ჯანსაღი სხეული

გაკაჟდით სწორად და უვნებლად: უფასო მეთოდი ძლიერი იმუნიტეტისთვის

281
(განახლებულია 16:49 10.10.2020)
გაკაჟება უფასო საშუალებაა არა მარტო იმუნური სისტემის გასაძლიერებლად, არამედ ბევრი სხვა პრობლემის მოსაგვარებლადაც, თუმცა არსებობს შემთხვევები, როცა ეს დაუშვებელია

დაბალი ტემპერატურა ორგანიზმს ზემო სასუნთქი გზების რესპირატორული ინფექციების  მიმართ ნაკლებად მგრძნობიარეს ხდის - ნაკლებად გაიყინებით და უფრო იშვიათად გაცივდებით.

თერაპევტი ანა ეფიმოვა გირჩევთ, თუ როგორ უნდა დაიწყოთ გაკაჟება ისე, რომ ზიანი არ მოგადგეთ.

რატომ არის გაკაჟება სასარგებლო ორგანიზმისთვის

გაკაჟება აჩქარებს მეტაბოლიზმს ― ეს იმას ნიშნავს, რომ თუ წონაში იკლებთ, შედეგი ბევრად უფრო სწრაფი იქნება. ტემპერატურის ცვლილებები აუმჯობესებს სისხლის მიმოქცევას. ამასთან, ბოლოს მოუღებთ უძილობას, რადგან ცენტრალური ნერვული სისტემის ტონუსი უფრო მაღალი იქნება. 

ვისთვის არის დაუშვებელი გაკაჟება

გაკაჟების პროცედურები დაუშვებელია მათთვის, ვინც: გულ-სისხლძარღვთა დაავადებებით ავადმყოფობს (განსაკუთრებით, თუ გულის შეტევა ახლო წარსულში გადაიტანა), ბოლო პერიოდში ინსულტი გადაიტანა, აქვს მწვავე რესპირატორული ვირუსული ინფექცია ან არის გაციებული, თირკმლის პრობლემები, ცისტიტი ან ვენების ვარიკოზული გაფართოება.

სხვა შემთხვევებში კი შეგიძლიათ დაიწყოთ სხეულის გაკაჟება, თუმცა მანამდე ექიმთან კონსულტაცია მაინც უნდა გაიაროთ.

ვკაჟდებით თანდათანობით

სისხლძარღვები და უჯრედები უნდა მოერგონ ტემპერატურის ცვლილებას. ამიტომ თავიდან პროცედურები უნდა იყოს ხანმოკლე, მარტივი, არასტრესული. იდეალურია 15 წამიანი წყლის პროცედურებით დაწყება.

გააკონტროლეთ ორგანიზმის რეაქცია

თუ გაკაჟების პროცედურების შედეგად ძილი და მადა გაგიუმჯობესდათ, გაგეზარდათ შრომისუნარიანობა, ესე იგი, სწორად კაჟდებით. ეს ის შედეგებია, რასაც მაშინვე იგრძნობთ.

გაციების სიმპტომები და გაღიზიანებადობა ნიშნავს, რომ რაღაცას არასწორად აკეთებთ. შეაჩერეთ პროცედურები და მიმართეთ ექიმს.

რეგულარულად და სისტემატურად

თუ ერთი კვირის შემდეგ გაკაჟების პროცედურებს შეაჩერებთ, ეფექტს ვერ მიიღებთ.  ისევე, როგორც სპორტში, თუმცა იმ განსხვავებით, რომ გაკაჟება კუნთებზე არ მოქმედებს.

ძირითადი და პოპულარული პროცედურები 

ჰაერის აბაზანები

როგორ გავკაჟდეთ სწორად? დაიწყეთ ჰაერით. ხშირად გაანიავეთ ბინა, მაგრამ ნუ შექმნით ორპირს. ზაფხულში ყველაფერი მარტივია ― საკმარისია დღეში თუნდაც ორი საათის განმავლობაში სუფთა ჰაერზე ყოფნა: მთავარია არ ჩაიცვათ ბევრი ტანსაცმელი, რომ არ გაოფლიანდეთ.

ზამთარში გაკაჟება დაიწყეთ კარგად განიავებული ოთახით. ტემპერატურა დაიყვანეთ 15-16 გრადუსამდე, შემდეგ გაიხადეთ ტანსაცმელი და შეეცადეთ, ათი წუთით გარჩერდეთ ოთახში. თუ კომფორტულად იგრძნობთ თავს, შეგიძლიათ დროთა განმავლობაში ჰაერით გაკაჟება 20 წუთამდე გაზარდოთ.

შხაპი

როგორ მივიღოთ სწორად ცივი წყლის შხაპი? თავდაპირველად წყლის ტემპერატურა ორი გრადუსით შეამცირეთ. შემდეგ რაიმე ჭურჭლის გამოყენებით ნელ-ნელა გადაისხით ჯერ ტერფებსა და წვივებზე, მერე ― ბარძაყებზე და მხოლოდ ამის შემდეგ ― ზურგზე.

ერთი კვირის შემდეგ წყლის ტემპერატურა კიდევ ორი გრადუსით შეგიძლიათ შეამციროთ და ასე განაგრძოთ.

არ ღირს, წყლით გაკაჟება მაშინვე ყინულოვანი შხაპის მიღებით დაიწყოთ ― ასე უეჭველად გაცივდებით და ვერანაირ სარგებელს ვერ მიიღებთ.  

კონტრასტული შხაპი

ჯერ უნდა გახურდეთ: დადექით თბილი წყლის ქვეშ დაახლოებით ხუთი წუთის განმავლობაში, შემდეგ 15 წამის განმავლობაში გრილი წყალი ივლეთ, მერე 15 წამით ისევ თბილი წყალი.

პროცედურა სამჯერ ჩაიტარეთ და დაასრულეთ ცივი წყლის გადავლებით. თითოეული სეანსის ხანგრძლივობა თანდათანობით მიიყვანეთ 40-60 წამამდე.

დაზელვა

თუ ცივი წყლით ან კონტრასტული შხაპით დაწყება ძალიან გიჭირთ, შეგიძლიათ დაზელვით დაიწყოთ.

დაასველეთ პირსახოცი წყლით და სხეული ხუთი წუთის განმავლობაში იზილეთ: დაიწყეთ ტერფებით და თანდათან ადით ზემოთ. შეგიძლიათ პროცედურა კონტრასტული გახადოთ, ანუ პირსახოცი მორიგეობით დაასველოთ ხან ცივ და ხან ცხელ წყალში.

სიცივეში ფეხშიშველი სიარული

ეს არის ერთ-ერთი ყველაზე ეგზოტიკური მეთოდი. მიიჩნევა, რომ ამით ადამიანებს გრიპისა და გაციების მიმართ ძლიერი იმუნიტეტი უვითარდებათ.

მართალია, ეს მეთოდი ყინულჭრილში ბანაობასთან ახლოსაც ვერ მოვა, მაგრამ მაინც არანაკლებ ექვსთვიანი მომზადება უნდა უძღოდეს წინ.

ამისთვის უნდა აიღოთ ორი თასი, ჩაასხათ ერთში ცივი, მეორეში კი თბილი წყალი. მერე კი მორიგეობით ჩაალაგოთ ფეხები ხან ერთ და ხან მეორე თასში 15-15 წამით. და ასე დაახლოებით ექვსი თვე.

ამის შემდეგ უკვე შეგიძლიათ გადახვიდეთ ცივ ქუჩაში ფეხშიშველ სიარულზე. ეს პროცედურა ერთი წუთიდან უნდა დაიწყოთ და საბოლოოდ ეს დრო არ უნდა აღემატებოდეს ხუთ წუთს.

ანა ეფიმოვას თქმით, მნიშვნელობა არ აქვს, გაკაჟების რომელ საშუალებას აირჩევთ, მთავარია გახსოვდეთ, რომ:

  • დაუშვებელია დღეში ორ პროცედურაზე მეტის ჩატარება;
  • მათ შორის მინიმუმ რვა საათიანი ინტერვალი უნდა დაიცვათ;
  • წყლის (!) ყველა პროცედურა უნდა ჩატარდეს დაძინებამდე ორი საათით ადრე მაინც, ვინაიდან ეს ნერვულ სისტემას აღაგზნებს.  
281
ჯანსაღი ხილი და ბოსტნეული

მეტს სარგებელი არ მოაქვს: დადგინდა ხილ-ბოსტნეულის ყოველდღიური ეფექტური ულუფა

23
(განახლებულია 16:06 01.03.2021)
მასშტაბურმა ანალიზმა, რა დროსაც 2 000 000 ადამიანის მონაცემები შეისწავლეს, აჩვენა, რომ ამაზე მეტი დოზა არანაირ დამატებით სარგებელს არ იძლევა ჯანმრთელობისთვის

თბილისი, 1 მარტი — Sputnik. ხანგრძლივი და ჯანმრთელი ცხოვრებისთვის ადამიანმა დღეში ორი ულუფა ხილი და სამი ულუფა ბოსტნეული უნდა მიირთვას, აცხადებენ ამერიკელი მეცნიერები, რომლეთა კვლევაც ამერიკის კარდიოლოგიური ასოციაცია Circulation–ის ჟურნალშია გამოქვეყნებული.

როგორც ირკვევა, კვლევის ავტორებმა 1984–2014 წლებში ჩატარებული ორი კოჰორტული კვლევის მონაცემები გაანალიზეს, რომლებშიც 100 ათასი ადამიანი მონაწილეობდა. გარდა ამისა, მათ ასევე შეისწავლეს 29 ქვეყნიდან მიღებული მონაცემები ხილისა და ბოსტნეულის მოხმარებისა და ასევე სიკვდილიანობის შესახებ. საერთო ჯამში, კვლევაში მონაწილე ადამიანების რაოდენობამ ორ მილიონს გადააჭარბა.

ანალიზმა აჩვენა, რომ ყოველდღიურად ხილ–ბოსტნეულის ხუთი ულუფის (ორი ულუფა ხილი და სამი ულუფა ბოსტნეული) მიღება მნიშვნელოვნად ამცირებს სიკვდილიანობის რისკს. ამასთან გაირკვა ისიც, რომ ამ დოზის გაზრდას არანაირი დამატებითი სარგებელი არ მოჰქონდა.

„ეს კომბინაცია დიდ სარგებელს იძლევა სერიოზული ქრონიკული დაავადებების პროფილაქტიკის თვალსაზრისით“, — აცხადებს კვლევის ხელმძღვანელი, ჰარვადრის უნივერსიტეტის მედიცინის პროფესორი დონ ვანა.

ამასთან მეცნიერები აღნიშნავენ, რომ ყველა ხილი და ბოსტნეული თანაბრად სასარგებლო არ არის. მაგალითად, სახამებლის შემცველი ბოსტნეული, როგორებიცაა კარტოფილი, ბარდა და სიმინდი, ასევე ხილის წვენები არ ამცირებს ქრონიკული დაავადებებითა თუ სხვა მიზეზებით გამოწვეულ სიკვდილიანობის რისკს. ამ მხრივ ყველაზე დიდი სარგებელი მოაქვს მწვანე ფოთლოვან ბოსტნეულს: ისპანახს, სალათსა და კომბოსტოს, და ასევე ბეტა–კაროტინებისა და C ვიტამინის შემცველ სხვა ხილსა და ბოსტნეულს: ციტრუსებს, კენკროვნებსა და სტაფილოს.

23
თემები:
მსოფლიო და მეცნიერება
შოკოლადის კანფეტები

რატომ უნდა მიირთვათ შოკოლადი კვირაში ერთხელ მაინც: ამერიკელი მეცნიერების განმარტება

75
(განახლებულია 17:08 01.03.2021)
დადგენილია, რომ ეს ტკბილეული ხელს უწყობს ტვინისკენ სისხლის ნაკადის ზრდასა და ჟანგბადით გაჯერებას, რითიც ნეიროდეგენერაციული დაავადებების თავიდან აცილებაში ეხმარება.

თბილისი, 1 მარტი — Sputnik. შოკოლადს შეუძლია დადებითი გავლენა მოახდინოს ადამიანის გულ-სისხლძარღვთა სისტემაზე, ამგვარ დასკვნამდე მივიდნენ აშშ-ის ბეილორის სამედიცინო სკოლის მეცნიერები, რომელთა კვლევაც გამოქვეყნებულია ჟურნალში European Journal of Preventive Cardiology.

გავრცელებული ინფორმაციით, სპეციალისტებმა 300 ათასი პაციენტის მონაცემები გააანალიზეს და შოკოლადის მიღებასა და კორონარულ დაავადებებს შორის კავშირი დაადგინეს.

გაირკვა, რომ მათ, ვინც შოკოლადს კვირაში ერთხელ მაინც მიირთმევს, გულის იშემიური დაავადებების რისკი 8%-ით ნაკლები აქვთ სხვებთან შედარებით.

მკვლევარები შოკოლადის სასარგებლო თვისებებს მასში შემავალი ნივთიერებებით — სტეარნის მჟავით, ფლავონოიდებითა და პოლიფენოლებით ხსნიან. ეს არის ელემენტები, რომლებიც ამაგრებს გულს და ხელს უწყობს ორგანიზმში „კარგი“ ქოლესტერინის დონის ზრდას.

ამასთან მეცნიერები ხაზს უსვამენ, რომ შოკოლადი მცირე ოდენობებით უნდა მიირთვათ, რათა მისმა ჭარბმა მოხმარებამ გაცხიმოვნება და მეორე ტიპის დიაბეტი არ გამოიწვიოს.

75
თემები:
მსოფლიო და მეცნიერება
კესარია აბრამიძე

„ბევრი შვილი უნდა გაგეჩინა...“ - კესარია აბრამიძემ შეუდარებელი და გამოაჩინა - ვიდეო

0
(განახლებულია 15:15 01.03.2021)
კესარია აბრამიძეს ულამაზესი ოჯახის წევრები ჰყავს. კესარიას დედა შეუდარებლად გამოიყურება და დიდ ყურადღებას იქცევს. ახლა კი მისი და ანაბელიც აქტუალური გახდა

ექსპერიმენტების მოყვარული კესარია აბრამიძე ოჯახის წევრების გარეგნობაზე თავად ზრუნავს. ცნობილი გახდა, რომ პოპულარულ ფოტომოდელს ვიზაჟის საკუთარი ქსელის გახსნა სურს, სადაც მაკიაჟის ხრიკებს თავად ასწავლის.

აშკარაა, რომ კესარიამ ამ პროფესიაში საკუთარი თავი მარტივად აღმოაჩინა. როგორც ჩანს, ის ცნობილ ქართველ ვარსკვლავებსაც ალამაზებს. მათ შორის მისი ყურადღების ობიექტი ლელა წურწუმია ხშირად ხდება.

კესარია აბრამიძე განსაკუთრებული დამოკიდებულებით დედის მიმართ გამოირჩევა. მისი სოციალური ქსელი მშვენიერი ქალბატონის სურათებით არის სავსე, თუმცა ბოლო პერიოდში კესარია დის სახელს ამხელს და შეუდარებელ სურათებს აქვეყნებს. გოგონასა და ტრანსგენდერ ქალს შორის დიდი მსგავსებაა.

ანაბელი კესარიას უმცროსი დაა. გოგონა ძალიან მიმზიდველად გამოიყურება. მას მოფერებით ანუკის ეძახიან. ცოტა ხნის წინ კესარიამ „ინსტაგრამის“ „სთორიზე“ დის ვიდეო გამოაქვეყნა. გოგონა შეუდარებლად გამოიყურება. „ბევრი შვილი უნდა გაგეჩინა ასეთი სილამაზის პატრონს“, - უწერენ კესარიას დედას სოციალური ქსელის მომხმარებლები.

0
თემები:
სელებრითების ცხოვრება