ძიუდოისტი ლაშა ბექაური

ქართველმა ძიუდოისტებმა თელ-ავივის „გრანდ სლემზე“ რვა მედალი მოიპოვეს - ვიდეო

129
(განახლებულია 22:50 20.02.2021)
ქართველმა ძიუდოისტებმა ისრაელის ქალაქ თელ-ავივში გამართულ „გრანდ სლემზე“ რვა მედლის მოპოვება შეძლეს. ყველაზე შედეგიანი ქართველებისთვის მესამე საჭიდაო დღე გამოდგა.

თბილისი, 20 თებერვალი - Sputnik. ისრაელის ქალაქ თელ-ავივში „დიდი სლემის“ სერიის ტურნირზე (TEL AVIV GRAND SLAM 2021) ქართველმა ძიუდოისტებმა ასპარეზობა დაასრულეს. ტურნირის ბოლო საჭიდაო დღეს ქართველებმა ხუთი მედალი მოიპოვეს.

„გრანდ სლემის“ ბოლო საჭიდაო დღეს პირველი შეხვედრა ბრინჯაოს მედლისთვის ბექა ღვინიაშვილმა (90კგ) აზერბაიჯანელ მამადალი მეჰდიევთან გამართა და იპონით გაიმარჯვა.

ამავე წონით კატეგორიაში ფინალში იჭიდავა ლაშა ბექაურმაც (-90 კგ), რომელიც ესპანეთის სახელით მოასპარეზე ნიკოლოზ შერაზადიშვილს დაუპირისპირდა. ბექაურმა დასაწყისშივე ვაზარის მოპოვება შეძლო და შეხვედრა ბოლომდე უპირატესობით მიიყვანა. აღნიშნული გამარჯვებით ბექაურმა ისრაელში პირველი ქართული ოქრო მოიპოვა.

ბრინჯაოს მედლის მოსაპოვებლად 100კგ-მდე წონით კატეგორიაში ერთმანეთს ქართველები დაუპირისპირდნენ. ორთაბრძოლის შუა ნაწილში ილია სულამანიძემ ონისე სანებლიძის დაგდება მოახერხა, რასაც მისი მხრიდან კიდევ ერთი გდება მოჰყვა და ბრინჯაოს მედალს დაეუფლა.

მძიმე წონით კატეგორიაში მოასპარეზე გურამ თუშიშვილმა (+100 კგ) ბრინჯაოს მედლისთვის ბრძოლაში ბელარუსი მოჭიდავე ალექსანდრ ვახავიაკი დაამარცხა. გურამის აქტიურობას პირველივე წუთზე მოპოვებული ვაზარი მოჰყვა, ხოლო შეხვედრის შუა ნაწილში ქართველმა გოლიათმა კიდევ ერთი გდება შეასრულა, რითაც საქართველოს კიდევ ერთი მედალი შემატა. აღსანიშნავია, რომ თუშიშვილმა ნახევარფინალური ბრძოლა გელა ზაალიშვილთან (+100 კგ) დათმო, რომელმაც ფინალში რუს ტამერლან ბაშაევთან უმნიშვნელოვანესი გამარჯვება მოიპოვა და საქართველოს მეორე ოქრო აჩუქა. ზაალიშვილმა მოწინააღმდეგე თავისსავე ილეთზე წამოაგო და შეხვედრა ულამაზესი გდებით დაასრულა.

ამგვარად, ქართველმა ძიუდოისტებმა ისრაელში გამართულ „გრანდ სლემზე“ სულ რვა მედლის მოპოვება შეძლეს. პირველ საჭიდაო დღეს ეთერ ლიპარტელიანმა (ბრინჯაო) და თემურ ნოზაძემ (ვერცხლი) მოახერხეს კვარცხლბეკზე ასვლა. ტურნირის მეორე დღეს კი საქართველომ მხოლოდ ერთ მედალი მოიპოვა. ნუგზარ ტატალაშვილმა ბრინჯაოს მედლისთვის ბრძოლაში შვედი ძიუდოისტი დაამარცხა.

საერთოგუნდურ ჩათვლაში საქართველოს ვაჟთა ნაკრებმა პირველი ადგილი დაიკავა -  - ორი ოქრო, ერთი ვერცხლი და ოთხი ბრინჯაო. მეორე ადგილზე ესპანეთის ნაკრებია (1-1-0), მესამე ადგილი უზბეკეთის და ნიდერლანდების ძიუდოისტებმა გაიყვეს (1-0-2).

 

129
ლევან გორგაძე

ტოჩინოშინი დაქვეითდა - ქართველი სუმოისტი მარტის ბაშოზე მე-7 მაეგაშირა იქნება

13
ტოჩინოშინისთვის მარტის სუპერტურნირი მის კარიერაში რიგით 90-ე ბაშო იქნება. ბაშო ტოკიოში გაიმართება და მას მაყურებელიც დაესწრება.

თბილისი, 1 მარტი - Sputnik. ქართველი სუმოისტი ლევან გორგაძე, იგივე ტოჩინოშინი, დაქვეითდა, ამას იაპონიის სუმოს ასოციაციის მარტის რეიტინგი ცხადყოფს.

ქართველმა სუმოისტმა წლის პირველი ბაშო უარყოფითი ბალანსით (4-11) დაასრულა, რაც განახლებულ რეიტინგზეც აისახა. ტოჩინოშინი აღმოსავლეთის მე-4 მაეგაშირას სტატუსს ატარებდა, ახლა კი ის აღმოსავლეთის მე-7 მაეგაშირაა.

მარტის ბაშოზე იოკუძუნას სტატუსით ორი სუმოისტი, ჰაკუჰო და კაკურიო იასპარეზებენ. ოძეკის რანგში შოდაი, ასანოიამა და ტაკაკეიშო გამოვლენ, ხოლო ტერუნოფუჯი და ტაკანოშო სეკივაკეს რანგში იქნებიან.

ტოჩინოშინი პროფესიულ სუმოში 2006 წლიდან გამოდის. უმაღლეს, მაკუუჩი დივიზიონში მისი დებიუტი 2008 წელს შედგა. რაც შეეხება მიღწევებს, ქართველ სუმოისტს იმპერატორის თასი ერთხელ აქვს მოგებული. ლევან გორგაძე კარიერის განმავლობაში შვიდჯერ იყო ოძეკის რანგში წარდგენილი. ქართველისთვის მარტის სუპერტურნირი 90-ე ბაშო იქნება.

მარტის (ჰარუ) ბაშო მსოფლიოში გავრცელებული პანდემიის გამო ტოკიოში 14-28 მარტს გაიმართება. ჩვეულებრივ ჰარუ ბაშოს იაპონიის ქალაქი ოსაკა მასპინძლობს ხოლმე.

13
გოგონა კომპიუტერთან

იქმნება მზერითა და აზრის ძალით მომუშავე კომპიუტერი: შედეგები უკვე არის

8
(განახლებულია 16:33 01.03.2021)
მეცნიერების თქმით, უნიკალურ სისტემას გარკვეული ნაკლი აქვს, რომლის აღმოფხვრაზეც მუშაობენ ამ დროისათვის

თბილისი, 1 მარტი — Sputnik. მეცნიერები კომპიუტერის მზერითა და „აზრის ძალით“ მართვის უნიკალურ სისტემაზე მუშაობენ მოსკოვის სახელმწიფო ფსიქოლოგიურ–პედაგოგიურ უნივერსიტეტში, შედეგები უკვე გამოქვეყნდა ჟურნალში Frontiers in Neuroscience.

გავრცელებული ინფორმაციით, სისტემას საფუძვლად ტვინის მაგნიტური ველების ამოკითხვა უდევს და ამას მნიშვნელოვნად შეუძლია გაუმარტივოს კომპუიტერით სარგებლობა შეზღუდული შესაძლებლობების მქონე ადამიანებს.

ავტორების თქმით, მზერის მეშვეობით კომპიუტერის მართვისთვის გამოიყენება სპეციალური მოწყობილობა აიტრეკერი. ის ვიდეოკამერის მეშვეობით განსაზღვრავს, რა ადგილს უყურებს მომხმარებელი ეკრანზე. ასეთ შემთხვევაში მზერის ერთ ადგილზე შეჩერება იგივეა, რაც „მაუსის დაკლიკება“.

ამასთან მეცნიერები წუხან, რომ ამ ტექნოლოგიას ჯერჯერობით სერიოზული ნაკლი აქვს: მას არ შეუძლია ამოიცნოს, განზრახ, ანუ დასაკლიკებლად აჩერებს მომხმარებელი ეკრანზე მზერას თუ უბრალოდ აკვირდება, ათვალიერებს რამეს.

სწორედ ამ ნაკლის აღმოფხვრაზე მუშაობენ ამ დროისათვის მოსკოველი მეცნიერები. ისინი ქმნიან სისტემას, რომელსაც განზრახ და შემთხვევით გაჩერებული მზერის განსხვავების უნარი ექნება. ავტორების თქმით, ეს იქნება აიტრეკერისა და კიდევ ერთი ტექნოლოგიის ჰიბრიდი, რომელიც შშმ პირების დასახმარებლად გამოიყენება.

8
თემები:
მსოფლიო და მეცნიერება
ანკარა

თურქეთში ტურისტებისთვის შეზღუდვები გაახანგრძლივეს

6
ტესტი კორონავირუსის გამოსავლენად უნდა გაკეთდეს რეისამდე არაუმეტეს 72 საათით ადრე. ექვს წლამდე ასაკის ბავშვებს ტესტის გაკეთება კვლავ არ მოეთხოვებათ

თბილისი, 1 მარტი - Sputnik. თურქეთის ხელისუფლებამ გადაწყვიტა, კვლავ გაახანგრძლივოს შეზღუდვა, რომლის თანახმადაც ქვეყანაში ჩასულმა მოგზაურებმა უნდა წარადგინონ უარყოფითი ტესტი COVID-19-ზე. იუწყება ტურისტული ოპერატორების ასოციაცია.

ავიაკომპანიებისთვის დაგზავნილ დირექტივაში ნათქვამია, რომ ისინი ვალდებული არიან, თურქეთში მიმავალ თვითმფრინავში დაუშვან მხოლოდ ის ტურისტები, რომლებიც ამ დოკუმენტს წარუდგენენ.

წესები 26 მაისამდე იმოქმედებს.

აღნიშნულია, რომ კორონავირუსის ანალიზი უნდა გაკეთდეს არაუადრეს 72 საათისა რეისის აფრენამდე. ამასთან, ექვს წლამდე ბავშვებისთვის ტესტი კვლავაც არ არის საჭირო. ტესტის წარმოდგენის ვალდებულება არ გააჩნიათ ასევე სატრანზიტო მგზავრებს, რომლებიც მესამე სახელმწიფოებში მიემგზავრებიან.

6