ვილი სანიოლი

ვილი სანიოლი: თუ ყველას ერთი მიზანი გვექნება, წარმატებას აუცილებლად მივაღწევთ

34
(განახლებულია 20:20 23.02.2021)
ვილი სანიოლი საქართველოს ნაკრებამდე საფრანგეთის ახალგაზრდულ გუნდსა და ფრანგულ „ბორდოს“ წვრთნიდა. ასევე მიუნხენის „ბაიერნში“ კარლო ანჩელოტის ასისტენტიც იყო.

თბილისი, 23 თებერვალი – Sputnik. ჩემი მიზანია – ქართველ ფეხბურთელებთან და ფედერაციასთან ერთად წარმატების მიღწევა, იმედი მაქვს, საქართველოში საამაყო შედეგი მექნება – საქართველოს საფეხბურთო ნაკრების ახალმა მწვრთნელმა ვილი სანიოლმა ფედერაციასთან თავის სამომავლო გეგმებზე ისაუბრა.

კობიაშვილი ნაკრების ახალ მწვრთნელზე: მას სურს რაც შეიძლება დიდხანს დარჩეს საქართველოში>>

ფრანგი სპეციალისტი საქართველოს ფეხბურთის ფედერაციამ ნაკრების მწვრთნელად 15 თებერვალს აღმასრულებელი კომიტეტის სხდომაზე დაამტკიცა. მანამდე საქართველოს ნაკრებს სლოვაკი ვლადიმერ ვაისი ხელმძღვანელობდა, რომელმაც გასულ წელს ჩრდილოეთ მაკედონიასთან წაგებული ფინალის შემდეგ თანამდებობიდან წასვლაზე განცხადება გააკეთა, ხოლო სომხეთთან მარცხის შემდეგ პოსტი ნაადრევად დატოვა.

ვილი სანიოლს საქართველოს ნაკრების ჩაბარებამდე ორწლიანი სამწვრთნელო პაუზა ჰქონდა. როგორც მან ინტერვიუში განმარტა, ეს ოჯახურ პრობლემებს უკავშირდებოდა.

„ბაიერნთან“ მუშაობის შემდეგ ორწლიანი პაუზა ავიღე. ეს გადაწყვეტილება ოჯახური მიზეზების გამო მივიღე, რომელიც ჯანმრთელობას უკავშირდება. მამისთვის მთავარი პრიორიტეტი მისი შვილების ჯანმრთელობაა. მეც ასე მოვიქეცი და ეს ორი წელი ჩემთვის მეტად მნიშვნელოვანი იყო. ახლა ვითარება გამოსწორდა და სრულად შემიძლია ყურადღება ახალ პროექტებს დავუთმო“, – აღნიშნა ნაკრების ახალმა მთავარმა მწვრთნელმა.

სანიოლი საფეხბურთო კარიერის განმავლობაში მიუნხენის „ბაიერნის“ ღირსებას იცავდა. მან ინტერვიუში ფედერაციის პრეზიდენტზე ლევან კობიაშვილზე და ვიცე-პრეზიდენტზე ალექსანდრე იაშვილზეც ისაუბრა.

„ლევან კობიაშვილი კარგად მახსოვს. ის მარცხენა ფლანგზე თამაშობდა, მე – მარჯვენაზე და ჩვენი გზები ყოველთვის იკვეთებოდა. როგორც მოთამაშე, ის ერთდროულად ხისტიც იყო და სამართლიანიც. იგივე შემიძლია ვთქვა ალექსანდრე იაშვილზეც. კარგია, როდესაც 10, 12 ან 15 წლის შემდეგ კვლავ ვხვდებით ერთმანეთს“, – განაცხადა სანიოლმა.

საქართველოს ფეხბურთის ნაკრებს სათავეში „ბაიერნის“ მწვრთნელი ჩაუდგა>>

აღსანიშნავია, რომ ფეხბურთის ფედერაციის ამჟამინდელი ხელმძღვანელები წლების წინ სანიოლის თანამედროვეები იყვნენ. იაშვილისა და კობიაშვილის საფეხბურთო კარიერის დიდი ნაწილი გერმანიის ბუნდესლიგას უკავშირდება.

ნაკრების ახალმა მეთაურმა საქართველოში ახალგაზრდა ფეხბურთელებსა და მათ პერსპექტივაზეც გაამახვილა ყურადღება.

„მე ყოველთვის მიხარია ახალგაზრდა ფეხბურთელებთან მუშაობა, რომლებსაც სურთ მიაღწიონ წარმატებას და საკუთარი შესაძლებლობები აჩვენონ როგორც მწვრთნელს, ისე მთელ ქვეყანას. მე მათთან მუშაობას ველი“, – განაცხადა მან.

ცნობილია, რომ ვილი სანიოლი განსხვავებული სამწვრთნელო მეთოდებითა და დისციპლინით გამოირჩევა. მისი განცხადებით, ნაკრებთან ერთად წარმატების მისაღწევად პირველ რიგში გუნდში დისციპლინასთან დაკავშირებულ საკითხებზე იზრუნებს. სანიოლმა ასევე აღნიშნა, რომ ჩვენს ნაკრებს საკმაოდ დიდი პოტენციალი გააჩნია და ის სწორედ ამ შესაძლებლობების კიდევ უფრო გაზრდაზე იმუშავებს.

ახალგაზრდა სპეციალისტმა ნაკრების მომავალ მეტოქეებზეც ისაუბრა. საქართველოს ეროვნული ნაკრები მსოფლიოს შესარჩევი ციკლისთვის ემზადება, სადაც ჩვენი მეტოქეები ესპანეთი, შვედეთი, საბერძნეთი და კოსოვო იქნებიან. ნაკრების მთავარი მწვრთნელი მოსალოდნელ მატჩებზე იმედიანად საუბრობს: „ეს რთული ჯგუფია, თუმცა, ეს 6-დღიანი სანაკრებო პერიოდი გარკვეულ ბალანსს შემოიტანს. ასეთ პირობებში შედარებით პატარა გუნდების წინააღმდეგ პრობლემები დიდ გუნდებსაც შეექმნებათ. 15-20 წლის წინ უფრო ძლიერი გუნდი, როგორც წესი, თამაშს იგებდა. არსებულ პირობებში კი ყველაფერი სხვანაირადაა“, – აღნიშნა ნაკრების თავკაცმა.

მოთამაშის ამპლუაში სანიოლმა კარიერა საფრანგეთში დაიწყო. 1995-1997 წლებში თამაშობდა „სენტ-ეტიენის“ გუნდში. მომდევნო ეტაპი მარჯვენა მცველისთვის იყო „მონაკო“ (1997-2000), საიდანაც იგი მიუნხენის „ბაიერნში“ გადავიდა (2000-2009). სწორედ აქ დაასრულა მან ფეხბურთელის კარიერა.

რას უნდა ველოდოთ ქართული სპორტისგან: 2021 – სპორტული მოვლენებით აღსავსე წელი>>

საფრანგეთის ნაკრების შემადგენლობაში სანიოლი გახდა მსოფლიოს ვიცე-ჩემპიონი (2006) და ორჯერ - კონფედერაციის თასის მფლობელი (2001, 2003).

რაც შეეხება სამწვრთნელო საქმიანობას, სანიოლი ერთი სეზონი ხელმძღვანელობდა საფრანგეთის ახალგაზრდულ ნაკრებს (U-21), რის შემდეგაც ორი სეზონი მუშაობდა „ბორდოსთან“ (2014-2016). 2017 წლიდან ფრანგი სპეციალისტი „ბაიერნის“ სამწვრთნელო შტაბში საქმიანობდა.

34
თემები:
სპორტის ამბები (1023)
საქართველოს რაგბის ნაკრები

საქართველოს მორაგბეთა ნაკრებმა ევროპის ერთა თასზე ასპარეზობა მოგებით დაიწყო

43
(განახლებულია 23:04 06.03.2021)
საქართველოს ნაკრებმა ზედიზედ მეცხრედ დაამარცხა პორტუგალიელები - „ბორჯღალოსნებმა“ საერთო ჯამში მათ 16-ჯერ მოუგეს

თბილისი,  6 მარტი – Sputnik. საქართველოს მორაგბეთა ეროვნულმა ნაკრებმა მიმდინარე სეზონის ევროპის ერთა თასის პირველ მატჩში ლისაბონში პორტუგალიის გუნდს ანგარიშით 29:16 მოუგო.

მასპინძლებმა შეხვედრის პირველი წუთებიდან ქართველებს ბრძოლა გაუმართეს და ორი ზუსტი საჯარიმო დარტყმის შემდეგ დაწინაურდნენ 6:0. ლევან მაისაშვილის შეგირდებმა ორი წარმატებული ლელოთი უპასუხეს. მათი ავტორები მირიან მოდებაძე და ჯაბა ბრეგვაძე გახდნენ.

მაგრამ პირველი ტაიმის დასასრულს მასპინძლებმა დაწინაურება შეძლეს. როდრიგოს ლელოს და მარგეშის გარდასახვის წყალობით პორტუგალიელები შესვენებაზე 13:10 ანგარიშით გავიდნენ.

მეორე ნახევრის დასაწყისში „მგლებმა“ მარგეშის მორიგი საჯარიმოს შემდეგ უპირატესობა ექვს ქულამდე გაზარდეს. მაგრამ ეს ლოკალური წარმატება პორტუგალიელებისთვის ამ მატჩში ბოლო აღმოჩნდა. 48-ე წუთიდან ქართველებმა ხელში ჩაიგდეს ინიციატივა და სათამაშო და ტერიტორიული უპირატესობა მათ მხარეს გადავიდა. ბურთის ტოტალური კონტროლის შედეგად სამი წარმატებული ლელო დადეს გიორგი ბაბუნაშვილმა, შალვა მამუკაშვილმა და თორნიკე ჯალაღონიამ. ორი ზუსტი გარდასახვა შეასრულა სოსო მატიაშვილმა. საბოლოო შედეგია 29:16 და საქართველოს ნაკრები ევროპის ერთა თასის წლევანდელ გათამაშებას მოგებით იწყებს.

საქართველოს ნაკრებმა პორტუგალიელებს ზედიზედ მეცხრედ მოუგო. მეტოქეთა დაპირისპირებაში ლისაბონში გამართული მატჩი 22-ე გახდა. საერთო ჯამში „ბორჯღალოსნებმა“ მოიგეს 16-ჯერ, ოთხჯერ წააგეს და ორი შეხვედრა ფრედ დაასრულეს.

აღსანიშნავია, რომ დღეს ტურნირზე კიდევ ერთი მატჩი შედგა - რუსეთის ნაკრებმა რუმინეთს ანგარიშით 18:13 მოუგო.

ევროპის ერთა თასზე მომდევნო მატჩს საქართველოს ნაკრები კვლავ გასვლაზე ჩაატარებს. 20 მარტს „ბორჯღალოსნები“ მადრიდში ესპანეთის გუნდს დაუპირისპირდებიან.

43
ფეხბურთი. საქართველოს ჩემპიონატი. თბილისის „დინამო“ - ქუთაისის „ტორპედო“

თბილისის „დინამომ“ ეროვნულ ლიგაში პირველი გამარჯვება იზეიმა

32
(განახლებულია 16:10 06.03.2021)
თბილისის „დინამო“ აღნიშნული გამარჯვებით სატურნირო ცხრილში მე-3 ადგილს იკავებს. შემდეგ მატჩს დედაქალაქური კლუბი 9 მარტს ბათუმის „დინამოს“ წინააღმდეგ გამართავს

თბილისი, 6 მარტი - Sputnik. თბილისის „დინამომ“ ეროვნული ლიგის მიმდინარე გათამაშებაში პირველი გამარჯვება მოიპოვა. დედაქალაქელებმა ქუთაისის „ტორპედოს“ გასვლით შეხვედრაში ანგარიშით 2:0 მოუგეს.

თბილისელებმა საწყის წუთებშივე მოახერხეს უპირატესობის მოპოვება. შეხვედრის მე-15 წუთზე ქუთაისელთა მეკარე დინო ხაზმიჩი დაჯარიმდა და წითელი ბარათიც დაიმსახურა. აღნიშნული მომენტის შემდეგ კაცნაკლულ „ტორპედოს“ წინააღმდეგობის გაწევა გაუჭირდა და შედეგად პირველი გოლი მეორე ტაიმის დასაწყისშივე მიიღო. 48-ე წუთზე თორნიკე ახვლედიანმა ანგარიში თავური დარტყმით გახსნა. მეორე ტაიმის შუაში 70-ე წუთზე ლუკა გაგნიძის მიერ ჩაწოდებულ კუთხურს დაუხვდა ტოგოელი ცენტრალური მცველი საიმონ ბენიო, რომელმაც საბოლოო ანგარიში დააფიქსირა.

ჩემპიონატის პირველ ტურში თბილისელები წყალტუბოს „სამგურალს“ დაუზავდნენ (1:1), ამასთან წითელი ბარათის გამო დინამოელთა თავკაცი გიორგი ნემსაძეც დაკარგეს. შედეგად, ქუთაისში გუნდი ნემსაძის ასისტენტმა ლაშა ჭელიძემ გაიყვანა.

თბილისის „დინამომ“ აღნიშნული გამარჯვებით სატურნირო ცხრილში 4 ქულა დააგროვა და მე-3 ადგილზე გადაინაცვლა. რაც შეეხება ქუთაისის „ტორპედოს“, ის რიგით მეორე მარცხის შემდეგ რეიტინგში ბოლო ადგილზე იმყოფება.

2021 წლის სეზონის საქართველოს ჩემპიონატი ფეხბურთში 27 თებერვალს დაიწყო.

32
„ქართული ოცნების“ ოფისი

„ქართული ოცნება“ ოპოზიციისგან კომპრომისს ელოდება

0
(განახლებულია 09:34 07.03.2021)
ოპოზიცია და ხელისუფლება ამჟამად ექვსპუნქტიან მოთხოვნათა პაკეტზე მოლაპარაკებების სტადიაში იმყოფებიან. მარტის შუა რიცხვებამდე მათ მინიმალურ შეთანხმებას უნდა მიაღწიონ.

თბილისი, 7 მარტი - Sputnik. მმართველი პარტი „ქართული ოცნება - დემოკრატიული საქართველო“ ოპოზიციისგან კომპრომისს ელოდება, განაცხადა მმართველი პარტიის ერთ-ერთმა ლიდერმა მამუკა მდინარაძემ.

არჩევნების შედეგების მიხედვით მმართველმა პარტიამ „ქართული ოცნება - დემოკრატიული საქართველო“ ძალაუფლების მესამედ შენარჩუნება და პარლამენტში უმრავლესობის მოპოვება შეძლო. თუმცა ოპოზიცია ამტკიცებს, რომ არჩევნები გაყალბებულია და მათ შედეგებს არ აღიარებს, რამაც ქვეყანა მიიყვანა ღრმა პოლიტიკურ კრიზისამდე, საიდანაც გამოსავალი ჯერჯერობით ნაპოვნი არ არის.

მმართველმა პარტიამ და ოპოზიციამ მარტის შუა რიცხვებისთვის პოლიტიკური კრიზისის დასაძლევად მინიმალურ შეთანხმებას უნდა მიაღწიონ.

„გვაქვს გონივრული მოლოდინი და გულწრფელად რომ ვთქვათ, გარკვეული ინფორმაციაც კი, რომ მომდევნო ორი-სამი დღის განმავლობაში ოპოზიციის წარმომადგენლები გარკვეულ კომპრომისულ ნაბიჯს გადმოდგამენ“, - განაცხადა მდინარაძემ.

მისი თქმით, ოპოზიციის წინადადება პრაგმატული იქნება.

ოპოზიცია და ხელისუფლება ამჟამად იმყოფებიან მოლაპარაკებების სტადიაში. მოლაპარაკების საგანს ექვსი პუნქტი წარმოადგენს. მათ შორისაა ამბიციური საარჩევნო რეფორმა, სასამართლო რეფორმა, პოლიტპატიმრების და პოლიტიკური მართლმსაჯულების საკითხი, ძალთა გადანაწილება პარლამენტში, პოტენციური ვადამდელი არჩევნები, მომზადება ადგილობრივი არჩევნებისთვის.

0