თბილისი, 14 ივლისი – Sputnik. ქართველი ძიუდოისტი ტატო გრიგალაშვილი ბუდაპეშტის გრან-პრის გამარჯვებულია.
81 კილოგრამამდე წონით კატეგორიაში გამართული შეჯიბრების ფინალში გრიგალაშვილმა ბრაზილიელ ჟოაო მაკედას იპონით სუფთად მოუგო.
გრიგალაშვილისთვის, რომელიც მსოფლიო რეიტინგზე 35-ე ადგილს იკავებს, ბუდაპეშტში მიღწეული გამარჯვება გრან-პრის სერიის ტურნირებზე პირველი გახდა. მანამდე მან ორჯერ მოიპოვა ბრინჯაო - ანტალიის გრან-პრიზე (2018) და თბილისის გრან-პრიზე (2019).
საქართველოს ნაკრებისთვის ამჟამინდელ გრან-პრიზე ეს მედალი პირველი გახდა.
შეჯიბრების დასკვნით დღეს, დღეს მედლებისთვის ბრძოლაში ჩაერთვება კიდევ ხუთი ქართველი ძიუდოისტი - ბექა ღვინიაშვილი და ავთო ჭრიკიშვილი (ორივე _90 კგ), გიორგი ბერიაშვილი (-100 კგ), გელა ზაალიშვილი და ონისე ბეგაძე (ორივე +100 კგ).
აღსანიშნავია, რომ საქართველოს ვაჟთა ნაკრები ბუდაპეშტში სრული შემადგენლობით არ არის წარმოდგენილი. მინსკში მეორე ევროპულ თამაშებში მონაწილე ძიუდოისტების უმრავლესობამ დამატებითი დასვენება დაიმსახურა.