გოგრა

გოგრის თესლი - მრავალი დაავადების მკურნალი

27359
(განახლებულია 12:20 11.12.2017)
ძალზე სასარგებლოა რაციონში გოგრის თესლის ჩართვა - ის თუთიის სრულფასოვანი საბადოა, რომელიც ასე ესაჭიროება განსაკუთრებით მამაკაცის ორგანიზმს, მის სქესობრივ სისტემას

გოგრის სამშობლოა სამხრეთ ამერიკა. გოგრის თესლი პირველად არქეოლოგებმა მექსიკის გამოქვაბულებში აღმოაჩინეს და დაადგინეს, რომ მას ჯერ კიდევ ჩვენს წელთ აღრიცხვამდე 7000 წლის წინ იყენებდნენ. ამერიკელი ინდიელები გოგრის რბილობსა და თესლს უკვე იმ დროს იყენებდნენ დიეტური და სამკურნალო კერძების დასამზადებლად. დღესდღეობით გოგრა პრაქტიკულად ყველა ქვეყანაში მოჰყავთ და მთლიანობაში, მისი 900-მდე სახეობაა გავრცელებული.

გოგრის თესლი ძალზე სასარგებლო პროდუქტია, ის მრავალ დაავადებას შველის. თესლი რომ გემრიელი და ხარისხიანი მივიღოთ, ის სწორად უნდა მოვამზადოთ: გავასუფთავოთ ნაყოფისგან, გავრეცხოთ გამდინარე წყალში, შემდეგ გავაშროთ მზეზე ან სხვაგვარად. გოგრის თესლი დიდხანს არ ინახება — მაქსიმუმ ერთი თვე, თუ მჭიდროდ დახურულ ჭურჭელში და ცივ ადგილას მოვათავსებთ.

გოგრის თესლის სამკურნალო თვისებები:

• ძილის ნორმალიზება და დეპრესიის განვითარების რისკის შემცირება

• ჰიპერტონიული დაავადებების პროფილაქტიკა

• თირკმლისა და შარდსასქესო ორგანოების დაავადებების მკურნალობა

• დამწვრობისა და ჭრილობების მკურნალობა

• ცუდი ქოლესტერინის დონის შემცირება, ათეროსკლეროზის განვითარების პროფილაქტიკა

• კანის სილამაზე და ახალგაზრდული იერი, აბრკოლებს ნაოჭების წარმოქმნას

• ოსტეოპოროზის პროფილაქტიკა, სახსრების ართრიტის ანთების შემცირება

• პროსტატის პროფილაქტიკა

• ორგანიზმიდან ჭიებისა და სხვა პარაზიტების გამოდევნა

• გულის დაავადებებისგან დაცვა

• შაქრიანი დიაბეტის პროფილაქტიკა

• ნაწლავური სისტემის მუშაობის ნორმალიზება, ქრონიკული შეკრულობა

• ფარისებრი ჯირკვლის დაავადებების პროფილაქტიკა

• სისხლის ნორმალური შედედება

• მხედველობისა და ფერთა აღქმის გაუმჯობესება

• იმუნიტეტის ამაღლება

• როგორც მამაკაცის, ისე ქალის ჰორმონების გამომუშავების ხელშეწყობა

• კოგნიტური უნარების გაუმჯობესება, განსაკუთრებით — მეხსიერების

• პირღებინების პროფილაქტიკა — ავტომობილში, ზღვაზე, ასევე ორსულებისთვის ზომიერი რაოდენობით

• მამაკაცის უნაყოფობის პროფილაქტიკა — სპერმატოზოიდები უფრო მოძრავი ხდება, რაც ბავშვის ჩასახვის შანსს ზრდის

• ცილების მნიშვნელოვანი წყარო, რაც ძალიან წაადგებათ ვეგეტარიანელებსა თუ მათ, ვინც მარხვას ინახავს

გასათვალისწინებელია: გოგრის თესლისგან რომ მეტი სარგებელი მივიღოთ, ის ნედლი სახით უნდა გამოვიყენოთ. მოხალვის შედეგად ვიტამინებისა და მიკროელემენტების უდიდესი ნაწილი ნადგურდება. გოგრის თესლი უნდა გავფცქვნათ უშუალოდ მიღების წინ.

გოგრის თესლის შემადგენლობა

გოგრის თესლის შემადგენლობაშია სხვადასხვა ვიტამინი (В-ჯგუფის ყველა ვიტამინი, А, ასკორბინის მჟავა, Е, К), ამინომჟავა, მინერალი და ცხიმი. საშუალოდ, ის შეიცავს 8,2 გრამამდე წყალს, 13,4 გრამამდე ნახშირწყლებს, 24,5 გრამამდე ცილებს, 25,7 გრამამდე ცხიმებს და 4,1 გრამამდე უჯრედისს.

გოგრის თესლი შეიცავს თუთიას, რკინას, მაგნიუმს, ფოსფორს, მანგანუმს.

100 გრამი გოგრის თესლის მიღებით ორგანიზმი იღებს თუთიის სადღეღამისო აუცილებელი ნორმის 80%-ს, მაგნიუმის 160%-ს, მანგანუმის 130%-სა და კალიუმის 40%-ს.

კალორიულობა

გოგრის თესლი საკმაოდ მაღალკალორიული პროდუქტია — 100 გრამი — 559 კკალორია.

გოგრის თესლი მამაკაცებისთვის

მამაკაცებისთვის ძალზე სასარგებლოა რაციონში გოგრის თესლის ჩართვა — ის თუთიის სრულფასოვანი საბადოა, რომელიც ასე ესაჭიროება მამაკაცის ორგანიზმს, მის სქესობრივ სისტემას. თავი რომ დაიცვან წინამდებარე ჯირკვლის ადენომისგან, მათ დღეში დაახლოებით გოგრის 50 ცალი თესლი უნდა მიიღონ.

გარდა ამისა, თუთია ტესტოსტერონის — მამაკაცის მთავარი ჰორმონის მოლეკულის ნაწილია. თესლის შემადგენლობაში შემავალი მიკროელემენტები ზრდიან სპერმატოზოიდების მოძრაობას, რაც მამაკაცის უნაყოფობის შესანიშნავი პროფილაქტიკაა.

ასევე სასარგებლოა გოგრის თესლი ალოპეციის (თმის ცვენა) დროს. თესლი აძლიერებს თმის ძირებს. ასევე, თესლში შემავალი თუთია ებრძვის ქერტლს, რომელიც სოკოვანი დაავადება და არა უბრალოდ კოსმეტიკური დეფექტი.

დამტკიცებულია, რომ მამაკაცები ქალებზე უფრო ადრე ავადდებიან ათეროსკლეროზით, რომელიც ინფარქტსა და ინსულტს იწვევს. გოგრის თესლის გამოყენება ამ პროცესის შეჩერებას უწყობს ხელს; ასევე ამცირებს სისხლში ქოლესტერინის დონეს.

გოგრის თესლი ქალებისთვის

ქალებისთვის გოგრის თესლი სასარგებლოა როგორც სილამაზის, ისე ჯანმრთელობის შესანარჩუნებლად.

ცნობილია, რომ ქალებს უფრო ხშირად აქვთ ოსტეოპოროზი, ვიდრე მამაკაცებს. კალციუმის ორგანიზმიდან გამოდევნა განსაკუთრებით 45 წლის შემდეგ აქტიურდება. გოგრის თესლში შემავალ მინერალებს ამ პროცესის შეჩერება შეუძლია.

ქალების კიდევ ერთი გახშირებული პრობლემაა სისხლნაკლებობა. რადგან გოგრის თესლი რკინის ერთგვარი საბადოა, ქალებისთვის დღეში 100 გრამის მიღება საკმარისია, რომ ამ მიკროელემენტის დღიური ნორმა შეივსონ.

გარდა ამისა, გოგრის თესლი ამაგრებს თმასა და ფრჩხილებს, ებრძვის ნაოჭებს, კანს სილამაზეს ანიჭებს, ხსნის მიკროანთებას. ცხიმოვანი მჟავები კანს შიგნიდან ატენიანებენ, აბრკოლებენ თმის ცვენას და ქერტლის გამომწვევი მიზეზების მოშორებას უწყობენ ხელს.

გოგრის თესლი სასარგებლოა ქალებისთვის მენოპაუზის დროს, რადგან მასში შემავალი ფიტოესტროგენები ხელს უწყობს განწყობის ნორმალიზებას, ებრძვის დეპრესიას, აუმჯობესებს ძილს, ხსნის თავისა და სახსრების ტკივილს.

რეცეპტები

პროსტატის სამკურნალოდ: ნახევარ კგ გოგრის თესლს ფქვავენ და ურევენ 200 გრამ თაფლში (თაფლი დაშაქრული არ უნდა იყოს). ნარევი შესქელებისთვის უნდა მოთავსდეს მაცივარში. შემდეგ მისგან მზადდება პატარა, თხილისოდენა ბურთები. მიღების წესი — უზმოდ 1-3 ბურთი უნდა ნელ-ნელა მიიღოთ, პირში დნობით. კურსის ხანგრძლივობა — 1 თვე.

ძილის მოსაწესრიგებლად, ნერვული დაძაბულობის მოსახსნელად: სამ სუფრის კოვზ გოგრის თესლს დაასხით 0,3 მლ წყალი, მიიყვანეთ ადუღებამდე და გააჩერეთ დაბალ ცეცხლზე 4 წუთი, შემდეგ გადაწურეთ. მიიღეთ მეოთხედი ჭიქა ნახარში ძილის წინ, ძლიერი ემოციური დაძაბულობის დროს.

გოგრის თესლი მავნებელია დიდი რაოდენობით:

• პროდუქტი ძალზე კალორიული და დღეში 140 გრამზე მეტის მიღებამ შეიძლება წონის მატება გამოიწვიოს

• საკვებში მარილიანი და მოხალული თესლის გამოყენებამ შეიძლება გამოიწვიოს სახსრების მოძრაობის შეზღუდვა და უმოძრაობა

• ასევე, შესაძლებელია კბილის ემალის დაზიანება, ამიტომ თესლი ხელით გაარჩიეთ და არა კბილით.

გოგრის თესლის გამოყენება არ შეიძლება:

• საჭმლის მომნელებელი ორგანოების დაავადებების გამწვავების სტადიაში

• ინდივიდუალური აუტანლობა, ალერგია

• ზედმეტი წონა

 

27359
თემები:
სასარგებლო რჩევები -2018 (201)
ვიდეოკამერა

ფრთხილად, გითვალთვალებენ! ყველაფერი, რაც ვიდეოთვალთვალის შესახებ უნდა იცოდეთ

77
(განახლებულია 10:10 28.02.2021)
ბევრი მიიჩნევს, რომ ვიდეოთვალთვალი პირად ცხოვრებაში ჩარევის ერთ-ერთ ყველაზე რადიკალური ფორმაა.  თუმცა, თანამედროვე სამყაროში ის უკვე მონაცემთა დამუშავების საკმაოდ გავრცელებული და კანონით ნებადართული საშუალებაა.

ვითეოთვალთვალი რომ არ იქცეს ადამიანის პირად ცხოვრებაში ჩარევად,  მისი გამოყენებისას აუცილებლად უნდა იყოს გათვალისწინებული  კანონით დადგენილი კონკრეტული წესები და რეგულაციები.

დღევანდელ სტატიაში აგიხსნით, რა არის ვითეოთვალთვალი, რა მიზნებისთვის და სად შეიძლება გამოიყენონ, ვის მიუწვდება ხელი ვიდეოჩანაწერებზე, როდის უნდა გადადგურდეს ისინი და ა.შ.

როგორც ზემოთ აღვნიშნეთ, ვიდეოთვალთვალი მონაცემთა დამუშავების საკმაოდ გავრცელებული და კანონით ნებადართული საშუალებაა. საქართველოში მის გამოყენებას „პერსონალურ მონაცემთა დაცვის შესახებ“ კანონი არეგულირებს.

სად შეიძლება განხორციელდეს ვიდეოთვალთვალი:

- ქუჩასა (ტერმინი ქუჩა მოიცავს პარკს, სკვერს, სათამაშო მოედანს, საზოგადოებრივი ტრანსპორტის გაჩერებას და სხვა თავშეყრის ადგილს)  და საზოგადოებრივ ტრანსპორტში

- საჯარო და კერძო დაწესებულებებში

- საცხოვრებელ შენობებში

რა მიზნით შეიძლება განხორციელდეს ვიდეოთვალთვალი:

იმის მიხედვით, თუ სად მიმდინარეობს ვიდეოთვალთვალი, განსხვავებულია მისი მიზნებიც. კერძოდ,

ქუჩასა და საზოგადოებრივ ტრანსპორტში ვიდეოთვალთვალი დასაშვებია მხოლოდ შემდეგი მიზნების მისაღწევად:

- დანაშაულის თავიდან აცილება;

- პირის უსაფრთხოებისა და საკუთრების დაცვა;

- საზოგადოებრივი წესრიგის დაცვა;

- არასრულწლოვანთა მავნე ზეგავლენისაგან დაცვა.

 საჯარო და კერძო დაწესებულებათა შენობების ვიდეოთვალთვალი დაიშვება შემდეგი მიზნით:

- პირის უსაფრთხოების და საკუთრების დაცვა;

- არასრულწლოვანის მავნე ზეგავლენისაგან დაცვა;

- საიდუმლო ინფორმაციის დაცვა.

- გამოცდის ან ტესტირების მიზნებისთვის

საცხოვრებელ შენობაში ვიდეოთვალთვალის სისტემის გამოყენება დასაშვებია მხოლოდ

- პირისა და ქონების უსაფრთხოების მიზნებისათვის.

როდესაც ქუჩაში  ან  საზოგადოებრივ ტრანსპორტში მიმდინარეობს ვიდეოთვალთვალი, საჯარო და კერძო დაწესებულებები ვალდებული არიან, თვალსაჩინო ადგილას განათავსონ შესაბამისი გამაფრთხილებელი ნიშანი. ამ შემთხვევაში პირი ინფორმირებულია იმის შესახებ, რომ მის შესახებ მონაცემთა დამუშავება მიმდინარეობს.

რაც შეეხება საჯარო და კერძო დაწესებულებებში მონიტორინგს, ვიდეოთვალთვალის სისტემის მეშვეობით შესაძლებელია  მხოლოდ შენობის გარე პერიმეტრისა და შესასვლელის მონიტორინგის განხორციელება. მონაცემთა დამმუშავებელი ვალდებულია, თვალსაჩინო ადგილას განათავსოს შესაბამისი გამაფრთხილებელი ნიშანი. ამ შემთხვევაში მონაცემთა სუბიექტი მის შესახებ მონაცემთა დამუშავების თაობაზე ინფორმირებულად ითვლება.

კანონმდებლობა  სამუშაო ადგილზე ვიდეოთვალთვალის სისტემის დაყენებას  მხოლოდ გამონაკლის შემთხვევებში უშვებს: თუ ეს აუცილებელია პირის უსაფრთხოებისა და საკუთრების დაცვის, საიდუმლო ინფორმაციის დაცვის და გამოცდის/ტესტირების მიზნებისათვის და თუ ამ მიზნების სხვა საშუალებით მიღწევა შეუძლებელია.

თუ სამუშაო  ადგილას მაინც იყენებენ ვიდეოთვალთვალის სისტემას, შესაბამის კერძო ან საჯარო დაწესებულებაში დასაქმებული ყველა პირი წერილობითი ფორმით უნდა იყოს ინფორმირებული ვიდეოთვალთვალის განხორციელებისა და მისი უფლებების შესახებ.

გაითვალისწინეთ, ვიდეოთვალთვალის განხორციელება დაუშვებელია გამოსაცვლელ ოთახებსა და ჰიგიენისათვის განკუთვნილ ადგილებში.

საჯარო და კერძო დაწესებულებებათა შენობების ვიდეოთვალთვალის შემთხვევაში, მონაცემთა დამმუშავებელი ვალდებულია შექმნას ვიდეოჩანაწერების შენახვისათვის განკუთვნილი ფაილური სისტემა. ჩანაწერების (სურათები/ხმა) გარდა, სისტემა უნდა შეიცავდეს ინფორმაციას მონაცემთა დამუშავების თარიღის, ადგილისა და დროის შესახებ.

საცხოვრებელ შენობაში ვიდეოთვალთვალის სისტემის დასაყენებლად კი აუცილებელია ამ შენობის მესაკუთრეთა ნახევარზე მეტის წერილობითი თანხმობა. აუცილებელია, ვიდეოთვალთვალის სისტემის დაყენების შესახებ  ეცნობოთ შენობაში მცხოვრებთ.

კანონის მიხედვით, საცხოვრებელ შენობაში დაყენებული ვიდეოთვალთვალის სისტემის მეშვეობით შესაძლებელია განხორციელდეს მხოლოდ შესასვლელისა და საერთო სივრცის მონიტორინგი. მესაკუთრეთა ბინების მონიტორინგი იკრძალება. გასათვალისწინებელია, რომ ეს წესი არ ვრცელდება პირადი მიზნებისთვის მონაცემთა დამუშავებაზე და იმ შემთხვევაზე, როცა ბინის მესაკუთრე თავად ახორციელებს საკუთარ ბინაში ვიდეოთვალთვალს.

აღსანიშნავია, რომ ვიდეოთვალთვალის სისტემის მეშვეობით ბინის შესასვლელის მონიტორინგის განხორციელება დასაშვებია მხოლოდ ამ ბინის მესაკუთრის გადაწყვეტილებით ან მისი წერილობითი თანხმობის საფუძველზე.

ვიდეოთვალთვალის შედეგად მოპოვებულ მონაცემებზე ხელი უნდა მიუწვდებოდეთ მხოლოდ სათანადო უფლებამოსილების  მქონე პირებს. ვიდეოჩანაწერი კი უნდა ინახებოდეს მხოლოდ იმ განსაზღვრული ვადით, რაც საჭიროა კონკრეტული მიზნის მისაღწევად.

აღსანიშნავია, რომ კანონით განსაზღვრული მიზნების მისაღწევად ვიდეოთვალთვალი განხილულია სივრცისა თუ ქცევის მონიტორინგის როგორც ერთ–ერთ და არა ერთადერთი საშუალება. ვინაიდან ვიდეოთვალთვალი მიჩნეულია პირად ცხოვრებაში ჩარევის რადიკალურ ფორმად, აუცილებელია მონაცემთა დამმუშავებელმა გააანალიზოს საფრთხე და დაასაბუთოს ამ სისტემის გამოყენების აუცილებლობა, კერძოდ უნდა შეფასდეს:

- მონაცემთა დამმუშავებლის რეალური საჭიროება და მიზანი; 

-სისტემის გავლენა პირადი ცხოვრების ხელშეუხებლობის უფლებაზე;

- სხვა საშუალებებით მიზნის მიღწევის შესაძლებლობა.

ვიდეოთვალთვალის სისტემა გამოყენებული უნდა იყოს მხოლოდ კანონით განსაზღვრული მიზნით. დაუშვებელია მისი სხვა მიზნით გამოყენება

 

77
ჩვილი ბავშვი საფენში

შეიძლება თუ არა ჩვილის მუცელზე დაძინება? ევგენი კომაროვსკის პასუხი მშობლებს

184
(განახლებულია 21:34 26.02.2021)
მსოფლიოს ყველა ქვეყნის პედიატრიულ ასოციაციებს აქვთ მკაფიო პოზიცია, რომ ადრეულ ასაკში ბავშვის მუცელზე ძილი ზრდის ჩვილთა უეცარი სიკვდილის სინდრომის რისკს.

თბილისი, 26 თებერვალი — Sputnik. ჩვილი ბავშვების მუცელზე დაძინება რეკომენდებული არ არის, აცხადებს უმაღლესი კატეგორიის პედიატრი ევგენი კომაროვსკი.

ბავშვთა ცნობილ ექიმს ერთ–ერთმა მშობელმა ასეთი შეკითხვა დაუსვა: „თქვენ არ აძლევთ მშობლებს ბავშვების მუცელზე დაძინების რეკომენდაციას. მაგრამ როგორ მოვიქცეთ, თუ მას ასეთ მდგომარეობაში უკეთ სძინავს? ბევრჯერ ვცადე, რომ პოზა შეეცვალა, მაგრამ ის მაინც ისე წვება, როგორც მოსწონს, ანუ მუცელზე. სხვაგვარად როცა წევს, ხშირად იღვიძებს და კაპრიზობს. მშვიდდება მხოლოდ მაშინ, როცა მუცელზე წევს. იქნება მაინც მივცე მუცელზე ძილის საშუალება, რახან ასე ურჩევნია?“

ამაზე პასუხად ევგენი კომაროვსკი მშობელს წერს:

„მე უბრალოდ ვერ გეტყვით, რომ თქვენი ბავშვისთვის მუცელზე ძილი შეიძლება, ვინაიდან მისი ასაკი არ ვიცი. მსოფლიოს ყველა ქვეყნის პედიატრიულ ასოციაციებს აქვთ მკაფიო პოზიცია, რომ ადრეულ ასაკში ბავშვის მუცელზე ძილი ზრდის ჩვილთა უეცარი სიკვდილის სინდრომის  რისკს.

დიახ, მე — როგორც პედიატრი, რომლის ხელშიც ასობით ათას ბავშვს გაუვლია, ვადასტურებ, რომ ბავშვებს მუცელზე უკეთ სძინავთ, ვიდრე ზურგზე. მაგრამ სამედიცინო მეცნიერების თანახმად, მართალია, ასეთი ძილი უფრო მაგარია, მაგრამ ამავდროულად უფრო სარისკოცაა ბავშვის სიცოცხლის კუთხით, ვიდრე ზურგზე ძილი.

ამიტომ ექიმი ვერ დაგრთავთ ამის ნებას. ექიმი ყოველთვის გეტყვით, რომ ჩვილის მუცელზე დაძინებას რისკები ახლავს. ამიტომ, როცა ბავშვს (სულ ცოტა, ერთ წლამდე მაინც) მუცელზე აძინებთ, მთელი ეს რისკები თქვენს სინდისზე იქნება.

ერთადერთი, რაც შემიძლია გითხრათ ისაა, რომ: თუ ბავშვი არანაირად არ იძინებს ზურგზე, სძინავს მხოლოდ მუცელზე, ამ დროს კი უკვე იცით, რომ ეს სახიფათოა, შეგიძლიათ ორი ძირითადი მეთოდით შეამციროთ რისკები.

  • პირველი: საწოლში ბავშვის გარდა არაფერი არ უნდა იყოს. ანუ მხოლოდ მყარი და სწორი ზედაპირის მქონე ლეიბი — ბალიშების, პლედების, სათამაშოებისა და სხვა ნებისმიერი ნივთის გარეშე. ბავშვს უნდა ეცვას შესაბამისად თბილად და ეძინოს ლეიბზე მკვრივად გადაჭიმულ ზეწარზე.

დაიმახსოვრეთ: მთავარია იდეალურად სწორი ზედაპირი და არაფერი ისეთი, რაშიც ბავშვს შეუძლია გაეხვეს ან ცხვირი შეყოს.

  • მეორე: ჰაერის ტემპერატურისა და ტენიანობის სწორი პარამეტრები. ანუ ბავშვს უნდა ეძინოს ოთახში, სადაც ტემპერატურა არ არის 20 გრადუსზე მაღალი, ხოლო ტენიანობა 40–60%-ს არ აღემატება.

ასე რომ, თუ მაინც გადაწყვეტთ ბავშვის მუცელზე დაძინებას, ყველაფერი უნდა გააკეთოთ იმისთვის, რომ მინიმუმამდე დაიყვანოთ ჩვილთა უეცარი სიკვდილის სინდრომის რისკი“.

184
თემები:
ექიმი გირჩევთ
მოღრუბლული ამინდი თბილისში

ამინდის ზუსტი პროგნოზი თბილისში სამშაბათს, 2 მარტს

0
საქართველოს დედაქალაქში სამშაბათს ჰაერის ტემპერატურა დღის განმავლობაში 8-9 გრადუსამდე აიწევს, იქროლებს სუსტი ქარი

თბილისი, 26 თებერვალი – Sputnik. თბილისში სამშაბათს, 2 მარტს სინოპტიკოსები მოღრუბლულ, მაგრამ უნალექო ამინდს ვარაუდობენ.

მზე ამოვა 07:34 საათზე და 18:51 საათზე ჩავა.

ღამის საათებში ჰაერის ტემპერატურა 1 გრადუსამდე დაიკლებს, ხოლო დღის განმავლობაში ჰაერი 8-9 გრადუსამდე გათბება. დედაქალაქის ზოგიერთ რაიონში სუსტი ქარი იქროლებს.

0