შეყვარებულები

ზოდიაქოს რომელი ნიშნების მამაკაცებს შეუძლიათ ძლიერი სიყვარული

24657
(განახლებულია 11:19 23.05.2019)
ბევრი ქალისთვის ცნება „მამაკაცის ღრმა სიყვარული" ირონიული და სასაცილოა. ისინი დარწმუნებული არიან, რომ მამაკაცისთვის ნამდვილი სიყვარული უცხო ხილია, კაცებს მხოლოდ სიჭაბუკეში უყვართ და მაშინაც ამ გრძნობას ჰორმონალურ აფეთქებებში ურევენ.

ასტროლოგიური თვალსაზრისით კი ეს ასე კატეგორიული სულაც არ არის. სპეციალისტები აცხადებენ, რომ სიყვარული და შეყვარება ძლიერი სქესის წარმომადგენლებსაც შეუძლიათ. არიან ზოდიაქოს ზოგიერთი ნიშნის წარმომადგენლები, რომლებსაც დიდი გული აქვთ და მათთვის სიყვარული ძალზე ღირებული გრძნობაა.

კურო

კუროს მთვარე და ვენერა მართავს, ამიტომ ის არ შეიძლება სიყვარულისადმი გულგრილი იყოს. კურო მამაკაცი ძალზე მოსიყვარულეა, რომანტიკული, მძაფრად რეაგირებს გრძნობებზე. მისი აზრით, გრძნობების გამოხატვა მამაკაცის საქმე არაა, ამიტომ ის მალავს ემოციების ქარიშხალს, სანამ საპასუხო გრძნობაში არ დარწმუნდება. შემდეგ კი კურო არ დაიშურებს არც ენერგიას, არც ფანტაზიას, გამომგონებლობას, რომ საყვარელი ქალი კვარცხლბეკზე აიყვანოს.

მაგრამ ყველა კურო მამაკაცს არ შეუძლია ჰარმონიული ურთიერთობების აწყობა და ამის მიზეზი ეჭვიანობაა. ეს გრძნობა ხანდახან ძალიან საშიში ხდება. პათოლოგიაში გადაზრდილ ეჭვიანობას კი ოჯახის დანგრევაც შეუძლია. სიყვარულში კურო მამაკაცი ბედნიერი იქნება თევზებთან, ქალწულთან და თხის რქასთან.

კირჩხიბი

მამაკაცი კირჩხიბის გულს მთვარე მართავს, ამიტომ მას მთელი გულით უყვარდება. ამით აიხსნება ასევე მისი ერთგულება, რომანტიკულობა და გრძნობების სიღრმე. ამას გარდა, მთვარემ ეს ნიშანი დაასაჩუქრა სენტიმენტალობითა და ემპათიით. გარეგნობით ყველაზე ბრუტალური კირჩხიბიც კი, სინაზისა და მოულოდნელი რომანტიკული სიურპრიზის დროს, ძალზე მგრძნობიარე ხდება. მას თავადაც შეუძლია სიურპრიზებით გაოცება, ქალის ლამაზად მოხიბვლა. კირჩხიბი მამაკაცი ხშირად თავის თავს ურთიერთობებსა და ოჯახში ხედავს. ის განსაკუთრებით სერიოზულად ირჩევს პარტნიორს და მხოლოდ პოტენციურ ცოლს ხვდება. თუ მან ქალში მეოჯახე ვერ დაინახა, ურთიერთობები გაცივდება.

კირჩხიბის სიყვარულში ერთი უკიდურესობაა: ის იმდენად დიდი რაოდენობით აგროვებს ამ გრძნობას, რომ ხშირად თავადაც ვერ უმკლავდება. თუ კირჩხიბს შეუყვარდა, მისგან თავის დაღწევა ძალზე რთულია, მას სიყვარულით შეუძლია "დაახრჩოს" თავისი საყვარელი ქალი. ასეთი სიყვარულის მიღება შეუძლიათ მხოლოდ ქალწულებს, კუროებსა და მორიელებს.

სასწორი

სასწორის ნიშნის მამაკაცებს ვენერა მართავს. მათ შეუძლიათ, იყვნენ საკუთარი გრძნობების ერთგული, ქალის გარშემო შექმნან სიყვარულის, ბედნიერებისა და ჰარმონიის ატმოსფერო. ურთიერთობები იქნება სტაბილური, შესაძლოა, არ იყოს ფოიერვერკებით სავსე, მაგრამ წონასწორობა და ჰარმონია გარანტირებულია. სასწორი სიყვარულში ერთგულია, მას წლებთან ერთად გული არ უცივდება და სიყვარული ყოფაში არ იკარგება. სწორედ მამაკაცი სასწორები არიან წყვილებში, რომლებიც ოქროს ქორწილს ზეიმობენ. სხვა ოჯახების მსგავსად, მათ ოჯახებშიც არის კამათი და ჩხუბი, კონფლიქტები, მაგრამ სასწორ მამაკაც ჰყოფნის მოთმინება და სიბრძნე, რომ კონფლიქტი მოაგვაროს. ამ ნიშნის წარმომადგენლებში დიპლომატია სისხლშია გამჯდარი.

სასწორთან ურთიერთობა არ გამოვა, თუ მას ანგარების მიზნით დაუკავშირდებით. როგორც კი იგრძნობს მამაკაცი, რომ მისი რჩეული არ აფასებს ან ვერ ხედავს მის სიყვარულს, უბრალოდ, იყენებს მას, ის ადგება და წავა. ამასთან, წავა სკანდალის გარეშე, ჩუმად. იდეალურად აეწყობა ურთიერთობები ქალ მერწყულთან, ტყუპთან და ლომთან.

თევზები

თევზები დიდსულოვანი და დიდებული ნეპტუნის ზეგავლენას განიცდიან. ამ ნიშნით დაბადებულ მამაკაცებში მას სიყვარულის გაღვივება ურთიერთსაწინააღმდეგო მხარეებით შეუძლია: სინაზე და ძალა, მგრძნობელობა და გაუცხოება, რომანტიზმი და სიმკაცრე. თვითონ ნიშანი იშვიათად არის ერთგული და პროგნოზირებადი, მაგრამ სიყვარულში ამ თანავარსკვლავედის წარმომადგენლები მაინც ახერხებენ გარკვევას.

სიყვარული თევზებისთვის - ეს, პრაქტიკულად, მშობლიური სახლია, სამყოფელი, სტიქია, თუ ისინი შეყვარებული არ არიან, ბედნიერს მათ ვერ უწოდებ. სიყვარულში მამაკაცი-თევზი ბედნიერებით არის აღსავსე. ის აღმერთებს საყვარელ ქალს, თუნდაც მას ის თვისებები არ გააჩნდეს, რომელიც მამაკაცს ქალში მოსწონს. საწინააღმდეგოს მტკიცებას აზრი არა აქვს - ვარდისფერ სათვალეზე ის უარს არ იტყვის. ის ბედნიერია თავის ილუზიებში და უარს ამბობს სინამდვილის მიღებაზე, რათა იმედი არ გაუცრუვდეს.

სწორედ ამიტომ ძალიან რთულია მამაკაც-თევზთან ურთიერთობების გაწყვეტა. ის ძალიან განიცდის თავის გრძნობებს და სახალხოდ შეუძლია ამაზე ისაუბროს. ერთადერთი, რასაც მისი იმედგაცრუება შეუძლია, ისაა, თუ ქალი არ წაახალისებს და სტიმულს არ მისცემს მის სიყვარულს. ამ შემთხვევაში ყველაფერი სავალალოდ დასრულდება - თევზ მამაკაცს თავისი თავიც უყვარს და სიცივეს ვერ აიტანს. როდესაც ქალისგან დიდი ხნის განმავლობაში ვერ იღებს საჭირო შეგრძნებებს, ის სხვის საძებნელად მიდის. მტკიცე ურთიერთობების აგება თევზ მამაკაცთან შეუძლიათ თხის რქებს, კუროებსა და მორიელებს.

24657
თემები:
ასტროლოგიური პროგნოზი ზოდიაქოს თითოეული ნიშნისთვის (186)
საპატრულო პოლიცია

როგორ ისჯება პოლიციელის მოთხოვნის შეუსრულებლობა და მისთვის წინააღმდეგობის გაწევა

82
(განახლებულია 19:06 10.05.2021)
ნებისმიერ ჩვენგანს შესაძლოა მოუწიოს პოლიციასთან ურთიერთობა, რა დროსაც მოქალაქეების დიდი ნაწილი იბნევა და არ იცის როგორ მოიქცეს. ეს ლოგიკურიცაა – ყველა ადამიანი იურისტი არ არის, ამიტომ საკუთარი უფლებების ცოდნა ძალიან მნიშვნელოვანია.

დღევანდელ სტატიაში იპოვით პასუხებს იმ ძირითად კითხვებზე, რაც სამართალდამცველებთან ურთიერთობისას შეიძლება დაგვჭირდეს – როგორი ფორმით შეიძლება მოგვიხდეს პოლიციასთან ურთიერთობა, რას ნიშნავს სპეციალური საპოლიციო კონტროლი, სად შეიძლება გავასაჩივროთ პოლიციის ქმედებები, რა ჯარიმა დაგვეკისრება, თუ მათ მოთხოვნებს არ დავემორჩილეთ და ა.შ.

პოლიცია საგანგებო სამართალდამცველი სახელმწიფო სტრუქტურების სისტემაა, რომლის უმთავრესი ფუნქცია საზოგადოების უსაფრთხოებისა და მართლწესრიგის დაცვაა.

სამართალდამცველები ვალდებული არიან, განახორციელონ როგორც პრევენციული ღონისძიებები, ასევე მოახდინონ სამართალდარღვევებზე რეაგირება. მათ ასევე ევალებათ, პატივი სცენ ადამიანის უფლებასა და თავისუფლებას.

რა სახის ღონისძიებებს ახორციელებს პოლიცია საზოგადოებრივი უსაფრთხოებისა და მართლწესრიგის დასაცავად:

პოლიცია, თავისი კომპეტენციის ფარგლებში, ისეთ პრევენციულ ღონიძიებებს ახორციელებს, როგორიცაა: პირის გამოკითხვა და იდენტიფიკაცია, ზედაპირული შემოწმება და დათვალიერება, სპეციალური საპოლიციო კონტროლი, პირის ან სატრანსპორტო საშუალების გადაადგილების შეზღუდვა, ნივთის ფაქტობრივი ფლობის უფლება და ა.შ.

სამსახურებრივი მოვალეობის შესრულების დროს პოლიცია ვალდებულია მოქალაქეს წარუდგინოს თავისი უფლებამოსილების დამადასტურებელი დოკუმენტი, თუ ვიზუალურად, გარეგნული ნიშნებით შეუძლებელია მისი, როგორც პოლიციელის იდენტიფიცირება.

პოლიციელი უფლებამოსილია, რომ საზოგადოებრივი უსაფრთხოების დაცვის მიზნით დაადგინოს ნებისმიერი მოქალაქის ვინაობა, ამ მიზნით მას შეუძლია გააჩეროს მოქალაქე, გამოკითხოს პერსონალური მონაცემები და მოსთხოვოს პირადობის დამადასტურებელი დოკუმენტების წარდგენა.

პოლიცია ასევე უფლებამოსილია გამოკითხოს პირი, თუ ამისთვის არსებობს საკმარისი საფუძველი.

რას ნიშნავს სპეციალური საპოლიციო კონტროლი

სიტყვები „საპოლიციო კონტროლი“ ხშირად გვესმის სატელევიზიო ეთერებიდან. პირის, ნივთის ან სატრანპორტო საშუალების სპეციალური საპოლიციო კონტროლი ხორციელდება იმ შემთხვევაში, თუ არსებობს საკმარისი საფუძველი ვარაუდისთვის, რომ ჩადენილია ან ახლო მომავალში შესაძლოა ჩაიდინონ დანაშაული. ამისათვის პოლიციის მიერ ხორციელდება შემოწმება წინასწარ შერჩეულ ტერიტორიაზე განსაზღვრული დროის განმავლობაში.

სპეციალური საპოლიციო კონტროლის შესახებ გამოიცემა ბრძანება შინაგან საქმეთა მინისტრის მიერ. თუ გადაუდებელი აუცილებლეობაა, ეს ბრძანება შეიძლება ზეპირი ფორმითაც გამოიცეს, თუმცა უფლებამოსილი პირი ვალდებულია 24 საათის განმავლობაში უზრუნველყოს ამ ბრძანების წერილობითი ფორმით გამოქვეყნება.

სპეციალური საპოლიციო კონტროლის განხორციელებისას კანონი ადგენს იმპერატიულ მოთხოვნას, რომ პოლიციელი უნდა იყოს ფორმის ტანსაცმელზე დამაგრებული ჩართული ვიდეოგადამღები ტექნიკით.

რას ავალდებულებს ეთიკის კოდექსი პოლიციელს მოქალაქესთან ურთიერთობისას

სამართალდამცველს დაწესებული აქვს მაღალი ეთიკური სტანდარტები. კერძოდ, მას ეკისრება ვალდებულება, რომ მოქალაქეებთან ურთიერთობისას იყოს ტაქტიანი, თავაზიანი და კეთილგანწყობილი. მან მოქალაქის მიმართ წაყენებული მოთხოვნები თუ შენიშვნები უნდა გამოთქვას მშვიდად, ზრდილობიანი ფორმით, მოქალაქეს უნდა მისცეს საკუთარი მოსაზრების გამოთქმის საშუალება. პოლიციელის მხრიდან დაუშვებელია ქედმაღლური ტონით მიმართვა, მუქარა, ირონია და ჟარგონის გამოყენება.

გარდა ამისა, სამსახურებრივი მოვალეობის შესრულების დროს, მოქალაქესთან ურთიერთობისას, პოლიციელს კატეგორიულად ეკრძალება სიგარეტის მოწევა, საღეჭი რეზინის ღეჭვა, მობილურ ტელეფონზე საუბარი, მანქანიდან საუბარი, მზის სათვალის ტარება და მოუწესრიგებელ მდგომარეობაში ყოფნა.

როგორ ისჯება პოლიციელისთვის წინააღმდეგობის გაწევა

ამ მიმართულებით ორი მომენტი გამოიყოფა:

1. ადმინისტრაციულ სამართალდარღვევათა კოდექსით გათვალისწინებული სანქცია;

2. სისხლის სამართლის კოდექსით გათვალისწინებული სანქცია.

ადმინისტრაციულ სამართალდარღვევათა კოდექსის მიხედვით (მუხლი 173), სამსახურებრივი მოვალეობის შესრულების დროს პოლიციის თანამშრომლის კანონიერი განკარგულებისადმი, ან მოთხოვნისადმი დაუმორჩილებლობა, ასევე მისი სიტყვიერი შეურაცხყოფა, ან მის მიმართ სხვა შეურაცხმყოფელი ქმედებების განხორცილება - გამოიწვევს დაჯარიმებას 1000 ლარიდან 4 ათას ლარამდე ოდენობით, ანდა საქმის კონკრეტული ვითარების გათვალისწინებით, სანქცია შეიძლება იყოს ადმინისტრაციული პატიმრობა 15 დღემდე ვადით. გარდა ამისა, სამართალდამრღვევს შესაძლოა ჩამოერთვას იარაღის ტარების უფლება სამ წლამდე ვადით.

გარდა ამისა, პოლიციის თანამშრომლის მიმართ ძალადობრივ ქმედებებზე არსებობს სისხლის სამართლებრივი პასუხისმგებლობაც. სისხლის სამართლის კოდექსი (მუხლი 353) ადგენს, რომ პოლიციელის მიმართ წინააღმდეგობა, საზოგადოებრივი წესრიგის დაცვისათვის ხელის შეშლის, მისი საქმიანობის შეწყვეტის ან შეცვლის მიზნით, აგრეთვე აშკარად უკანონო ქმედებისთვის მისი იძულება, თუ ეს ქმედებები ჩადენილი იქნა ძალადობით, ან ძალადობის მუქარით, დაისჯება ჯარიმით ან შინაპატიმრობით ვადით ექვსი თვიდან ორ წლამდე, ანდა თავისუფლების აღკვეთით, რომლის ვადა განსაზღრულია კანონით ორიდან ხუთ წლამდე.

იმ შემთხვევაში, თუ ადგილი ჰქონდა პოლიციელზე ან მისი ოჯახის წევრზე, ან მის სამსახურებრივ ან საცხოვრებელ შენობაზე, ან მის სატრანპორტო საშუალებაზე თავდასხმას, მაშინ სასჯელის სახით გათვალისწინებულია თავისუფლების აღკვეთა ოთხიდან შვიდ წლამდე ვადით.

იმ შემთხვევაში, თუ პოლიციელის, ან მისი ოჯახის წევრის ჯანმრთელობის ხელყოფა მოხდება, მიუხედავად დაზიანების ხარისხისა, მის სამსახურებრივ საქმიანობასთან დაკავშირებით, სასჯელის ზომა იქნება თავისუფლების აღკვეთა შვიდიდან 11 წლამდე.

ხოლო თუ ადგილი აქვს პოლიციელის, ან მისი ოჯახის წევრის სიცოცხლის მოსპობას მის სამსახურებრივ საქმიანობასთან დაკავშირებით, მაშინ სასჯელის ზომა არის 16-დან 20 წლამდე ვადით თავისუფლების აღკვეთა და შესაძლოა დამნაშავეს მიესაჯოს უვადო თავისუფლების აღკვეთაც.

სად შეიძლება გავასაჩივროთ პოლიციელის ქმედება

მოქალაქე, რომელიც მიიჩნევს, რომ პოლიციელის ქმედებით მისი უფლებები დაირღვა, უფლებამოსილია კანონმდებლობით დადგენილი წესით გაასაჩივროს უკანონო ქმედება ზემდგომ თანამდებობის პირთან შინაგან საქმეთა სამინისტროს სისტემაში, ასევე პროკურატურაში, ან სასამართლოში.

პოლიციელის საქმიანობის, კანონიერებისა და ეთიკის ნორმებთან შესაბამისობას აკონტროლებს შინაგან საქმეთა სამინისტროში არსებული სპეციალური დანაყოფი - გენერალური ინსპექცია, რომლის ცხელი ხაზის ნომერია 126.

 

82
დიეტა

მათთვის, ვინც დიეტაზეა, მაგრამ წონაში მაინც ვერ იკლებს

220
(განახლებულია 18:36 09.05.2021)
თუ საუზმობთ ფინჯანი ყავით, სადილობთ ბუტერბროდით, ხოლო ვახშამზე კუჭისთვის ზეიმს აწყობთ, კალორიულობის მთელი დღის ნორმა რომც დაიცვათ, წონაში მაინც ვერ დაიკლებთ.

ძალიან ხშირად ვიცავთ დიეტას, ნაკლებს ვჭამთ, ვვარჯიშობთ, მაგრამ ჩვენს კილოგრამებს მაინც არაფერი აკლდება. თუ ეს ერთი თვის განმავლობაში და მეტხანს გრძელდება, მაშინ ამის მიზეზი სხვაგან უნდა ვეძებოთ. ჩვენ გთავაზობთ რჩევებს, თქვენ კი ყურადღებით წაიკითხეთ. იმედია, ეს დაგეხმარებათ გაარკვიოთ, რატომ არ იკლებთ წონაში. როდესაც მიზეზი ცნობილია, პრობლემასთან გამკლავებაც ადვილია.

•    ვერ დაიკლებთ წონაში, თუ ფარისებრი ჯირკვლის ფუნქცია დარღვეულია და ჰიპოთირეოზი გაქვთ. ჰიპოთირეოზის პირველი სიმპტომებია დაღლილობა, უგუნებობა, აპათია. შეიძლება იფიქროთ, რომ მუდმივი გადაღლილობა ან უგუნებობა გაზაფხულის ბრალია, მაგრამ ყველაფერს მას ნუ დააბრალებთ, ეწვიეთ ექიმს, ჩაიტარეთ ანალიზი.

•    ყურადღება მიაქციეთ: თუ თქვენს ცხოვრებაში ბოლო დროს სულ პოზიტიური მოვლენები ხდება, ყველა გაქებთ, თქვენით აღფრთოვანებული არიან, საყვარელი ადამიანი ხელისგულზე გატარებთ, უფროსი ქებას არ იშურებს — ეს ძალიან კარგია, მაგრამ ამ კეთილდღეობისა და სიმშვიდის შეგრძნებამ შესაძლოა მეტაბოლიზმი დაგიქვეითოთ. ადამიანებს, რომლებიც ე.წ. პოზიტიურ სტრესს განიცდიან, უფრო აქტიური ნივთიერებათა ცვლა აქვთ და ისინი უფრო ადვილად იკლებენ წონაში, ვიდრე სრული სიმშვიდის მდგომარეობაში მყოფი ადამიანები. პოზიტიური სტრესია ფიზიკური დატვირთვის, რეალური ადამიანების ან წიგნებისა და ფილმების გმირების ემოციური თანაგრძნობით, უსაფრთხო მწვავე შეგრძნებებით მიღებული სტრესი.

•    თუ წონაში ვერ იკლებთ, საგულდაგულოდ შეამოწმეთ საკვები, ხომ არ „შეიპარა“ თქვენი კვების რაციონში ფსევდოდიეტური საკვები, მაგალითად, ჩირი ან ანანასი, რომლებიც არც ისე უვნებელია, როგორც თქვენ გგონიათ.

•    ცნობილია, რომ ჯანსაღი ძილი კარგია ჯანმრთელობისთვის, კანისა და ზოგადი განწყობისთვის, მაგრამ იცით, რომ ის წონაზე უშუალოდ მოქმედებს? ძალების აღსადგენად ორგანიზმს დღე-ღამეში არანაკლებ შვიდი საათი ძილი ესაჭიროება. ნაკლები დასვენების დროს ორგანიზმს ენერგია არ ჰყოფნის. ენერგიის გამომუშავება ორგანიზმს ცხიმების დანაწევრებით შეუძლია, ხოლო დასანაწევრებელი რომ ჰქონდეს, ამისთვის ორგანიზმი ცხიმს აგროვებს. მიაქციეთ ყურადღება, გამოუძინებელი ხომ არ ხართ?

•    თუ საუზმობთ ფინჯანი ყავით, სადილობთ ბუტერბროდით, ხოლო ვახშამზე კუჭისთვის ზეიმს აწყობთ, კალორიულობის მთელი დღის ნორმა რომც დაიცვათ, წონაში მაინც ვერ დაიკლებთ. კალორიულობა ასე დაითვალეთ: რასაც 12 საათამდე მიიღებთ, ორზე გაყავით, 12-დან 18 საათამდე დაითვალეთ ისე, როგორც არის, ხოლო 18 საათიდან მიღებული კალორიები ორზე გაამრავლეთ — მარტივია!

•    მუდმივად შიმშილის გრძნობა ხომ არ გაწუხებთ? თუ გგონიათ, იმიტომ გშიათ, რომ ცოტას ჭამთ, ცდებით! თუ შიმშილის გრძნობა გაქვთ, ესე იგი, წონაში იმატებთ. ორგანიზმმა ზუსტად იცის, რომ შიმშილი ცუდია, ეს სიგნალია, რომ ცუდი დრო დადგა და გადასარჩენად ცხიმი უნდა მოიმარაგოს.

•    ცხიმის მარაგი ორგანიზმს მარტო აქტიურობის შესანარჩუნებლად არ სჭირდება. ეს მას სიცივისგან დაცვაშიც ეხმარება. თუ ძალზე მსუბუქად გაცვიათ და ამ დროს ბინა და სამსახურის ოფისი კარგად არ თბება, ორგანიზმმა შეიძლება ცხიმის დაგროვება დაიწყოს, რათა შინაგანი ორგანოების ნორმალური მუშაობა უზრუნველყოს. გაითვალისწინეთ, რომ რაც უფრო ნაკლებია ტემპერატურა, მით უფრო ნელა ფუნქციონირებს სისტემა.

•    ორგანიზმს შიდა ნორმის განმსაზღვრელი „მრიცხველი“ აქვს — ის იმ წონას „აჩვენებს“, რომელიც თქვენთვის ნორმალურია. საკუთარი წონის ნორმის გარკვევაში სხეულის მასის ინდექსი დაგეხმარებათ: წონა/სიმაღლე² (სანტიმეტრებში). ნორმალური ინდექსი 18,5-24,9-ის ფარგლებშია. თუ შედეგი 18,5-ზე ნაკლებია, მაშინ თქვენი გახდომა უბრალოდ საშიში კი არა, არამედ ძალიან საშიშია, რასაც შესაძლოა ფატალური შედეგიც კი მოჰყვეს.

•    თუ შეკრულობა გაწუხებთ, მაშინ წონის დაკლების პრობლემა თქვენი ნაწლავების სისავსით არის გამოწვეული. დალიეთ მეტი წყალი და მიირთვით მეტი ბოჭკოვანი მცენარეები, ეს ვითარებას მალე და ადვილად გამოასწორებს.

    ზედმეტად ხომ არ ვარჯიშობთ? გამორიცხული არ არის – თქვენი წონა სტაბილური იმიტომაა, რომ უფრო მსუბუქი ცხიმი უფრო მძიმე კუნთებმა ჩაანაცვლა. ანუ, მოცულობა მცირდება, მაგრამ კილოგრამები — არა. მაგრამ განა მთავარი სასწორზე ნაჩვენები კილოგრამებია?

ჯანმრთელობას, წონაში დაკლებასა და წარმატებებს გისურვებთ!

220
თემები:
სასარგებლო რჩევები
ბათუმის ბოტანიკური ბაღი

დღის ასტროპროგნოზი ზოდიაქოს ნიშნებისთვის: 11 მაისი

0
(განახლებულია 09:16 10.05.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 11 მაისია, სამშაბათი. ახალმთვარეობა კუროს ნიშანშია. ამ დღეს პლანეტა მარსი მფარველობს.

დღეს გრძნობები გაბატონდება გონებაზე. თუ ნეგატივს ავყვებით და გულში წყენას შევუშვებთ, ის ღრმა კვალს დატოვებს დიდი ხნით. და თუ პოზიტიურ მომენტებზე შევაჩერებთ გულისყურს და უარყოფით წვრილმანებს არ მივაქცევთ ყურადღებას, დღე ძალიან პროდუქტიული იქნება, ამ დღისთვის დამახასიათებელი ენერგიულობა, შრომისუნარიანობა წარმატებების კარს გახსნის.

რას ნანობენ ზოდიაქოს ნიშნები?>>

ვერძი: დღევანდელი დღე მოითხოვს, რომ ფინანსური საკითხები მოაგვაროთ. ეს არ ნიშნავს, რომ ამ თვალსაზრისით პრობლემები შეიძლება შეგექმნათ, უბრალოდ ფულთან დაკავშირებული საკითხები ყურადღებას მოითხოვს. კარგი დღეა იმისთვის, რომ გაერკვიოთ თქვენს ბიუჯეტში, დაითვალოთ შემოსავლები და შეადგინოთ ბიზნეს–გეგმა უახლოესი კვირების ან დღეებისთვის. თუ ამ რჩევას გაითვალისწინებთ, მოგებაში დარჩებით.

კურო: იმდენად შრომისუნარიანი ხართ, რომ ეს თავადაც გაგაკვირვებთ, არამცთუ კოლეგებსა და ახლობლებს. ნებისმიერ პრობლემაში ძირეულად გაერკვევით და მისი გადასაჭრელად უნივერსალურ გასაღებს მოძებნით. სამეცნიერო ძიებანი, სწავლა და ნებისმიერი სამუშაო, რომელიც ყურადღებასა და მოთმინებას მოითხოვს, დღე ისე იოლად გამოგივათ, როგორც არასდროს. ერთადერთი – განწყობამ შეიძლება ხელი შეგიშალოთ და გამოამჟღავნოთ გაღიზიანება მათ შორის უმიზეზოდაც.

ტყუპი: ვარსკვლავები გირჩევენ, რომ დღეს გარშემომყოფების მხრიდან დიდ ყურადღებას მოერიდოთ. არ ხართ იმგვარ განწყობაზე, რომ თავი საუკეთესო მხრიდან წარმოაჩინოთ, ამიტომ, თუ დრო ამის საშუალებას გაძლევთ, დაელოდეთ. სამაგიეროდ იდეალური დღეა იმისთვის, რომ მომავალ წარმატებას საძირკველი მოუმზადოთ. იმუშავეთ საკუთარ პროექტზე, მოამზადეთ საჭირო მასალები, მოიფიქრეთ არგუმენტები და როდესაც ყურადღების ცენტრში აღმოჩენის დრო დადგება, ყველას გაოცებას შეძლებთ.

კირჩხიბი: ერთნაირად ხელსაყრელი დროა საქმიანი და პირადი შეხვედრებისთვის. ბევრთან შეგიძლიათ კონტაქტის დამყარება, იცით, რას გრძნობენ ადამიანები. ახალი ნაცნობობით შეიძლება სათავე დაედოს მეგობრულ ან რომანტიკულ ურთიერთობებს. ეს ბევრად იქნება დამოუკიდებული იმაზე, მოისურვებთ თუ არა ინიციატივის გამოჩენას. საღამოს სასიამოვნო სიურპრიზები გელოდებათ. შესაძლებელია მოულოდნელი შეხვედრა ადამიანთან, რომელიც ძალიან მოგენატრათ.

ლომი: აუცილებელია მუშაობა, მაგრამ სამუშაო გარემოს შექმნა შეიძლება გაგიჭირდეთ. დღე თქვენგან ყურადღების კონცენტრაციასა და დაგროვებულ საქმეებთან გამკლავებას მოითხოვს. მზად ხართ, თავი აჩვენოთ, მაგრამ გარშემომყოფები ხშირად ამოგაგდებენ კალაპოტიდან და ხელს შეგიშლიან. ყველაფერი ისე რომ გააკეთოთ, როგორც დაგეგმილი გაქვთ, დროებით მაინც უნდა გაერიდოთ ხმაურსა და ორომტრიალს, მოძებნოთ წყნარი ადგილი – სულ ეს გჭირდებათ იმისთვის, რომ საქმეები ფრიადზე შეასრულოთ.

ქალწული: გულწრფელი ურთიერთობების დიდი სურვილი გაგიჩნდებათ. ჩვეულებრივმა საქმიანმა საუბრებმა, შესაძლოა, გაგაღიზიანოთ და დაპირისპირებებიც კი გამოიწვიოს. თუ ვინმეს ახლოს გაცნობა გსურთ, ვარსკვლავები გირჩევენ, ეს დღეს გააკეთოთ. არა აქვს მნიშვნელობა, ვინაა ეს ადამიანი – ახლობელი, კოლეგა თუ პარტნიორი. ისაუბრეთ მასთან გულახდილად, გაიგეთ, რას ფიქრობს ის და რისკენ ისწრაფვის. ეს შეიძლება თქვენ შორის განსაკუთრებული ურთიერთობების პირველი ნაბიჯი აღმოჩნდეს.

სასწორი: დღეს შეიძლება მოგეჩვენოთ, რომ მთელი ძალებით ცდილობთ კონფლიქტებს აარიდოთ თავი, მაგრამ კონფლიქტები თვითონ გეძებენ და გპოულობენ. დაპირისპირებები, წყენა ცარიელ ადგილზე – ეს ყველაფერი მოსალოდნელია იქ, სადაც თქვენ გაჩნდებით. სინამდვილეში კი გაუგებრობების მიზეზი თქვენ ხართ თქვენი გაძლიერებული ემოციებით და საკმარისია მცირე ნაპერწკალიც, რომ „ცეცხლი აგიზგიზდეს“. თუ არ გინდათ მთელი დღის კამათში გატარება, ყველა წვრილმანს ნუ გამოედევნებით.

მორიელი: ვარსკვლავები გირჩევენ, დღეს არანაირი გრანდიოზული ამოცანა არ დაისახოთ. ეს ის დღეა, როცა არ ღირს არაფრის დამტკიცება არც საკუთარი თავისა და არც სხვებისთვის. რაღაც საქმეები უკვე გაკეთებული გაქვთ, რაღაც კი მოიცდის. სჯობს, დაისვენოთ, მოდუნდეთ. მაგრამ თუ ერთ ადგილას ვერ ისვენებთ, ისეთი საქმე გააკეთეთ, რომელიც მინიმალურ სულიერ ძალას მოითხოვს. მაგალითად, მიხედეთ სახლის საკიტხებს, ან დიდი პროექტის ერთ რომელიმე ნაწილს.

მშვილდოსანი: დღეს თქვენი კონტაქტები გარშემომყოფებთან მინიმუმამდე იქნება დაყვანილი. და ამაში „დამნაშავე“ თავად თქვენ იქნებით. გაგიჭირდებათ ადამიანებთან ურთიერთობები. თუნდაც თავს ძალა დაატანოთ, ამისგან მაინც არაფერი გამოვა – ხართ გაღიზიანებული და ჩხუბის პროვოცირება შეგიძლიათ. აქედან გამომდინარე, ვარსკვლავები გირჩევენ, დღეს მხოლოდ საკუთარი თავის იმედი გქონდეთ და გააკეთოთ ის საქმეები, რომლებსაც მარტოც გაუმკლავდებით და სხვების დახმარება არ გჭირდებათ.

თხის რქა: დღეს ძირეულად შეიგრძნობთ ფრაზას „ცხოვრება თეატრია“, რადგან სწორედ თქვენ ითამაშებთ სპექტაკლში მთავარ როლს. შეგრძნება, რომ დგახართ პროჟექტორებით გაჩახჩახებულ სცენაზე, მთელი დღე გექნებათ და ეს შესაბამისად, ანუ დემონსტრაციულ მოქმედებას გაიძულებთ. უფრო მეტიც, შეიძლება ტრაგიკული როლიც მოირგოთ და მიანიშნოთ გარშემომყოფებს, თუ როგორ არ გაფასებენ და გიგებენ ისინი. ტრაგედია რომ კომედიად არ გადაიქცეს, ზედმეტიც არ მოგივიდეთ საკუთარი თავის შეცოდებაში.

მერწყული: წყნარი და მშვიდი დღე გელოდებათ, რომელიც სჯობს საოჯახო საზრუნავში ან სამომავლო გეგმების დაწყობაში გაატაროთ. დაასუფთავეთ და მოაწესრიგეთ სახლი და ამასთან, ფიქრებიც. არ გაწყენთ ბოლო ხანს გაკეთებული საქმეების შეჯამება და შემდეგ უახლოესი დროის მოქმედებების გეგმის შედგენა. ახლობელ ადამიანებთან დაპირისპირებას კი აუცილებლად უნდა მოერიდოთ – მცირე წყენაც კი მძიმე დაპირისპირებაში შეიძლება გადაიზარდოს.

თევზები: დღეს მომატებული ცნობისმოყვარეობა და სხვისი საიდუმლოს გაგების სურვილი მოგეძალებათ. თუ ჩვეულებრივ დღეებში მაინცდამაინც არ გაწუხებთ, თუ რას მალავენ გარშემომყოფები თქვენგან, ახლა მზად ხართ, ამის გასაგებად ძალ–ღონე არ დაიშუროთ. სხვათა შორის, სიტუაცია შეიძლება ისე აეწყოს, რომ უნებურად სხვისი საიდუმლო შეიტყოთ ან საკუთარი შემთხვევით წამოგცდეთ. ეს რომ არ მოხდეს, ენას კბილი უნდა დააჭიროთ და ჭორიკანა ადამიანებს გვერდი აუაროთ.

0