თბილისი, 19 ივნისი – Sputnik. შემტევი ნახევარმცველი ვატო არველაძე კარიერას თბილისის „ლოკომოტივში“ გააგრძელებს, ნათქვამია კლუბის განცხადებაში.
„ვატო არველაძე „ლოკომოტივში" დაბრუნდა. ახალგაზრდა შემტევმა თბილისურ კლუბთან წელიწადნახევრიანი კონტრაქტი გააფორმა. Welcome Back, Vato (კეთილი იყოს შენი დაბრუნება, ვატო)“, – ნათქვამია განცხადებაში.
ბოლო ორი წლის განმავლობაში 22 წლის არველაძე პოლონეთის ჩემპიონატში მონაწილეობდა, გამოდიოდა „კორონაში“. ქართველმა ნახევარმცველმა პოლონურ გუნდში 29 მატჩი ჩაატარა, გაიტანა ხუთი გოლი და გააკეთა სამი შედეგიანი გადაცემა.
საქართველოს ნაკრების შემადგენლობაში არველაძე სულ ორ მატჩში მონაწილეობდა, მაგრამ გოლის გატანა მოასწრო – ევრო-2020-ის შესარჩევ მატჩში გიბრალტარის წინააღმდეგ (3:0).
ვატო საქართველოს ნაკრების ყოფილი ფეხბურთელის რევაზ არველაძის ვაჟია.