დავით კვაჭაძე

ძლიერები და წარმატებულები: საქართველოს საუკეთესო მოკრივეთა ხუთეული

175
(განახლებულია 20:34 22.07.2019)
ყოველწლიურად 22 ივლისს აღინიშნება ჯერ კიდევ სრულიად „ახალგაზრდა“ დღესასწაული – კრივის საერთაშორისო დღე. სპორტისადმი მიძღვნილი საერთაშორისო თარიღების ჩამონათვალს კრივის დღე 2017 წელს შეემატა.

მართალია, კრივის საერთაშორისო დღე ორიოდე წლის წინ დაწესდა, მაგრამ თავად სპორტის ეს სახეობა ჯერ კიდევ ჩვენ წელთაღრიცხვამდე არსებობდა.

ამ დღის პატივსაცემად „Sputnik-საქართველომ“ გადაწყვიტა, მკითხველს ყველაზე ცნობილი და წარმატებული ქართველი მოკრივეების შესახებ უამბოს.

დავით კვაჭაძე

დავით კვაჭაძე პირველი ქართველი მოკრივეა, რომელმაც ქვემძიმე წონით კატეგორიაში ევროპის ჩემპიონის ტიტული მოიპოვა.

იგი 1951 წელს თბილისში დაიბადა. ვარჯიში 1963 წელს დაიწყო, 1971 წელს სპორტულ საზოგადოება „ქარიშხალაში“ მოხვდა. ჩემპიონატებისთვის მზადებაში მას აქტიურად ეხმარებოდა ძმა როლანდ კვაჭაძე – მომავალში საქართველოს მოკრივეთა ნაკრების უფროსი მწვრთნელი. დავით კვაჭაძეს გამართული აქვს 180 ბრძოლა და აქედან მოგებული – 165.

ვლადიმერ ჭანტურია

2000 წლის ოლიმპიური თამაშების პრიზიორი ვლადიმერ ჭანტურია 1978 წელს ფოთში დაიბადა.

საერთაშორისო ასპარეზზე 1996 წლიდან გამოჩნდა. მსოფლიოს ახალგაზრდულ ჩემპიონატზე ჰავანაში 81 კგ წონით კატეგორიაში მესამე რაუნდში მსაჯის გადაწყვეტილების შედეგად დამარცხდა გერმანელ კოდორ ზახერთან. მომდევნო ტურნირზე უკვე 91 კგ წონით კატეგორიაში მონაწილეობდა, მაგრამ კვლავ წარუმატებლად. მოგვიანებით, რამდენიმე ბრძოლის მოგების შემდეგ, +91 კგ წონით კატეგორიაში ასპარეზობდა. 2006 წელს პროფესიონალურ კრივში გადავიდა და მძიმე წონით კატეგორიაში საქართველოს ჩემპიონის ტიტული მოიპოვა. ჭანტურიას პროფესიული კარიერის განმავლობაში გამართული 15 ბრძოლიდან მოგებული აქვს 13, აქედან 9 ნოკაუტით დასრულდა.

რამაზ ფალიანი

რამაზ ფალიანი – მსუბუქ წონით კატეგორიებში მოასპარეზე მოკრივეა. იგი 1973 წელს მესტიაში დაიბადა. კრივში აქტიურად ჩაება 13 წლის ასაკიდან. მისი ძმები, ზურაბი და შალვა ასევე წარმატებული მოკრივეები არიან.

მის გამარჯვებათა ნუსხა ვრცელია: სხვადასხვა დროს იგი ბრძოლებში მონაწილეობდა როგორც სსრკ-ის, დსთ-ის, საქართველოს, რუსეთისა და თურქეთის ნაკრებების წევრი. ფალიანი სამი ოლიმპიადის მონაწილე, 1992 წლის ბარსელონის ოლიმპიური თამაშების ბრინჯაოს მედალოსანი, 2001 წლის მსოფლიოს ჩემპიონი, ევროპის სამგზის ჩემპიონი, სხვადასხვა ეროვნული პირველობის გამარჯვებული და სპორტის დამსახურებული ოსტატია. პროფესიონალური კარიერის განმავლობაში ფალიანს 16-დან 14 ბრძოლა აქვს მოგებული, ნოკაუტით დასრულდა 8.

ავთანდილ ხურციძე

საშუალო წონით კატეგორიაში მოასპარეზე ავთანდილ ხურციძე 1979 წელს ქუთაისში დაიბადა. პროფესიონალური კარიერა 2002 წელს დაიწყო, ტექნიკური ნოკაუტით დაამარცხა თავისი თანამემამულე გიორგი ყანჩაველი.

ხურციძის ტიტულების სია საკმაოდ შთამბეჭდავია: იგი არის IBO (კრივის საერთაშორისო ორგანიზაცია) ვერსიით მსოფლიოს ჩემპიონი, WBO (მსოფლიო კრივის ორგანიზაცია) ვერსიით - მსოფლიოს დროებითი ჩემპიონი, WBC Silver (მსოფლიო კრივის საბჭო) – 2011 წელს და WBA Inter-Continental (მსოფლიო კრივის ასოციაცია) – 2008-2010 წლებში საშუალო წონით კატეგორიაში. პროფესიონალური კარიერის განმავლობაში მან 37 ბრძოლიდან 33 მოიგო, ნოკაუტით დაასრულა 22. 

2017 წლის დასაწყისში დანიშნული იყო ხურციძის ორთაბრძოლა მსოფლიოს ჩემპიონთან, ბრიტანელ ბილი ჯო სონდერსთან, მაგრამ მოვლენები არასასურველი მიმართულებით განვითარდა. ბრძოლა არ შედგა, ვინაიდან ქართველი მოკრივე აღმოჩნდა ორგანიზებულ დანაშაულთან კავშირში ეჭვმიტანილ იმ 33 მოქალაქეს შორის, რომლებიც აშშ-ში დააკავეს.

გიორგი კანდელაკი

გიორგი კანდელაკი 1974 წელს ვარიანში დაიბადა. კანდელაკი 1997 წლის მსოფლიოს ჩემპიონია +91 კგ წონით კატეგორიაში და 1993 წლის ევროპის ჩემპიონი 91 კგ წონით კატეგორიაში. ის არის ასევე 2002-2004 წლების მსოფლიოს ჩემპიონი WBU (მსოფლიო კრივის კავშირი) ვერსიით.

გიორგი კანდელაკმა კრივში ვარჯიში მამის ხელმძღვანელობით სოფელშივე დაიწყო. მაშინ კრივი მისი ოცნების სფერო არ ყოფილა, გატაცებული იყო თევზაობითა და ნადირობით. თუმცა მალე ვარჯიშებიდან სიამოვნების მიღება ისწავლა და ახალგაზრდულ შეჯიბრებებში გამარჯვებასაც არაერთხელ მიაღწია. საოცარია, მაგრამ პროფესიონალური კარიერის მანძილზე მას არც ერთი მარცხი არ განუცდია. სულ ჩატარებული აქვს 24 ორთაბრძოლა, აქედან ნოკაუტით დასრულებული – 18.

175
თემები:
საქართველოს სიამაყე (64)
თბილისის „დინამო

ცნობილია თბილისის „დინამოს“ მეტოქე უეფას ჩემპიონთა ლიგაში

50
(განახლებულია 18:40 09.08.2020)
უეფას ახალი რეგულაციებითა და ტურნირის შემცირებული რეგლამენტით, გამარჯვებული ერთი თამაშის შედეგით გამოვლინდება

თბილისი, 9 აგვისტო - Sputnik. თბილისის საფეხბურთო კლუბი „დინამო“ უეფას ჩემპიონთა ლიგის 2020/2021 წლის სეზონის პირველ საკვალიფიკაციო რაუნდში ალბანეთის „ტირანას“ შეხვდება. კენჭისყრა უეფას შტაბ–ბინაში – ნიონში გაიმართა.

მატჩი 18 ან 19 აგვისტოს თბილისში „დინამო არენაზე“ ჩატარდება.

უეფას ახალი რეგულაციებისა და ტურნირის შემცირებული რეგლამენტის თანახმად გამარჯვებული ერთი თამაშის შედეგით გამოვლინდება. თუ გამარჯვებული მატჩის ძირითად დროში ვერ გამოვლინდება, დაინიშნება 30–წუთიანი დამატებითი დრო. თუ ამის შემდეგაც ფრე ანგარიში იქნება, მაშინ გუნდის შემდეგ რაუნდში გადასვლას პენალტები გადაწყვეტს.

გუნდი, რომელიც უეფას ჩემპიონთა ლიგის პირველ საკვალიფიკაციო რაუნდში წააგებს, უეფას ევროპის ლიგის მეორე საკვალიფიკაციო რაუნდში მოხვდება.

უეფამ თარიღები დაადგინა: საქართველოს ფეხბურთის ნაკრების მატჩები უეფას ერთა ლიგაში – ცხრილი>>

ასევე უეფას რეკომენდაციების გათვალისწინებით, კორონავირუსის პანდემიის გამო ყველა მატჩი და მათ შორის, თბილისშიც, მაყურებლის გარეშე გაიმართება.

50
თემები:
სპორტის ამბები
ოდისეი დიმიტრიადი

რატომ ანდეს ოლიმპიადა-80-ის მუსიკალური გაფორმება ქართველ დირიჟორს

118
(განახლებულია 15:17 05.08.2020)
ოლიმპიადა-80-ის მთავარი დირიჟორის ოდისეი დიმიტრიადის ქალიშვილი „Sputnik-საქართველოს“ მამის რთულ ბედსა და ოლიმპიური თამაშების მუსიკალურ გაფორმებაში შეტანილი წვლილის შესახებ ესაუბრა.

საბჭოთა კავშირი ოლიმპიადისთვის ისე ემზადებოდა, როგორც პლანეტარული მასშტაბის ღონისძიებისთვის. თამაშების დახურვა, ისევე, როგორც გახსნა, გრანდიოზული და დასამახსოვრებელი უნდა ყოფილიყო. ოლიმპიური ჰიტების დასაწერად პახმუტოვა და დობრონრავოვი მიიწვიეს, ხოლო მუსიკალური არანჟირება თბილისის ოპერისა და ბალეტის თეატრის მთავარ დირიჟორს ოდისეი დიმიტრიადის მიანდეს.  

Одиссей Димитриад с дочерью Наной
photo: courtesy of Nana Dimitriadi
ოდისეი დიმიტრიადი ქალიშვილთან, ნანასთან ერთად

საგზური ცხოვრებაში

ოდისეი დიმიტრიადი 1908 წლის 7 ივლისს დაიბადა ბათუმის საქალაქო საბჭოს წევრის აქილეს დიმიტრიადის მრავალშვილიან ოჯახში. მუსიკისადმი ნიჭი ბიჭს ჯერ კიდევ ადრეულ ასაკში გამოუვლინდა. ამიტომ, როგორც კი წამოიზარდა, მუსიკალურ სასწავლებელში გაამწესეს, სადაც მას სიმღერასა და ფორტეპიანოზე დაკვრას ასწავლიდნენ.

მაგრამ ახალმა, საბჭოთა ხელისუფლებამ აქილეს დიმიტრიადის ქონება ჩამოართვა და ხმის უფლებაც ჩამოართვა. ახალი დროის კანონების მიხედვით კი ასეთი ადამიანების შვილებს უმაღლესი განათლების მიღების უფლება არ ჰქონდათ. ამიტომ, მამის რჩევით, გიმნაზიის დამთავრების შემდეგ, 1925 წლის ზაფხულში ოდისეი თავის უფროს ძმასთან წავიდა სოხუმში, რომელიც იქ სახელმწიფო სამსახურში მსახურობდა. ოდისეის ერთი წლის განმავლობაში უნდა ეცხოვრა იქ, რათა კონსერვატორიაში ჩაბარების შემთხვევაში წარედგინა საბუთი, რომ ძმის კმაყოფაზე ცხოვრობდა.

Одиссей Димитриади с первой супругой Надежой Харадзе, 1929 год.
photo: courtesy of Nana Dimitriadi
ოდისეი დიმიტრიადი და ნადეჟდა ხარაძე

ერთი წლის შემდეგ ოდისეიმ ტფილისის კონსერვატორიის თეორიულ-საკომპოზიციო განყოფილებაზე ჩააბარა. სწავლის პერიოდში მან ვოკალური განყოფილების სტუდენტი, მომავალი საოპერო მომღერალი ნადეჟდა ხარაძე გაიცნო. ახალგაზრდებს ერთმანეთი შეუყვარდათ და მაშინვე დაქორწინდნენ, თუმცა რამდენიმე წლის შემდეგ დაშორდნენ.

ოდისეი დიმიტრიადის ქალიშვილი, თბილისის კონსერვატორიის პროფესორი ნანა დიმიტრიადი იხსენებს:

„მამა პირველად ხუთი წლისამ გავიცანი. ის და დედა განქორწინებული იყვნენ. ბებიაჩემი კი, დედაჩემის დედა მასწავლიდა, როცა მამაშენი მოვა, უთხარი, რომ მაწანწალააო. და, აი, მამაც მოვიდა. ხელში ამიყვანა. მე კი ძლივს გასაგებად, მორცხვად აღმომხდა ეს სიტყვა ― „მაწანწალა“. მამამ, რა თქმა უნდა, გამიღიმა და ჩამეხუტა. აქედან დაიწყო ჩვენი მეგობრობა. არც დები და არც ძმები მე არ მყავდა. მაგრამ ჩემი ნახევარძმები სწორედ ასე აღვიქვი. ჩვენ ძალიან ახლო ურთიერთობა გვქონდა. დეიდა ლიზასთანაც (ოდისეის მეორე ცოლი) ვმეგობრობდი, ერთმანეთს ხშირად საიდუმლოებებსაც ვანდობდით. მამა ძალიან მიმზიდველი და მომხიბვლელი მამაკაცი იყო და ყოველთვის იპყრობდა ქალების ყურადღებას. დეიდა ლიზას კი ეს გულს ტკენდა (იცინის). 

მამა დიდი პატრიოტი იყო. მან ჩემს ძმებს ბერძნული სახელები დაარქვა, მაგრამ დედაჩემმა არ მისცა მას ჩემთვისაც  ტრადიციული ბერძნული სახელის დარქმევის უფლება. უთხრა, ბავშვს დედა ქართველი ჰყავს, ამიტომ სახელიც ქართული ექნებაო. ის კი არა, დედას სურდა, რომ მის გვარზე გადავსულიყავი. მაგრამ მამამისმა, ჩემმა ბაბუამ ამის გაკეთების საშუალება არ მისცა – არავითარ შემთხვევაში, გოგონამ მამის გვარი უნდა ატაროსო, უთხრა. თუმცა, მიუხედავად გვარისა და ფესვებისა, სამიდან არც ერთმა ჩვენგანმა არ იცოდა ბერძნული“.

ოდისეი დიმიტრიადის პირველი გამოსვლა თბილისის ოპერისა და ბალეტის თეატრში 1937-ში გაიმართა. ის ოპერა „ევგენი ონეგინს“ დირიჟორობდა. წარმატება იმდენად გამაოგნებელი იყო, რომ ოპერისა და ბალეტის მთავარმა დირიჟორმა ევგენი მიქელაძემ ოდისეი თბილისში სამუშაოდ მიიწვია. და ისიც დათანხმდა. ვერც კი წარმოიდგენდა, რომ რამდენიმე თვეში მიქელაძეს დააპატიმრებდნენ და დახვრეტდნენ. მომხდარის შემდეგ დიმიტრიადი გამუდმებით ელოდებოდა, რომ მის წასაყვანადაც მივიდოდნენ, მაგრამ გადარჩა ― არ მივიდნენ.  

Дирижер Одиссей Димитриади
© photo: Sputnik /
ოდისეი დიმიტრიადი

მერე კი ომი დაიწყო. ომის დასასრულს ის საქართველოს სსრკ-ის სიმფონიური ორკესტრის მთავარ დირიჟორად და სამხატვრო ხელმძღვანლად დანიშნეს. 1952 წელს კი ის ოპერის თეატრის მთავარი დირიჟორი გახდა.

ნანა დიმიტრიადი: „ერთხელაც თბილისში მამაჩემის მეგობარი და დიდი მუსიკოსი მელიქ-ფაშაევი ჩამოვიდა მოსკოვიდან. მან მამას მოუსმინა და თქვა, რომ ოდისეის ნიჭს სხვა მასშტაბები სჭირდებოდა. მანაც რჩევა ყურად იღო და მოსკოვში გაემგზავრა.

იქ დიდი წარმატებით გამოვიდა. მოვიდა დიდ თეატრში მუშაობის დაწყების შესახებ განცხადების დაწერის დროც. ანკეტა, რომელიც დირიჟორს უნდა შეევსო, შეიცავდა კითხვებს ნათესავების შესახებაც. ოდისეიმ ყველაფერი დაწერა ისე, როგორც იყო ― რომ მისი ყველა ნათესავი საბერძნეთში ცხოვრობდა. სულ ერთია, მაინც ყველაფერს გაიგებენო, ფიქრობდა მუსიკოსი. გავიდა დრო, მაგრამ პასუხი არა და არ აღირსეს“.

ყველაფერი „ხალხთა ბელადის“ გარდაცვალების შემდეგ შეიცვალა. ოდისეის დიმიტრიადის დიდ თეატრში დაუძახეს. შემდეგ იყო მუშაობა, გასტროლები სხვადასხვა ქვეყნებში დიდი თეატრის წამყვანი დირიჟორის სტატუსით. 

ნანა დიმიტრიადი: „მექსიკაში ყოფნის დროს ტრაგედია დაატყდა თავს ― დაიღუპა ოდისეის ვაჟი. პარისი 25 წლის იყო. მეგობრებთან ერთად ქუჩაში მიდიოდა ღამით, მღეროდნენ. ცუდი მხედველობა ჰქონდა და გზაზე შემომსაზღვრელი ლენტი ვერ შენიშნა. გადააბიჯა მას, ფეხი მიწაყრილში ჩაეფლო და თან ჩაიტანა. პარისმა ხელები ზემოთ ასწია ― შეეშინდა, რომ ხელები არ დაზიანებოდა, ის ხომ ძალიან ნიჭიერი პიანისტი იყო. ამ დროს მან ძლიერ დაიზიანა თირკმლები და 12 დღეში გარდაიცვალა. პარისის სიკვდილი მამამ ძალიან მძიმედ გადაიტანა. მწუხარების გაქარვებაში მას საყვარელი მუსიკა ეხმარებოდა“.

„კარმენი“ და ოლიმპიადა

70-იანი წლების დასაწყისში საქართველოს სსრ-ის კულტურის მინისტრმა, კომპოზიტორმა ოთარ თაქთაქიშვილმა ოდისეი დიმიტრიადი ოპერისა და ბალეტის თეატრის ხელმძღვანლად მიიწვია.

ნანა დიმიტრიადი: „ვერ შეეგუა მამა მოსკოვს, მიუხედავად იმისა, რომ იქ წასვლით მან დიდ პროფესიონალურ ზრდას მიაღწია. ის მეტისმეტად მიჯაჭვული იყო საქართველოს, მის გარეშე არ შეეძლო. ყოველთვის მზად იყო საქართველოში დასაბრუნებლად, რაც უნდა მაცდური ყოფილიყო სამუშაო ნებისმიერ სხვა ქალაქში“.

მერე, 1980 წელს ოდისეი დიმიტრიადი ოლიმპიადა-80-ის მთავარ დირიჟორად დანიშნეს.

ნანა დიმიტრიადი: „მე და მამა არასდროს ვსაუბრობდით ოლიმპიადაზე. ის ხომ შემოქმედებითი ადამიანი გახლდათ, ოლიმპიადა კი მისთვის ცოტა კონიუნქტურული ღონისძიება იყო. მთავარ დირიჟორად მიწვევას სხვა მიზეზიც ჰქონდა ― აბა, მოუსმინეთ: საზაფხულო ოლიმპიური თამაშების გახსნისა და დახურვის მთავარი დირიჟორი ოდისეი აქილესის ძე დიმიტრიადი! ოლიმპიადას ბერძენი დირიჟორობდა...

ვხუმრობ, რა თქმა უნდა. მამა მარტო მისი ბერძნული წარმოშობის გამო კი არ მიიწვიეს, არამედ იმის გამო, რომ ის დიდი პროფესიონალი იყო ― ძალიან მრავალმხრივი მუსიკოსი, ფენომენალური მახსოვრობით. ახსოვდა ყველა ის ოპერეტა, რომელსაც ბავშვობაში ბათუმში უსმენდა. ამიტომ ის ხშირად აწყობდა ვალსისა და ოპერეტის საღამოებს“...

ოდისეი დიმიტრიადი 2005 წელს გარდაიცვალა. ის მთელი ცხოვრების განმავლობაში ემსახურებოდა ხელოვნებას და, რაც უნდა რთული ყოფილიყო არჩევანი, ის ყოველთვის მუსიკის სასარგებლოდ აკეთებდა მას. უბრალოდ იმიტომ, რომ მუსიკა თავდავიწყებით უყვარდა და სხვაგვარად არ შეეძლო.

118
თემები:
ოლიმპიადა 1980
იოდი

იოდის ბადე მარტივი, იაფი და ეფექტური

0
(განახლებულია 15:21 09.08.2020)
იოდის ბადე მრავალი დაავადების განკურნებაში გვეხმარება. მისი გაკეთება მარტივია, იაფიც გვიჯდება და თან - შედეგიც ეფექტურია. ამისთვის მხოლოდ იოდი და ბამბის ჩხირებია საჭირო.

იოდი ძირითადად გამოიყენება ჭრილობების, ნაკაწრების, ანთების, დაზიანებების, ორგანიზმში იოდის ნაკლებობის დროს.

რატომ მაინც და მაინც ბადე?

იოდის ბადე ბაქტერიებს ერთმანეთისგან აცალკევებს და ასეთ მდგომარეობაში ისინი უფრო სწრაფად იხოცებიან.

იოდი არა მარტო ხოცავს ბაქტერიებს, არამედ ის ჩვენი ორგანიზმისთვის აუცილებელ ელემენტს წარმოადგენს — თუნდაც მიკროსკოპული დოზით. ის პირდაპირ აგებს პასუხს ჩვენი ფარისებრი ჯირკვლის მუშაობაზე. იოდი საკმარისი რაოდენობით უნდა იყოს ორსული ქალის ორგანიზმში, რათა ბავშვი ნორმალურად განვითარდეს.

იოდის ბადე ორგანიზმში იოდის დონის იდენტიფიცირების საშუალებას იძლევა. ამისთვის ჩაატარეთ ცდა: გაიკეთეთ იოდის ბადე ფეხის შიდა მხარეს, შემდეგ დააკვირდით — თუ ორგანიზმმა ბადე 4 საათზე ნაკლებ დროში შეიწოვა, ეს ნიშნავს, რომ სერიოზული პრობლემა გაქვთ; თუ ამას ხუთი და მეტი საათი მოუნდა, ორგანიზმს იოდის უკმარისობა აქვს და მისი კომპენსირებაა საჭირო.

ნახეთქები ქუსლზე: მიზეზები და მოშორების ხერხები>>

იოდის მიღება საკვების მეშვეობით შეიძლება. მას შეიცავს ზღვის კომბოსტო, იოდირებული მარილი, თევზის ცხიმი და, ზოგადად, ზღვის პროდუქტები, ასევე კომბოსტო, ბანანი, ლიმონი, ყურძენი, ტკბილი წიწაკა.

თუ ბადე 24 საათი არ შეიწოვა, ე.ი. იოდის ნორმალური შემცველობა გაქვთ.

იოდის ბადე ასევე შველის ხველებას, მაგრამ იოდით მკურნალობა მაშინ შეიძლება, თუ სხეულის ტემპერატურა 38 გრადუსს არ აღემატება. ბადე პირდაპირ ყელზე ან მკერდზე გაიკეთეთ, თუმცა, უცბად არა — შეამოწმეთ, რომ კანზე რაიმე ალერგიული რეაქცია არ გაჩნდეს (დაელოდეთ დაახლოებით 10-15 წუთი).

იოდის ბადე ეხმარება სურდოსაც — ცხვირზე წვრილი ბადე გაიკეთეთ.

გაციებისას ასევე შველის ბადის გაკეთება ფეხის კანჭსა და ტერფზე. გაფრთხილდით — იოდმა შეიძლება კანი დაწვას.

დაზიანებისას იოდის ბადე მაშინვე არ უნდა გაიკეთოთ — მხოლოდ 24 საათის შემდეგ, რაც დაზიანებულ ადგილზე დაიდებთ კომპრესს; როდესაც შეშუპება დაცხრება, შეგიძლიათ გაიკეთოთ იოდის ბადე.

ფეხის აბაზანა სულ ორი ინგრედიენტისგან და საოცარი შედეგი>>

იოდის ბადე ფართოდ გამოიყენება კისრის, ბეჭების, წელის ტკივილისას.

ამგვარად, იოდის ბადე მრავალმხრივ შეიძლება გამოვიყენოთ. თანაც, ეს ძალიან იაფი და მოსახერხებელია.

0
თემები:
სასარგებლო რჩევები