გიორგი მიქაუტაძე

ქართველი ფეხბურთელი ბელგიის მეორე დივიზიონის საუკეთესო თავდამსხმელი გახდა

49
გიორგი მიქაუტაძე „სერენის“ შემადგენლობაში იჯარის წესით ასპარეზობს, მასზე უფლება ფრანგულ „მეცს“ ეკუთვნის

თბილისი, 26 აპრილი - Sputnik. საქართველოს ფეხბურთის ნაკრების თავდამსხმელი გიორგი მიქაუტაძე, რომელიც კლუბ „სერენის“ (R.F.C. Seraing) შემადგენლობაში იჯარის წესით თამაშობს, ბელგიის ჩემპიონატის მეორე დივიზიონის საუკეთესო ბომბარდირად დასახელდა.

ქართველი ფეხბურთელის ანგარიშზე 19 გატანილი გოლია. ამდენივე აქვს გატანილი „სენ-ჟილუაზის“ (Saint-Gilloise) თავდამსხმელ დანტე ვანზეირს (Dante Vanzeir). მაგრამ საქმე ისაა, რომ მიქაუტაძემ პენალტით მხოლოდ ორი გოლი გაიტანა, ვანზეირმა კი - ოთხი.

ჩემპიონატში „სენ-ჟილუაზმა“ პირველი ადგილი აიღო და ავტომატურად მოიპოვა საგზური ბელგიის უმაღლეს დივიზიონში. „სერენი“ კი მეორე ადგილზე გავიდა და ითამაშებს გარდამავალ მატჩებში „ვასლანდ-ბევერენთან“. შეხვედრები 1 და 8 მაისს გაიმართება.

მიქაუტაძე „სერენში“ იჯარის წესით თამაშობს, რადგან ფეხბურთელი ფრანგული „მეცის“ (FC Metz) განკარგულებაშია. დიდი ალბათობით მომდევნო სეზონს ქართველი უკვე პირველ დივიზიონში „მეცის“ შემადგენლობაში ითამაშებს.

მიქაუტაძე საფრანგეთში დაიბადა და ამ ქვეყნის მოქალაქეა. მარტის შუა რიცხვებში თავდამსხმელმა მიიღო საქართველოს მოქალაქეობა და გამოძახება საქართველოს ნაკრებში. 20 წლის მიქაუტაძის დებიუტი საქართველოს ნაკრებში მსოფლიო-2022-ის შესარჩევ მატჩში შვედეთის წინააღმდეგ შედგა (0:1). მაგრამ ამ მატჩში მან მცირედი ტრავმა მიიღო და გამოტოვა ესპანეთთან (1:2) და საბერძნეთთან შეხვედრა (1:1).

49
ზუგდიდი

აზიის განვითარების ბანკი ზუგდიდში სპორტული კომპლექსის მშენებლობას აფინანსებს

28
(განახლებულია 16:35 08.05.2021)
სპორტული კომპლექსის ასაშენებლად 11 მილიონ ლარზე მეტი უნდა დაიხარჯოს. სამშენებლო სამუშაოები მიმდინარე წლის აპრილში დაიწყო და 18 თვეში დასრულდება.

თბილისი, 8 მაისი – Sputnik. ზუგდიდში აზიის განვითარების ბანკის ფინანსური მხარდაჭერით სპორტული კომპლექსის მშენებლობა მიმდინარეობს, ნათქვამია საქართველოს რეგიონული განვითარებისა და ინფრასტრუქტურის სამინისტროს განცხადებაში.

პროექტის ღირებულება 11 მილიონ ლარზე მეტია და ის ითვალისწინებს დიდი და მცირე საცურაო აუზების, ტრენაჟორების, ძალოსნობის, კრივის და ჭიდაობის დარბაზების მშენებლობას. იქვე განთავსდება ღია კაფე, მაღაზია და საკონფერენციო დარბაზი. კეთილმოეწყობა კომპლექსის მიმდებარე ტერიტორიაც.

ახალ სპორტულ კომპლექსში შესაძლებელი იქნება ტურნირების გამართვა როგორც ეროვნულ, ისე საერთაშორისო დონეზე.

სამშენებლო სამუშაოები მიმდინარე წლის აპრილში დაიწყო და 18 თვეში დასრულდება. პროექტს საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ახორციელებს.

ზუგდიდის გარდა, სპორტკომპლექსების მშენებლობა კიდევ სამ ქალაქში – ახალციხეში, რუსთავსა და ქუთაისში დაიწყო. 

აზიის განვითარებული ბანკი (ADB) საქართველოს 2007 წლიდან ეხმარება და ქვეყნისათვის ერთ-ერთი ყველაზე მრავალმხრივი პარტნიორია.

28
ბათუმის ახალი სტადიონი

ბათუმი საფეხბურთო დღესასწაულისთვის ემზადება

30
(განახლებულია 14:00 08.05.2021)
ბილეთები ბათუმის „დინამოსა“ და თბილისის „დინამოს“ მატჩზე საფეხბურთო შეხვედრებს დანატრებულმა გულშემატკივარმა სულ რამდენიმე საათში შეიძინა

თბილისი, 8 მაისი — Sputnik. ბათუმი დიდ საფეხბურთო დღესასწაულს ელოდება – 8 მაისს საქართველოს ეროვნული ლიგის ჩემპიონატის მე–12 ტურის ფარგლებში მეორე წრის ცენტრალური თამაში გაიმართება, სადაც ორი „დინამო“ დაუპირისპირდება ერთმანეთს – ბათუმელები თბილისელებს უმასპინძლებენ.

საუკეთესო ახალი სტადიონი მსოფლიოში: ბათუმის არენა ასპარეზობის მოლოდინში - ვიდეო>>

ეს შეხვედრა მნიშვნელოვანია რამდენიმე მიზეზის გამო. ჯერ ერთი, სატურნირო ვითარებიდან გამომდინარე, თბილისის „დინამო“ ჩემპიონატის ლიდერია, მაგრამ ბათუმელებს მხოლოდ სამი ქულით უსწრებს; მეორეც, ერთმანეთს ხვდებიან გასული სეზონის ჩემპიონი და ვიცე–ჩემპიონი და სავარაუდოდ, ეროვნულ ლიგაში გამარჯვებისთვის წელსაც სწორედ ეს ორი კლუბი იბრძოლებს გამარჯვებისთვის.

და ბოლოს, მესამე – მატჩი ბათუმის ახალ სტადიონზე გაიმართება, ახალ გაზონზე (სპეციალური ჰიბრიდული საფარით) და რაც მთავარია, 6 200 გულშემატკივრის თანდასწრებით. უნდა აღინიშნოს, რომ ბილეთები სულ რამდენიმე საათში გაიყიდა.

მატჩი 20:15 საათზე დაიწყება.

ბათუმის სტადიონს საძირკველი 2018 წლის 21 იანვარს ჩაეყარა და ოფიციალურად 2020 წელს გაიხსნა. ის დაპროექტებულია თურქული არქიტექტურული კომპანია Bahadir Kul Architects-ის მიერ. სტადიონი 20 ათას მაყურებელს იტევს. მის მშენებლობაზე თითქმის 145 მლნ ლარი დაიხარჯა. ბათუმის ახალი არენა უეფას მე-4 კატეგორიის სტანდარტებით აშენებული სტადიონია, რომელიც უახლესი მოდელის განათების, გახმოვანებისა და სხვა სისტემებით არის აღჭურვილი.

30
თემები:
სპორტის ამბები
გიგა წულეისკირი

გიგა წულეისკირი: მევახშეებისგან დაზარალებული სულ უფრო მეტი ადამიანი მოგვმართავს

0
(განახლებულია 20:02 08.05.2021)
„იპოთეკით, მშენებლობებითა და მევახშეებისგან დაზარალებულთა გაერთიანება“  რამდენიმე თვის წინ შეიქმნა და უფასო იურიდიულ დახმარებას სთავაზობს იმ მოქალაქეებს, რომელთა ქონებაც უკანონოდ მიითვისეს

თბილისი, 8 მაისი — Sputnik. კორონავირუსის პანდემიის შედეგად ქვეყანაში შექმნილი ვითარების გამო იპოთეკით დაზარალებულთა რაოდენობა საგრძნობლად გაიზარდა, განაცხადა „იპოთეკით, მშენებლობებითა და მევახშეებისგან დაზარალებულთა გაერთიანების“ თავმჯდომარე გიგა წულეისკირმა Sputnik-საქართველოსთან საუბრისას.

არასამთავრობო ორგანიზაცია უფასო იურიდიულ დახმარებას უწევს იმ მოქალაქეებს, რომლებმაც მევახშეებისგან ფული უძრავი ქონების გარანტიით ისესხეს, შემგეგ ვალი ვერ დააბრუნეს და საცხოვრებელი ბინების დაკარგვის საფრთხის წინაშე აღმოჩნდნენ.

გიგა წულეისკირის თქმით, ბოლო დროს მათ  სულ უფრო მეტი დაზარალებული მიმართავს და ეს იმ თაღლითური სქემების ბრალია, რომელსაც მევახშეები ბოლო დროს იყენებენ.

„მევახშეებმა მიმართეს თაღლითურ სქემას, რაც იმაში გამოიხატება, რომ რეალურად ხდება ფული გასესხება, ხოლო იურიდიულად ფორმდება ნასყიდობა-გამოსყიდვის ხელშეკრულება“, - აღნიშნა გიგა წულეისკირმა.

არასამთავრობო ორგანიზაციის ხელმძღვალელის განმარტებით, რადგან თანხის გასესხება დაბეგვრას ექვმედებარება, ამიტომ მევახშეები ნასყიდობა-გამოსყიდვის ხელშეკრულებას თითქოსდა გადასახადისთვის თავის არიდების მიზნით აფორმებენ, შედეგად მსესხებელები, რომლებიც დადგენილ ვადაში ჩადებული ქონების უკან გამოსყიდვას ვერ ახერხებენ, ნასესხებზე ორჯერ და სამჯერ მეტი ღირებულების სახლებს კარგავენ.

მოქალაქეებს აღარ რჩებათ რეალური ბერკეტი მევახშეებთან საბრძოლველად. კრედიტორები კი  ისაკუთრებენ მათ ქონებას და ამით სჩადიან სისხლის სამართლის დანაშაულს, რადგან შეთანხმება ხდება ერთზე, ხოლო ფორმდება სულ სხვა დოკუმენტი, აღნიშნა წულეისკირმა.

„დიდი მნიშვნელობა აქვს, როგორ მოხდება ამ საკითხების გამოძიება, რადგან სამწუხაროდ, პოლიცია მოსახლეობას სასამართლოში ამისამართებს, სასამართლო კი, პირიქით, პოლიციაში და ასე ინსტანციიდან ინსტანციაში სიარულში ადამიანები უძრავ ქონებას კარგავენ“, - აღნიშნა გიგა წულეისკირმა.

არასამთავრობო ორგანზიაციის ხელმძღვანელმა  მოუწოდა სამართალდამცველ უწყებებს, არ დატოვონ მევახშეებისგან დაზარალებული ადამიანების საჩივრები უყურადღებოდ, ხელისუფლების წარმომადგენლებს კი –  მოახდინონ ამ საკითხის დარეგულირება საკანონმდებლო დონეზე.

„იპოთეკით, მშენებლობებითა და მევახშეებისგან დაზარალებულთა გაერთიანება“ რამდენიმე თვის წინ შეიქმნა უფასო იურიდიულ დახმარებას სთავაზობს იმ მოქალაქეებს, რომელთა ქონებაც უკანონოდ მიითვისეს.

0