სოფია კვინიკაძე

კორეაში მცხოვრები ქართველი სტუდენტის ფერადი ცხოვრება: როგორ გავაგრძელოთ სწავლა კორეაში

9613
(განახლებულია 11:36 18.09.2019)
სოფია კვინიკაძე წარმოშობით ქუთაისიდანაა. ფიზიკა-მათემატიკური სკოლის დამთავრების შემდეგ ჩააბარა თავისუფალი უნივერსიტეტის აზიისა და აფრიკის ინსტიტუტში, საერთაშორისო ურთიერთობებზე, სადაც კორეული ენის შესწავლა დაიწყო.

სოფიამ კორეული ენის ერთ-ერთ კონკურსში გაიმარჯვა, რის შედეგადაც მოიპოვა სრული დაფინანსება სამხრეთ კორეის ერთ-ერთ წამყვან უნივერსიტეტში. ამით მან ბავშვობის ოცნება აიხდინა და კორეაში მალევე გაემგზავრა. ამჟამად სოფო მაგისტრატურას გადის, ამასთან ასწავლის ბაღსა და სკოლაში ინგლისურ ენას. ასევე მუშაობს მსახიობად ტელევიზიაში. პარალელურად მონაწილეობას იღებს სხვადასხვა გადაღებებში. როგორ მოხვდა კორეაში, რა გზა გაირა, სანამ უცხო ქვეყანაში თავის დამკვიდრებას შეძლებდა და როგორ შეიცვალა სოფოს ცხოვრება ამ პერიოდის განმავლობაში, ის თავად მოგვიყვება.

სოფია კვინიკაძე
სოფია კვინიკაძე

- უნივერსიტეტში მესამე კურსზე როცა ვიყავი, ჩატარდა კავკასიის რეგიონში კორეულ ენაზე სიტყვით გამოსვლის კონკურსი, სადაც გავიმარჯვე. ამ გამარჯვებამ მომცა შანსი, მომეპოვებინა სრული დაფინანსება სამხრეთ კორეის ერთ-ერთ წამყვან, ჩონბუკის სახელმწიფო უნივერსიტეტში. ამჟამად ვსწავლობ კორეული ენის ფილოლოგიას, მაგისტრატურას გავდივარ და დამრჩა მხოლოდ საკურსო ნაშრომის ჩაბარება, თითქმის დავამთავრე.

სოფია კვინიკაძე დასთან ერთად
სოფია კვინიკაძე დასთან ერთად

- ალბათ მარტივი არ იყო სრულიად უცხო ტრადიციების, კულტურის მქონე ქვეყანაში თავის დამკვიდრება, უცხო გარემოსთან შეგუება. მოგვიყევით როგორ დაიწყეთ ახალი ცხოვრება და როგორ გადალახეთ სირთულეები?

- ყველაზე დიდი ბარიერი სამხრეთ კორეაში არის ენის არცოდნა. თუ ენა იცი, შედარებით მარტივია თავის დამკვიდრება. თუმცა, კორეელები ძალიან ჩაკეტილი ხალხია და უცხოელებს ადვილად არ ეხსნებიან. მე კორეულ ენაზე გამართულად ვლაპარაკობ, მაგრამ ენის ცოდნასთან ერთად ხასიათიც ძალიან დამეხმარა. ანუ, კორეელებს ხალისიანი და ბეჯითი ხალხი უყვართ, ნათელი აურის მქონე ადამიანები იზიდავთ. მეც, კორეელებივით, ფუტკარივით ვარ. საქმის კეთების დროს წუწუნი არ მიყვარს და სამუშაო საათებს რომც გადაცდეს, სანამ საქმეს არ მოვრჩები, ადგომა არ მჩვევია. ხშირად მეუბნებიან კორეელები, რომ მე ამ თვისების გამო აქ უნდა ვიცხოვრო. ამბობენ, იმდენად რთულია კორეულ სამუშაო გარემოს ფეხი აუწყო, რომ თუ ადამიანი ამას შეძლებს, აქ ბევრ წარმატებას მიაღწევსო. მეც ჩემი ბედი უნდა ვცადო...

სოფია კვინიკაძე
სოფია კვინიკაძე

- როგორ შეგაყვარათ კორეამ თავი?  

- კორეა ჯერ კიდევ მეათე კლასში შემიყვარდა, კორეული ფილმებიდან. ფილმებიდან მუსიკის მოსმენა დავიწყე, შემდეგ სერიალების ყურება და ასე გადავვარდი კორეულ სამყაროში. თან დავიწყე ოცნება კორეაში წასვლასა და ცხოვრებაზე, თუმცა ქუთაისიდან ეს ოცნება ნამეტანი შორი და რთული ჩანდა.

- კორეელ ხალხზე რას გვეტყვით, რით არიან გამორჩეული?

- კორეელები ძალიან თბილები არიან, უყვართ უცხოელები. მაგრამ ყველაზე სახასიათო რაც აქვთ, არის შრომისმოყვარეობა, ფუტკრებივით არიან. საათობრივი განაკვეთით მსოფლიოში ყველაზე მეტს მუშაობენ, სამსახურს უკავშირებენ ყველაფერს და ამის ირგვლივ ტრიალებს მათი ცხოვრება. კორეა საკმაოდ განვითარებული ქვეყანაა და ცხოვრების ძალიან მაღალი დონეა, ანაზღაურებაც საკმაოდ კარგი. ამავე დროს უსაფრთხო გარემოა. 

სოფია კვინიკაძე კორეელ მეგობრებთან ერთად
სოფია კვინიკაძე კორეელ მეგობრებთან ერთად

- ალბათ არაერთმა ტრადიციამ და კანონმა გაგაოცათ. მოგვიყევით მათი განსხვავებული ტრადიციების და კულტურის შესახებ...

- მიუხედავად იმისა, რომ ძალიან გახსნილი და თავისუფალი აზროვნების ხალხია, ძალიან დიდ ყურადღებას აქცევენ „იმიჯს“ და იმას, თუ რას იტყვიან სხვები. ამიტომ ყოველთვის მკაცრად მოწესრიგებულად გადიან გარეთ, აქვთ უამრავი წესი, თუნდაც, სუფრასთან, სამსახურში. ეს იმდენად დიდი თემაა, ძალიან გამიგრძელდება. მოკლედ რომ გითხრათ რამდენიმე უცნაური წესი, რაც გამიკვირდა, იყო ის, რომ სამსახურში წვერის ტარება არ შეიძლება და დეკოლტე ითვლება ძალიან ვულგარულად. ამიტომ დეკოლტეს, მაგალითად, სამსახურში ჩაცმა კატეგორიულად არ შეიძლება. ასევე ლიფის ზორტი თუ გამოგიჩნდა, ქუჩაშიც კი ყველა თვალს გამოგაყოლებს.

- ამ ეტაპზე რას საქმიანობთ, სად სწავლობთ, სად მუშაობთ და ამ ყველაფერს როგორ უთავსებთ ერთმანეთს?

- ამჟამად ვწერ სამაგისტრო ნაშრომს, პარალელურად ვასწავლი ბაღსა და სკოლაში ინგლისურს. ასევე ვმუშაობ მსახიობად (მოდელად) ტელევიზიაში. პარალელურად ვიღებ მონაწილეობას სხვადასხვა გადაღებებში, აქამდე რადიოშიც ვმუშაობდი ნახევარი წელი.

- საქართველოში ყველაზე მეტად რა გენატრებათ?

- სახლი, ბებო და მეგობრები...

სოფია კვინიკაძე
სოფია კვინიკაძე

- თქვენი დაც თქვენთან ერთადაა. ალბათ მისი გვერდით ყოფნა მონატრებას გიმსუბუქებთ...

- კი, ჩემი და ჩემი ჩამოსვლიდან ერთი წლის თავზე ჩამოვიყვანე. კორეა ჩემ დასაც შევაყვარე, მაგრამ უნივერსიტეტში ჩაბარების შემდეგ მე თბილისში ვიყავი, ის ქუთაისში დარჩა, იქ ჩააბარა უნივერსიტეტშიც. უნივერსიტეტი არ მოსწონდა და ფაკულტეტი რამდენჯერმე შეიცვალა. მოკლედ, უკმაყოფილო იყო და ამის გამო ხშირად მოსდიოდა ბებოსთან დავა. მე უკვე კორეაში ვცხოვრობდი. ბოლოს გადაწყდა, რომ მე ჩამოვიყვანდი აქ, ჩემთან და ერთად გავაგრძელებდით კორეაში ცხოვრებას.

- ძალიან პოპულარული ხართ სოციალურ ქსელში. რატომ გადაწყვიტეთ ფეისბუქ-გვერდის შექმნა და რაში გეხმარებათ ამ გვერდის არსებობა?

- მე თვითონ, როცა კორეაზე ბევრი რამე მაინტერესებდა, ენის ბარიერის გამო უამრავ საჭირო ინფორმაციაზე არ მიმიწვდებოდა ხელი და ვდარდობდი. დავპირდი საკუთარ თავს, რომ ჩავალ, მე ყველაფერს გამოვაქვეყნებ, ბევრ ფოტოს გადავიღებ და ვისაც კი კორეაზე რამის ცოდნა და გაგება მოუნდება, დავეხმარები–მეთქი. რეალურად, რომ ჩამოვედი, ბევრმა მიპოვა პირად გვერდზე და მწერდნენ სხვადასხვა კითხვებით. ცალ-ცალკე პასუხი ძალიან მიჭირდა (დღემდე მიჭირს) დატვირთული გრაფიკის გამო და გადავწყვიტე ჩამეწერა საერთო ვიდეო და ამეტვირთა კორეული კულტურის გულშემატკივრებისთვის. არასდროს მითხოვია არც გვერდის მოწონება და არც გაზიარება, რადგან ჩემი მიზანი პოპულარობა და გასართობი ვიდეოების ჩაწერა არ ყოფილა. გვერდი, პირველ რიგში, ეკუთვნის იმ ადამიანებს, ვინც (როგორც მე მეათე კლასში) ოცნებობს კორეაში მოგზაურობაზე ან ცხოვრებაზე. არ ვიცი როგორ, ბუნებრივად შემოიკრიბა ხალხი და დაიწყეს ვიდეოების ყურება ისეთმა ადამიანებმაც კი, რომელთაც კორეის შესახებ აქამდე არც კი სმენიათ. თავიდან ვიფიქრე, გვერდს გავაუქმებ და ჯგუფს შევქმნი–მეთქი, რადგან ეს შემოკრებილი ხალხის რაოდენობა მაშინებდა და ის ფაქტიც, რომ დღეს ინტერნეტ-სივრცეში ერთმანეთის ჭამისა და კრიტიკის მეტი არაფერი ხდება. არ მინდოდა მეც ამის ობიექტი გავმხდარიყავი, რადგან ხალხს შეიძლება ჰგონებოდა, რომ მეც ერთ-ერთი უსაქმური გოგო ვარ, ინტერნეტის საშუალებით პოპულარობა რომ მოუნდა. დღეს 123 ათასი ხელმომწერი მყავს და რამდენიმე ვიდეო მილიონ ნახვამდეც ავიდა. ამ დროს მხოლოდ რამდენიმე ნეგატიურ კომენტარს თუ ნახავთ. დღემდე ვერ ვიჯერებ, რომ ჩვენ გვერდზე ეს მართლა ხდება. უამრავი დიდი წერილი და სამადლობელი ტექსტი შემოდის, გვეფერებიან ქართველები მსოფლიოს სხვადასხვა ქვეყნებიდან და ამან გული ისე გამითბო, გადავწყვიტე გამეგრძელებინა ჩემი ჩანაწერები (თუმცა ნეგატიური კომენტარებისა და კრიტიკის დღემდე მეშინია).

სოფია კვინიკაძე
სოფია კვინიკაძე

- და, ბოლოს, რას ურჩევთ ადამიანებს, ვისაც კორეაში სურს მუშაობა, სწავლის გაგრძელება, როგორ უნდა მოიქცნენ, რა ზომებს უნდა მიმართონ?

- ბევრს ჰგონია, რომ კორეაში სწავლის გასაგრძელებლად ან ჩამოსასვლელად კორეული ენის სწავლა ან ცოდნაა საჭირო და ეს არის ყველაზე დიდი წინაპირობა. სამწუხაროდ, საქმე ამაზე ცოტა რთულადაა, რადგან ჩვენ კორეასთან უვიზო მიმოსვლა არ გვაქვს და კორეელები ვიზას ადვილად არ იძლევიან. ყველაზე მარტივი ვიზის ტიპი არის სტუდენტური ვიზა, რომლის აღებაც შეგიძლიათ მაშინ, თუ წინასწარვე ჩარიცხავთ სწავლის საფასურს – რამდენიმე ათას დოლარს. კორეაში ცხოვრებაც ძალიან ძვირი ღირს და ენის ცოდნისა და კონტრაქტის გარეშე სამსახურშიც არავინ აგიყვანთ. ერთ-ერთი ყველაზე კანონმორჩილი ერია. კანონის ძალიან დიდი შიში აქვთ და არალეგალურად ჩამოსულს და ა.შ. ძალიან უფრთხიან, დიდი ალბათობით გიჩივლებენ კიდეც. მაშინ რა უნდა ვქნათ? არსებობს სხვადასხვა დაფინანსებები, რომელზეც ვილაპარაკე ჩემ სულ პირველ ვიდეოში. აქ საუბარია სწორედ იმ გზებზე, თუ როგორ შეიძლება მოხვდეთ კორეაში.

 

9613
სალათი

შვიდი აკრძალვა: რა არ უნდა გავაკეთოთ ჭამის შემდეგ

398
(განახლებულია 16:48 14.08.2020)
რაც არ უნდა საუკეთესო საკვები მივიღოთ, ჯანსაღად ვიკვებოთ, კვების საკითხში არსებობს წესები და თუ მათ არ გავითვალისწინებთ, აზრს კარგავს ჩვენი ჯანსაღი კვებაც კი.

გადაცემაში „თქვენი კლინიკა" წამყვანებმა ისაუბრეს შვიდ აკრძალვაზე, რომელთა გაუთვალისწინებლობა მნიშვნელოვნად არღვევს ნივთიერებათა ცვლას და უარყოფითად მოქმედებს ადამიანის ჯანმრთელობაზე.

სიგარეტი

პირველი და ძალიან მნიშვნელოვანი – ეს არის სიგარეტი. მწეველებს საკვების მიღების მერე უყვართ ერთი ღერი სიგარეტის დაყოლება. სიგარეტის მოწევა ჭამის შემდეგ განსაკუთრებით მავნებელია ჯანმრთელობისთვის და ის მოწეულ 10 ღერ სიგარეტს უდრის. ამ დროს აქტიურდება მისი მავნე თვისებები, შესაბამისად, ეს დიდ ზიანს აყენებს ჯანმრთელობას.

ხილი

ცნობილია, რომ ხილი ძალიან ბევრი სასარგებლო თვისებებით გამოირჩევა და მნიშვნელოვანია, რომ ის როგორც ვიტამინების ნაკრები მივიღოთ ძალიან ხშირად. მაგრამ საკვების მიღებისთანავე დაყოლებული ხილი სრულიად არღვევს საჭმლის მონელების პროცესს, იწვევს შებერილობას, რის შედეგადაც ირღვევა მიღებული საკვების შეწოვა, ათვისება. იქმნება ძალიან დიდი დისკომფორტი და ამიტომ ხილიც კარგავს თავის სასარგებლო თვისებებს. ხილი უნდა მივიღოთ ან ჭამამადე ერთი საათით ადრე, ან ჭამის შემდეგ ორი საათის გასვლის შემდეგ. ხილი უნდა იყოს ცალკე კვებად.

ჩაი

არ შეიძლება ჩაის დალევა ჭამის პროცესში და ჭამის შემდეგ. ჩაის ნაყენში დიდი რაოდენობით არსებული მჟავები აფერხებს საკვებით მიღებული ცილების მონელებას, ტანინი (ბუნებრივად შექმნილი ქიმიური ნივთიერება, რომელიც გვხვდება შავ ჩაიში) კი ხელს უშლის კალციუმისა და სხვა მინერალური ნივთიერებების შეწოვა-შეთვისებას. ამგვარად, ჩაის საჭმელს ნუ მიაყოლებთ.

ქამარი

თუ საკვები მოჭერილი ქამრით მიირთვით, მისი მოშვება ან მთლად შეხსნა არც კი იფიქროთ. ამით საჭმლის მონელების პროცესში უხეშად ჩაერევით. მიღებული საკვები ერთბაშად ქვასავით ჩაეშვება ქვემოთ და საჭმლის მონელება გარკვეული დროით სრულად დაიბლოკება. ამ ფაქტორზე ნუ გაგეცინებათ. თუ ვინმეს ერთხელ მაინც ჰქონია ქამრის მოშვების შემთხვევა, ალბათ არასოდეს დაავიწყდება მიღებული დისკომფორტი, სიმძიმისა და გაქვავების შეგრძნება მუცლის ქვედა ნაწილში მიუხედავად კარგი სადილობისა.

შხაპი

ბევრ ადამიანს აქვს ტრადიციად სადილის ან ვახშმის შემდეგ მიიღოს შხაპი. ჭამის შემდეგ შხაპისა თუ აბაზანის მიღება დაუშვებელია. წყლის პროცედურა, შხაპი იქნება ეს თუ აბაზანა, სისხლის ნაკადის გადანაწილებას იწვევს. სისხლის მოძრაობა ამ დროს ძლიერდება კიდურების, ხელების, ფეხების და სხეულის ზედაპირისკენ, კანისკენ. შესაბამისად, შინაგანი ორგანოებისა და მათ შორის კუჭის არეში სისხლის ნაკადი მცირდება. ვფიქრობთ, გაგრძელება და დამატებითი განმარტება აღარ არის საჭირო, თავადაც მიხვდებით, როგორი ზიანი ადგება საჭმლის მონელების პროცესს და ამ პროცესში ჩართულ მობილიზებულ ორგანოებს.

დაწოლა

საკვების მიღების შემდეგ ბევრს მოსწონს წამოწოლა და დასვენება. ჭამის შემდეგ აკრძალულია მხარ-თეძოზე წამოწოლა. თუმცა, ძველი შეხედულება, რომ ჭამის შემდეგ აქტიურად მოძრაობაა სასურველი საკვების უკეთ მონელებისთვის, ასევე უგულებელყოფილია. თურმე აქტიური მოძრაობა, უმოძრაობის მსგავსად, მონელების პროცესსა და გარკვეული ნივთიერებების შეწოვას აფერხებს. ყველაზე კარგი ნელ-ნელა ჭამა და საკვების მიღების შემდეგ ერთხანს მაგიდასთან მშვიდად ჯდომაა. ამის შემდეგ შეგიძლიათ ამოძრავდეთ, თუნდაც მშვიდად გაიარ-გამოიაროთ ან სუფთა ჰაერზე ნელი ნაბიჯით გაისეირნოთ. არავითარ შემთხვევაში არ გაიქცეთ და არც საქმეს შეეჭიდოთ აჩქარებული წესით.

ძილი

მიუხედავად იმისა, რომ დანაყრების შემდეგ ადამიანს ხშირად ეძინება, ჭამის შემდეგ არ შეიძლება დაძინება. ჭამის შემდეგ ძილის მოყვარულებს გასტრიტი, კუჭის ინფექციები და საჭმლის მონელების სხვადასხვაგვარი დარღვევა ემუქრებათ. ამიტომ სპეციალისტები გირჩევენ, საკვების მიღებიდან მინიმუმ ერთი საათის განმავლობაში არ დაიძინოთ.

 

398
თემები:
ჯანმრთელობა და სილამაზე
მტირალი მამაკაცი

იტირე ანუ რა უნდა ქნა, როცა ყელში „ბურთი გეჩხირება“

192
(განახლებულია 19:35 13.08.2020)
რუბრიკა „ფასილიტატორის“ სტუმარია ფსიქოლოგიის მაგისტრი, ბავშვთა ფსიქოდიაგნოსტიკოსი, ფსიქოკონსულტანტი, პროექტ „მომავლის კონსტრუქტორის“ წამყვანი, სპეციალური მასწავლებელი სკოლაში ანა ჯუღელი.

ტირილი ემოციის გამოხატვის ერთ-ერთი ფორმაა. ჩვილი ბავშვი გარე სამყაროსთან ურთიერთობას ტირილით ამყარებს. ამ გზით ცდილობს საკუთარი ფიზიოლოგიური მოთხოვნილებების დაკმაყოფილებას. შემდეგ, როდესაც ბავშვი იზრდება და უკვე მეტყველებით შეუძლია მოთხოვნილებებისა და სურვილების დაფიქსირება, ტირილი სხვა ფუნქციას იძენს.

ანა ჯუღელი
photo: courtesy of Ana Jugheli
ანა ჯუღელი

აღსანიშნავია, რომ ადამიანი სამი სახის ცრემლს გამოყოფს, ესენია:

ბაზალური (ძირითადი) – საცრემლე ჯირკვლები ამ სახის ცრემლს მუდმივად აწარმოებენ. ის უზრუნველყოფს თვალის ტენიანობის შენარჩუნებას.

რეფლექსური – გამღიზიანებლისგან გამოწვეული ცრემლი. მაგალითად, თვალში რაიმეს მოხვედრით, ქარით, კვამლით და ა.შ. გამოწვეული. ცრემლი ამ დროს თვალის დამცავის ფუნქციას იძენს.

ემოციური – ემოციის ტალღის მოწოლისას გამოყოფილი ცრემლი.

როდესაც ტირილზე ვსაუბრობთ, როგორც წესი, ემოციური ცრემლები იგულისხმება.

ტირილი ადამიანის ფიზიოლოგიური რეაქციია გარკვეულ ემოციურ სტიმულებზე, მაგალითად, ტკივილზე, იმედგაცრუებაზე, სიხარულზე და ა.შ.

ადამიანს ტირილის საშუალებით შეუძლია განიმუხტოს მოზღვავებული ემოციისგან. ტირილის დროს გამოიყოფა სტრესის ჰორმონი, რაც ხელს უწყობს სტრესისგან გათავისუფლებას.

ცრემლების მეშვეობით ადამიანს შეუძლია მიიღოს თანაგრძნობა. ამ შემთხვევაში ცრემლებს მეორადი სარგებელი აქვს.

ადამიანი ბავშვობიდანვე ირჩევს ქცევის გარკვეულ სტრატეგიებს, რომელთა საშუალებითაც ერგება გარემოს, სოციუმს, რომელთა საშუალებითაც იღებს სხვადასხვა ტიპის სარგებელს. ერთ-ერთი ასეთი სტრატეგია შეიძლება იყოს ტირილი.

თუ იტირებს, იცის, რომ აუცილებლად მიიღებს სასურველს (ბავშვობიდანვე განმტკიცებული აქვს ეს ქცვევა). მსგავსი ტიპის ქცევა შენარჩუნებული იქნება იქამდე, ვიდრე ის „მუშაობს“. თუ ამ ქცევით სასურველს ვეღარ მიიღებს, მოუწევს სხვა სტრატეგიის შემუშავება.

აქვე უნდა აღინიშნოს, რომ ხშირად ტირილი ბავშვობიდანვე იკრძალება. ტირილი მიაჩნიათ სისუსტედ, მხოლოდ გოგონებისთვის დამახასიათებელ ქცევადაც კი. ჩვენ ხშირად სტერეოტიპების მსხვერპლად ვიქცევით, ამის გამო ადამიანი ზრდასრულობაშიც არ აძლევს საკუთარ თავს ტირილის უფლებას.

უნდა გვახსოვდეს, რომ ტირილი ადამიანს როგორც ფსიქიკის, ასევე ფიზიოლოგიური განტვირთვისთვის სჭირდება. ალბათ გქონიათ შემთხვევა, როდესაც ტირილი გინდათ, შეგრძნება გაქვთ, რომ ყელში „ბურთი გაგეჩხირათ“ და ვერაფერს უხერხებთ. ტირილის შემდეგ კი ეს ბურთულა ქრება და თქვენც შედარებით მსუბუქად გრძნობთ თავს.

ტირილისას ადამიანს შეუძლია გააცნობიეროს საკუთარი გრძნობები და ემოციები, ისე რომ არ დათრგუნოს ისინი. გრძნობების იგნორირებამ შეიძლება ადამიანი მიიყვანოს გაუცნობიერებელ ნეგატიურ განცდებამდე, რომლებიც გარკვეული დროის შემდეგ ხშირად სომატურ ჩივილებად ვლინდება. 

ტირილი ხშირად სიტუაციის სხვაგვარად დანახვის საშუალებას გვაძლევს. ის არ შველის მძიმე სიტუაციებს, არ ცვლის არსებულ რეალობას, თუმცა იძლევა ემოციური განმუხტვის საშუალებას და შემდეგ თითქოს საჭირო ხედვა და რესურსიც კი უჩნდება ადამიანს კონკრეტულ სიტუაციაში მოქმედებისთვის.

ასევე საინტერესოა ის ფაქტი, რომ ადამიანები თავად წყვეტენ სად იტირონ. იტირონ სხვების თანდასწრებით თუ იტირონ, როდესაც მარტო დარჩებიან.

„ნუ ტირი, ნუ აჩვენებ სხვებს, რომ სუსტი ხარ“, „დიდი ბიჭები არ ტირიან“, „შენ უკვე დიდი გოგო ხარ, ნუ ტირი“ – დარწმუნებული ვართ, ხშირად მოგისმენიათ მსგავსი ფრაზები, ან შეიძლება თავადაც გითქვამთ სხვებისთვის.

გვახსოვდეს, რომ ტირილი ბუნებრივი ადამიანური რეაქციაა მოზღვავებულ ემოციურ სტიმულებზე, რომელსაც ბევრი სასარგებლო ფუნქცია აქვს. შემდეგ ჯერზე, თუ ცრემლები მოგადგებათ, ნუ მოგერიდებათ, ნუ შეგრცხვებათ და მიეცით თავს ტირილის უფლება, ნახავთ, როგორ დაგამშვიდებთ ის – შეძლებთ ცხოვრებას პოზიტიური თვალით შეხედოთ.

თუმცა, აქვე უნდა აღინიშნოს, რომ ხშირი ტირილი შეიძლება დეპრესიული მდგომარეობის ნიშანი იყოს – თუ ტირით ძალიან ხშირად, მიზეზის გარეშე და ტირილი უკონტროლოა, აუცილებელია დროულად მიმართოთ სპეციალისტს.

 

192
თემები:
ჯანმრთელობა და სილამაზე
სანთლები

სამების ტაძარში აფხაზეთიდან გადმოსვენებული13 პირის სამოქალაქო პანაშვიდი მიმდინარეობს

0
(განახლებულია 14:47 15.08.2020)
ნეშტების ამოცნობა წითელი ჯვრის საერთაშორისო კომიტეტის ანთროპოლოგიური კვლევის შედეგად მოხერხდა. ორმხრივი მექანიზმის ფარგლებში ნაპოვნია 563 ადამიანის ნეშტი, მათგან იდენტიფიცირებულია 191.

თბილისი, 15 აგვისტო - Sputnik.  სამების საკათედრო ტაძარში გასული საუკუნის 90-იან წლებში აფხაზეთის  შეიარაღებული კონფლიქტის დროს დაღუპული 13 იდენტიფიცირებული პირის სამოქალაქო პანაშვიდი მიმდინარეობს.

ნეშტებს, რომლებიც წლების შემდეგ აღმოაჩინეს, იდენტიფიცირების მიზნით დნმ-ის ანალიზი ჩაუტარდა. 

13 პირიდან ორს დიღმის ძმათა სასაფლაოზე დაკრძალავენ, დანარჩენ მებრძოლებსა და მშვიდობიან მოქალაქეებს კი, ოჯახების გადაწყვეტილებით, საგვარეულო საფლავებზე გადაასვენებენ.

სამოქალაქო პანაშვიდზე საქართველოს პრემიერ-მინისტრი გიორგი გახარია და მთავრობის წევრები იმყოფებიან. 

 

„კიდევ ერთხელ მინდა აღვნიშნო, რომ მშვიდობას ალტერნატივა არ აქვს. არ უნდა განმეორდეს ამგვარი ტრაგედია საქართველოში. საქართველოს მთავრობა ყველაფერს აკეთებს იმისათვის, რომ დაიცვას მშვიდობა,” – განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა.

2010  წელს,  წითელი ჯვრის საერთაშორისო კომიტეტის ფინანსური და ტექნიკური დახმარებით, 1992-1993 აფხაზეთში საომარი მოქმედებების  შედეგად უგზო-უკვლოდ დაკარგულთა მოძიების საკითხების შემსწავლელი საკოორდინაციო მექანიზმი შეიქმნა, რომელმაც დაღუპულთა მოძიების პროცესი დაიწყო. ამ მექანიზმის მონაწილეები არიან ოფიციალური თბილისისა და აფხაზეთის დე-ფაქტო ხელისუფლების წარმომადგენლები.

მექანიზმის ამუშავებიდან, ანუ 2010 წლიდან სულ აღმოჩენილია 563 ადამიანის ნეშტი. აქედან ჯერ მხოლოდ 191 ადამიანის ამოცნობა მოხერხდა, დანარჩენი ნეშტების ამოცნობის პროცესი გრძელდება.

საქართველომ კონტროლი აფხაზეთსა და ცხინვალის რეგიონზე 1990-იანი წლების დასაწყისში, შეიარაღებული კონფლიქტის შემდეგ დაკარგა. 2008 წლის აგვისტოს ომის შემდეგ რუსეთმა ამ რეგიონების დამოუკიდებლობა აღიარა, ამის საპასუხოდ თბილისმა მოსკოვთან დიპლომატიური ურთიერთობები გაწყვიტა.

 

 

 

0