ფუტსალი. საქართველო-სომხეთი

ფუტსალი: საქართველო-საფრანგეთის შეხვედრას გულშემატკივარი დაესწრება

59
საქართველო-საფრანგეთის შეხვედრა თბილისის ოლიმპიურ სასახლეში გაიმართება, სადაც პანდემიის გამო შესაბამისი რეგულაციები იმოქმედებს.

თბილისი, 8 აპრილი - Sputnik. ფუტსალში საქართველოსა და საფრანგეთს შორის 9 აპრილს გასამართ მატჩს გულშემატკივრები დაესწრებიან, ინფორმაციას საქართველოს ფეხბურთის ფედერაცია ავრცელებს.

ფედერაციაში აცხადებენ, რომ თბილისის ოლიმპიურ სასახლეში მაყურებელი ტრიბუნის 30%-ს შეავსებს. მატჩზე შესაბამისი რეგულაციები იმოქმედებს. ერთი ბილეთის ფასი 5 ლარს შეადგენს. პანდემიის გამო ბილეთები ონლაინ რეჟიმში გაიყიდება, ხოლო ერთი მომხმარებელი მაქსიმუმ ორი ბილეთის შეძენას შეძლებს.

თბილისის ოლიმპიურ სასახლეში შესასვლელები 16:00 საათიდან გაიღება, შესვლამდე მოხდება გულშემატკივრების თერმოსკრინინგი, დარბაზის ტერიტორიაზე სავალდებულო იქნება პირბადის ტარება, ტრიბუნაზე დაბლოკილი ადგილები აღნიშნულია სტიკერით. ასევე აუცილებელია, ყველა გულშემატკივარმა დაიკავოს მხოლოდ ის ადგილი, სადაც დაჯდომაა დაშვებული.

აღნიშნულ საკითხზე კომენტარი გააკეთა ფეხბურთის ფედერაციის გენერალურმა მდივანმა დავით მუჯირმა. მისი განცხადებით, მაყურებლის მხარდაჭერა პრინციპულ მატჩში უმნიშვნელოვანესია.

„ევროპის ჩემპიონატამდე ერთი ნაბიჯი გვაშორებს. ესპანეთთან ვნახეთ, რამხელა მუხტი იყო, ჩვენს ნაკრებს გულშემატკივარი რომ ქომაგობდა. დარწმუნებული ვარ, დარბაზის ტევადობის 30%-ის დაშვებაც შექმნის იმ მუხტს, რომელიც ჩვენს გუნდს გამარჯვებაში დაეხმარება“, - განაცხადა მუჯირმა.

საქართველოს ნაკრები ხვალ, 18:00 საათზე საფრანგეთის ნაკრებს უმასპინძლებს, შემდეგ შეხვედრას კი 12 აპრილს რუსეთთან სტუმრად გამართავს. ნაკრების მთავარმა მწვრთნელმა ავთანდილ ასათიანმა მომავალი მატჩებისთვის 20 ფეხბურთელი გამოიძახა, შემადგენლობაში ტრავმების გამო არ არიან ნიკოლოზ კურტანიძე და სიმი საიოტი.

საქართველოს ნაკრები საკვალიფიკაციო ეტაპის მეორე ჯგუფში საფრანგეთის, სომხეთისა და რუსეთის ნაკრებებთან ერთად ასპარეზობს. ჩატარებული ოთხი შეხვედრის შემდეგ, საქართველოს ნაკრებს შვიდი ქულა აქვს და მეორე ადგილს იკავებს.

„ევრო 2022“-ის ჩემპიონატზე საკვალიფიკაციო ჯგუფური ეტაპის რვა გამარჯვებული და ექვსი საუკეთესო მეორე ადგილზე გასული გუნდი იასპარეზებს. კიდევ ერთი საგზურის მფლობელის ვინაობა ჯგუფებში მეორე ადგილზე გასულ რეიტინგის ბოლო ორ ნაკრებს შორის პლეი-ოფის სისტემით გაირკვევა. ფუტსალში ევროპის 2022 წლის ჩემპიონატი ნიდერლანდების ორ ქალაქში - ამსტერდამსა და გრონინგენში გაიმართება.

საქართველოს ფუტსალის ნაკრებს კონტინენტურ პირველობაში მონაწილეობა ჯერ არასდროს არ მიუღია.

 

59
ჯაბა კანკავა

საქართველოს ფეხბურთის ნაკრების კაპიტანი ფრანგული „ვალანსიენის“ საუკეთესო მოთამაშედ აღიარეს

37
კანკავასთვის ეს ჯილდო ზედიზედ მეორეა - თებერვალში ქართველი ნახევარმცველი გულშემატკივრებმა ასევე საუკეთესო მოთამაშედ დაასახელეს

თბილისი, 14 აპრილი - Sputnik. საქართველოს ფეხბურთს ნაკრების კაპიტანი ჯაბა კანკავა „ვალანსიენის“ (Valenciennes) გულშემატკივრებმა მარტში კლუბის საუკეთესო მოთამაშედ დაასახელეს. ამის შესახებ ფრანგული გუნდის ოფიციალური Twitter იუწყება. 

კანკავასთვის ეს ჯილდო ზედიზედ მეორეა. გულშემატკივრების აზრით, ქართველი ნახევარმცველი თებერვალშიც გუნდის საუკეთესო მოთამაშე იყო.

ქართველი ყველაზე მაღალანაზღაურებადი ფეხბურთელების ტოპ-ხუთი
© Sputnik / Konstantin Ivanov
ქართველი ყველაზე მაღალანაზღაურებადი ფეხბურთელების ტოპ-ხუთი

კანკავა საფრანგეთის მეორე ლიგის გუნდში - „ვალანსიენში“ 2020 წლის ზამთარში ყაზახეთის „ტობოლიდან“ გადავიდა. ახალ გუნდში 35 წლის ფეხბურთელმა 12 მატჩი ითამაშა.

კანკავასა და „ვალანსიენს“ შორის კონტრაქტი მიმდინარე სეზონის ბოლომდეა გაფორმებული.

37
ნიკოლოზ ბასილაშვილი

ბასილაშვილმა მონტე-კარლოში პირველი წრის მატჩი ტრავმის გამო ვერ დაასრულა

33
(განახლებულია 14:44 14.04.2021)
ქართველმა ჩოგბურთელმა გასულ კვირაში კალიარიში გამართულ ტურნირზე ნახევარფინალამდე მიაღწია და ლასლო დიერესთან ორ პარტიაში წააგო.

თბილისი, 14 აპრილი – Sputnik. საქართველოს პირველმა ჩოგანმა ნიკოლოზ ბასილაშვილმა (АТР-ს რეიტინგით 36-ე ადგილი) მონტე-კარლოში „მასტერსის“ სერიის ტურნირზე პირველი წრის მატჩი ტრავმის გამო ვერ დაასრულა.

ბასილაშვილი სერბ ფილიპ კრაიინოვიჩს (37) ხვდებოდა და პირველი პარტია ანგარიშით 1:6 დათმო. მეორე სეტში, როდესაც ანგარიში 0:2 იყო კრაიინოვიჩის სასარგებლოდ, ქართველმა ჩოგბურთელმა პარტია ვეღარ გააგრძელა. რა სახის ტრავმა მიიღო ბასილაშვილმა, ჯერჯერობით უცნობია.

ჩოგბურთელებმა კორტზე მხოლოდ 36 წუთი გაატარეს.

ბასილაშვილისთვის მონტე-კარლოს „მასტერსი“ სეზონზე მეორე გრუნტის ტურნირი გახდა. ქართველმა ჩოგბურთელმა გასულ კვირაში კალიარიში გამართულ ტურნირზე ნახევარფინალამდე მიაღწია და ლასლო დიერესთან ორ პარტიაში წააგო – 2:6, 0:6.

რაც შეეხება მონტე-კარლოს „მასტერსს“, ტურნირის საერთო საპრიზო ფონდი თითქმის 2,5 მილიონ ევროს შეადგენს, ხოლო მისი მოქმედი გამარჯვებულია იტალიელი ფაბიო ფონინი (Fabio Fognini).

33
კახა კალაძე

კალაძე: ორშაბათიდან სრულფასოვნად დავუბრუნდები ჩემს საქმიანობას

15
(განახლებულია 13:59 15.04.2021)
კახა კალაძეს თბილისის ერთ-ერთ კლინიკაში ვესტიბულოპათიის დიაგნოზი დაუსვეს – ექიმების განცხადებით, მერის ავადმყოფობა მის სპორტულ წარსულს უკავშირდება.

 

თბილისი, 15 აპრილი – Sputnik. თბილისის მერი კახა კალაძე საქართველოში კვირის ბოლოსთვის დაბრუნდება და მუშაობის ჩვეულ რეჟიმს დაუბრუნდება. 

43 წლის კალაძე უცხოეთში გამოკვლევების ჩასატარებლად 12 აპრილს გაემგზავრა – იგი მარტის ბოლოს თბილისის ერთ-ერთ კლინიკაში ე.წ. ვესტიბულოპათიის დიაგნოზით (ვესტიბულარული ანალიზატორის ფუნქციის დარღვევა) მოხვდა. 4 აპრილს მან კლინიკა დატოვა და რეაბილიტაციის კურსს სახლის პირობებში გადიოდა. 

„დამატებით კვლევები ჩავიტარე ყველა მიმართულებით და ბედნიერი ვარ, რომ კარგად ვარ. ორშაბათიდან სრულფასოვნად დავუბრუნდები ჩემს საქმიანობას და ერთად განვახორციელებთ ყველა იმ მნიშვნელოვან პროექტს, რომელიც დედაქალაქს სჭირდება“, - განაცხადა კალაძემ Facebook-ჩართვაში.

ადრე ქართულ მასმედიაში თბილისის მერისა და „ქართული ოცნების“ გენერალური მდივნის კახა კალაძის მმართველი გუნდიდან და, ზოგადად, პოლიტიკიდან წასვლის შესახებ ინფორმაცია გავრცელდა. ერთ-ერთი ტელეკომპანიის ვერსიით, კალაძე მილანში დაბრუნებას გეგმავს, სადაც ფეხბურთელის წარმატებული კარიერა ჰქონდა.

კონკრეტულად რომელ ქვეყანაში იმყოფება დედაქალაქის მერი, ამის თაობაზე ინფორმაციას თბილისის მერიის პრეს-სამსახური არ ავრცელებს.

15