გლუკომეტრი დიაბეტის მაჩვენებლის გასაზომად

არ გამოგეპაროთ დიაბეტი: ექიმები რვა წინმსწრებ ნიშანს ასახელებენ

300
(განახლებულია 16:55 05.11.2020)
მეორე ტიპის შაქრიანი დიაბეტის მზაკვრობა იმაში მდგომარეობს, რომ ეს დაავადება ადამიანისთვის შეუმჩნევლად იწყება.

უფრო ზუსტად რომ ვთქვათ, მის განვითარებაზე არაერთი უმნიშვნელო სიმპტომი გვაფრთხილებს, მაგრამ მათ არსებობას ადამიანები ხშირად სრულიად განსხვავებულ მიზეზებს მიაწერენ.

ექიმები ასახელებენ დიაბეტის ჩამოყალიბების რამდენიმე ნიშანს, რომლებსაც აუცილებლად უნდა მიექცეს ყურადღება, რათა დაავადება არ გამოგვეპაროს.

უცნაური სუნი პირიდან

ლათინურად შაქრიან დიაბეტს Diabetes mellitus ეწოდება, რაც სიტყვა სიტყვით „თაფლის დიაბეტს“ ნიშნავს. ამ ნოზოლოგიით დაავადებული ადამიანის ამონასუნთქს ზოგჯერ ხილის სუნი აქვს, შარდს კი — მოტკბო გემო. ძველად ექიმები დიაბეტის დიაგნოზის დასასმელად სწორედ ამით ხელმძღვანელობდნენ — პაციენტის ამონასუნთქს ყნოსავდნენ და შარდს გემოს უსინჯავდნენ.

მწვავე შიმშილი და წონის მერყეობა

სისხლში შაქრის დონის მუდმივმა მერყეობამ შეიძლება შიმშილის მუდმივი შეგრძნება გამოიწვიოს. ტკბილეულობისადმი ლტოლვა განსაკუთრებით ხშირია დიაბეტიანებში, რაც წონის მატებას იწვევს. ამასთან ზოგჯერ ამ დაავადების გამო ადამიანები წონას კარგავენ, რადგან ინსულინს სისხლში უჯრედებთან გლუკოზა ვეღარ მიაქვს და ორგანიზმი კუნთოვანი ცილის გამოყენებას იწყებს „საწვავის“ სახით.

ხშირი შარდვა და მუდმივი წყურვილი

როდესაც სისხლში შაქრის დონე გარკვეულ დონეს აჭარბებს, თირკმელები ცდილობს რაც შეიძლება სწრაფად გამორეცხოს ის. ეს იწვევს ხშირ შარდვას, მათ შორის ღამითაც. და როცა სითხე ძალიან ინტენსიურად გამოიდევნება, ორგანიზმი მისი მარაგის შევსებას მოითხოვს. სწორედ ამიტომ როდესაც სისხლში შაქრის დონე მატულობს, ადამიანს მუდმივად სწყურია.  

კრუნჩხვები, ტკივილი და შებოჭილობა

დიაბეტის შედეგად დეჰიდრატაცია იწვევს ელექტროლიტების ბალანსის დარღვევას, როგორიცაა კალიუმის ან მაგნიუმის დონის შემცირება. ეს, თავის მხრივ, იწვევს კუნთების მტკივნეულ სპაზმებს. გარდა ამისა, დიაბეტი ზოგჯერ აზიანებს სახსრების მობილობას, რადგან ზედმეტი გლუკოზა შემაერთებელ ქსოვილში გროვდება. ამან შეიძლება ხელ-ფეხის სახსრების შებოჭილობის გრძნობა გააჩინოს.

დაღლილობა და გუნების ცვალებადობა

ორგანიზმის მუდმივმა მცდელობამ, შეავსოს გლუკოზის დეფიციტი, შეიძლება გამოიწვიოს მძიმე დაღლილობა. ამას ხშირად ემატება ღამით ხშირი გაღვიძება საპირფარეშოში შესასვლელად.

სილურჯეები და შეუხორცებელი ჭრილობები

სისხლში შაქრის ძალიან მაღალი დონე არტერიებსა და სხვა სისხლძარღვებს აზიანებს. ეს ეფექტი ვლინდება მიკროცირკულაციის დარღვევით, რაც იწვევს დაჟეჟილობისას ძალიან მუქი სილურჯეების გაჩენას ან ჭრილობებისა და ნაკაწრების ცუდად შეხორცებას.

ცივი თითები და მშრალი კანი

ეს შეიძლება სრულიად უვნებელი ინდივიდუალური თავისებურებაც იყოს, თუმცა დიაბეტსაც შეუძლია დაარღვიოს სისხლის პერიფერული ცირკულაცია, რის გამოც კიდურების თითების კანი ცივდება. დეჰიდრატაციასთან ერთად ესეც იწვევს კანის მომატებულ სიმშრალეს, განსაკუთრებით ტერფებზე.

უჩვეულო შეგრძნებები ფეხებში

II ტიპის შაქრიანი დიაბეტი იწვევს ნერვული სისტემის ცვლილებებს, რაც უპირველესად ფეხებში იგრძნობა. დაავადებაზე შეიძლება მიუთითებდეს: უჩვეულო ჩხვლეტა და მწვავე ტკივილი ფეხებში, დაბუჟება ან მგრძნობელობის სრული დაკარგვა კანის ზოგ ნაწილში.

დიაბეტის საწყის ეტაპზე სენსორული ნერვების დაზიანებამ შეიძლება ძალიან უცნაური შეგრძნებები გამოიწვიოს. მაგალითად, ადამიანს შეიძლება გაუჩნდეს შეგრძნება, რომ ფეხის თითები მუდმივად მაღლა ეწევა. დიაბეტთან დაკავშირებული ყველა უსიამოვნო შეგრძნება ფეხებში, როგორც წესი, საღამოობით ძლიერდება.

300
თემები:
სასარგებლო რჩევები (465)
ექოსკოპიაზე ორსულობა დადგინდა

რატომ ვერ ორსულდებიან ჯანმრთელი ქალები? - ექიმის განმარტება

149
(განახლებულია 16:25 24.02.2021)
ქალის უნაყოფობის მიზეზი შეიძლება იყოს არა მარტო ფიზიკური, არამედ ფსიქოლოგიური ჯანრთელობის პრობლემებიც

ანუ, თუ ქალს რეპროდუქციული ორგანოები წესრიგში აქვს, მაგრამ მაინც ვერ ოსრულდება, ესე იგი, პრობლემა „თავშია“, მიაჩნია რეპროდუქციული ჯანმრთელობის ცენტრის ფსიქოთერაპევტ ელეონორა კოზლოვას.

მისი თქმით, უნაყოფობის შემთხვევების ნახევარი რაიმე ტიპის ფიზიოლოგიური პრობლემებით აიხსნება, დანარჩენ შემთხვევებში კი მიზეზი ფსიქოსომატიკაში იმალება. ანუ, მარტივად რომ ვთქვათ, ფსიქოლოგიურ განწყობაში — თანაც როგორც ქალის, ისე მამაკაცისა.

„ფსიქოლოგიური უნაყოფობა — ეს არის მდგომარეობა, როდესაც ქალს, გაცნობიერებულად თუ გაუცნობიერებლად, არ სურს ჰყავდეს შვილი. ზოგჯერ ეს არის ორსულობისა თუ მშობიარობის შიში, კონკრეტული მამაკაცისგან შვილის გაჩენის სურვილის არქონა, ფეხმძიმობით გამოწვეული ფიზიკური ცვლილებებისადმი შიში და სხვა“, — ამბობს ექიმი.

გარდა ამისა, ფსიქოლოგიური უნაყოფობის მიზეზები ასევე შეიძლება იყოს: კარიერის წინა პლანზე წამოწევა, საკუთარი თავისადმი ზედმეტად მაღალი მოთხოვნები (პერფექციონიზმი), ბავშვის გაზრდა–აღზრდისთვის არასაკმარისად კომფორტული პირობები, ბავშვობის დროინდელი ტრავმები, საკუთარი სიამოვნებისთვის ცხოვრების სურვილი (განსაკუთრებით მაშინ, თუ ქალმა ცოტა ხნის წინ დააღწია თავი ზედმეტად მკაცრ მშობლებს).

როგორც ფსიქოლოგი ამბობს, ადამიანის ტვინს უზარმაზარი გავლენა აქვს სხვა ორგანოებზე. შესაბამისად, „თუ მან რაიმე არასწორად მიიჩნია, შეუძლია სხვა ორგანოებს გარკვეული ოერაციების შესრულება აუკრძალოს“.

„მაგალითად, თუ ქალს მომავალი ორსულობის მიმართ ეჭვები აწუხებს, ტვინს შეუძლია ისარგებლოს ამით და სიგნალი გაუგზავნოს რეპროდუქციულ ორგანოებს, არ დაუშვან ნაყოფის ჩასახვა, ან თავიდან მოიშორონ უკვე ჩასახული ნაყოფი“, — ამბობს რეპროდუქტოლოგ–ფსიქოთერაპევტი.

ფსიქოლოგიური უნაყოფობის რისკი განსაკუთრებით მაღალია მგრძნობიარე ნატურისა და ასევე იმ ქალებში, რომლებიც ყველაფერს „საკუთარ თავში იმარხავენ“. აქედან პირველების პრობლემა ისაა, რომ ზედმეტად აზვიადებენ არსებულ თუ მოსალოდნელ სიძნელეებს, ხოლო მეორეებისა ის, რომ ემოციებს გამოსავალს არ აძლევენ.

ამასთან ექიმი განმარტავს, რომ არ შეიძლება თავს ნაჩქარევად დავუსვათ უნაყოფობის დიაგნოზი. საქმე ისაა, რომ სტატისტიკის თანახმად, აქტიური სექსუალური ცხოვრების პირობებში ქალების 85% ერთი წლის განმავლობაში ორსულდება, ხოლო 95% — ორი წლის განმავლობაში.

როგორ დავადგინოთ ფსიქოლოგიური უნაყოფობა

ქალებში ფსიქოლოგიური უნაყოფობის პროვოცირება შეუძლია შემდეგ ძირითად მიზეზებს:

  • სისტემატური სტრესი სამსახურში;
  • თავის დადანაშაულება უნაყოფობაში, ან ფიქრი იმაზე, რომ ეს არის სასჯელი თქვენი ცხოვრების წესის გამო;
  • პარტნიორის მიმართ უნდობლობა და ფიქრი, რომ ის მზად არ არის ბავშვის დაბადებისთვის;
  • გაურკვევლობა, გჭირდებათ თუ არა ბავშვი სწორედ ახლა;
  • ზოგადი დეპრესიის ნიშნები;
  • გადაუჭრელი ფინანსური თუ საყოფაცხოვრებო პრობლემები, რაც ბავშვის დაბადებას უკავშირდება;
  • ბოლო პერიოდში განცდილი სერიოზული ფსიქოლოგიური რყევა (ახლობლის დაკარგვა, ხანძარი, დიდი ფინანსური კრახი);
  • გარშემო მყოფების მხრიდან გამუდმებული პრესინგი, ანუ გამუდმებული შეკითხვები ორსულობაზე.

როგორც ელენა კოზლოვა ამბობს, პირველი, რაც ფსიქოლოგიური უნაყოფობის შემთხვევაში უნდა გააკეთოს ქალმა, ეს ისაა, რომ ხმამაღლა წარმოთქვას ყველა თავისი პრობლემა და აზრი. მეორე ნაბიჯი — ეს პარტნიორის გამოკითხვაა, რა აწუხებს და აშფოთება მას.

მამაკაცები, როგორც წესი, ნაკლებად საუბრობენ ამ თემაზე, მაგრამ გამორიცხული არ არის, წყვილის უნაყოფობის მიზეზი სწორედ მამაკაცის შინაგანი შფოთვები იყოს.

ფსიქოლოგიური უნაყოფობის მკურნალობა

პირველ რიგში, დარწმუნდით, რომ თქვენცა და თქვენს პარტნიორსაც ფიზიკური ჯანმრთელობის მხრივ ყველაფერი წესრიგში გაქვთ;

შემდეგ თავიდან მოიშოროთ ყველანაირი ღელვა და ფიქრი ორსულობაზე — უბრალოდ მოდუნდით. რაც ნაკლებს იფიქრებთ იმაზე, რომ თქვენი მიზანი ბავშვის გაჩენაა, მით უფრო მალე გამოგივათ დაფეხმძიმება;

თუ სამსახურში სტრესს განიცდით, აიღეთ შვებულება და სადმე შორს წადით მეუღლესთან ერთად. ან რაიმე ახალი „პროექტი“ წამოიწყეთ, მაგალითად, დაიწყეთ რომელიმე უცხო ენის შესწავლა.

მთავარი ისაა, რომ ორსულობაზე ფიქრები თავში არ შეუშვათ!
149
თემები:
ექიმი გირჩევთ
სათვალე

მხედველობის აღდგენის იაპონური მეთოდი: სამწუთიანი სახალისო სავარჯიშოები

131
(განახლებულია 14:17 24.02.2021)
იაპონელი ოფთალმოლოგი ირწმუნება, რომ ეს „ერთადერთი მეთოდია მსოფლიოში, რომლის ეფექტურობაც მეცნიერულადაა დადასტურებული“

თბილისი, 24 თებერვალი — Sputnik. მხედველობის გაუმჯობესება უბრალო ვარჯიშითაა შესაძლებელი, რომელიც დღეში სულ ორიოდე წუთს წაგართმევთ, აცხადებს იაპონელი ოფთალმოლოგი რუი ჰირამაცუ.

მისი თქმით, თანამედროვე მედიცინას აქვს შესაძლებლობა, რამდენიმე წუთიანი ოპერაციის შედეგად გამოგისწოროთ მხედელობა, თუმცა მხედველობის ორგანოში გარე ჩარევას სჯობს მხოლოდ უკიდურეს შემთხვევაში მივმართოთ.

როგორც სპეციალისტი განმარტავს, თვალი საკმაოდ რთული და სრულყოფილი მექანიზმია, რომელსაც შეუძლია თვითაღდგენა, თუ საამისოდ შესაბამის ძალისხმევებს მივმართავთ.

ამისათვის რუი ჰირამაცუ საკმაოდ მარტივ და შეიძლება ითქვას, სახალისო ვარჯიშს გვთავაზობს. საუბარია გაბორის ვარჯიშების შესრულებაზე, რაც ორ სურათზე განსხვავებების პოვნას გულისხმობს.

ოფთალმოლოგი ირწმუნება, რომ თუ ამ ვარჯიშს დღის ნებისმიერ მონაკვეთში სამ წუთს მაინც დაუთმობთ, უკეთესობისკენ ცვლილებებს უკვე ორი კვირის შემდეგ იგრძნობთ, ხოლო 28 დღის შემდეგ აღმოაჩენთ, რომ მხედველობა შესამჩნევად გაგიუმჯობესდათ.

ჰირამაცუ ირწმუნება, რომ ეს ვარჯიშები ტვინის სტიმულაციით მხედველობის აღდგენას ემსახურება და „ერთადერთი მეთოდია მსოფლიოში, რომლის ეფექტურობაც მეცნიერულადაა დადასტურებული“.

გარდა ამისა, ოფთალმოლოგი მათ, ვინც დიდ დროს ატარებს კომპიუტერებთან, ურჩევს გააკეთონ „ვარჯიშები პერსპექტივაზე“. ესეც ძალიან მარტივი ვარჯიშია და მზერის შორიდან ახლოს რამდენჯერმე გადმოტანას გულისხმობს თითო ჯერზე ათჯერ. ამასთან, „შორი“ — ეს ორ მეტრზე მეტი მანძილია, ხოლო „ახლოს“ — დაახლოებით 30 სმ. ამ ვარჯიშის გაკეთება იმდენჯერ შეიძლება, რამდენჯერაც მოისურვებთ.

კიდევ ერთი რეკომენდაცია, რომელსაც იაპონელი სპეციალისტი თვალების გადაღლილობის მოსახსნელად გასცემს — ეს თერმოთერაპია, ანუ თვალების „დათბილვაა“. არსებობს ამის ორი გზა:

  • თერმოთერაპია თბილი პირსახოცით — მოათავსეთ ნოტიო პირსახოცი მიკროტალღურ ღუმელში 4 წამით, შემდეგ დაიფინეთ თვალებზე და დაელოდეთ, სანამ პირსახოცი არ გაცივდება;

რედაქციის შენიშვნა: თუ მიკროტალღური ღუმელი არ გაქვთ, სავარაუდოდ ამისთვის პირდაპირ თბილ წყალში დასველებული და კარგად გაწურული ტილოც გამოდგება.

  • თერმოთერაპია ხელებით — გაუსვით ხელები ერთმანეთს ათჯერ. როცა იგრძნობთ, რომ, ხელები გაგიხურდათ, დაილაგეთ დახუჭულ თვალებზე და ოდნავ დააჭირეთ ქუთუთოებს. გეჭიროთ ნახევარი წუთი.

დოქტორი ჰირამაცუ მხედველობის გასაუმჯობესებლად  ასევე გვირჩევს რაციონში ისპანახის შეტანას, რომელიც მდიდარია ლუთეინით. ეს პიგმენტი შესანიშნავი ანტიოქსიდანტია, რომელიც იოლად გროვდება თვალებში. ამიტომ, თუ ისპანახს ხშირად მიირთმევთ, ამით თავიდან აიცილებთ თვალებში ყვითელი ლაქების გაჩენასა და კატარაქტას.

131
თემები:
ექიმი გირჩევთ

თოვლი და ლიპყინული თბილისის გზებზე: მძღოლებს სიფრთხილე მართებთ - ვიდეო

0
თბილისის ქუჩები თოვლით დაიფარა, დაბალი ტემპერატურის გამო კი გზები მოიყინა. იხილეთ Sputnik-საქართველოს ვიდეოში, როგორ გამოიყურებოდა დედაქალაქის ერთ-ერთი ქუჩა ღამით

მძღოლებს ასეთ ამინდში მაქსიმალური სიფრთხილე მართებთ. ლიპყინული და თოვლი გამოცდილი მძღოლებისთვისაც კი საშიშია, საქართველოში კი ზამთრის საბურავებს დიდი ნაწილი არ იყენებს და მთელი წლის განმავლობაში ზაფხულის საბურავებით გადაადგილდება.

ამიტომ ოთხშაბათს საღამოს ქალაქის სხვადასხვა წერტილებში უამრავი ავარია მოხდა. ღამით თბილისში -6 გრადუსი იქნება, ხოლო დღისით 0 - +1, მოსალოდნელია თოვაც. კვირის ბოლოს კი კარგი ამინდია მოსალოდნელი.

 

0