გიორგი პაპუნაშვილი

ქართველმა ფეხბურთელმა ესპანური კლუბი განაწყენებულმა დატოვა

117
(განახლებულია 20:26 22.07.2020)
კლუბის შემადგენლობაში ოთხი მატჩის ჩატარების შემდეგ ქართველმა ნახევარმცველმა მცირე დაზიანება მიიღო და ჩემპიონატის განახლების შემდეგ „რასინგში" აღარ უთამაშია.

თბილისი, 22 ივლისი — Sputnik. საქართველოს ფეხბურთის ნაკრების ნახევარმცველმა გიორგი პაპუნაშვილმა ესპანური კლუბი „რასინგი" (სანტანდერი) ხელმძღვანელობაზე განაწყენებულმა დატოვა. ამის შესახებ ფეხბურთელმა Facebook-ის საკუთარ გვერდზე დაწერა.

ქართველი ფეხბურთელი ესპანურ „რასინგში" ითამაშებს>>

„მოვიდა დრო, დაგემშვიდობოთ. სამწუხაროდ, გუნდის დახმარება ვერ მოვახერხე, ძნელია გადმოცემა თქვენთვის და სიტყვების პოვნა, რასაც ვგრძნობ. დიდი იმედებითა და ოცნებებით ჩამოვედი, მაგრამ ადამიანებმა, სამწუხაროდ, ეს ვერ დაინახეს და არ დააფასეს. მათ საკუთარი მიზნები და შეხედულებები ჰქონდათ, როგორც აღმოჩნდა, ამან არ გაამართლა და ჩვენ მარცხი განვიცადეთ", – დაწერა თავის მიმართვაში პაპუნაშვილმა.

მან მადლობა გადაუხადა თავის პარტნიორებს გუნდში, რომლებიც, მისი თქმით, საუკეთესონი არიან და მეტს იმსახურებენ. გვერდი არ აუვლია პაპუნაშვილს გულშემატკივრისთვისაც – ისინი დააიმედა, რომ რთულ პერიოდს გადალახავენ და უფრო ძლიერი დაბრუნდებიან.

ესპანეთის მეორე დივიზიონის „სეგუნდას" ჩემპიონატის შედეგებით „რასინგმა" სატურნირო ცხრილში ბოლო ადგილი დაიკავა და შემდეგ წელს უფრო ქვედა დივიზიონში გაატარებს.

პაპუნაშვილი „რასინგში" მიმდინარე წელს „სარაგოსადან" გადავიდა იჯარის უფლებით. კლუბში მან ოთხი მატჩი ჩაატარა, შემდეგ კი მცირე დაზიანება მიიღო. ჩემპიონატის განახლების შემდეგ „რასინგის" შემადგენლობაში მინდორზე ერთი წუთითაც აღარ გასულა. ამასთან, ქართველი ფეხბურთელი ყოველი მატჩის განაცხადში იყო, მაგრამ მინდორზე არ გამოჩენილა.

ფეხბურთელზე უფლება „სარაგოსას“ ეკუთვნის, რომელთანაც პაპუნაშვილს კონტრაქტი 2022 წლამდე აქვს გაფორმებული. ამ გუნდში პაპუნაშვილი 2017 წლის ზაფხულში გადავიდა, ითამაშა 58 მატჩში, გაიტანა 13 გოლი და გააკეთა სამი შედეგიანი გადაცემა.

ამ დროისთვის უცნობია, დარჩება პაპუნაშვილი „სარაგოსაში" თუ ზაფხულის სატრანსფერო ფანჯრის დროს გუნდს შეიცვლის.

117
თემები:
სპორტის ამბები (825)
უეფას ევროპის ლიგა. თბილისის „ლოკომოტივი“ - მოსკოვის „დინამო“

თბილისის „ლოკომოტივმა“ და „დინამომ“ უეფას „ევროპა ლიგაში“ ასპარეზობა დაასრულეს

76
(განახლებულია 13:28 25.09.2020)
„ლოკომოტივი“ და „დინამო“ ამჟამინდელი სეზონის ევროთასებში საქართველოს უკანასკნელი წარმომადგენლები იყვნენ.

თბილისი, 24 სექტემბერი — Sputnik. თბილისის საფეხბურთო კლუბებმა „ლოკომოტივმა“ და „დინამომ“ უეფას „ევროპა ლიგის“ მესამე საკვალიფიკაციო რაუნდის მატჩები წააგეს.

„ლოკომოტივი“ გასვლაზე დამარცხდა ესპანურ „გრანადასთან“ ანგარიშით 0:2. ორივე გოლი შესვენების შემდეგ გავიდა. 48-ე წუთზე ესპანელები წინ გაიყვანა დარვინ მაჩისმა, ხოლო მსაჯის მიერ დამატებულ დროში ხორხე მოლინამ საბოლოო ანგარიში გააფორმა. აღსანიშნავია, რომ „რკინიგზელები“ მეორე ტაიმის შუა პერიოდიდან უმცირესობაში აღმოჩნდნენ, რადგან მეორე ყვითელი ბარათის გამო მოედნიდან გიორგი გაბაძე გააძევეს.

რაც შეეხება „დინამოს“, თბილისურმა კლუბმა გამანადგურებელი მარცხი განიცადა – ფარერების კუნძულების ჩემპიონმა „კლაქსვიკმა“ მას 6:1 მოუგო. შეხვედრის გმირი გახდა თავდამსხმელი პოლ კლეტსკარდი, რომელმაც ჰეტ-ტრიკი შეასრულა. „დინამოელთა“ მხრიდან პრესტიჟის გოლი ჟოზე ვიტორმა გაიტანა.

„ლოკომოტივი“ და „დინამო“ ამჟამინდელი სეზონის ევროთასებში საქართველოს უკანასკნელი წარმომადგენლები იყვნენ. მანამდე უეფას „ევროპა ლიგის“ პირველივე საკვალიფიკაციო რაუნდში თბილისის „საბურთალო“ კვიპროსის „აპოლონთან“ 1:5 დამარცხდა, ხოლო ბათუმის „დინამო“ – ისრაელის „ჰაპოელთან“ (0:3).

76
თემები:
სპორტის ამბები (825)
შოთა არველაძემ „ფახთაქორი“ აზიის ჩემპიონთა ლიგის პლეი-ოფში გაიყვანა

არველაძემ „ფახთაქორი“ აზიის ჩემპიონთა ლიგის პლეი-ოფში გაიყვანა

54
(განახლებულია 21:46 24.09.2020)
კლუბის მწვრთნელი მატჩს ვერ დაესწრო, რადგან ქართველ სპეციალისტს მატჩის წინა დღეს კორონავირუსი დაუდგინდა.

თბილისი, 23 სექტემბერი — Sputnik. ტაშკენტის „ფახთაქორი“, რომლის მთავარი მწვრთნელი ქართველი სპეციალისტი შოთა არველაძეა, პირველად 10 წლის მანძილზე აზიის ჩემპიონთა ლიგის პლეი-ოფში გავიდა.

ჯგუფური ეტაპის ბოლო მატჩში „ფახთაქორმა“ გასვლაზე მოუგო ირანის „პადიდე ჰორასანს“ 1:0 და 11 ქულით კვარტეტში პირველი ადგილი დაიკავა.

თავად არველაძე მატჩს ვერ დაესწრო, რადგან ქართველ სპეციალისტს მატჩის წინა დღეს კორონავირუსი დაუდგინეს და მომდევნო ორ კვირას ის კარანტინში გაატარებს.

გამარჯვების შემდეგ „ფახთაქორის“ მოთამაშეებმა მხარი დაუჭირეს თავის მთავარ მწვრთნელს და გადაიღეს საერთო ფოტო, რომელზეც ეჭირათ მაისური, რომელსაც არველაძის გვარი ეწერა.

მერვედფინალურ მატჩში, რომელიც 26 სექტემბერს გაიმართება, გუნდი ირანის „ესტეგლალს“ შეხვდება.

არველაძემ მწვრთნელის კარიერა 2008 წელს დაიწყო, როდესაც ჰოლანდიურ AZ-ში ლუი ვან გაალის ასისტენტი გახდა. ორი წლის შემდეგ ქართველი სპეციალისტი გაემგზავრა თურქეთში, სადაც 2010-დან 2015 წლამდე სამ კლუბთან - „ქაისერისპორთან“, „კასიმფაშასთან“ და „ტრაბზონსპორთან“ იმუშავა. მომდევნო ეტაპი არველაძის კარიერაში იყო ისრაელის „მაკაბი“, 2017 წლიდან კი ის „ფახთაქორს“ ჩაუდგა სათავეში.

ქართველი სპეციალისტის ხელმძღვანელობით ტაშკენტის კლუბმა 2017 წლის ჩემპიონატის ბრინჯაო მოიპოვა, 2018 წელს ქვეყნის ვიცე-ჩემპიონი გახდა და გასულ წელს უზბეკეთის ჩემპიონიც გახდა.

54
თემები:
COVID-19-ის პანდემია მსოფლიოში
წიგნის ფესტივალი

წიგნის ფესტივალი ვირტუალურ სივრცეში გაიხსნა

0
(განახლებულია 13:49 25.09.2020)
თბილისის საერთაშორისო წიგნის ფესტივალი თბილისის მერიის, განათლების, მეცნიერების, კულტურისა და სპორტის და მწერალთა სახლის მხარდაჭერით ტარდება.

თბილისი, 25 სექტემბერი  — Sputnik. საქართველოს დედაქალაქში თბილისის წიგნის  XXII საერთაშორისო  ფესტივალი ონლაინ–ფორმატში გაიხსნა.

ადრე წიგნის კვირეულის ორგანიზატორებს ყოველწლიური ღონისძიების შერეულ ფორმატში  ჩატარების იმედი ჰქონდათ. თუმცა, პანდემიის მეორე ტალღის დაწყებისა  და ინფიცირებულთა რაოდენობის მატების გამო, მათ ფესტივალის მთლიანად ვირტუალურ სივრცეში ჩატარების გადაწყვეტილება მიიღეს. 

ფესტივალზე თვალის მიდევნება, რომელიც დღეს გაიხსნა და 27 სექტემბერს დასრულდება, ღონისძიების ოფიციალურ ვებგვერდზეა შესაძლებელი.

ღონისძიების პირველ დღეს წარმოდგენილი იქნება ნინო ხარატიშვილის, ლაშა ბუღაძისა და ანდრეას ფლურაკისის პიესების კრებული „სამი მედეა“. ასევე შედგება  არჩილ ქიქოძის წიგნის  „ნორვეგიული დღიური“ პრეზენტაცია, ხოლო პროექტ „მსახიობები ლიტერატურისთვის“ ფარგლებში  – ახალი გამომცემლობების წარდგენა და სხვა.

ფესტივალის პროგრამაშია  –ახალი წიგნების პრეზენტაცია და ქართველ მწერლებთან შეხვედრები, უცხოელ ავტორებთან ვიდეოკონფერენციები, საბავშვო პროგრამა და სხვა.

თბილისის საერთაშორისო წიგნის ფესტივალი თბილისის მერიის, განათლების, მეცნიერების, კულტურისა და სპორტის და მწერალთა სახლის მხარდაჭერით ტარდება.

0