ფეხბურთი

ქართველმა მწვრთნელმა ლატვიის კლუბი ევროთასზე გაიყვანა

67
(განახლებულია 21:21 12.11.2019)
ვალმიერის კლუბს დიდი ხნის ტრადიციები აქვს, მაგრამ ევროთასის ზონაში გასვლა მხოლოდ წელს მოახერხა, როდესაც გუნდს ცნობილი ქართველი სპეციალისტი თამაზ პერტია ჩაუდგა სათავეში.

თბილისი, 12 ნოემბერი - Sputnik. ფეხბურთის კლუბმა „ვალმიერამ“, რომელსაც წელს ქართველი სპეციალისტი თამაზ პერტია ჩაუდგა სათავეში, მეოთხე ადგილი დაიკავა ლატვიის ჩემპიონატზე, რაც გუნდს მომდევნო სეზონზე ევროპის ლიგის გათამაშებაში მონაწილეობის შესაძლებლობას აძლევს, იუწყება „Sputnik-ლატვია“

ლატვიიდან უეფას ევროპის ლიგაში ადგილის დასაკავებლად იბრძოდნენ იურმალის „სპარტაკი“ და „ვალმიერა“. გუნდებს შორის სხვაობა ორი ქულა იყო. „სპარტაკის“ ფეხბურთელებს სჭირდებოდათ დასკვნით მატჩში ჩემპიონ „რიგის“ დამარცხება და „ვალმიერას“ მარცხი აუტსაიდერ „მეტასთან“.  

თუ მეორე მაინც მოხდა – „ვალმიერამ“ ვერ შეინარჩუნა სამბურთიანი უპირატესობა და თამაში ფრედ - 3:3 დაასრულა, „სპარტაკმა“ თავისი თამაში დიდი სხვაობით დათმო - 1:4.

ამგვარად, მომავალ წელს ლატვიას ევროპის თასზე წარადგენენ: ჩემპიონთა ლიგაზე - ფეხბურთის კლუბი „რიგა“, ევროპის ლიგაზე - „ვენტსპილსი“, „რიგის ფეხბურთის სკოლა“ და „ვალმიერა“. 

მომდევნო სეზონზე ლატვიის ფეხბურთის უმაღლეს ლიგაში 10 გუნდი ითამაშებს. ამიტომ 2019 წლის სეზონის შედეგად ბოლო ადგილზე გასულ რიგის „მეტას“ ჯერ კიდევ მოუწევს თავისი პოზიციების დაცვა პირველი ლიგის მეორე საუკეთესო გუნდ „სუპერ ნოვასთან“.

2019 წლის ლატვიის ჩემპიონატის მეორე ეშელონის გუნდებს შორის გამარჯვებული „ტუკუმს-2000“ კი მომავალ წელს უკვე დანამდვილებით ითამაშებს უძლიერესების გვერდით.

67
თემები:
სპორტის ამბები (822)
თორნიკე შენგელია

შენგელიამ ЦСКА-ს შემადგენლობაში პირველივე ოფიციალურ მატჩში მუხლი დაიზიანა

42
დროის იმ ხანმოკლე მონაკვეთში, რომელიც შენგელიამ პარკეტზე გაატარა, ქართველმა ფორვარდმა ორი ქულის მოპოვება და ორი მოხსნის გაკეთება მოასწრო

თბილისი, 23 სექტემბერი - Sputnik. საქართველოს ნაკრების კაპიტანმა თორნიკე შენგელიამ, რომელიც მოსკოვის ЦСКА-ს შემადგენლობაში თამაშობს, გუნდის პირველივე ოფიციალურ შეხვედრაზე მუხლი დაიზიანა, აღნიშნულია კლუბის ვებგვერდზე განთავსებულ განცხადებაში.

VTB ლიგის სადებიუტო შეხვედრაში ყაზახური „ასტანას“ წინააღმდეგ შენგელიამ პარკეტზე მხოლოდ 3 წუთი და 19 წამი გაატარა, რის შემდეგაც მუხლი დაიზიანა. მაგრამ, როგორც ჩანს, ტრავმა სერიოზული არაა. შენგელიას დაზიანებული ადგილი გაუყინეს და ის სათადარიგო სკამთან ითელებოდა იმ იმედით, რომ თამაშს დაუბრუნდებოდა. თუმცა საბოლოო ჯამში მოედანზე შენგელია მატჩის განმავლობაში აღარ გასულა.

რაც შეეხება შეხვედრის შედეგს, ЦСКА-მ დამაჯერებელი გამარჯვება მოიპოვა - 93:60. დროის იმ ხანმოკლე მონაკვეთში, რომელიც შენგელიამ პარკეტზე გაატარა, ქართველმა ფორვარდმა ორი ქულის აღება და ორი მოხსნის გაკეთება მოასწრო. საუკეთესო შედეგს კი გამარჯვებული გუნდის შემადგენლობაში მიაღწია მაიკ ჯეიმსმა, რომელმაც გუნდს 21 ქულა მოუტანა.

მომდევნო შეხვედრას VTB ლიგის ფარგლებში ЦСКА 26 სექტემბერს პერმის „ამკარის“ წინააღმდეგ გამართავს.

შენგელია ЦСКА-ში მიდმინარე წლის ივლისში გადავიდა ესპანური „ბასკონიიდან“, სადაც 2014 წლიდან თამაშობდა. გასულ სეზონზე მისი კლუბი ქვეყნის ჩემპიონი გახდა (პირველად 2010 წლის შემდეგ). 28 წლის ქართველ კალათბურთელს მოსკოვის ЦСКА-სთან სამწლიანი კონტრაქტი აქვს გაფორმებული.

42
თემები:
სპორტის ამბები (822)
ნიკოლოზ ბასილაშვილი

ბასილაშვილის კრიზისი გრძელდება: საქართველოს პირველი ჩოგანი ისევ დამარცხდა

133
(განახლებულია 20:02 22.09.2020)
კორონავირუსის პანდემიის გამო შეჩერებული საჩოგბურთო სეზონის განახლების შემდეგ ბასილაშვილმა შვიდი მატჩი წააგო ისე, რომ არც ერთი სეტი არ მოუგია.

თბილისი, 22 სექტემბერი – Sputnik. საქართველოს პირველმა ჩოგანმა ნიკოლოზ ბასილაშვილმა (33-ე ნომერი АТР-ს რეიტინგში) საჩოგბურთო სეზონის განახლების შემდეგ უკვე მეშვიდედ წააგო.

ჰამბურგის ტურნირის პირველივე წრეში (Hamburg European Open) ბასილაშვილი ესპანელ რობერტო ბაუტისტა-აგუტთან (11) ორ სეტში დამარცხდა. მატჩს საათ-ნახევარზე ნაკლები დრო დასჭირდა.

ქართველ ჩოგბურთელს ჰქონდა გარკვეული შანსები, თუმცა თავად მან მისცა ბაუტისტა-აგუტს ოთხი ბრეიკის გაკეთების საშუალება. ამან კი საბოლოოდ მისი დამარცხება გამოიწვია.

ბასილაშვილი ჰამბურგის ტურნირების ბოლო ორი წლის გამარჯვებული იყო. ამჯერად მან ვერ შეძლო თავისი ტიტულის დაცვა და 500 სარეიტინგო ქულა დაკარგა. ეს ნიშნავს, რომ АТР-ს განახლებულ რეიტინგში, რომელიც 28 სექტემბერს გამოქვეყნდება, ბასილაშვილი 33-ე ადგილიდან დაახლოებით მე-60 პოზიციაზე გადაინაცვლებს.

საჩოგბურთო სეზონის განახლების შემდეგ, რომელიც COVID-19-ის პანდემიის გამო იყო შეჩერებული, ბასილაშვილმა შვიდი მატჩი წააგო ისე, რომ არც ერთი სეტი არ მოუგია.

ბასილაშვილს ბრალი არ დამძიმებია: გენპროკურატურა ინფორმაციას უარყოფს>>

შეიძლება ითქვას, რომ ბასილაშვილის ასეთი უსახური თამაში ყოფილ მეუღლესთან დაკავშირებულ ვითარებას უკავშირდება. ნეკა დოროყაშვილი ბასილაშვილს ოჯახურ ძალადობაში ადანაშაულებს. ამ საკითხზე სასამართლო პროცესი მიმდინარეობს. ასეთ ვითარებაში სპორტსმენს, როგორც ჩანს, უჭირს ჩოგბურთზე კონცენტრირება.

133
თემები:
სპორტის ამბები (822)
ევროკავშირის შტაბბინა

გაუმართლებელია და შეუსაბამო: ევროკავშირი არ ცნობს რუსეთის სანქციებს

0
(განახლებულია 12:06 24.09.2020)
მანამდე რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ გაავრცელა ინფორმაცია, რომ რუსეთი აფართოებს შავ სიას ევროკავშირის მოქალაქეებისთვის

თბილისი, 24 სექტემბერი — Sputnik. ევროკავშირი არ ცნობს რუსეთის მიერ გამოცხადებულ საპასუხი სანქციებს და გაუმართლებლად მიიჩნევს მათ, განუცხადა სააგენტო РИА Новости–ს ევროკავშირის ოფიციალურმა წარმომადგენელმა პიტერ სტანომ.

შეგახსენებთ: რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ ოთხშაბათს გაავრცელა ინფორმაცია, რომ ბრიუსელის კონფრონტაციული ხაზის პასუხად, რუსეთი აფართოებს შავ სიას ევროკავშირის მოქალაქეებისთვის.

„ჩვენ უარვყოფთ რუსეთის მიერ გამოცხადებულ ამ საპასუხი სანქციებს ისევე, როგორც მის სხვა სანქციებს, კერძოდ, სოფლის მეურნეობის სექტორში, ვინაიდან ისინი გაუმართლებელია“, — განაცხადა სტანომ.

მისი განმარტებით, ევროკავშირის სანქციები რუსეთისა და მისი მოქალაქეების წინააღმდეგ, „არის მისამართიანი და შეესაბამება საერთაშორისო სამართალს“.

„[ევროკავშირის] სიაში შეყვანა ხდება მკაფიო კრიტერიუმებისა და იურიდიულად არგუმენტირებული მტკიცებულებების საფუძველზე“, — ხაზი გაუსვა პიტერ სტანომ.

ევროგაერთიანების წარმომადგენლის თქმით, ევროკავშირის სანქციები მიმართულია „გარკვეული ქცევების შეცვლისკენ“.

გარდა ამისა, სტანომ მოუწოდა რუსეთის საგარეო საქმეტა სამინისტროს, დააზუსტოს ამ სანქციების დაწესების მიზეზი და მათი იურიდიული საფუძველი.

 

0
თემები:
მსოფლიო დღეს