ბექა ღვინიაშვილი

უმედლო დღე ძიუდოში ბექა ღვინიაშვილმა აკრძალული ილეთი გამოიყენა

41
(განახლებულია 21:38 10.06.2021)
მსოფლიო პირველობის მეხუთე საჭიდაო დღეს ბექა ღვინიაშვილმა და მარიამ ჭანტურიამ იასპარეზეს, მეექვსე დღეს კი კვარცხლბეკზე ასვლას ლიპარტელიანი და სულამანიძე შეეცდებიან.

თბილისი, 10 ივნისი – Sputnik. უნგრეთის დედაქალაქ ბუდაპეშტში მიმდინარე მსოფლიო ჩემპიონატის მეხუთე დღეს მოასპარეზე ორივე ქართველი სპორტსმენი შეჯიბრებას გამოეთიშა.

დღეს ტატამზე ბექა ღვინიაშვილი (90 კგ) და მარიამ ჭანტურია (70 კგ) ვიხილეთ, რომლებიც მსოფლიო პირველობას საწყის ეტაპზე დაემშვიდობნენ.

ბექა ღვინიაშვილი ტურნირზე განთესილი იყო და მას ჭიდაობა პირდაპირ მეორე წრიდან მოუწია, სადაც მისი მეტოქე შვეიცარიელი სირილ გროსკლაუსი იყო. თავდაპირველად ღვინიაშვილი ვაზარით დაწინაურდა, რასაც სულ მალე მომგებიანი გდებაც მიაყოლა. მაგრამ ქართველ ძიუდოისტს გამარჯვება ვიდეოგამეორების შედეგად ჩამოართვეს, სადაც ნათლად გამოჩნდა, რომ ღვინიაშვილმა აკრძალული ილეთი – კავაზუ გაკე (ფეხის ამოხვევით გდება) გამოიყენა. აღნიშნულის გამო ბექა ტურნირს ნაადრევად გამოეთიშა.

რაც შეეხება მარიამ ჭანტურიას, მან პირველი შეხვედრა გაბონელ კარენ აგონო ვორასთან იპონით მოიგო, მაგრამ მეორე წრეში ის გერმანელ მირიამ ბუტკერაიტთან დამარცხდა.

ქართველმა ძიუდოისტმა მსოფლიო ჩემპიონატზე ვერცხლის მედალი მოიპოვა>>

საქართველოს ნაკრებს მსოფლიოს ჩემპიონატზე ორი მედალი აქვს. ლაშა შავდათუაშვილმა ოქროს მედლის მოპოვება შეძლო, ხოლო ტატო გრიგალაშვილი ვერცხლს დასჯერდა. მეექვსე საჭიდაო დღეს ბუდაპეშტში ტატამზე ვარლამ ლიპარტელიანი და ილია სულამანიძე (ორივე -100 კგ) გავლენ.

41
თემები:
სპორტის ამბები (1131)
ხელბურთის ნაკრები

ხელბურთი: საქართველოს ნაკრებმა ჯგუფში მეორე გამარჯვება იზეიმა

17
(განახლებულია 20:29 16.06.2021)
საქართველოს ხელბურთელთა ნაკრები პლეი-ოფში ბულგარეთის ან ანდორის გუნდს შეხვდება, გამარჯვების შემთხვევაში კი ფინალში იასპარეზებს.

თბილისი, 16 ივნისი — Sputnik. საქართველოს ხელბურთელ ვაჟთა ნაკრებმა თბილისში მიმდინარე ერთა თასის (IHF/EHF Trophy 2021) გათამაშების მეორე შეხვედრაში მოლდოვის ნაკრები ანგარიშით 27:20 დაამარცხა და პლეი-ოფის საგზური მოიპოვა.

საქართველოს ნაკრებისთვის ეს ტურნირზე მეორე გამარჯვებაა. პირველ მატჩში ქართველმა სპორტსმენებმა აზერბაიჯანის გუნდი ანგარიშით 36:16 დაამარცხეს.

ერთა თასის პლეი-ოფის შეხვედრები 18 ივნისს გაიმართება. ტურნირის მოსაგებად საქართველოს ნაკრების ჩათვლით ექვსი ქვეყანა იბრძვის, საიდანაც საუკეთესო სამი გუნდი 2024 წლის ევროპის ჩემპიონატის შესარჩევი ეტაპის მომდევნო საფეხურზე იასპარეზებს.

საქართველოს ნაკრების მეტოქე პლეი-ოფში ბულგარეთისა და ანდორის შეხვედრაში გამოვლინდება, რომლებიც კვიპროსთან ერთად მეორე ჯგუფში იმყოფებიან და თითო წაგება აქვთ.

17
თემები:
სპორტის ამბები (1131)

ევრო-2020-ის მატჩის წინ მოედანზე პარაპლანერისტი დაეშვა ვიდეო

33
(განახლებულია 15:54 16.06.2021)
მიუნხენში ევროპის ჩემპიონატის შეხვედრის დასაწყისში მოედანზე პარაპლანერისტი დაეშვა, რის გამოც მატჩისათვის მზადება შეწყდა.

საფრანგეთსა და გერმანიას შორის მატჩის დაწყების წინ სტადიონის შუაგულში მოულოდნელად პარაპლანერისტი დაეშვა, რის გამოც ფეხბურთელებმა მზადება შეწყვიტეს.

მამაკაცმა თავდაპირველად ტრიბუნას შემოუფრინა და შემდეგ პირდაპირ გაზონზე დაჯდა, სადაც კამერა დააზიანა. ზოგიერთი ფეხბურთელი ნანახით გაოცებული დარჩა.

პარაპლანზე დატანილი იყო წარწერა „გრინპისი“ და ნავთობპროდუქტებზე უარის თქმის მოწოდება.

თავად მატჩი საფრანგეთის ნაკრების გამარჯვებით დასრულდა, რაც ფრანგებმა ჰუმელსის ავტოგოლის წყალობით მოიპოვეს.

გავრცელებული ინფორმაციით, გასულ კვირაში მსგავსი შემთხვევა მოხდა საფეხბურთო მატჩის მსვლელობისას პოლონეთშიც, სადაც მატჩი პარაშუტისტის დაშვების გამო შეწყდა. შეხვედრის არბიტრმა პარაშუტისტს ყვითელი ბარათი უჩვენა, რითიც ისედაც კურიოზულ ამბავს მეტი ხალისი შესძინა.

33
ნინოწმინდის პანსიონი

რატომ დაატოვინეს ნინოწმინდის პანსიონი ზოგიერთ აღმზრდელს

0
პანსიონიდან ამ ეტაპზე ბავშვების დაახლოებით ნახევარი გაყვანილია ოჯახებში, ხოლო დარჩენილებთან სოციალური მუშაკები მუშაობენ. პარალელურად მიმდინარეობს მუშაობა მათთვის ოჯახების მოსაძიებლად.

თბილისი, 16 ივნისი - Sputnik. აღმზრდელები, რომლებთან დაკავშირებითაც რისკები გამოიკვეთა, ნინოწმინდის პანსიონში აღარ იმყოფებიან, განაცხადა სახელმწიფო ზრუნვისა და ტრეფიკინგის მსხვერპლთა, დაზარალებულთა დაცვისა და დახმარების სააგენტოს დირექტორმა, მერი მაღლაფერიძემ.

დღეს პანსიონის ახალმა დირექტორმა, მეუფე იაკობმა განაცხადა, რომ 40 აღმზრდელიდან პანსიონში 19 დარჩება.

წმინდა ნინოს სახელობის ობოლ, უპატრონო და მზრუნველობამოკლებულ ბავშვთა პანსიონი, რომელიც საპატრიარქოს პატრონაჟის ქვეშაა, ფართო საზოგადოებისა და სახელმწიფო სტრუქტურების ყურადღების ცენტრში სახალხო დამცველის განცხადების შემდეგ მოექცა. როგორც ნინო ლომჯარიამ განაცხადა, პანსიონში ბავშვებზე ფსიქოლოგიური და ფიზიკური ზეწოლა ხორციელდება, ხოლო დაწესებულების ტერიტორიაზე მის წარმომადგენლებს შესვლის უფლებას არ აძლევენ. აღნიშნული განცხადების საფუძველზე საქართველოს შსს-მ გამოძიება დაიწყო.

მაღლაფერიძის განმარტებით, შემდგომი ნაბიჯები შესაძლოა გარკვეული პერსონალის გადამზადებასაც ითვალისწინებდეს.

„როდესაც იდენტიფიცირდა გარკვეული რისკები კონკრეტულ პირებთან დაკავშირებით, მათ დაწესებულების ტერიტორია დატოვეს. როდესაც დაწესებულებაში რაიმე ტიპის რისკზე არის საუბარი, მნიშვნელოვანია, ბავშვის საუკეთესო ინტერესებიდან გამომდინარე მოხდეს მათი განრიდება“, – განაცხადა მერი მაღლაფერიძემ.

მაღლაფერიძის განცხადებით, დღეის მდგომარეობით ნინოწმინდის პანსიონიდან სულ 29 ბავშვია გაყვანილი.

„22 ჩარიცხული ბენეფიციარი რჩება, თუმცა პროცესი კვლავ გრძელდება. ამას წინ უძღვის შეფასება, საუკეთესო ადგილების შერჩევა, ბიოლოგიური ოჯახების შეფასება, მათთან კონტაქტი და ასე შემდეგ. როდესაც ბავშვების ინტერესებზე ვსაუბრობთ, ეს არ არის უბრალოდ ფრაზა, უნდა შევარჩიოთ მათთვის სწორი ზრუნვის ფორმები, შევეცადოთ მათ ბიოლოგიურ მშობლებთან ან მათ სიახლოვეს განთავსება“, – განაცხადა მერი მაღლაფერიძემ.

თბილისის საქალაქო სასამართლომ 5 ივნისს ნაწილობრივ დააკმაყოფილა არასამთავრობო ორგანიზაციის „პარტნიორობა ადამიანის უფლებებისთვის" (PHR) შუამდგომლობა და შესაბამის სახელმწიფო უწყებებს დაავალა შშმ სტატუსის მქონე ბავშვების პანსიონიდან დაუყოვნებლივ გაყვანის პროცესის დაწყება. ეს გადაწყვეტილება საპატრიარქომ გაასაჩივრა.

ნინოწმინდის პანსიონში ჩარიცხული შეზღუდული შესაძლებლობის მქონე ბავშვების სახელმწიფო მზრუნველობის სხვა დაწესებულებაში (მინდობით აღზრდა, მცირე საოჯახო, ან რეინტეგრაცია) გადაყვანა საქართველოს ჯანდაცვის სამინისტროსა და სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს დაევალათ.

პანსიონთან დაკავშირებით განვითარებული მოვლენების შემდეგ ნინოწმინდის პანსიონის ხელმძღვანელის თანამდებობა პირადი განცხადების საფუძველზე დატოვა მეუფე სპირიდონმა, ხოლო მის ნაცვლად ბოდბელი ეპისკოპოსი, მეუფე იაკობი (იაკობიშვილი) დაინიშნა.

 

0