გიორგი შერმადინი

„გიორგი შერმადინი 2020 წლის მეფე“ ქართველი კალათბურთელი ესპანეთში საუკეთესოა

66
(განახლებულია 19:46 07.01.2021)
გიორგი შერმადინი ჩემპიონატში საუკეთესო კალათბურთელად მეორედ დაასახელეს. ქართველმა ცენტრმა ეს ტიტული პირველად 2017 წელს მოიპოვა.

თბილისი, 7 იანვარი – Sputnik. ესპანეთის ჩემპიონატის 2020 წლის საუკეთესო კალათბურთელად „ტენერიფეს“ ქართველი ცენტრი გიორგი შერმადინი დასახელდა. გასული წლის შედეგები ესპანეთის კალათბურთის ჩემპიონატის ოფიციალურმა ვებ-გვერდმა შეაჯამა.

კალათბურთელები სარგებლიანობის ჯამური კოეფიციენტის მიხედვით შეაფასეს, რაც მოპოვებული ქულების, მოხსნების, სეზონში ჩატარებული წუთებისა და სხვა სათამაშო კომპონენტებისგან შედგება.

ესპანური ვებ-გვერდის მიერ გამოქვეყნებულ სტატიაში გიორგი შერმადინს 2020 წლის მეფე (Shermadini, el Rey de 2020) უწოდეს. ქართველმა ცენტრმა ესპანეთის ჩემპიონატში მოასპარეზე უძლიერეს კალათბურთელებს ვალტერ ტავარესს, მარსელინიო უერტასსა და ნიკოლა მიროტიჩს აჯობა.

გიორგი შერმადინის სარგებლიანობის კოეფიციენტი 592 იყო. მას მცირედით ჩამორჩა ვალტერ ტავარესი (579), მიროტიჩის ჯამური კოეფიციენტი კი 547-ს შეადგენს.

აღსანიშნავია, რომ შერმადინი ესპანეთის ლიგაში 2017 წელსაც საუკეთესოდ დასახელდა, 2018 წელს კი პირველობა კიდევ ერთ ქართველ კალათბურთელს თორნიკე შენგელიას ერგო. შენგელია იმ პერიოდში ესპანური „ბასკონიას“ ღირსებას იცავდა, ახლა კი მოსკოვის „ცსკა“-ში ირჯება.

გიორგი შერმადინი „ტენერიფეს“ ღირსებას უკვე მეორე სეზონია იცავს. მიმდინარე სეზონში მას ესპანეთის ჩემპიონატში 17 მატჩი აქვს ჩატარებული, საშუალო მაჩვენებლები კი ასეთი აქვს: 24:39 წუთი, 16.4 ქულა, 6.0 მოხსნა, 2.2 პასი.

გიორგის საშუალო სარგებლიანობის კოეფიციენტი 22.7-ს უტოლდება, რაც ესპანეთის ჩემპიონატში საუკეთესო მაჩვენებელია. „ტენერიფეს“ 17-დან 14 მატჩი აქვს მოგებული და „ბარსელონასთან“ II-III ადგილებს იყოფს.

აღსანიშნავია, რომ საქართველოს კალათბურთის ნაკრების კაპიტანი თორნიკე შენგელია ესპანეთში ათწლეულის საუკეთესო მოთამაშის ტიტულის კანდიდატთა სიაში მოხვდა, ვებ-გვერდზე მასთან დაკავშირებული კენჭისყრა 11 იანვარს გაიმართება.

66
ქართველი სპორტსმენები

ოლიმპიადებში გამარჯვებული ქართველი სპორტსმენები გაორმაგებულ სტიპენდიას მიიღებენ

37
(განახლებულია 19:40 15.01.2021)
მთავრობის გადაწყვეტულება ძალიან მნიშვნელოვანია იმის გათვალისწინებით, რომ 2021 წელს მნიშვნელოვანი სპორტული ღონისძიებებია დაგეგმილი.

თბილისი, 15 იანვარი – Sputnik. ოლიმპიურ და პარალიმპიურ ჩემპიონებს, საჭადრაკო ოლიმპიადებში გამარჯვებულ სპორტსმენებს ყოველთვიური სტიპენდია გაუორმაგდათ, ისინი დღეიდან 2000 ლარს მიიღებენ, იუწყება საქართველოს განათლების, მეცნიერების, კულტურისა და სპორტის სამინისტრო.

უწყების ცნობით, სპორტსმენების ჩამონათვალს ოლიმპიური და პარალიმპიური თამაშების პრიზიორებიც დაემატებიან. ვერცხლის მედლის მფლობელებს 800, ხოლო ბრინჯაოს მედალოსნებს 500 ლარი გადაეცემათ.

ყოველთვიური სტიპენდია ასევე დაენიშნებათ უფროსთა შორის მსოფლიო ჩემპიონებსა და ევროპის ჩემპიონებსაც. მსოფლიო ჩემპიონატზე გამარჯვებულები 800 ლარს, ხოლო ევროპის ჩემპიონები - 400 ლარს მიიღებენ.

სპორტსმენთა სტიპენდიების გაზრდის შესახებ საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა პარლამენტში სპორტისა და ახალგაზრდულ საქმეთა კომიტეტის წინაშე გამოსვლისას დეკემბერში ისაუბრა.

„გადაწყვეტილება მიღებულია სამთავრობო გეგმის ფარგლებში. საქართველოს მთავრობისთვის სპორტი ერთ-ერთი უმთავრესი პრიორიტეტია და მისი მხარდაჭერა მომავალშიც გაგრძელდება. მთავრობის მიერ მიღებული გადაწყვეტილება ორმაგად მნიშვნელოვანია 2021 წელს დაგეგმილი მნიშვნელოვანი სპორტული ღონისძიებების გათვალისწინებით“, – ნათქვამია სამინისტროს მიერ გავრცელებულ განცხადებაში.

მიმდინარე წლის 23 ივლისიდან 8 აგვისტოს ჩათვლით ტოკიოში ზაფხულის ოლიმპიური თამაშები ჩატარდება. ოლიმპიადა 2020 წელს უნდა ჩატარებულიყო, თუმცა მსოფლიოში არსებული პანდემიის გამო ერთი წლით გადაიდო.

ტოკიოში 24 აგვისტოდან 5 სექტემბრის ჩათვლის გაიმართება პარალიმპიური თამაშებიც. 2021 წელს ასევე ჩანიშნულია ევროპისა და მსოფლიოს ჩემპიონატები არაერთ ოლიმპიური სპორტის სახეობაში.

სამინისტროს ცნობით, მომავალი შეჯიბრებები ქართველ სპორტსმენებს წარმატებით ასპარეზობის შემთხვევაში შესაძლებლობას აძლევს საქართველოს მთავრობის დადგენილების შესაბამისად ყოველთვიური სტიპენდია მიიღონ.

37
თემურ ქეცბაია

„ანორთოსისს“ თემურ ქეცბაიასთან კონტრაქტის გაგრძელება სურს

22
(განახლებულია 18:57 15.01.2021)
„ანორთოსისის“ ხელმძღვანელობამ ქეცბაიას კონტრაქტის 2023 წლამდე გაგრძელების წინადადებით ოფიციალურად მიმართა.

თბილისი, 15 იანვარი – Sputnik. კვიპროსის საფეხბურთო კლუბმა „ანორთოსისმა“ თემურ ქეცბაიას, რომელიც 2019 წლიდან გუნდის მთავარი მწვრთნელია, ახალი კონტრაქტი შესთავაზა და ქართველი სპეციალისტის პასუხს ელოდება, იუწყება გამოცემა kathimerini.com.cy.

„ანორთოსისის“ ხელმძღვანელობამ კონტრაქტის 2023 წლამდე გაგრძელების წინადადებით ქეცბაიას ოფიციალურად მიმართა. ამჟამინდელი შეთანხმება ფამაგუსტას კლუბსა და ქართველ მწვრთნელს შორის მიმდინარე წლის მაისში იწურება. ქეცბაიამ მოსაფიქრებლად რამდენიმე დღე ითხოვა“, – წერს გამოცემა.

ინფორმაციაში ასევე აღნიშნულია, რომ ახალი კონტრაქტი ქეცბაიასთვის უკეთეს პირობებს შეიცავს.

ქეცბაია „ანორთოსისში“ 2004 წლიდან 2009 წლამდე მუშაობდა, 2019 წლიდან კი ის კლუბს კვლავ ჩაუდგა სათავეში. ქართველი სპეციალისტის თავკაცობით „ანორთოსისმა“ ორჯერ მოიგო კვიპროსის ჩემპიონატი (2005, 2008) და თითოჯერ ქვეყნის თასი და სუპერთასი (2007).

ეროვნული პირველობის მიმდინარე გათამაშებაში „ანორთოსისი“ 19 ტურის შემდეგ 36 ქულით სატურნირო ცხრილში მეოთხე ადგილს იკავებს და ჩემპიონატის ლიდერს – „აპოლონს“ ოთხი ქულით ჩამორჩება.

22
ეკატერინე ტიკარაძე

ტიკარაძე: აუცილებლად ავიცრები და არ ვისარგებლებ არანაირი პრიორიტეტით

0
საქართველოში კორონავირუსის საწინააღმდეგო ვაქცინაციის გეგმის მომზადებასა და მის შესყიდვაზე სპეციალურად შექმნილი უწყებათშორისი კომისია მუშაობს

თბილისი, 15 იანვარი - Sputnik. საქართველოს ჯანდაცვის მინისტრი ეკატერინე ტიკარაძე კორონავირუსზე აუცილებლად აიცრება, ამის შესახებ მან ტელეკომპანია „რუსთავი 2“-ის ეთერში განაცხადა.

ჯანდაცვის მინისტრის განმარტებით, ქვეყანაში გარანტირებულად ხარისხიანი ვაქცინა შემოვა, ამის გარანტიებს კი COVAX-პლატფორმა იძლევა.

„რა თქმა უნდა, ავიცრები იმ კატეგორიაში, რომელშიც ვაქცინაციის საჭიროება მექნება და არ ვისარგებლებ პრიორიტეტით… ზუსტად ვიცი, რა ხარისხის ვაქცინაცია იქნება ქვეყანაში და ვაქცინას აუცილებლად გავიკეთებ“, - განაცხადა ეკატერინე ტიკარაძემ.

ტიკარაძის თქმით, საუბარია Pfizer-ის ვაქცინაზე, რომლის დოზირებაც ორეტაპიანია. მან ასევე აღნიშნა, რომ გარანტირებულად ხარისხიანი ვაქცინა შემოვა, ამის გარანტიებს კი COVAX-პლატფორმაზე გასაგზავნად დღეს უკვე გამზადდა წერილი ყველა იმ შესრულებული სამუშაოების შესახებ, რომელიც საქართველოში ვაქცინაციის მომზადების პერიოდისთვის განხორციელდა.

„მზადდება გარკვეული დოკუმენტაცია როგორც საკანონმდებლო, ასევე საინფორმაციო მიმართულებით. გეგმაზომიერად მივყვებით ყველა იმ პროცესს, რომელიც საჭიროა შეუფერხებელი და უსაფრთხო ვაქცინაციისთვის“, - განაცხადა ჯანდაცვის მინისტრმა.

მინისტრმა ასევე აღნიშნა, რომ ქვეყანაში ვაქცინების შესანახად დამატებითი მაცივრების შეძენის საჭიროება არ არის.

საქართველოს პირველ ეტაპზე COVID-19-ის საწინააღმდეგო ვაქცინის იმ რაოდენობით შეძენის უფლება აქვს, რომელიც მოსახლეობის 20%-სთვის იქნება საკმარისი. ქვეყანამ 1 400 ათასი დოზა ვაქცინის შესაძენად პირველი შენატანი — 4 მლნ დოლარი უკვე განახორციელა. აღნიშნული რაოდენობა 700 ათას ადამიანზეა გათვლილი.

პრემიერი: ვაქცინასთან დაკავშირებით ბევრი აბსურდული ჭორი ვრცელდება >>

საქართველოში კორონავირუსის საწინააღმდეგო ვაქცინაციის გეგმის მომზადებასა და მის შესყიდვაზე სპეციალურად შექმნილი უწყებათშორისი კომისია მუშაობს, რომელიც ასევე უზრუნველყოფს კოვიდ-ვაქცინაციის დასაწყებად საჭირო ტექნიკურ სამუშაოებს.

0