუჟება ასევე არის გაფანტული სკლეროზის ხშირი სიმპტომიც.

გარდა ამისა, ჩამონათვალში, თუ რაზე შეიძლება მიუთითებდეს თავის დაბუჟება, ასევე შედის:

  • ალერგიული რინიტი;
  • გაციება;
  • სინუსიტი;
  • ტვინის სიმსივნე;
  • არტერიული ჰიპერტენზია;
  • ინსულტი;
  • ეპილეფსიური კრუნჩხვები;
  • აკრძალული ნივთიერებების გამოყენება;
  • ალკოჰოლის ბოროტად გამოყენება;
  • ანტიკონვულსანტების მიღება.

ირინა რიაბოკონი ასევე აღნიშნავს, რომ თავის არეში დაბუჟების გამომწვევ მიზეზებს შეიძლება დაემატოს თავისა და კლასტერული ტკივილები (მკვეთრად გამოხატული ტკივილის სინდრომი), დაძაბულობის ტკივილი, შაკიკი, ენცეფალიტი, ლაიმის დაავადება, სარტყლისებური ლიქენი და სტომატოლოგიური ინფექციები.

„თავის დაბუჟება ზოგჯერ მხოლოდ ერთ მხარეს ვითარდება, ან შეიძლება მხოლოდ საფეთქელი ან კეფა დაზარალდეს. ჩვეულებრივ ასეთი მდგომარეობა მიგვანიშნებს ბელის დამბლაზე (სახის კუნთების დამბლა), ინფექციებზე ან მწვავე შაკიკზე“, — აღნიშნავს ნევროლოგი.

მისი თქმით, ხშირად თავის დაბუჟების შეგრძნება ძილის დროს ჩნდება და ეს არახელსაყრელ პოზაში ძილის შედეგი შეიძლება იყოს — თავისკენ სისხლის ნაკადის შეზღუდვის გამო.

„ასეთ შემთხვევაში შეეცადეთ დაიძინოთ ზურგზე ან გვერდზე, თავი და კისერი ისეთ მდგომარეობაში გქონდეთ, რომ დისკომფორტი არ შეგექმნათ. თუ გვერდზე წევხართ, შეეცადეთ ბალიში მუხლებს შორის ჩაიდოთ, ეს ზურგის გასწორებაში დაგეხმარებათ“, — გვირჩევს ირინა რიაბოკონი.

COVID-19-თ დაავადებულები ხშირად უნდა იწვნენ მუცელზე – ექიმი გირჩევთ>>

ამასთან ექიმი გვაფრთხილებს, რომ თავის დაბუჟების უყურადღებოდ დატოვება არავითარ შემთხვევაში არ შეიძლება, რადგან ამით შეიძლება ძვირფასი დრო დაიკარგოს და მკურნალობა უფრო ხანგრძლივი და რთული გამოდგეს.

434
თემები:
სასარგებლო რჩევები (445)
გულის შეტევა

ამოიცანით მოახლოებული ინფარქტი: ბრიტანელი პროფესორი ნიშნებს ასახელებს

368
(განახლებულია 19:35 14.01.2021)
მოახლოებული მიოკარდიუმის ინფარქტის ამოცნობა შესაძლებელია პირის ღრუსთან დაკავშირებული სიმპტომებით

თბილისი, 14 იანვარი — Sputnik. კბილებზე ნადები, რომელიც წებოვან ფირს ჰგავს, შეიძლება მიოკარდიუმის ინფარქტის ერთ-ერთი ნიშანი იყოს, განუცხადა ლანკასტერის უნივერსიტეტის პროფესორმა ადამ ტეილორმა გამოცემა Express-ს.

მან განმარტა, რომ ამ ტიპის ნადები შედგება ცხიმისგან, ქოლესტერინისგან, კალციუმისგან და სისხლში შემავალი სხვა ნივთიერებებისგან, რომლებიც არტერიებში გროვდება. ეს ცხიმოვანი ნალექი, რომელიც ათეროსკლეროზის სახელითაა ცნობილი, არის გულის დაავადებებისა და გულის შეტევების  მკვებავი გარემო და ასევე მათი მახასიათებელი.

გარდა ამისა, პროფესორი განმარტავს, რომ თუ ადამიანი პირში უჩვეულო მჟავე გემოს შეამჩნევს, ეს შეიძლება სიგნალიც კი იყოს.

გარდა ამისა, ღრძილების დაავადებამ ან პაროდონტიტმა შეიძლება გულის დაავადება გამოიწვიოს, რადგან პირის ღრუში არსებული „ცუდი“ ბაქტერიების გროვა შეიძლება სისხლნაკადში მოხვდეს.

„პირი სავსეა როგორც კარგი, ისე ცუდი ბაქტერიებით. ცუდი ბაქტერიები პირის ღრუდან შეიძლება სისხლში მოხვდეს და სისხლძარღვების ანთება გამოიწვიოს, რასაც შედეგად შეიძლება გულ-სისხლძარღვთა დაავადებები მოჰყვეს“, — ამბობს პროფესორი.

ადამ ტეილორის აღნიშნავს, რომ გულის შეტევის სიმპტომი ასევე შეიძლება იყოს ტკივილი ყბაში, რომელიც შეიძლება კბილის ძლიერ ტკივილად მივიჩნიოთ.

მანამდე კორეელმა სწავლულებმა დადგინეს, რომ კბილების რეგულარულ გამოხეხვასა და გულის ჯანმრთელობას შორის პირდაპირი კავშირი არსებობს. მათი კვლევის თანახმად, პირის ღრუს გამუდმებული მოვლა ამცირებს მოციმციმე არითმიისა და გულის უკმარისობის განვითარების რისკს.

368
თემები:
ექიმი გირჩევთ
ძალადობა ბავშვზე

ბავშვი სექსუალური ძალადობის მსხვერპლია, თუ... რამ უნდა გააფაციცოს მშობელი

205
(განახლებულია 22:03 14.01.2021)
ამ მასალის გაკეთება სამწუხარო რეალობამ გვიკარნახა: ბოლო პერიოდში საქართველოში ბავშვებსა და მოზარდებზე სექსუალური ძალადობის არაერთი ფაქტი მოხდა, რომელთაგან ზოგ შემთხვევაში მოძალადე თავად არასრულწლოვანის ახლობელი ან ნათესავი იყო.

თემა საკმაოდ რთულია და სათუთი. ამაზე საუბარი ყველას გვიჭირს, მაგრამ, როგორც ჩანს, აუცილებელია. ამიტომაც გადავწყვიტეთ მშობლებს ამერიკელი ტრენერების რჩევები შევთავაზოთ იმასთან დაკავშირებით, თუ როგორ დავიცვათ ბავშვები სექსუალური ძალადობისგან.

უპირველესად იცოდეთ, რომ:

„ცუდი ბიძია“ შესაძლოა ძალიან ახლობელი, კარგად ნაცნობი ადამიანი გამოდგეს. მოძალადეები ძირითადად ის უფროსები არიან, რომლებსაც ბავშვები იცნობენ და ენდობიან, ვისთანაც კარგი დამოკიდებულების გაფუჭებისა ეშინიათ, ვისაც მათი დაშინება და დაშანტაჟება შეუძლია.

რას უნდა მიაქციოთ ყურადღება:

უფროსის მხრიდან ზედმეტი ყურადღების გამოვლენას, მაგალითად, საჩუქრებს, თავსა და ზურგზე ხელის მოფერებით გადასმას.

როგორ უნდა მოიქცეს მშობელი?

  • ნუ დატოვებთ მცირეწლოვან შვილს მარტო სხვასთან დიდი ხნით. თუ მაინც მოგიწიათ ეს, შეეცადეთ მოულოდნელად დაბრუნდეთ ან შორიდან გააკონტროლოთ მათი ერთად ყოფნის პერიოდი;
  • ასწავლეთ მცირეწლოვან ბავშვს სხეულის ნაწილების სახელები. მაგალითად, იყო შემთხვევა, როდესაც 5 წლის გოგონამ საბავშვო ბაღში უცბად ტირილი დაიწყო და აღმზრდელს ჩუმად გაანდო, რომ „მამიკომ ისევ შეუჭამა ორცხობილა“. აღმზრდელმა ბავშვს დასამშვიდებლად სხვა ორცხობილა მისცა. მას წარმოდგენაც არ შეეძლო, რეალურად რა იგულისხმებოდა „ორცხობილის ჭამაში“;
  • აუხსენით შვილს პირადი სივრცის საზღვრები. საკუთარ მაგალითზე აჩვენეთ, რას ნიშნავს მიუღებელი, დაუშვებელი შეხება. პატარები ბევრად უკეთესად აღიქვამენ ვიზუალურ მაგალითებს. ამიტომ საცურაო კოსტიუმი ან თავად ჩაიცვით, ან მას ჩააცვით და უთხარით, რომ ადგილებზე, რომლებსაც „პლავკები“ ფარავს, ხელი არავის არ უნდა მოაკიდებინოს;
  • გაიცანით ყველა უფროსი, მათ შორის ბავშვებიც, ვისთანაც თქვენი შვილი მეგობრობს და ვისაც ენდობა;
  • აუხსენით, რა სახის საიდუმლო უნდა დაფაროს და რა - არა;
  • ჩამოაყალიბეთ შვილთან იმდენად მეგობრული ვითარება, რომ ყველაფერი გიამბოთ, არ დაგიმალოთ, თუ რაიმე უხერხულ ან გაუგებარ ვითარებაში მოხვდა;

რამ უნდა შეგაშფოთოთ ბავშვის ქცევაში:

ქცევისა და ემოციური მდგომარეობის უჩვეულო და მკვეთრმა ცვლილებამ. მაგალითად – დეპრესიამ, აუხსნელმა აგრესიამ, ღამეულმა კოშმარებმა, ცხოველებისადმი სისასტიკემ, საკუთარი თავისთვის ფიზიკური ტრავმების მიყენებამ, ცეცხლის წაკიდების მცდელობებმა, მოუსვენრობამ, ქრონიკულმა კუჭის ან თავის ტკივილებმა, სექსუალურმა ქცევებმა და ბავშვის ასაკისთვის შეუფერებელმა ლექსიკამ.

დააკვირდით, რას ხატავს ბავშვი!

იყო შემთხვევა, როდესაც სწორედ ნახატების მეშვეობით „გასცა“ 5 წლის გოგონამ საკუთარი მოძალადე აღმზრდელი – ეკლესიასთან არსებული საბავშვო ბაღის 56 წლის მასწავლებელი.

თუ ისე მოხდა, რომ, ვთქვათ, ოთახში შეხვედით და დაინახეთ, რომ თქვენი შვილი იქ რომელიღაც უფროსთან ერთადაა მარტო და ამის გამო გულის სიღრმეში უსიამო ეჭვი გაგიჩნდათ, ბავშვი კი არ გამოარიდოთ იქაურობას, არამედ მტკიცედ, მოურიდებლად და ტაქტიანად უთხარით უფროსს, რომ შვილს უფროს ადამიანებთან მარტო დარჩენის უფლებას არ აძლევთ!

ამით თქვენ სიგნალს გზავნით, რომ ყურადღებიანი მშობელი ბრძანდებით. თუ ადამიანი ნორმალურია, აუცილებლად გაგიგებთ. თუ თქვენი ეჭვი მცდარი აღმოჩნდა, მაინცდამაინც უხერხულად ნუ იგრძნობთ თავს. ჯობს შეცდეთ და მავანმა იწყინოს კიდეც თქვენი სიტყვები, ვიდრე თქვენს შვილს უბედურება შეემთხვეს და სიცოცხლის ბოლომდე მძიმედ ტრავმირებულმა იცხოვროს.

საქართველოში პედოფილების მიმართ სისხლის სამართლის პოლიტიკა მკაცრდება

აუცილებლად გაითვალისწინეთ:

ღმერთმა არ ქნას, მაგრამ თუ მსგავსი საშინელება მაინც მოხდა და ბავშვი შეეცდება გიამბოთ ყველაფერი, ეცადეთ, გააკონტროლოთ საკუთარი რეაქცია. მწვავედ რეაგირებამ შესაძლოა ბავშვი კიდევ მეტად დააფრთხოს და დააშინოს.

რაც მთავარზე უმთავრესია — ეს ისაა, რომ კარგად გაიცნოთ საკუთარი შვილი, ხშირად ესაუბროთ გულახდილად და აგრძნობინოთ, რომ ნებისმიერ შემთხვევაში მის მხარეს იქნებით.

205
თემები:
მშობლები და შვილები
თელასი

„თელასი": თბილისის რომელ უბნებს შეეზღუდება ელექტროენერგია 18 იანვარს

0
(განახლებულია 10:21 18.01.2021)
გეგმური სარემონტო სამუშაოების გამო დედაქალაქის სხვადასხვა უბნებში ელექტროენერგიის მიწოდება დროებით შეიზღუდება.

თბილისი, 18 იანვარი – Sputnik. სააქციო საზოგადოება „თელასი" იუწყება, რომ 18 იანვარს გეგმური სარემონტო სამუშაოების გამო დედაქალაქში ელექტროენერგიის მიწოდება შეიზღუდება.

ვაკის რაიონი

10:00 საათიდან 11:00 საათამდე შეზღუდვა შეეხება: აბაშიძის ქუჩის (ნაწილობრივ) მოსახლეობას.

12:00 საათიდან 13:00 საათამდე შეზღუდვა შეეხება: აბაშიძის ქუჩის (ნაწილობრივ) მოსახლეობას.

საბურთალოს რაიონი

10:00 საათიდან 18:00 საათამდე შეზღუდვა შეეხება: სოფელი დიღმის (ნაწილობრივ) მოსახლეობას.

კომპანია ბოდიშს უხდის მომხმარებლებს შექმნილი დისკომფორტის გამო. სამუშაოების დასრულების შემდეგ აბონენტებს ელექტრომომარაგება აღუდგება.

0
თემები:
თბილისი დღეს