რაგბი. საქართელო-რუსეთი. 2021 წლის 7 თებერვალი

ლევან მაისაშვილი: რუსეთი კარგად მოემზადა მატჩისთვის

102
(განახლებულია 20:28 07.02.2021)
გამარჯვების მიუხედავად, საქართველოს მორაგბეთა ნაკრების მოთამაშეები და მწვრთნელები თამაშის ხარისხით უკმაყოფილონი დარჩნენ

თბილისი, 7 თებერვალი – Sputnik. საქართველოს რაგბის ნაკრების მთავარმა მწვრთნელმა ლევან მაისაშვილმა ისაუბრა თავისი აღსაზრდელების გამარჯვებაზე (16:7) რუსეთზე ევროპის ერთა თასის მატჩში. ბორჯღალოსნების თავკაცის თქმით, მეტოქე კარგად იყო მომზადებული თამაშისთვის.

„არ გვიფიქრია, რომ პირველ ტაიმში ქულებს ვერ ავიღებდით. ამ ტიპის თამაშებში ხშირად ხდება მსგავსი რამ. თუ მეტოქეს ვერ მოაქცევ წნეხში, გარკვეული პერიოდის შემდეგ, ეს წნეხი შენზე გადმოდის და სწორედ ეს დაგვემართა. გვქონდა კარგი მომენტები, მაგრამ დაუდევრობის გამო ქულა ვერ ავიღეთ, ბურთს ვერ გავუფრთხილდით. რუსები ამ შეხვედრისთვის კარგად იყვნენ მომზადებული“, - განაცხადა მაისაშვილმა მატჩისშემდგომ პრესკონფერენციაზე.

Матч по регби между сборными Грузии и России 7 февраля 2021 года
© Sputnik / STRINGER
რაგბი. საქართელო-რუსეთი. 2021 წლის 7 თებერვალი

„ბორჯღალოსნების“ თავკაცმა აღნიშნა, რომ მეორე ტაიმში მისმა შეგირდებმა ითამაშეს უკეთესად, თუმცა არა იდეალურად.

„პირველ ტაიმში გაგვიჭირდა შერკინებაში, თუმცა მეორე ტაიმში ეს კომპონენტიც და მოლიც უკეთესი იყო. შესაძლოა, ისეთი სხვაობით ვერ მოვიგეთ, როგორითაც ვგეგმავდით, მაგრამ წამითაც არ დამდგარა იმის საფრთხე, რომ გამარჯვებას ვერ შევძლებდით“, - ხაზგასმით აღნიშნა მაისაშვილმა.

Матч по регби между сборными Грузии и России 7 февраля 2021 года
© Sputnik / STRINGER
რაგბი. საქართელო-რუსეთი. 2021 წლის 7 თებერვალი

თამაშით უკმაყოფილება გამოთქვა საქართველოს ნაკრების კაპიტანმა მერაბ შარიქაძემაც: „ეს არ იყო რუსეთთან ყველაზე მძიმე თამაში. დარწმუნებული ვარ, გულშემატკივარი ამ თამაშით არ იქნება ბედნიერი და დიდად არც ჩვენ ვართ გახარებულები, მაგრამ მოგება მოგებაა. რეალობა ისაა, რომ რუსეთთან თამაში იმხელა პასუხისმგებლობაა, იმდენად ემოციური და მძიმეა, რომ ეს ხშირად ხელს გვიშლის ხოლმე“.

აღსანიშნავია, რომ საქართველოს ნაკრებმა რუსეთს ზედიზედ მე-19-დ მოუგო.

სატურნირო თვალსაზრისით თბილისში გამართულ მატჩს არანაირი მნიშვნელობა არ ჰქონდა - საქართველოს ნაკრებმა წინასწარ, ჯერ კიდევ შარშან გახდა ევროპის ერთა თასის გამარჯვებული, ხოლო რუსეთმა ტურნირის უმაღლეს დივიზიონში ადგილი შეინარჩუნა.

საქართველოს და რუსეთის ნაკრებები ერთმანეთს 24-ჯერ შეხვედრიან. პირველად 1993 წელს პოლონეთში, მაშინ რუსეთმა პირველად და უკანასკნელად დაამარცხა საქართველოს ნაკრები ანგარიშით 15:9.

Сборная Грузии по регби с европейским кубком 7 февраля 2021 года
© Sputnik / STRINGER
საქართელოს რაგბის ნაკრები ევროპის ერთა თასით. 2021 წლის 7 თებერვალი

2002 წელს გუნდებმა შეხვედრა ფრედ - 12:12 დაასრულეს. ყველა დანარჩენი მატჩი საქართველოს ნაკრების გამარჯვებით მთავრდებოდა. 2012 წელს თბილისში გამართულ მატჩში „ბორჯღალოსნებმა“ მეტოქე ანგარიშით 46:0 დაამარცხეს.

საქართველო-რუსეთის ნაკრებების დაპირისპირების საერთო ანგარიშია - 595:276, ლელოს რაოდენობა კი - 67:17.

102
ჰელი–სქი

თურნავა: ბაკურიანი მზადაა, მაღალ დონეზე უმასპინძლოს მსოფლიო თასის ეტაპს

23
(განახლებულია 20:48 25.02.2021)
მსოფლიო თასის აღნიშნული ეტაპი 26-28 თებერვალს ჩატარდება. პანდემიიდან გამომდინარე, ბაკურიანში შეჯიბრება მაყურებლის გარეშე გაიმართება.

თბილისი, 25 თებერვალი – Sputnik. ეკონომიკისა და მდგრადი განვითარების მინისტრი ნათია თურნავა ბაკურიანში „სქი-ქროსში“ მსოფლიო თასის ეტაპის ორგანიზატორებს შეხვდა. მხარეებმა დაგეგმილი ტურნირის ჩატარებასა და მის მნიშვნელობაზე ისაუბრეს. იუწყება „პირველი არხი“.

ბაკურიანში 26-28 თებერვალს სათხილამურო ფედერაციის ეგიდით დაგეგმილ მაღალი დონის შეჯიბრებაში 9 ქვეყნის 51 სპორტსმენი მიიღებს მონაწილეობას (ავსტრია, ბელგია, კანადა, ჩეხეთი, ბრიტანეთი, იაპონია, შვეიცარია, შვედეთი, აშშ). ბაკურიანი შერეული ნაკრებების გუნდურ შეჯიბრებას მსოფლიო თასის ფარგლებში პირველად უმასპინძლებს. ასპარეზობა კოვიდ-პროტოკოლის წესებისა და რეგულაციების მკაცრი დაცვით გაიმართება.

მინისტრის თქმით, საქართველოს მთავრობა ხელს უწყობს საქართველოში არსებულ სამთო კურორტებზე შეჯიბრებების გამართვას. შეხვედრაზე ასევე საქართველოში ზამთრის სათხილამურო კურორტების განვითარების პერსპექტივებზე ისაუბრეს.

„ეს მნიშვნელოვანი საერთაშორისო შეჯიბრება ტარდება 2023 წლის ზამთრის ჩემპიონატისთვის მზადების ეგიდით. მოგეხსენებათ, ამ მიზნით საქართველოში ძალიან სერიოზული დელეგაციები ჩამოდიან ცხრა ქვეყნიდან, რომლებიც მონაწილეობას მიიღებენ ამ მნიშვნელოვან სპორტულ ღონისძიებაში“, – განაცხადა თურნავამ.

მსოფლიო ჩემპიონატის პროექტის ფარგლებში ბაკურიანში დიდი ინფრასტრუქტურული პროექტები განხორციელდა – აშენდა სამი ახალი საბაგირო, დამონტაჟდა ხელოვნური გათოვლიანების სისტემა, შეიძინეს სპეცტექნიკა და უსაფრთხოების ინვენტარი და სხვ.

საქართველო ფრისტაილსა და სნოუბორდში 2023 წლის მსოფლიო ჩემპიონატისთვის ემზადება>>

აღნიშნულ საკითხზე შეხვედრის შემდეგ საქართველოს სათხილამურო ფედერაციის ვიცე-პრეზიდენტმა პატრიკ ლანგმაც ისაუბრა. მისი თქმით, მსგავსი ტურნირები ქართული მთების პოპულარიზაციას კარგად წაადგება.

  • „ჩვენზე მართლაც დიდი შთაბეჭდილება მოახდინა იმ გარემოებამ, რომ ძალიან ძლიერი მხარდაჭერა გვქონდა ქართველი ხალხისგან, სათხილამურო ფედერაციისა და საქართველოს მთავრობისგან, რაც ძალიან კარგია. ასევე იმედით ვუყურებთ მომავალს, რადგან ეს ნამდვილად კარგი შანსია, რომ საქართველომ განიმტკიცოს პოზიცია, როგორც მსგავსი ტურნირების მასპინძელმა ქვეყანამ“, – აღნიშნა პატრიკ ლანგმა.

შეჯიბრება საქართველოს მთავრობის მხარდაჭერით, ეკონომიკისა და მდგრადი განვითარების სამინისტროს „მთის კურორტების განვითარების კომპანიისა“ და საქართველოს სათხილამურო ფედერაციის ორგანიზებით გაიმართება.

23
თემები:
სპორტის ამბები
ნიკა ბასილაშვილი

ქართველი ჩოგბურთელი კვლავ დამარცხდა - ამჯერად მონპელიეში

173
პირველ წრეში მარცხის გამო ბასილაშვილი სარეიტინგო ქულების გარეშე დარჩა, თუმცა საპრიზო ფონდიდან ოთხი ათასი ევრო ერგო

თბილისი, 24 თებერვალი - Sputnik. საქართველოს პირველმა ჩოგანმა (მე-40 АТР რეიტინგში) მონპელიეში АТР-250 კატეგორიის ტურნირზე გამოსვლა მარცხით დაასრულა.

პირველივე წრეში ბასილაშვილი დამარცხდა ფრანგ გრეგუარ ბარერთან (113) ორ სეტში ერთი და იმავე ანგარიშით 4:6. მატჩი ერთ საათი და 17 წუთი გრძელდებოდა.

აღსანიშნავია, რომ მეორე სეტის მეოთხე გეიმში ბასილაშვილი 4:1 დაწინაურდა, მაგრამ ამის შემდეგ ზედიზედ ხუთი გეიმი წააგო. ქართველმა ჩოგბურთელმა ოთხი ბრეიკ-პოინტიდან ორი გამოიყენა, ბარერს კი 11 ბრეიკ-პოინტი და ოთხი ბრეიკი ჰქონდა.

პირველ წრეში მარცხის წყალობით ბასილაშვილი სარეიტინგო ქულების გარეშე დარჩა. ერთადერთი ნუგეში - ოთხი ათასი ევროა საპრიზო ფონდიდან.

მონპელიეს ტურნირის საპრიზო ფონდი 324 ათას ევროს შეადგენს, მისი მოქმედი ჩემპიონი გაელ მონფისია (საფრანგეთი).

173
სალომე ზურაბიშვილი

სალომე ზურაბიშვილმა ჟურნალისტზე თავდასხმის ფაქტი დაგმო და დამნაშავეების დასჯა მოითხოვა

0
(განახლებულია 22:51 25.02.2021)
ჟურნალისტ ვახო სანაიაზე თავდასხმის ფაქტზე სამი პირია დაკავებული. ბრალის დამტკიცების შემთხვევაში მათ ორ წლამდე ვადით თავისუფლების აღკვეთა ემუქრებათ.

თბილისი, 25 თებერვალი – Sputnik. საქართველოს პრეზიდენტმა სალომე ზურაბიშვილმა ჟურნალისტ ვახო სანაიაზე თავდასხმის ფაქტი დაგმო და სამართალდამცავ სტრუქტურებს მიმართა, რაც შეიძლება სწრაფად გამოიძიონ აღნიშნული ინციდენტი.

ტელეკომპანია „ფორმულას” ტელეწამყვან ვახო სანაიას, მის მეუღლესა და მისი მეუღლის ნათესავს წუხელ თბილისში, წყნეთის ქუჩაზე დაესხნენ თავს. თავდამსხმელების მოგერიებაში ჟურნალისტს დაეხმარნენ ტექნიკური სამსახურის თანამშრომლები, რომლებიც მან მანქანის მოყინული გზიდან გამოსაყვანად გამოიძახა. ადგილზე მისულმა სამართალდამცველებმა თავდასხმის ფაქტზე სამი პირი ცხელ კვალზე დააკავეს. სანაია დარწმუნებულია, რომ თავდასხმა მის ჟურნალისტურ საქმიანობას უკავშირდება.

„კატეგორიულად მიუღებელია ნებისმიერი ფორმისა და სახის ძალადობა! ძალადობა, არსებული დაპირისპირებისა და პოლარიზაციის ფონზე კიდევ უფრო დაუშვებელია და მას არანაირი გამართლება არ აქვს! მივმართავ სამართალდამცავ ორგანოებს, სწრაფად გამოიძიონ ფაქტი და დაისაჯონ დამნაშავეები, რათა არ იქნეს წახალისებული ძალადობა!“ - დაწერა პრეზიდენტმა სოციალურ ქსელში.

შსს-მ სანაიაზე თავდასხმის ფაქტზე სამი ადამიანი დააკავა. გამოძიება საქართველოს სსკ-ის 126-ე მუხლით მიმდინარეობს, რაც „ორი და მეტი პირის მიმართ ჯგუფურ ძალადობას“ გულისხმობს. აღნიშნული დანაშაულისთვის მაქსიმალური სასჯელია - 2 წლის ვადით თავისუფლების აღკვეთა.

 

 

0