საქართველოს ფეხბურთი ნაკრები უეფას ერთა ლიგის ფინალისათვის ემზადება

საქართველო Vs ჩრდილოეთ მაკედონია: ერთი ნაბიჯი ისტორიულ შედეგამდე

318
(განახლებულია 16:01 11.11.2020)
ქართველი გულშემატკივრები სულმოუთქმელად ელოდებიან 12 ნოემბერს დაგეგმილ მატჩს. რა შანსები აქვს საქართველოს ნაკრებს და რამდენად მნიშვნელოვანი იქნება გამარჯვება ქართული ფეხბურთისთვის – ცნობილი ფეხბურთელი არჩილ არველაძე გვესაუბრა.

ერეკლე ხიტალიშვილი

ქვეყანა ისტორიული დღის მოლოდინშია. საქართველოს ეროვნულ ნაკრებს ევროპის ჩემპიონატის ჯგუფურ ეტაპზე მოსახვედრად ერთი შეხვედრის მოგება სჭირდება.

საქართველოს ნაკრების შესანიშნავი დასაწყისი „ერთა ლიგაზე“ 

ყველაფერი 2018 წლის 6 სექტემბერს დაიწყო, როდესაც „ერთა ლიგის“ გათამაშების პირველ ოფიციალურ შეხვედრაში ყაზახეთის ნაკრებთან გიორგი ჩაკვეტაძემ საჯარიმოს გარედან გაისროლა და აღნიშნული ტურნირის პირველი გატანილი გოლის ავტორი გახდა. ქართველი „ოქროს ბიჭუნა“ იმ დროისათვის უკვე ნაკრების ძირითადი შემადგენლობის წევრი იყო.

გიორგის დებიუტი ეროვნულ გუნდში 2018 წლის 24 მარტს ლიტვასთან გამართულ ამხანაგურ შეხვედრაში შედგა, სადაც თავი ასევე გატანილი გოლით გამოიჩინა. ყაზახეთთან გამარჯვების შემდეგ ვლადიმერ ვაისის შეგირდებმა მიჯრით სამი შეხვედრა მოიგეს. საბოლოოდ ხუთი მოგებითა და ერთი ფრით ჩვენი ნაკრები ჯგუფის ერთპიროვნული გამარჯვებული გახდა, რის შედეგადაც ავტომატურად „ერთა ლიგის“ C დივიზიონში აღზევდა. მაშინ ეროვნულ გუნდს ევროპის ჩემპიონატამდე კიდევ ორი ნაბიჯი აშორებდა. მართალია, ჯგუფური ეტაპის დაძლევის შემდეგ C დივიზიონის საგზური გარანტირებული გვქონდა, თუმცა, „მადა ჭამაში მოდისო“ და ყველა ევროპის ჩემპიონატზე გასვლაზე ფიქრობდა. წინ იყო ბელარუსთან შეხვედრა, რომელიც აუცილებლად უნდა მოგვეგო.

საქართველო–ბელარუსი – ნახევარფინალი, რომელიც არასდროს დაგვავიწყდება

ფეხბურთელების თამაშით აღტაცებული გულშემატკივარი 2020 წლის მარტს მოუთმენლად ელოდა. უეფას მიერ წინასწარ დადგენილი თარიღების მიხედვით, ევროპის ჩემპიონატის ნახევარფინალური პლეი-ოფის მატჩი საქართველოსა და ბელარუსს შორის მიმდინარე წლის მარტში უნდა გამართულიყო. გამარჯვებული კი მეორე ნახევარფინალურ შეხვედრაში კოსოვოსა და ჩრდილოეთ მაკედონიას შორის მოგებულს შეხვდებოდა. გუნდის მთავარმა მწვრთნელმა ვლადიმერ ვაისმა და ფედერაციის პრეზიდენტმა ლევან კობიაშვილმა ამ შეხვედრას „საუკუნის მატჩი“ და „მთელი ერის ოცნება“ უწოდეს.

გულშემატკივრის ანთებული გულები დროებით ჩაქრა, როდესაც საქართველოსა და ბელარუსს შორის გასამართი „საუკუნის მატჩი“ კორონავირუსის პანდემიის გამო გაურკვეველი ვადით გადაიდო.

მოგვიანებით კი ცნობილი გახდა, რომ აღნიშნული მატჩი 2020 წლის 8 ოქტომბერს „დინამო არენაზე“ უმაყურებლოდ გაიმართებოდა. საქართველოს მთავრობამ გადაწყვიტა, რომ თამაშზე დასწრება მაღალ ეპიდემიოლოგიურ რისკებთან იყო დაკავშირებული. ქართველი გულშემატკივარი კი, რომელსაც ასეთი საქართველოს ნაკრები დიდი ხანია არ ახსოვს, პანდემიას არ შეუშინდა და შეხვედრის პირველივე წუთიდან ბორის ბაიჭაძის სახელობის სტადიონთან შეიკრიბა.

90 წუთის განმავლობაში მოედნის ირგვლივ იყო გამამხნევებელი შეძახილები, სიმღერა და ანთებული ფერადი მაშხალები. 

Грузинские болельщики радуются победе своей команды в матче с Беларусью
photo : courtesy of George Gladchenko
ბელორუსთან გამართული მატჩის შემდეგ ქართველი გულშემატკივრები დინამო არენას სტადიონთან

ჩვენმა ბიჭებმაც გულშემატკივარს მხარდაჭერა ბოლომდე დაუფასეს. მათ ბელარუს ფეხბურთელებს არაფერი დაუთმეს და თორნიკე ოქრიაშვილის მე-7 წუთზე გატანილი თერთმეტმეტრიანის შემდეგ ანგარიში შეინარჩუნეს. უნდა აღინიშნოს, რომ ჩვენი ნაკრების მეკარეს გიორგი ლორიას საქმე თითქმის არ ჰქონია. მოწინააღმდეგე გუნდმა ბურთის კარის ჩარჩოში გაგზავნაც ვერ მოახერხა. მაშინ კი საქართველოს საფეხბურთო ოცნება რეალობას მიუახლოდა. ნაკრების ფეხბურთელებს ახლა უკვე მხოლოდ ერთი შეხვედრის მოგება მართებთ და მათი სახელები ისტორიაში ჩაიწერება.

რა უნდა ვიცოდეთ მეტოქე გუნდზე

ერთა ლიგის მეორე ნახევარფინალში მაკედონიამ შეძლო და კოსოვოს ეროვნული ნაკრები 2-1 დაამარცხა.

ჩრდილოეთ მაკედონიის ნაკრების უდიდეს ძალას 37 წლის იტალიური „ჯენოას“ შემტევი გორან პანდევი წარმოადგენს. მას იტალიის „სერია A”-ში გამოსვლის 17-წლიანი გამოცდილება უმაგრებს ზურგს.

ასევე არ შეიძლება ელიფ ელმასის უყურადღებოდ დატოვება. ისიც იტალიის უმაღლეს ლიგაში ირჯება და „ნაპოლის“ შემადგენლობის მნიშვნელოვანი წევრია.

ისტორიულ შედეგამდე ერთი ნაბიჯი რჩება

საქართველოს ეროვნულ ნაკრებს ერთი შეხვედრის მოგება დარჩა, რათა ყველა თაობის ქართველი ფეხბურთელის ოცნება აასრულოს. 12 ნოემბერს ეროვნული გუნდი საკვალიფიკაციო ეტაპის ბოლო, ფინალურ შეხვედრაში ჩრდილოეთ მაკედონიას დაუპირისპირდება. ნაკრებებს შორის დამოუკიდებელი საქართველოს ისტორიაში სულ ორი მატჩი გაიმართა. „ერთა ლიგის“ გათამაშების C დივიზიონში ერთდროულად აღზევებულ გუნდებს შორის გამართული ორივე შეხვედრა ფრედ, 1-1 დასრულდა.

საქართველოსა და ჩრდილოეთ მაკედონიას შორის 14 ოქტომბერს ჩატარებული მატჩიდან რთულია არ გამოვარჩიოთ ყაზანის „რუბინის“ ქართველი შემტევი ხვიჩა კვარაცხელია, რომელიც ბოლო დროს ქართველი გულშემატკივრის მთავარ იმედად იქცა. „კვარამ“ ჩრდილოეთ მაკედონიასთან დაპირისპირება სათადარიგოთა სკამიდან დაიწყო. მეორე ტაიმის შუა ნაწილში, როდესაც ჩვენს გუნდს შემოქმედებითობა დააკლდა, ვლადიმერ ვაისმა ის მოედანზე შეუშვა. აქედან ზუსტად სამ წუთში შესანიშნავი სოლორეიდის შემდეგ ხვიჩამ ნაკრებში სადებიუტო გოლი გაიტანა და ანგარიში გახსნა.

სამწუხაროდ, მატჩის მიწურულს არბიტრის მიერ დანიშნული თერთმეტმეტრიანი ალიოსკიმ ზუსტად გამოიყენა და შეხვედრა ფრედ დასრულდა. შეგახსენებთ, რომ კვარაცხელია ყაზანურმა გუნდმა 15 მილიონ დოლარად შეაფასა. ის ბოლო დროს რუსული კლუბის ვარსკვლავად იქცა. მისი შეძენით არაერთი ევროპული გრანდია დაინტერესებული.

12 ნოემბრის ფინალისთვის ვლადიმერ ვაისის ფეხბურთელები სრულ მზადყოფნაში არიან. გამონაკლისია გიორგი ჩაკვეტაძე, რომელიც საქართველოს ნაკრებისთვის უდიდეს ძალას წარმოადგენს. მისმა ტრავმებმა, სამწუხაროდ, ბოლო პერიოდში სისტემატური სახე მიიღო. თუმცა თამამად შეგვიძლია ვთქვათ, რომ „ჩაკვეს“ დანაკლისს ხვიჩა კვარაცხელია შეავსებს.

მოახლოებულ მატჩსა და მის მნიშვნელობაზე „Sputnik–საქართველოსთან“ ნაკრების ყოფილმა ფეხბურთელმა არჩილ არველაძემ ისაუბრა.

არჩილ არველაძე
photo: courtesy of Archil Arveladze
არჩილ არველაძე

- რა იქნება საქართველოს ნაკრების კოზირი – იქნება ეს კვარაცხელია, მწვრთნელის ტაქტიკური სვლები თუ სხვა?

- ძალიან არ მინდა ერთპიროვნულად ვინმეზე გავაკეთო აქცენტი. რა თქმა უნდა, კვარაცხელია ძალიან კარგ ფორმაშია და მისი კარგი თამაში ბევრ რამეს გადაწყვეტს, მაგრამ ეს გუნდური სპორტია. არ მინდა ახალგაზრდა ბიჭზე ამხელა პასუხისმგებლობის დაკისრება. მეორე მხრივ, აქამდეც ვამბობდით და ახლაც დარწმუნებული ვარ, რომ უკეთესი გუნდი გვყავს, უკეთესი ფეხბურთელებით და ამ ეტაპზე ჩვენ უფრო ვიმსახურებთ ევროპის ჩემპიონატზე თამაშს. ამას ემატება ისიც, რომ სახლში ვთამაშობთ. ყველა ფაქტორი მეტყველებს იმაზე, რომ ფავორიტები ვართ. აქვე არ უნდა დაგვავიწყდეს, რომ ფეხბურთია და ამ სპორტში ყველაფერია მოსალოდნელი. მოსაგებად მაქსიმუმი უნდა გავაკეთოთ.

- რამდენად იმოქმედებს უმაყურებლობა, შეიძლება ეს მეტოქის უპირატესობად ჩაითვალოს?

- რა თქმა უნდა, ეს გარკვეულწილად უპირატესობაა, მაგრამ მე ვფიქრობ კონკრეტულ თამაშზე ამან განსაკუთრებული გავლენა არ უნდა მოახდინოს. უბრალოდ ერთი მატჩი უნდა ითამაშო და მოიგო.

- ნაკრებს ტრავმის გამო ერთ-ერთი ყველაზე მნიშვნელოვანი ფეხბურთელი გიორგი ჩაკვეტაძე აკლია...

- ფეხბურთი ტრავმებისკენ მიდრეკილი სპორტია და ეს მხოლოდ ქართველების პრობლემა არ არის. გიორგის რაც შეეხება, სამწუხაროა მისი მდგომარეობა, ვურჩევდი მაქსიმალურად ყურადღებით იყოს და თავს მოუაროს.

- რას მოუტანს გამარჯვება ნაკრებს და რამდენად გაზრდის ეს ქართველი ფეხბურთელების მიმართ ინტერესს?

- ქართველი ფეხბურთელები, რომლებიც ეროვნულ ნაკრებში თამაშობენ, დღესაც ყურადღების ცენტრში არიან, თუმცა ევროპის ჩემპიონატზე გასვლის შემთხვევაში, ცხადია, კონკრეტულ ფეხბურთელებს, რომლებიც წარმატებით იასპარეზებენ, შედარებით მეტი ყურადღება მიექცევათ. ევროპის ჩემპიონატი მაღალი დონის ტურნირია, აქედან გამომდინარე დაინტერესება, შესაძლოა, უფრო დიდი გუნდებისგანაც გაჩნდეს. ეს ასევე ძალიან კარგი იქნება ფინანსური თვალზასრისითაც, ამ მხრივ ფედერაცია რამდენიმე მილიონიან სარგებელს ნახავს, რაც თავისთავად კვლავ ფეხბურთის განვითარებას მოხმარდება. რაც მთავარია, გამარჯვების შემთხვევაში ჯგუფურ ეტაპზე მოხვედრა ზოგადად ქართული ფეხბურთის იმიჯზე აისახება.

Главный судья Энтони Тейлор (Англия) во время матча между московским ФК Локомотив и ФК Шальке-04
© photo: Sputnik / Anton Denisov
ინგლისელი არბიტრი ენტონი ტეილორი

წილისყრის შედეგად ბედმა გაგვიღიმა და ჩვენი ნაკრები, როგორც ბელარუსთან, ამ შეხვედრასაც მასპინძლის რანგში გამართავს. შეხვედრას დიდი ემოციური მუხტი და დაძაბულობა ახლავს თან. ასეთი შანსი საქართველოს ნაკრებს ქვეყნის დამოუკიდებლობის ისტორიაში არასდროს ჰქონია. ფეხბურთს და, ზოგადად, სპორტს კი ქართველი ერი არაერთხელ გაუერთიანებია, ამას ისტორიაც მოწმობს.

საქართველოსა და ჩრდილოეთ მაკედონიას შორის დაპირისპირება 12 ნოემბერს, თბილისის დროით 21:00 საათზე „დინამო არენაზე“ გაიმართება. შეხვედრას ინგლისელი არბიტრი ენტონი ტეილორი განსჯის. ფინალში ასევე ჩართული იქნება VAR სისტემა.

 

318
საქართველოს რაგბის ახალგაზრდული ნაკრები (U-20)

რაგბი: საქართველოს ახალგაზრდული ნაკრები ურუგვაელ თანატოლებთან დამარცხდა

37
(განახლებულია 22:56 23.06.2021)
ეს მარცხი ქართველი მორაგბეებისთვის ტურნირზე მეორე გახდა: რამდენიმე დღის წინ გუნდმა არგენტინის ახალგაზრდულ ნაკრებთან დიდი სხვაობით წააგო.

თბილისი, 23 ივნისი – Sputnik. საქართველოს რაგბის ახალგაზრდული ნაკრები (U-20) საერთაშორისო ამხანაგურ ტურნირში სამხრეთ აფრიკაში ურუგვაის გუნდთან ანგარიშით 15:20 დამარცხდა.

ქართველმა მორაგბეებმა შეხვედრა აქტიურად დაიწყეს და უკვე მე-10 წუთისთვის იგებდნენ ანგარიშით 7:0. მეტოქის ჩათვლის ზონაში წარმატებული ლელო დაამიწა ალექსანდრე ქუნთელიამ. შეხვედრის პირველი ნახევარი ქართველების სასარგებლოდ ანგარიშით 10:8 დასრულდა.

შესვენების შემდეგ ინიციატივას სამხრეთამერიკელები დაეუფლნენ. მე-60 წუთის შემდეგ მათ ორი წარმატებული ლელო დაამიწეს (ერთი გარდასახვით დასრულდა). ანგარიში 20:10 გახდა მათ სასარგებლოდ. ერთადერთი, რაც ამას უმცროსმა „ბორჯღალოსნებმა“ დაუპირისპირეს, 75-ე წუთზე თამაზ ჯიმშელეიშვილის ლელო გახდა.

ეს მარცხი ქართველი მორაგბეებისთვის ტურნირზე მეორე გახდა: რამდენიმე დღის წინ გუნდმა არგენტინის ახალგაზრდულ ნაკრებთან დიდი სხვაობით წააგო – 10:82.

ტურნირზე მომდევნო მატჩს საქართველოს ნაკრები 28 ივნისს სამხრეთ აფრიკის გუნდის წინააღმდეგ გამართავს.

ტურნირის რეგლამენტით, ჯგუფში პირველ ორ ადგილზე გასულ გუნდებს შორის ურთიერთდაპირისპირებაში გამარჯვებული გამოვლინდება, ხოლო დანარჩენი ორი ნაკრები მესამე ადგილისთვის იბრძოლებს.

აღსანიშნავია, რომ 3 და 10 ივლისს ისევ სამხრეთ აფრიკაში საქართველოს ეროვნული ნაკრები მსოფლიოს მოქმედ ჩემპიონთან - სამხრეთ აფრიკასთან ორ ტესტ-მატჩს გამართავს.

37
ქალთა ნაკრები ევროპის ჩემპიონატზე

ბელა ხოტენაშვილი მესამედ გახდა საქართველოს ჩემპიონი ჭადრაკში

49
მოჭადრაკემ მოიპოვა ევროპის ინდივიდუალურ ჩემპიონატში მონაწილეობის უფლება; ჩემპიონატი მიმდინარე წლის ივლისში რუმინეთში გაიმართება.

თბილისი, 23 ივნისი - Sputnik. ბელა ხოტენაშვილი კარიერის განმავლობაში მესამედ გახდა საქართველოს ჩემპიონი ჭადრაკში.

ცხრა ტურის შემდეგ ხოტენაშვილმა 6,5 ქულა მოაგროვა - მოიგო ხუთი პარტია, სამი ყაიმით დაასრულა და ერთ პარტიაში დამარცხდა.

პირველად საქართველოს ჭადრაკის ჩემპიონატში ხოტენაშვილმა 2012 წელს გაიმარჯვა და ეს მიღწევა ხუთი წლის შემდეგ გაიმეორა.

საქართველოს ვიცეჩემპიონი მერი არაბიძე გახდა (6 ქულა), ბრინჯაოს პრიზიორი კი - ნინო ბაციაშვილი (5,5 ქულა).

აღსანიშნავია, რომ სამივე მოჭადრაკემ მოიპოვა ევროპის ინდივიდუალურ ჩემპიონატში მონაწილეობის უფლება, რომელიც რუმინეთში მიმდინარე წლის ივლისში გაიმართება.

საქართველოს ჭადრაკის ჩემპიონატი ქალთა შორის 78-ედ ჩატარდა.

 

 

49
ვაქცინაცია  AstraZeneca-ს პრეპარატით

ჯანდაცვის სამინისტროს შიდა აუდიტი AstraZeneca-ს დეფიციტის მიზეზებს სწავლობს

0
ჯანდაცვის სამინისტროს ინფორმაციით, საქართველოში უახლოეს პერიოდში ექვსი კომპანიის ვაქცინა შემოვა, რის შემდეგაც ვაქცინების დეფიციტი აღარ იქნება.

თბილისი, 24 ივნისი – Sputnik. თბილისის რესპუბლიკურ საავადმყოფოში AstraZeneca-ს ვაქცინის დეფიციტის გამო ჯანდაცვის სამინისტროს შიდა აუდიტი შევიდა.

შემოწმების ჩატარების გადაწყვეტილება ჯანდაცვის სამინისტრომ მას შემდეგ მიიღო, რაც ვაქცინაციის პროცესში AstraZeneca-ს ვაქცინის გადანაწილებაზე ლოჯისტიკური პრობლემები შეიქმნა.

რამდენიმე დღის წინ დაავადებათა კონტროლის ეროვნულმა ცენტრმა მოქალაქეებს ვაქცინების დეფიციტთან დაკავშირებით ბოდიში მოუხადა. როგორც მაშინ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა, მოწოდების სერიოზული შეფერხებაა, რომელიც ბევრ ფაქტორთან არის დაკავშირებული. 

რაც შეეხება ვაქცინების დანაკარგებს, გამყრელიძის თქმით, სხვა პრეპარატებისგან განსხვავებით, ყველაზე მეტი – სამპროცენტიანი დანაკარგი იყო AstraZeneca-ზე, რადგან ის 10-დოზიან ფლაკონებშია შეფუთული და გახსნის შემდეგ გარკვეული დოზა აუთვისებელი რჩებოდა, თუ ასაცრელად ჩაწერილი ადამიანი ვაქცინაციაზე არ გამოცხადდებოდა.

როგორც გამყრელიძემ დღეს აღნიშნა, საქართველოში არავითარი ვაქცინა არ გამქრალა.

„როგორც ინფორმირებული ვარ, იმ ქარხანაში, რომლიდანაც უნდა ყოფილიყო მოწოდება, თავად გაეროს ბავშვთა ფონდმა ვერ მიიღო შესაბამისი დოზები და ვერ შემოვიდა მესამე პარტია ქვეყანაში, აღმოჩნდა გარკვეული დეფიციტი 4 000-დან 5 000-მდე მეორე და პირველ აცრაზე 30 ივნისამდე ჩაწერილი ადამიანებისთვის“, – განაცხადა გამყრელიძემ.

მისივე განცხადებით, ივლისში ქვეყანა ვაქცინების საკმაოდ დიდ რაოდენობას მიიღებს და დეფიციტი აღარ იქნება.

როგორც გამყრელიძემ გასულ კვირას გამართულ ბრიფინგზე აღნიშნა, ივლისის დასაწყისიდან  საქართველო ეტაპობრივად დაიწყებს სხვადასხვა დასახელების ვაქცინების, მათ შორის  43 ათასი დოზა AstraZenecа–ს მიღებას.

რაც შეეხება მოქალაქეებს, რომლებიც  AstraZeneca–ს მეორე დოზით ვაქცინაციაზე იყვნენ დარეგისტრირებული და  პირველი დოზის მიღებიდან 10–12 კვირა გაუვიდათ, გამყრელიძის თქმით, მათ უკვე შეუძლიათ სპეციალურ პორტალზე რეგისტრაციის გავლა. უახლოესი ორი კვირის განმავლობაში დაახლოებით 1,8 ათასი მოქალაქე შეძლებს AstraZeneca–ს მეორე დოზით აცრას.

ამასთან, როგორც რესპუბლიკური საავადმყოფოს გენერალურმა დირექტორმა ლევან გოფოძემ განაცხადა,  ეს არის დროებითი შეფერხება და ვაქცინაციის პროცესი ისევ გაგრძელდება.

„რაღაც დოზები მოითხოვა ჯანმომ, იმიტომ, რომ შეემოწმებინა ამ ვაქცინების შენახვის პირობები რამდენად სწორად იყო დაცული. შემოწმდა და აღმოჩნდა, რომ ყველაფერი წესრიგშია და ეს დოზები ისევ დაუბრუნდება ჩვენ მოქალაქეებს", - განაცხადა გოფოძემ.

აღნიშნულ საკითხთან დაკავშირებით კომენტარი გააკეთა ჯანდაცვის მინისტრმა, ეკატერინე ტიკარაძემ. მისი თქმით, შიდა აუდიტი დაავადებათა კონტროლის ეროვნულ ცენტრშიც იმყოფებოდა, კონკრეტული მითითებები კი დღეს გახდება ცნობილი.

„ვაქცინები არსად გამქრალა, ჩვენ დროულად გავაკეთეთ ვაქცინების მობილიზება იმ მნიშვნელოვანი პაციენტებისთვის, რომლებსაც კრიტიკულად ესაჭიროებოდა 10-12 კვირაზე ვაქცინაციის პროცესის უწყვეტობა. შიდა აუდიტი დაავადებათა კონტროლის ეროვნულ ცენტრში იმყოფებოდა ამ ფაქტის და ასევე პროცესის მეტად უფრო ეფექტური მართვისთვის“, - აღნიშნა ტიკარაძემ.

ბოლო მონაცემებით, საქართველოში სულ 245.380 ადამიანია აცრილი, სრულად, ორი დოზით ვაქცინირებულია 88.754 ადამიანი.

0