ფეხბურთი

მსოფლიო ჩემპიონი ეროვნულ ნაკრებში ქართველმა ფეხბურთელმა გადაწყვეტილება მიიღო

51
(განახლებულია 19:35 23.02.2021)
ახალგაზრდა ნახევარმცველი უკრაინის ასაკობრივ ნაკრებებში წლების განმავლობაში ასპარეზობდა, 2019 წელს კი უკრაინის სახელით მსოფლიო ჩემპიონიც გახდა.

თბილისი, 23 თებერვალი – Sputnik. პოლტავის „ვორსკლას“ ქართული წარმომავლობის ნახევარმცველი გიორგი წიტაიშვილი საქართველოს ნაკრების ღირსებას დაიცავს. ინფორმაციას ერთ-ერთი უკრაინული გამოცემა ავრცელებს ჟურნალისტ იგორ ციგანიკზე დაყრდნობით.

გიორგი წიტაიშვილი ამჟამად კიევის „დინამოს“ საკუთრებაშია და „ვორსკლას“ შემადგენლობაში იჯარის წესით ასპარეზობს. მას ამ დრომდე უკრაინის მოქალაქეობა აქვს და ადგილობრივ ეროვნულ გუნდშიც არაერთი მატჩი აქვს ჩატარებული. საუბარია უკრაინის ასაკობრივ ნაკრებებზე, რომლის შემადგენლობაში 2019 წელს მსოფლიოს ჩემპიონიც გახდა.

ჟურნალისტი იგორ ციგანიკი წერს, რომ უკრაინელი ფეხბურთის ქომაგისთვის არცთუ კარგი ამბავი აქვს, რადგან წიტაიშვილმა მოქალაქეობასთან დაკავშირებით საბოლოო გადაწყვეტილება მიიღო. ჟურნალისტი გიორგის გადაწყვეტილებას მისი ბაბუის გარდაცვალების გამო საქართველოში ჩამოსვლასაც კი უკავშირებს.

„გიორგი წიტაიშვილმა გადაწყვიტა საქართველოს ნაკრებში ითამაშოს. ასეთია თავად ფეხბურთელის პოზიცია. რამდენიმე თვის წინ გიორგის ბაბუა გარდაეცვალა, რომელიც მას ძალიან უყვარდა. გასვენებაში კი მას ნათესავებმა ბაბუის სურვილი გააცნეს. როგორც ჩანს, ბაბუას სურდა, რომ გიორგის საქართველოში ეთამაშა“, – წერს უკრაინელი ჟურნალისტი.

საინტერესოა, რომ აღნიშნულ საკითხზე მცირე კომენტარი თავად ფეხბურთელმაც გააკეთა, თუმცა მან კონკრეტულ დეტალებზე საუბარი არ ისურვა.

„ჯერჯერობით არ შემიძლია და არც უფლება მაქვს ამ თემაზე ვისაუბრო. როდესაც მეტი კონკრეტიკა გვექნება, ყველაფერი ცხადი გახდება“, – განაცხადა წიტაიშვილმა.

აღსანიშნავია, რომ წიტაიშვილის მოქალაქეობის საკითხთან დაკავშირებით დიდი ხანია უცხოურ და ქართულ მედიაში აქტიურად იწერება. თავად ფეხბურთელს წარსულში მრავალჯერ აქვს ნათქვამი, რომ მოქალაქეობის შეცვლას არ აპირებს და უკრაინის ნაკრებში თამაშით კმაყოფილია.

გიორგის მიმდინარე სეზონში „დინამოს“ ძირითად შემადგენლობაში მხოლოდ ოთხი მატჩი აქვს ჩატარებული, ხოლო „ვორსკლას“ რიგებში ორ შეხვედრაში ერთი გოლის გატანა უკვე მოახერხა.

რამდენიმე დღის წინ მსგავსი ინფორმაცია ბელგიური „სერენის“ თავდამსხმელ გიორგი (ჟორჟ) მიქაუტაძეზეც გავრცელდა. მიქაუტაძეს ამ ეტაპზე ფრანგული პასპორტი აქვს, თუმცა შესაძლოა ისიც, წიტაიშვილის მსგავსად, საქართველოს ნაკრების მაისურით ვიხილოთ. ქართული წარმომავლობის ფეხბურთელი ბელგიის მეორე ლიგაში ასპარეზობს და მის ანგარიშზე მიმდინარე სეზონის 15 შეხვედრაში 16 გატანილი გოლია. მიქაუტაძე საკუთარი გუნდის ნამდვილი ლიდერი და საუკეთესო ბომბარდირია.

საქართველოს ფეხბურთის ფედერაციაში ამ დროისთვის წიტაიშვილთან და მიქაუტაძესთან დაკავშირებით ინფორმაციას არ ავრცელებენ.

51
თემები:
სპორტის ამბები (1017)
ნიკოლოზ ბასილაშვილი

ნიკა ბასილაშვილის მორიგი წარუმატებლობა - ამჯერად როტერდამში

30
მიმდინარე სეზონში ბასილაშვილმა შვიდი მატჩი ჩაატარა, აქედან მოიგო მხოლოდ ორი - ანტალიაში გამართულ ტურნირზე, სადაც ქართველმა ჩოგბურთელმა მეოთხედფინალამდე მიაღწია

თბილისი, 1 მარტი – Sputnik. საქართველოს პირველ ჩოგანს ნიკოლოზ ბასილაშვილს (АТР-ს რეიტინგში მე-40 ნომერი) უიღბლობა დასჩემდა. ამჯერად ის როტერდამში АТР-500 სერიის ტურნირის პირველ წრეში დამარცხდა.

ბასილაშვილმა ორ სეტში ბრიტანელ კემერონ ნორთან (65-ე) დამარცხდა - 0:6, 3:6. შეხვედრა ორ საათზე მეტხანს გაგრძელდა.

პირველი პარტია ნიკამ ფაქტობრივად ჩააგდო - ყველა ჩაწოდება წააგო. სეტში მხოლოდ ცხრა ქულა მოიგო (ხუთი თავის ჩაწოდებაზე და ოთხი - მეტოქის).

მეორე პარტიაში ბასილაშვილმა ბრეიკი გააკეთა (3:1), მაგრამ სეტის ბოლოს თამაში „გაექცა“. შედეგად ნორმა ზედიზედ ორი ბრეიკი გააკეთა და სეტი, მასთან ერთად კი მატჩიც მოიგო. აღსანიშნავია, რომ ტურნირის ძირითად ბადეში ბრიტანელი საკვალიფიკაციო რაუნდიდან მოხვდა.

მიმდინარე სეზონში ბასილაშვილმა შვიდი მატჩი ჩაატარა, რომელთაგანაც ორი მისი გამარჯვებით დასრულდა. იანვრის დასაწყისში ანტალიაში ტურნირზე ქართველმა ჩოგბურთელმა მეოთხედფინალამდე მიაღწია, სადაც ავსტრალიელ ალექს დი მინუართან ორ სეტში დათმო – 2:6, 4:6. ამის შემდეგ ბასილაშვილმა მონაწილეობა მიიღო სამ ტურნირში – მელბურნში, Australian Open-ზე და მონპელიეში, სადაც პირველივე წრეში მარცხი იგემა. როტერდამში გამოსვლა კიდევ ერთი წარუმატებლობა გახდა.

როტერდამის ტურნირის საპრიზო ფონდი 1 112 ათასი ევროა, ტურნირის მოქმედი გამარჯვებულია ფრანგი გაელ მონფისი.

30
ლევან გორგაძე

ტოჩინოშინი დაქვეითდა - ქართველი სუმოისტი მარტის ბაშოზე მე-7 მაეგაშირა იქნება

32
ტოჩინოშინისთვის მარტის სუპერტურნირი მის კარიერაში რიგით 90-ე ბაშო იქნება. ბაშო ტოკიოში გაიმართება და მას მაყურებელიც დაესწრება.

თბილისი, 1 მარტი - Sputnik. ქართველი სუმოისტი ლევან გორგაძე, იგივე ტოჩინოშინი, დაქვეითდა, ამას იაპონიის სუმოს ასოციაციის მარტის რეიტინგი ცხადყოფს.

ქართველმა სუმოისტმა წლის პირველი ბაშო უარყოფითი ბალანსით (4-11) დაასრულა, რაც განახლებულ რეიტინგზეც აისახა. ტოჩინოშინი აღმოსავლეთის მე-4 მაეგაშირას სტატუსს ატარებდა, ახლა კი ის აღმოსავლეთის მე-7 მაეგაშირაა.

მარტის ბაშოზე იოკუძუნას სტატუსით ორი სუმოისტი, ჰაკუჰო და კაკურიო იასპარეზებენ. ოძეკის რანგში შოდაი, ასანოიამა და ტაკაკეიშო გამოვლენ, ხოლო ტერუნოფუჯი და ტაკანოშო სეკივაკეს რანგში იქნებიან.

ტოჩინოშინი პროფესიულ სუმოში 2006 წლიდან გამოდის. უმაღლეს, მაკუუჩი დივიზიონში მისი დებიუტი 2008 წელს შედგა. რაც შეეხება მიღწევებს, ქართველ სუმოისტს იმპერატორის თასი ერთხელ აქვს მოგებული. ლევან გორგაძე კარიერის განმავლობაში შვიდჯერ იყო ოძეკის რანგში წარდგენილი. ქართველისთვის მარტის სუპერტურნირი 90-ე ბაშო იქნება.

მარტის (ჰარუ) ბაშო მსოფლიოში გავრცელებული პანდემიის გამო ტოკიოში 14-28 მარტს გაიმართება. ჩვეულებრივ ჰარუ ბაშოს იაპონიის ქალაქი ოსაკა მასპინძლობს ხოლმე.

32
 შოუ The Voice Georgia

„ვიცე-მის საქართველო“, მძიმე როკი და რესტორნის მომღერლები: რა მოამზადა ქართულმა „ვოისმა“

0
(განახლებულია 22:21 01.03.2021)
პროექტში The Voice of Georgia თავი მოიყარეს ყველაზე, ყველაზე გამორჩეულებმა - მოდელებმა, ქუჩის მუსიკოსებმა, რესტორნის მომღერლებმა და უბრალოდ სიმღერის მოყვარულებმა

შაბათს ვოკალური ტელეპროექტის The Voice of Georgia სეზონის მეორე გამოშვება - ბრმა მოსმენების ეტაპი გაიმართა. Sputnik-საქართველო მკითხველს ყველაზე გამორჩეულ კონკურსანტებსა და ნომრებს აცნობს.

სანდრო ლაშხი

სანდრო ლაშხი 20 წლის სტუდენტი და ქუჩის მუსიკოსია სასიამოვნო ხრინწიანი ხმით. მუსიკა ლაშხის ერთადერთი გატაცება არ არის. ის დროს უთმობს ფოტოგრაფიასა და ხატვას, განსაკუთრებით კი მოტოციკლეტები უყვარს.

სანდრომ შეასრულა ჯგუფის The Animals სიმღერა The house of rising sun. დაიწყო დაბალი ტონალობით, შემდეგ კი ზედა რეგისტრში გადავიდა. იგი მძიმე და კლასიკური როკის თაყვანისმცემელია. სანდრომ ნიკა რაჭველი და სალიო შემოაბრუნა, არჩევანი კი სალიოს გუნდზე შეაჩერა. 

მარიამ დოკვაძე

ოცდასამი წლის მარიამ დოკვაძე რუსთავიდანაა. გოგონას დედის თქმით, იგი ბავშვობიდან გამოირჩეოდა სრულყოფილი სმენით, ამიტომ გადაწყვიტეს მუსიკალურ სკოლაში მიყვანა. მარიამმა იქ მხოლოდ რამდენიმე წელი იარა, ამიტომ მიაჩნია, რომ თვითნასწავლია. 18 წლის ასაკში მარიამმა შექმნა ბენდი, რომელთან ერთადაც რესტორნებში გამოდიოდა.

პროექტისთვის დოკვაძემ შეარჩია არეტა ფრანკლინის სიმღერა Respect. გოგონამ ენერგიითა და ძლიერი ვოკალით თავიდანვე დაიმსახურა სტეფანესა და სალიოს მოწონება. მან სტეფანეს გუნდი აირჩია.

ლარა იანი

ამ გამოშვების ერთ-ერთი ყველაზე მომხიბვლელი მონაწილე თბილისელი 28 წლის ლარა იანი იყო. 2017 წელს ლარა მონაწილეობდა სილამაზის კონკურსში „მის მსოფლიო“, როგორც „ვიცე-მის საქართველო“, 2020 წელს კი მოსკოვში გაემგზავრა, სადაც 2020 წლის პირველი „ვიცე-მის ოფისი“ გახდა.

გოგონამ შეასრულა ბიონსეს სიმღერა Runnin. მსმენელი და მეგობარი ბიჭი ამაოდ ელოდნენ, რომ მისკენ ჟიურის რომელიმე წევრი შემობრუნდებოდა, თუმცა სიმღერის დასრულების შემდეგ, გოგონას დანახვისას, სტეფანემ ის კომპლიმენტებით აავსო.

სალომე ხუჯაძე

18 წლის თბილისელი სალომე ხუჯაძე ბავშვობიდან გატაცებულია სიმღერით. გოგონა საკმაოდ თავდაჯერებულია და გამოსვლამდე თითქმის არ ღელავდა, მიუხედავად იმისა, რომ ეს მისი პირველი პროექტია. ხუჯაძემ შეასრულა ჯენიფერ ჰადსონის სიმღერა I'm changing.

მან ხმის ტემბრით ჟიურის სამი წევრი მოხიბლა - სტეფანე, ნიკა რაჭველი და სალიო. არჩევანი კი მაესტრო რაჭველის გუნდზე შეაჩერა.

კატო ვერხვიაშვილი

31 წლის კატო თბილისში ცხოვრობს. დაიბადა მუსიკალურ ოჯახში, მაგრამ ძალები სპორტშიც აქვს მოსინჯული. ამჟამად მუსიკის გარდა ფოტოგრაფიითაა გატაცებული. პროექტ „ვოისის“ სცენაზე თავისი პირველი გამოსვლა კატომ მიუძღვნა მამას, რომელიც სამი თვის წინ გარდაიცვალა.

კატომ ტომ ჟობიმის სიმღერის Meditation პირველივე ნოტებიდან მიიქცია ყურადღება. სტეფანემ მომღერალი შეაფასა, როგორც ძალიან ალტერნატიული. ამასობაში მისკენ სალიო შემობრუნდა, რომელიც კატოს ნამღერმა ისე აღაფრთოვანა, რომ ჟიურის დანარჩენი წევრების ღილაკებსაც თავად დააჭირა ხელი. საბოლოოდ მომღერალი ნიაზ დიასამიძის გუნდში მოხვდა.

The Voice of Georgia - არის სატელევიზიო ვოკალური შოუ. 2012 წლიდან კონკურსი „იმედის“ არხზე გადიოდა, ამჟამად კი „პირველი არხით“ გადაიცემა.

ადრე მას ეწოდებოდა „ახალი ხმა“. პირველი ორი სეზონის გამარჯვებულები გახდნენ სალომე ქათამაძე და მარიამ ჩაჩხიანი. პროექტი არის ორიგინალური ფორმატის The Voice ქართული ანალოგი. პროექტი 2010 წელს ჰოლანდიურ ტელევიზიაში RTL4 გამოჩნდა, როგორც The Voice of Holland.

0