თბილისი, 23 ივნისი — Sputnik. უეფამ ვებ გვერდ biletebi.ge-ს 48 საათიანი ვადა მისცა ყველა პრობლემის მოსაგვარებლად. ამის შესახებ ჟურნალისტებს საქართველოს ფეხბურთის ფედერაციის პრეზიდენტმა ზვიად სიჭინავამ სამშაბათს, 23 ივნისს განუცხადა.
„შემდეგი კონსულტაცია უეფას წარმომადგენლებთან 25 ივნისს თბილისის დროით 17:30 საათზე გაიმართება და მაშინ გაირკვევა შეძლებს თუ არა biletebi.ge გადაჭრას ეს პრობლემა. შესაბამისად, ამ დროის განმავლობაში „ბარსელონასა“ და „სევილიას“ შორის უეფას სუპერ თასის 11 აგვისტოს თბილისში დაგეგმილ მატჩზე ბილეთები არ გაიყიდება“- განაცხადა სიჭინავამ.
სფფ-ს პრეზიდენტმა აღნიშნა, რომ იმ შემთხვევაში თუ გაყიდვის პრობლემა ვერ გადაიჭრა, ფედერაცია და უეფა „ბე“ გეგმაზე გადადიან. ამ გეგმის არსი საქართველოს ფეხბურთის ფედერაციის პრეზიდენტს არ დაუკონკრეტებია.
ბილეთები უეფას სუპერ-თასის მატჩზე ონლაინ გაყიდვაში 22 ივნისს დილის 9 საათზე გვერდ biletebi.ge-ზე უნდა გასულიყო. მაგრამ მსურველთა ძალიან დიდი ნაკადის გამო, გვერდის სერვერმა ვერ გაუძლო და მოიშალა.
