თბილისი, 27 ივნისი – Sputnik. საქართველოს ნაკრების თავისუფალი სტილით მოჭიდავეებმა გივი მაჭარაშვილმა და ავთანდილ კენჭაძემ მინსკის მეორე ევროპულ თამაშებზე შეჯიბრების მეხუთე დღეს საქართველოს ნაკრებს კიდევ ორი მედალი მოუტანეს.
მაჭარაშვილი 125 კილოგრამამდე წონით კატეგორიაში ვიცე-ჩემპიონი გახდა. მან ფინალური ორთაბრძოლა რუსეთის წარმომადგენელ ანზორ ხიზრიევთან წააგო – 2:8.
ავთანდილ კენჭაძე კი ბრინჯაოს პრიზიორი გახდა 74 კილოგრამამდე წონით კატეგორიაში. მესამე ადგილისთვის ბრძოლაში მან ბელარუსის წარმომადგენელი აზამატ ნურიკაუ დაამარცხა – 8:5.
შეჯიბრების მეხუთე დღის შემდეგ საქართველოს ნარების აქტივშია 22 მედალი - 6 ოქრო, 6 ვერცხლი და 10 ბრინჯაო. ამ შედეგებით ქართული ნაკრები საერთო გუნდურ ჩათვლაში მესამე ადგილზეა.
თამაშების ლიდერია რუსეთი – მას 63 მედალი აქვს (28–15–20). მეორე ადგილზეა ბელარუსის ნაკრები 45 მედლით (15-11-19).
შეჯიბრების მეექვსე დღეს, 27 ივნისს ქართველი სპორტსმენები იასპარეზებენ ჭიდაობასა და ნიჩბოსნობაში.
