ქალი გულის აპლიკაციით ხელში

ეს უნდა იცოდეთ: სახელდება ინფარქტის განსხვავებული ნიშნები ქალებში

158
(განახლებულია 11:23 19.12.2020)
ქალები იშვითად იძახებენ სასწრაფო დახმარებას მაშინაც კი, თუ გულის შეტევის სერიოზული სიმპტომები აქვთ, ამბობენ კარდილოგები

თბილისი, 19 დეკემბერი ― Sputnik. მამაკაცებისგან განსხვავებით, მოწიფულ ასაკში ქალებში ინფარქტი ხშირად არც ისე გამოხატულად და მკაფიოდ ყალიბდება, აცხადებენ ჯანდაცვის მსოფლიო ორგანიზაციის ექსპერტი, ექიმ-პათოფიზიოლოგი ალიონა პარეცკაია და ევროპის კარდილოგთა საზოგადოების წევრი, კარდიოლოგი ნატალი გავრილიუკი.

მათი თქმით, ბევრ ქვეყანაში, განსაკუთრებით ხანდაზმულ ასაკში, გულის დაავადებები სიკვდილის ძირითადი მიზეზია. ამ ტიპის დაავადებებით ქალები ხუთჯერ ხშირად იღუპებიან, ვიდრე ძუძუს კიბოთი. ამასთან ქალებში მწვავე ინფარქტების 20% უსიმპტომოდ მიმდინარეობს. განსაკუთრებული რისკის ქვეშ არიან დიაბეტით დაავადებული პაციენტები ― მათ, დიდი ალბათობით, ინფარქტი ატიპიური სიმპტომებით გამოუვლინდებათ, რომლებიც ფილტვების ან კუჭის პრობლემებს წააგავს.

კარდიოლოგების რჩევით, ადამიანმა ექიმს ინფარქტის პირველი ნიშნების გაჩენისთანავე უნდა მიმართოს, მაგრამ საქმეს ის ართულებს, რომ ქალების დაახლოებით მესამედი ამ დროს გულმკერდის არეში ტკივილს არ განიცდის. ქალი-პაციენტების 71% აცხადებს, რომ დაახლოებით ორი კვირიდან ერთი თვის განმავლობაში გრიპისმაგვარ სიმპტომებს განიცდიდა და მხოლოდ ამის შემდეგღა გრძნობდა უფრო ძლიერ დისკომფორტს ან ძლიერ ქოშინს.

სპეციალისტების თქმით, პაციენტის არაინფორმირებულობა ხშირად ხდება იმის მიზეზი, რომ ინფარქტის მსუბუქი სიმპტომების დროს ქალები ექიმებს არ მიმართავენ. სწორედ ამიტომ ალიონა პარეცკაია და ნატალი გავრილიუკი ასახელებენ რამდენიმე ნიშანს, რომლებმაც აუცილებლად უნდა დააყურადოს ქალი პაციენტები.

ინფარქტის ნიშნები ქალებში

ქალებში მიოკარდიუმის ინფარქტის სიმპტომები შეიძლება განსხვავდებოდეს ერთმანეთისგან, მაგრამ გულის შეტევის ყველაზე გავრცელებული ნიშნები ასეთია:

  • ტკივილი ან დისკომფორტი გულმკერდის არეში, რომელიც მოულოდნელად ჩნდება და არ ქრება, შეიძლება იგრძნობოდეს დაწოლა, შებოჭილობა ან შეკუმშვა;
  • ტკივილი შეიძლება გავრცელდეს მარცხენა ან მარჯვენა მკლავზე, ასევე კისერზე, ყბაზე, ზურგზე ან მუცელზე;
  • ქალს შეიძლება ჰქონდეს გულისრევის შეგრძნება, ოფლიანობა, თავბრუხვევა ან ქოშინი.

სხვა ნაკლებად გავრცელებული სიმპტომებია:

  • უეცარი შფოთვა, პანიკის შეტევის მსგავსი;
  • მუდმივი ხველა ან ხიხინი.

კარდილოგების განმარტებით, ინფარქტთან ასოცირდება რამდენიმე რისკ-ფაქტორი, რომელთა კონტროლი ან შეცვლა შეუძლებელია. მაგალითად:

სქესი ― მამაკაცები უფრო მეტად არიან მიდრეკილნი გულის დაავადებებისა და ინფარქტების მიმართ, ვიდრე ქალები;

ოჯახური ისტორია ― წინაპრებისგან მემკვიდრეობით მიღებული გულის გენეტიკური დაავადება, რომლის კონტროლი ან შეცვლა შეუძლებელია;

ასაკი ― 65 წელს გადაცილებული ადამიანები უფრო მეტი რისკის ქვეშ არიან.

შვედი კარდილოგების რჩევა მათ, ვისაც ინფარქტი აქვს გადატანილი>>

ალიონა პარეცკაია და ნატალი გავრილიუკი ურჩევენ ქალ-პაციენტებს, ყურადღება გაამახვილონ ჩამოთვლილ ნიშნებზე და გაითვალისწინონ ისინი. ექიმები ხაზს უსვამენ სამწუხარო ფაქტს, რომ ქალები, მამაკაცებისგან განსხვავებით, მიოკარდიუმის ინფარქტზე სერიოზული ნიშნების შემთხვევაშიც კი, დაუყოვნებლივ იშვიათად იძახებენ ხოლმე სასწრაფო დახმარებას. ამის გამო კი მკვეთრად მცირდება გადარჩენისა და სრული გამოჯანმრთელების შანსი.

158
გულის შეტევა

ამოიცანით მოახლოებული ინფარქტი: ბრიტანელი პროფესორი ნიშნებს ასახელებს

163
(განახლებულია 19:35 14.01.2021)
მოახლოებული მიოკარდიუმის ინფარქტის ამოცნობა შესაძლებელია პირის ღრუსთან დაკავშირებული სიმპტომებით

თბილისი, 14 იანვარი — Sputnik. კბილებზე ნადები, რომელიც წებოვან ფირს ჰგავს, შეიძლება მიოკარდიუმის ინფარქტის ერთ-ერთი ნიშანი იყოს, განუცხადა ლანკასტერის უნივერსიტეტის პროფესორმა ადამ ტეილორმა გამოცემა Express-ს.

მან განმარტა, რომ ამ ტიპის ნადები შედგება ცხიმისგან, ქოლესტერინისგან, კალციუმისგან და სისხლში შემავალი სხვა ნივთიერებებისგან, რომლებიც არტერიებში გროვდება. ეს ცხიმოვანი ნალექი, რომელიც ათეროსკლეროზის სახელითაა ცნობილი, არის გულის დაავადებებისა და გულის შეტევების  მკვებავი გარემო და ასევე მათი მახასიათებელი.

გარდა ამისა, პროფესორი განმარტავს, რომ თუ ადამიანი პირში უჩვეულო მჟავე გემოს შეამჩნევს, ეს შეიძლება სიგნალიც კი იყოს.

გარდა ამისა, ღრძილების დაავადებამ ან პაროდონტიტმა შეიძლება გულის დაავადება გამოიწვიოს, რადგან პირის ღრუში არსებული „ცუდი“ ბაქტერიების გროვა შეიძლება სისხლნაკადში მოხვდეს.

„პირი სავსეა როგორც კარგი, ისე ცუდი ბაქტერიებით. ცუდი ბაქტერიები პირის ღრუდან შეიძლება სისხლში მოხვდეს და სისხლძარღვების ანთება გამოიწვიოს, რასაც შედეგად შეიძლება გულ-სისხლძარღვთა დაავადებები მოჰყვეს“, — ამბობს პროფესორი.

ადამ ტეილორის აღნიშნავს, რომ გულის შეტევის სიმპტომი ასევე შეიძლება იყოს ტკივილი ყბაში, რომელიც შეიძლება კბილის ძლიერ ტკივილად მივიჩნიოთ.

მანამდე კორეელმა სწავლულებმა დადგინეს, რომ კბილების რეგულარულ გამოხეხვასა და გულის ჯანმრთელობას შორის პირდაპირი კავშირი არსებობს. მათი კვლევის თანახმად, პირის ღრუს გამუდმებული მოვლა ამცირებს მოციმციმე არითმიისა და გულის უკმარისობის განვითარების რისკს.

163
თემები:
ექიმი გირჩევთ
ძალადობა ბავშვზე

ბავშვი სექსუალური ძალადობის მსხვერპლია, თუ... რამ უნდა გააფაციცოს მშობელი

143
(განახლებულია 22:03 14.01.2021)
ამ მასალის გაკეთება სამწუხარო რეალობამ გვიკარნახა: ბოლო პერიოდში საქართველოში ბავშვებსა და მოზარდებზე სექსუალური ძალადობის არაერთი ფაქტი მოხდა, რომელთაგან ზოგ შემთხვევაში მოძალადე თავად არასრულწლოვანის ახლობელი ან ნათესავი იყო.

თემა საკმაოდ რთულია და სათუთი. ამაზე საუბარი ყველას გვიჭირს, მაგრამ, როგორც ჩანს, აუცილებელია. ამიტომაც გადავწყვიტეთ მშობლებს ამერიკელი ტრენერების რჩევები შევთავაზოთ იმასთან დაკავშირებით, თუ როგორ დავიცვათ ბავშვები სექსუალური ძალადობისგან.

უპირველესად იცოდეთ, რომ:

„ცუდი ბიძია“ შესაძლოა ძალიან ახლობელი, კარგად ნაცნობი ადამიანი გამოდგეს. მოძალადეები ძირითადად ის უფროსები არიან, რომლებსაც ბავშვები იცნობენ და ენდობიან, ვისთანაც კარგი დამოკიდებულების გაფუჭებისა ეშინიათ, ვისაც მათი დაშინება და დაშანტაჟება შეუძლია.

რას უნდა მიაქციოთ ყურადღება:

უფროსის მხრიდან ზედმეტი ყურადღების გამოვლენას, მაგალითად, საჩუქრებს, თავსა და ზურგზე ხელის მოფერებით გადასმას.

როგორ უნდა მოიქცეს მშობელი?

  • ნუ დატოვებთ მცირეწლოვან შვილს მარტო სხვასთან დიდი ხნით. თუ მაინც მოგიწიათ ეს, შეეცადეთ მოულოდნელად დაბრუნდეთ ან შორიდან გააკონტროლოთ მათი ერთად ყოფნის პერიოდი;
  • ასწავლეთ მცირეწლოვან ბავშვს სხეულის ნაწილების სახელები. მაგალითად, იყო შემთხვევა, როდესაც 5 წლის გოგონამ საბავშვო ბაღში უცბად ტირილი დაიწყო და აღმზრდელს ჩუმად გაანდო, რომ „მამიკომ ისევ შეუჭამა ორცხობილა“. აღმზრდელმა ბავშვს დასამშვიდებლად სხვა ორცხობილა მისცა. მას წარმოდგენაც არ შეეძლო, რეალურად რა იგულისხმებოდა „ორცხობილის ჭამაში“;
  • აუხსენით შვილს პირადი სივრცის საზღვრები. საკუთარ მაგალითზე აჩვენეთ, რას ნიშნავს მიუღებელი, დაუშვებელი შეხება. პატარები ბევრად უკეთესად აღიქვამენ ვიზუალურ მაგალითებს. ამიტომ საცურაო კოსტიუმი ან თავად ჩაიცვით, ან მას ჩააცვით და უთხარით, რომ ადგილებზე, რომლებსაც „პლავკები“ ფარავს, ხელი არავის არ უნდა მოაკიდებინოს;
  • გაიცანით ყველა უფროსი, მათ შორის ბავშვებიც, ვისთანაც თქვენი შვილი მეგობრობს და ვისაც ენდობა;
  • აუხსენით, რა სახის საიდუმლო უნდა დაფაროს და რა - არა;
  • ჩამოაყალიბეთ შვილთან იმდენად მეგობრული ვითარება, რომ ყველაფერი გიამბოთ, არ დაგიმალოთ, თუ რაიმე უხერხულ ან გაუგებარ ვითარებაში მოხვდა;

რამ უნდა შეგაშფოთოთ ბავშვის ქცევაში:

ქცევისა და ემოციური მდგომარეობის უჩვეულო და მკვეთრმა ცვლილებამ. მაგალითად – დეპრესიამ, აუხსნელმა აგრესიამ, ღამეულმა კოშმარებმა, ცხოველებისადმი სისასტიკემ, საკუთარი თავისთვის ფიზიკური ტრავმების მიყენებამ, ცეცხლის წაკიდების მცდელობებმა, მოუსვენრობამ, ქრონიკულმა კუჭის ან თავის ტკივილებმა, სექსუალურმა ქცევებმა და ბავშვის ასაკისთვის შეუფერებელმა ლექსიკამ.

დააკვირდით, რას ხატავს ბავშვი!

იყო შემთხვევა, როდესაც სწორედ ნახატების მეშვეობით „გასცა“ 5 წლის გოგონამ საკუთარი მოძალადე აღმზრდელი – ეკლესიასთან არსებული საბავშვო ბაღის 56 წლის მასწავლებელი.

თუ ისე მოხდა, რომ, ვთქვათ, ოთახში შეხვედით და დაინახეთ, რომ თქვენი შვილი იქ რომელიღაც უფროსთან ერთადაა მარტო და ამის გამო გულის სიღრმეში უსიამო ეჭვი გაგიჩნდათ, ბავშვი კი არ გამოარიდოთ იქაურობას, არამედ მტკიცედ, მოურიდებლად და ტაქტიანად უთხარით უფროსს, რომ შვილს უფროს ადამიანებთან მარტო დარჩენის უფლებას არ აძლევთ!

ამით თქვენ სიგნალს გზავნით, რომ ყურადღებიანი მშობელი ბრძანდებით. თუ ადამიანი ნორმალურია, აუცილებლად გაგიგებთ. თუ თქვენი ეჭვი მცდარი აღმოჩნდა, მაინცდამაინც უხერხულად ნუ იგრძნობთ თავს. ჯობს შეცდეთ და მავანმა იწყინოს კიდეც თქვენი სიტყვები, ვიდრე თქვენს შვილს უბედურება შეემთხვეს და სიცოცხლის ბოლომდე მძიმედ ტრავმირებულმა იცხოვროს.

საქართველოში პედოფილების მიმართ სისხლის სამართლის პოლიტიკა მკაცრდება

აუცილებლად გაითვალისწინეთ:

ღმერთმა არ ქნას, მაგრამ თუ მსგავსი საშინელება მაინც მოხდა და ბავშვი შეეცდება გიამბოთ ყველაფერი, ეცადეთ, გააკონტროლოთ საკუთარი რეაქცია. მწვავედ რეაგირებამ შესაძლოა ბავშვი კიდევ მეტად დააფრთხოს და დააშინოს.

რაც მთავარზე უმთავრესია — ეს ისაა, რომ კარგად გაიცნოთ საკუთარი შვილი, ხშირად ესაუბროთ გულახდილად და აგრძნობინოთ, რომ ნებისმიერ შემთხვევაში მის მხარეს იქნებით.

143
თემები:
მშობლები და შვილები
ვაქცინაცია კორონავირუსზე მოსკოვში

კორონავირუსის საწინააღმდეგო რუსული ვაქცინა პარაგვაიში დაარეგისტრირეს

0
სამხრეთ ამერიკაში კორონავირუსის საწინააღმდეგო პრეოპარატით უკვე იცრება არგენტინის, ბოლივიის, ვენესუელისა და ბრაზილიის მოსახლეობა

თბილისი, 15 იანვარი — Sputnik. პარაგვაის ჯანდაცვის სამინისტრომ COVID-19-ის საწინააღმდეგო ვაქცინა „სპუტნიკV" დაარეგისტრირა, იუწყება რუსეთის პირდაპირი ინვესტიციების ფონდი.

ვაქცინა დაარეგისტრირეს დაჩქარებული წესით, სახელმწიფოს ტერიტორიაზე დამატებითი კლინიკური კვლევების ჩატარების გარეშე. ანალოგიურად დაარეგისტრირეს პრეპარატი არგენტინაში, ბოლივიაში, ვენესუელაში, სერბეთში, ალჟირსა და პალესტინაში.

პარაგვაიში პრეპარატის მიწოდებას უზრუნველყოფენ ფონდის საერთაშორისო პარტნიორები ინდოეთში, ჩინეთში, სამხრეთ კორეაში და სხვა ქვეყნებში.

ფონდის გენერალური დირექტორის, კირილ დმიტრიევის თქმით, ლათინური ამერიკის მრავალი ქვეყანა დაინტერესებულია რუსული ვაქცინით. მას იმედი აქვს, რომ უახლოეს დროს „სპუტნიკV" რეგიონის სხვა ქვეყნებშიც გაივლის რეგისტრაციას.

რუსეთის ჯანდაცვის სამინისტრომ აგვისტოში დაარეგისტრირა მსოფლიოში პირველი COVID-19-ის საწინააღმდეგო ვაქცინა, რომელიც გამალეის ცენტრშია შექმნილი. ცენტრის დირექტორმა ალექსანდრ გინცბურგმა განაცხადა, რომ ვაქცინის უსაფრთხოება სრულად არის დამტკიცებული, ხოლო მისმა ეფექტურობამ 91,4% შეადგინა.

0