თბილისი, 21 თებერვალი — Sputnik. საქართველო სპორტის ზამთრის ერთ-ერთ სახეობაში მსოფლიო ჩემპიონატის ჩატარებაზე განაცხადის შეტანას გეგმავს, განაცხადა ქვეყნის პრემიერ-მინისტრმა გიორგი კვირიკაშვილმა მთავრობის სხდომაზე.
ამ დღეებში კვირიკაშვილი შვეიცარიაში იმყოფებოდა, სადაც სათხილამურო სპორტის საერთაშორისო ოლიმპიური კომიტეტისა და საერთაშორისო ფედერაციის პრეზიდენტებს შეხვდა.
„საუბარი გვქონდა ზამთრის რომელიმე სახეობაში საქართველოში მსოფლიო ჩემპიონატის ჩატარებაზე. ამას სჭირდება მომზადება და უკვე გამოკვეთილია ქვეყნები რამდენიმე წლის განმავლობაში. დაახლოებით ხუთწლიან პერსპექტივაში, არ არის გამორიცხული, შევიტანოთ განაცხადი და წარმატებით მივიღოთ მსოფლიო ჩემპიონატის ფინალური ტურნირის საქართველოში ჩატარების უფლება რომელიმე სახეობაში, შეიძლება ეს იყოს ფრისტაილი, სნოუბორდი და ა.შ.“ — განაცხადა კვირიკაშვილმა.
პრემიერი დარწმუნებულია, რომ ეს მიმართულება ქვეყანაში ინვესტიციების მოზიდვისთვის მნიშვნელოვანი ბიძგი იქნება.
