თვითმფრინავის სალონი

მოგზაურობა თვითმფრინავით: სანდო და არასანდო რეკომენდაციები

450
(განახლებულია 20:02 18.06.2020)
ირკვევა, რომ არსებობს ფრენის უსიამოვნებებისგან დაცვის პოპულარული „რეცეპტი“: გაფრენის წინ კარგად დანაყრება, ალკოჰოლის მიღება, ბანანის ჭამა და კევის ღეჭვა. გთავაზობთ მიმოხილვას, რომელი მოსაზრება არ შეესაბამება სიმართლეს.

თბილისი, 18 ივნისი — Sputnik. თვითმფრინავით მოგზაურობის დროს მგზავრებმა უნდა გაითვალისწინონ მხოლოდ პროფესიონალების მიერ გაცემული რეკომენდაციები, რომლებიც მათ თავიდან ააცილებს უსიამოვნებებს ფრენისას, აცხადებენ სპეციალისტები. 

მათი თქმით, არსებობს რამდენიმე ძალიან გავრცელებული „ხალხური“ რჩევა, რომლებიც საჰაერო მოგზაურობას შეეხება და რომელთაგან ყველა ნამდვილად არ არის სანდო.

ფრენის უსიამოვნებებისგან დაცვის პოპულარული „რეცეპტი“ მოკლედ ასე გამოიყურება: გაფრენის წინ კარგად დანაყრება, ალკოჰოლის მიღება, ბანანის ჭამა და კევის ღეჭვა.

ვნახოთ, რომელი მოსაზრება არ შეესაბამება სიმართლეს, რომელი უნდა გაითვალისწინოთ, როცა სადმე გაფრენას აპირებთ და რომელი – არა.

ფრენის წინ დანაყრება — მიიჩნევა, რომ დიდ სიმაღლეზე საჭმლის მონელების პროცესი გაძნელებულია. ეს მოსაზრება სიმართლეს შეესაბამება. სიმაღლეზე სხეულის მიერ წყლისა და საკვები ნივთიერებების შეწოვა მცირდება, ცხიმების ათვისება ძნელდება და ადამიანებს ხშირად მადა უქვეითდებათ. მაგრამ ეს შეეხება მხოლოდ მთებში ან საჰაერო ბურთით მოგზაურობას — მაქსიმუმ 5 კმ სიმაღლეზე, და არა თვითმფრინავით მგზავრობას, როდესაც დედამიწიდან 10 კილომეტრის სიმაღლეზე იმყოფებით საკუთარი წნევის, ჟანგბადისა და ტენიანობის მქონე ჩაკეტილ სივრცეში.

ასე რომ, ფრენის წინ გემრიელ საკვებზე უარის თქმა, მაგალითად, ჰამბურგერზე, ნამდვილად არ არის საჭირო. ოღონდ უნდა გაითვალისწინოთ, რომ საკვები არ უნდა შედგებოდეს უჯრედისით მდიდარი პროდუქტებისგან.

საქმე ისაა, რომ აფრენის დროს თვითმფრინავში წნევა ეცემა, რაც ჰაერის გაფართოებას იწვევს დაახლოებით 30%-ით (სწორედ ამ მიზეზით „იხშობა“ ყურები). ეს პრობლება არ არის იმ შემთხვევაში, თუ ჰაერს გაფართოებისა და თავისუფლად გასვლის საშუალება აქვს. მაგრამ თუ ასეთი შესაძლებლობა არ არსებობს, იწყება მუცლის უსიამოვნო შებერილობა.

სწორედ ამიტომ ფრენის წინ უჯრედისით მდიდარი ხილისა და ბოსტნეულის მიღება, რომლებიც ხელს უწყობს გაზების წარმოქმნას, სასურველი არ არის. საუბარია პროდუქტების ფართო სპექტრზე: დაწყებული ბარდითა და ბროკოლით, დასრულებული ბანანითა თუ სიმინდით.  

ამასთან, საჰაერო მოგზაურობის წინ არასდროს და არავითარ შემთხვევაში არ უნდა მიირთვათ უცხო საკვები შეუმოწმებელ ადგილებში, როგორც უნდა გშიოდეთ. თავი აარიდეთ ნებისმიერ მზა კერძს, რომლებიც შეიძლება არასწორად ინახებოდეს. თუნდაც ეს „გემრიელი გარეგნობის“ ნამცხვრები იყოს. ჯობს მშიერი მშვიდად იჯდეთ თვითმფრინავის სავარძელში, ვიდრე დანაყრებული, ოღონდ უკვე არა სავარძელში, არამედ საპირფარეშოში.

საღეჭი რეზინი — ერთი მხრივ, კევის ღეჭვისას ნერწყვის უხვი ყლაპვა ნამდვილად უწყობს ხელს „დახშული“ ყურების შეგრძნებისგან გათავისუფლებას. მაგრამ, მეორე მხრივ, ამ დროს ადამიანი ყლაპავს ჭარბი რაოდენობის ჰაერსაც. არადა, როგორც უკვე ვთქვით, თვითმფრინავის აფრენისას წნევა ეცემა და მუცელში ჰაერი ფართოვდება — ანუ, კევის ღეჭვა შესაძლოა ირიბად, მაგრამ მაინც იწვევს მუცლის შებერილობას სიმაღლეზე — და ფრენის სიამოვნებაც ქრება.

გარდა ამისა, საღეჭ რეზინში თითქმის ყოველთვის უმატებენ სორბიტოლს, რომელსაც ასევე შეუძლია გაზების წარმოქმნა.

სპირტიანი სასმელი — ალკოჰოლი გაუწყლოებას, დეჰიდრატაციას იწვევს. ფრენის დროს კი ეს ეფექტი კიდევ მეტად ძლიერდება, რადგან სალონში ყოველთვის ძალიან მშრალი ჰაერია.

ამასთან, ვინც ალკოჰოლს იმ მიზეზით მიირთმევს, რომ ფრენის შიში დათრგუნოს, უნდა იცოდეს, რომ ხშირ შემთხვევაში ალკოჰოლი სიმაღლეზე კი არ ამშვიდებს ადამიანს, პირიქით, კიდევ მეტად უძლიერებს შიშს. ფრენის დროს ნერვების დამშვიდებაში კი დიდი რაოდენობით წყალი ან წვენი დაგეხმარებათ.  

ყავა და ჩაი ბორტზე — აქ მხოლოდ იმას გეტყვით, რაც თავად ბორტგამცილებლების ნათქვამიდანაა ცნობილი: წყლის ავზები თვითმფრინავში წელიწადში მხოლოდ რამდენჯერმე იწმინდება. დასკვნები თავად გააკეთეთ.   

 

450
თემები:
სასარგებლო რჩევები (244)
ღობე ეზოს გარშემო

როდის შეუძლია მეზობელს თქვენი მიწის ნაკვეთის გამოყენება იცოდეთ თქვენი უფლებები

787
(განახლებულია 18:56 10.07.2020)
იცოდით, რომ საქართველოს კანონმდებლობა თქვენს მეზობელს უფლებას აძლევს – თქვენი მიწის ნაკვეთით ისარგებლოს?

დღევანდელ სტატიაში შევეცდებით აგიხსნათ შემთხვევები, თუ როდის ანიჭებს კანონმდებლობა თქვენს მეზობელს თქვენი ნაკვეთის გამოყენების უფლებას, ან რა შემთხვევაში ვერ ისარგებლებს ის აღნიშნული უფლებით.

სამეზობლო სამართალს „სამოქალაქო კოდექსი“ არეგულირებს და თუ ადამიანი ვერ ახერხებს მეზობელთან ურთიერთობის მშვიდობიანად მოგვარებას, იძულებული ხდება კანონს მიმართოს.

სამოქალაქო კოდექსის მიხედვით, მეზობლად მიიჩნევა ყველა ნაკვეთი ან სხვა უძრავი ქონება, საიდანაც შესაძლებელია გამომდინარეობდეს ორმხრივი ზემოქმედება. კანონი, პირველ რიგში, მეზობლებს ავალდებულებს, რომ პატივი სცენ ერთმანეთს, მეორე რიგში კი თმენისკენ მოუწოდებს.

მართალია, კანონი უძრავი ქონების მესაკუთრეებს გვაძლევს შესაძლებლობას – ჩვენი შეხედულებისამებრ ვფლობდეთ, ვსარგებლობდეთ და განკარგავდეთ ჩვენს უძრავ ქონებას, მაგრამ ხშირ შემთხვევაში, როდესაც საქმე ეხება მიწის ნაკვეთს, საკუთრებით შეუზღუდავი სარგებლობა გარკვეულ დისკომფორტს უქმნის მეზობელი მიწის ნაკვეთის მესაკუთრეს და ზიანს აყენებს მას.

ასეთ შემთხვევაში კანონმდებლობა გარკვეულწილად ითვალისწინებს მეზობელი მიწის ნაკვეთის მესაკუთრის ინტერესს და ადგენს მის მიერ აუცილებელი გზის მოთხოვნის შესაძლებლობას.

არის შემთხვევები, როცა მიწის ნაკვეთს არ გააჩნია კომუნიკაციებთან მისასვლელი გზა, როგორიცაა საავტომობილო გზა, წყალმომარაგების ქსელი და ა.შ. ამ შემთხვევაში ასეთი ნაკვეთის მესაკუთრეს შეუძლია მოითხოვოს აუცილებელი გზა იმ ნაკვეთის მესაკუთრისგან, რომლის ნაკვეთიც უერთდება აღნიშნულ კომუნიკაციებს.

მოდით, უფრო მარტივად ავხსნათ, როდის აძლევს კანონი უფლებას მეზობელს თქვენი მიწის ნაკვეთით ისარგებლოს:

თუ მის ნაკვეთს ისეთი მდებარეობა აქვს, რომ

1. საჯარო გზას უკავშირდება მხოლოდ თქვენი მიწის ნაკვეთის მეშვეობით;

2. ელექტრო, ნავთობის, გაზისა და წყალმომარაგების ქსელთან მიერთებისათვის კომუნიკაციებმა აუცილებლად თქვენი მიწის ნაკვეთი უნდა გაიაროს.

ამ ორ შემთხვევაში არ გაქვთ უფლება, მეზობელს აუკრძალოთ თქვენი მიწის ნაკვეთით ამგვარი სარგებლობის უფლება და მას შეუძლია მოგთხოვოთ, რომ ითმინოთ თქვენი მიწის ნაკვეთის გამოყენება ამგვარი აუცილებელი კავშირის უზრუნველსაყოფად.

თუ მეზობლის ნაკვეთამდე მისასვლელი გზა ან გაყვანილობა თქვენს ნაკვეთზე გადის, თქვენ უნდა მოგცენ შესაბამისი კომპენსაცია, რომელიც, მხარეთა შეთანხმებით, შეიძლება ერთჯერადი გადახდით გამოიხატოს.

გაითვალისწინეთ, თუ აუცილებელი გზა (მიწის ნაკვეთთან სხვა ალტერნატიული მისასვლელი) ან გაყვანილობა უკვე არსებობდა და იგი მეზობლმა თვითნებურად გააუქმა, მაშინ თმენის ვალდებულება აღარ წარმოიშობა და მეზობელიც თქვენი ნაკვეთის ხარჯზე ვეღარ მოითხოვს აუცილებელ გზას. აქვე გაგაფრთხილებთ, რომ თვითნებური მოქმედება წარმოადგენს შეფასების საგანს და ყოველ კონკრეტულ შემთხვევაში უნდა დადგინდეს მისი არსებობა/არარსებობა.

თუ თქვენ უარს აცხადებთ, ითმინოთ თქვენ მიერ აუცილებელი გზის გადაცემა, მეზობელს შეუძლია მიმართოს სასამართლოს და მოითხოვოს აუცილებელი გზის დადგენა. მტკიცების ტვირთი იმისა, რომ არ არსებობს აუცილებელი კავშირი სხვადასხვა ობიექტებთან, განმცხადებელს/მოსარჩელეს ეკისრება.

თუმცა, ვიდრე მეზობელს გაანაწყენებდეთ, გაიხსენეთ, რომ ცუდი მეზობელიც კი კარგ ნათესავს სჯობია და ხშირად ადამიანი გაჭირვების დროს მეზობლების იმედად რჩება.

 

787
თემები:
სასარგებლო რჩევები (244)
რძიანი ფაფა

რძის პროდუქტები გახდომის მსურველთა რაციონში: დიეტოლოგი მნიშვნელოვან ფაქტორებს ასახელებს

289
(განახლებულია 18:14 08.07.2020)
დიეტოლოგი განმარტავს, რძის რომელი და რამდენი პროდუქტი შეიძლება მიიღოს ყოველდღე გახდომის მსურველმა ისე, რომ წონაში მომატების არ ეშინოდეს.

თბილისი, 8 ივლისი — Sputnik. მიუხედავად იმისა, რომ რძის პროდუქტების ყოველდღიური მიღება ჯანდაცვის მსოფლიო ორგანიზაციის რეკომენდაციებში შედის, წონის დაკლების მსურველები მაინც სიფრთხილით ეკიდებიან მის მიღებას იმის შიშით, რომ ზედმეტი კილოგრამები არ დაიგროვონ, წერს დიეტოლოგი ლორა ფილიპოვა საკუთარ Instagram-ზე.  

სპეციალისტი განმარტავს, რძის რომელი და რამდენი პროდუქტი მიიჩნევა გახდომის მსურველებისთვის უსაფრთხოდ.

ფილიპოვას თქმით, ზრდასრული ადმიანისთვის ყველაზე მნიშვნელოვანი — მაგარი ყველი და ხაჭოა – როგორც კალციუმის, ისე ცილების შემცველობის მხრივ.

  • „დაიმახსოვრეთ: მნიშვნელოვანია, რომ ცილა სხვადასხვა წყაროებიდან მიიღოთ“, — წერს დიეტოლოგი.

ექსპერტის თქმით, რძის პროდუქტები შეიცავს ცხოველურ ცხიმებს, რაც სასარგებლო საკვები ელემენტია. თუმცა აუცილებელია, რომ ყოველდღიურ რაციონში მისი რაოდენობა გაკონტროლდეს. გამომდინარე აქედან, საშუალო ცხიმიანობის ხაჭო და ყველი ოპტიმალური პროდუქტებია ყოველდღიურად მისაღებად.

თუმცა დიეტოლოგი გვაფრთხილებს, რომ ზომიერების დაცვა ამ შემთხვევაშიც საჭიროა.

„არ ღირს ყველის კილოგრამობით ჭამა — საკმარისია დღეში 30-50 გრამი, ხაჭო კი 150-200 გრამი“, — წერს სპეციალისტი.

მისი თქმით, ასევე მნიშვნელოვანია, რომ არ შეიძინოთ ისეთი რძის პროდუქტები, რომლებიც დიდი რაოდენობით შაქარსა და მარილს შეიცავს. ამასთან, ხაჭო არ უნდა შეათავსოთ მარტივ შაქრებთან და ასევე ისეთ პროდუქტებთან, რომლებიც ფიტინის მჟავას შეიცავს, მაგალითად, მარცვლოვნებთან, თხილ–კაკალთან, პარკოსნებთან და ასევე თესლეულთან.

 

289
თემები:
რჩევები ჯანმრთელობასა და სილამაზეზე
დაკავება

ზუგდიდში „ტყის ძმების“ ლიდერის შვილი ნარკოდანაშაულზე დააკავეს

0
დაკავებულის პირადი, ავტომანქანის და საცხოვრებელი სახლის ჩხრეკისას ამოღებულია ნარკოტიკული საშუალებები - „მეტადონი” და „ლირიკა”. ასევე ამოღებულია დაკავებულის პირადი ავტომანქანა, 6785 აშშ დოლარი და 500 ევრო.

თბილისი, 12 ივლისი – Sputnik. „ტყის ძმების“ ყოფილი ლიდერის დათო შენგელიას შვილის, 38 წლის დადუ შენგელიას დაკავებასთან დაკავშირებით შსს განცხადებას ავრცელებს.

სპეცოპერაცია ზუგდიდში დღეს რამდენიმე საათს მიმდინარეობდა.

სამართალდამცველებმა მოსამართლის განჩინების საფუძველზე ჩატარებული საგამოძიებო მოქმედებების შედეგად შენგელია ნარკოტიკული საშუალების უკანონო შეძენა-შენახვის ბრალდებით დააკავეს.

სამართალდამცველებმა, დაკავებულის პირადი, ავტომანქანის და საცხოვრებელი სახლის ჩხრეკისას, ნარკოტიკული საშუალებები - „მეტადონი” და „ლირიკა” ამოიღეს.

ასევე, ნივთმტკიცების სახით ამოღებულია დაკავებულის პირადი ავტომანქანა, 6785 აშშ დოლარი და 500 ევრო.

ნარკოტიკული საშუალების უკანონო შეძენა-შენახვის ფაქტზე გამოძიება საქართველოს სისხლის სამართლის კოდექსის 260-ე მუხლით მიმდინარეობს.

0
თემები:
კრიმინალი საქართველოში