თბილისი, 14 თებერვალი — Sputnik. ქართველმა მოჭადრაკე ნანა ძაგნიძემ თეირანის გრან-პრის მესამე ტურში ინდოელ ხამპი კონერუსთან პარტია ყაიმით დაასრულა, იუწყება ფიდეს ოფიციალური ვებგვერდი.
სპეციალისტების აზრით, ტურნირზე მსოფლიო რეიტინგის ლიდერის, ჩინელი ხოუ იფანის არყოფნის გამო, ამჟამინდელი გრან-პრის მთავარი ფავორიტი სწორედ კონერუა.
ამგვარად, სამი სათამაშო დღის შემდეგ ძაგნიძის აქტივშია ორი ქულა. სატურნირო ცხრილში ნატალია პოგონინა ლიდერობს, შემდეგ ადგილზეა ძაგნიძე. რუსი მოჭადრაკის ანგარიშზე 2,5 ქულაა.
საქართველოს კიდევ ერთმა წარმომადგენელმა, რომელიც თეირანში ასპარეზობს — ნინო ბაციაშვილმა საანგარიშო ტურში ჩინელ ჟაო ქსიუსთან წააგო.
მეოთხე ტურში ძაგნიძე ანტოანეტა სტეფანოვას (ბულგარეთი) დაუპირისპირდება, ხოლო ბაციაშვილი — ტურნირის ლიდერს — ნატალია პოგონინას.
თეირანის გრან-პრიზე 12 მოჭადრაკე მონაწილეობს. ტურნირი 23 თებერვალს დასრულდება. გამარჯვებული 10 ათას აშშ დოლარსა და 160 სარეიტინგო ქულას მიიღებს.
მიმდინარე წელს გრან-პრის ფარგლებში კიდევ ორი ტურნირი — თბილისსა (მაისში) და ჩენდუში (ჩინეთი, ივლისი) გაიმართება.
